Mapanirang Pag-ibig

Matapos aksidenteng mapatay ng mga kaaway ng mga Palmer ang aking mga magulang, ang lalaking kapit-bahay namin ang naging heir ng mga Palmer at kinupkop ako.

Sa loob ng sampung taon, pinahirapan at kinontrol niya ako, pinilit niya akong pakasalan siya gamit ang karamdaman ng aking lola bilang kaniyang alas.

Dalawang buwan ang nakalipas, nayamot na siya sa masama kong pag-uugali at nakahanap siya ng babaeng halos kamukhang-kamukha ko, at sinimulang iparada ang kanilang pagmamahalan sa harap ko.

Nagpadala siya sa akin ng 'di mabilang na mga intimate photos, umaasa na magseselos ako. Tiningnan ko ang mga ito, hindi nagsalita, at sa halip ay kinuha ko ang aking paintbrush na puno ng iba’t ibang kulay at pinuno ko ng mga sunflower ang mga dingding.

Ngayon, halos natakpan na ng mga sunflower ang lahat ng pader ng villa, at malapit nang ma-discharge ang lola ko mula sa ospital. Nangako si Felix Palmer na papayagan niya akong makita siya kapag nakalabas na.

Magaan ang pakiramdam ko at kumakanta-kanta pa ako, nang bigla akong makarinig ng mga boses sa labas.

"Palagi siyang pumupunta dito tuwing gabi. Ngayon, sosorpresahin ko siya para makuha ko ang loob niya!"

Sumang-ayon naman ang iba, "Darcy, pag ikaw na ang naging misis ng CEO, huwag mo kaming kalimutan!"

Nagmamadali akong lumabas, gustong balaan silang umalis kaagad. Bawal kasi ang sinuman dito ayon kay Felix. Minsan, sinubukan kong tumakas sa pamamagitan ng paghingi ng tulong sa isang taong dumadaan, ngunit binugbog ito ni Felix. Simula noon, ikinulong niya ako sa liblib na villa na ito sa labas ng siyudad.

Isang tagapagsilbi lang na tapat sa kanya ang inatasang mag-alaga sa akin, si Mona. Walang ibang taong tutulong sa akin at wala akong paraan para makatakas.

Ngunit paglabas ko ng pinto, bumungad agad sa akin ang isang babaeng halos kamukhang-kamukha ko at tila huminto ang oras.

Mula sa ayos ng kanyang buhok hanggang sa kanyang mukha at sa suot niyang puting dress, nakagugulat ang pagkakahawig namin. Siya si Darcy Sherman, ang bagong kasintahan ni Felix—hindi biro ang paghahanap ng kamukha ko.

Natigilan si Darcy sandali, tapos biglang napalitan ng galit ang saya sa mukha niya. Itinaas niya ang kamay niya at sinampal ako.

"Anong ginagawa mo rito? Ang lakas ng loob mong pumasok sa villa ng boyfriend ko! Ang kapal din ng mukha mo!"

Bago pa ako makapagsalita, marahas niya akong sinabunutan at hinatak ako papunta sa hardin na puno ng mga sunflower.

"Hangal ka, ginaya mo pa ang itsura ko para makapasok sa villa ng boyfriend ko! Mukhang pinaghandaan mo talaga! Nanonood ka sa amin, ano? Pinag-aralan mo kami para mapalapit ka sa kanya! At hindi ka lang nagpagawa ng mukha, natutunan mo pa ang pagpipinta ko. Napaka-pathetic! Gusto mo ata talagang mapahamak! Kung hindi pa ako pumunta ngayon, baka nakalusot ka na!"

Dumadampi sa lupa ang mga tuhod at braso ko, punit-punit at kumikirot na parang tinutusok ng karayom. Wala si Mona, at nag-iisa lang ako. Wala akong laban sa pisikalang away.

Nagpaliwanag ako agad, "Ako ang legal na asawa ni Felix. Kung ayaw mong maniwala, tatawagan ko siya."

Pero pagkuha ko pa lang ng cellphone, agad na inagaw iyon ni Darcy.

Hawak niya ang kamay ko habang ini-unlock ang cellphone. Nakita niya ang numero na nakasulat bilang "Honey" at bigla siyang tumawa.

"Sinasabi mong ito ang numero ng boyfriend ko? Ha! Eh, kanino naman itong isa?"