#11:

Mabilis na naiwasan ni Kent ang sumalubong sa kanyang lumilipad na plorera ng makapasok siya sa malaking pinto ng mansyon.

Seryoso.

Walang ibang emosyon na tumingin pa siya sa plorera na nabasag. Kung hindi siya magkakamali ay nagkakahalaga iyon ng mahigit kalahating milyon ngunit ibinato lamang sa kanya ng kanyang ama.

Nagpakawala siya ng malalim na paghinga bago nagpatuloy sa paghakbang papasok. Naabutan nga niya sa loob ang kanyang ama na nakaupo sa malaki at pang isahang sofa.

Habang sa malaking sofa ay nandoon ang kanyang kapatid at hipag. At ang anak nilang si Richard na nakaupo pa mismo sa gitna nilang mag asawa.

Mas lumalim ang naging tingin ni Kent ng mapatingin sa tatlo na kahit hindi magsalita ang mga ito ay alam niya na minumura na siya sa kaibuturan nila.

"Kadarating mo lang pero hindi mo man lang pinahalagaan ang kasal ng iyong pamangkin," pasigaw at may galit na sabi ng kanyang ama.

Si Clent Evans.

"Mmm." Tanging naging tugon niya.