CHAPTER 1

“Scar, mamaya ka pa ba diyan? Bilisan mo naman!” sigaw sa akin ng aking kaibigang si Diane.

“Oo, oo, inaayos ko lang mga gamit ko at dadaanan na lang daw ni Mama dito mamaya!” sigaw ko pabalik sa kanya habang inaayos ang aking mga gamit.

“Sige at papunta na raw si Shane,” sagot pa nito sa akin.

Hindi na ako nagsalita pa. Tumingin ako sa salamin at naglagay ng lipstick sa aking labi. Ang totoo niyan ay tapos na akong mag-ayos ng aking gamit, inaayos ko na lang ang aking mukha.

Dahil ngayon ay huling araw ng aking trabaho dito sa malaking karinderya ng aking tiya at bukas naman ay unang araw ng aking practicum bilang isang pre-service teacher, kaya napag-usapan naming magkakaibigan ang bar bago sumugod sa laban. Char. Para sa amin, isang malaking laban ang practicum kaya naniniwala kami na deserve namin ito.

Tumingin ako sa salamin at inayos ko ang aking suot dahil nakapagbihis naman na ako at naihubad na ang aking uniporme dito sa trabaho. Ngumiti ako nang malaki at agad na lumapit sa aking gamit.

Nakita ko sa ibabaw ng aking uniporme ang aking name tag.

‘Quinn Scarlett Laurent,’ hindi ko mapigilang mapangiti dahil bukas ay may isusuot pa rin akong name tag, ngunit hindi na bilang worker kung hindi bilang isang pre-service teacher na. Malapit ko nang maabot ang aking pangarap at maiahon sa hirap ang aking ina na solong nagpapaaral sa aming dalawa ng kapatid ko.

“Oh, Scar, nandito ka pa pala? Sige na, umalis ka na. Ako na ang bahala diyan,” sabi ng aking tiya mula sa aking likod.

“Sige, Tiya, dadaanan naman po ni Mama yung mga gamit ko mayamaya pagkagaling niya sa palengke,” sagot ko sa kanya at isinukbit ang aking shoulder bag na sinadya ko pang dalhin.

“Talaga naman, 24 years old na ay nakaasa pa sa ina, tsk tsk,” natawa na lang ako sa sinabi nito.

Alam ko namang biro lang ito para sa aking tiya. Mabait ito at maalaga sa amin nila Mama. Sa katunayan ay ang ginagamit ni Mama na puwesto sa palengke ay sa kanya. Pinapagamit niya ito nang libre sa amin kaya nakapagtitinda si Mama ng mga seafood.

“Tiya, ako’y gagala. Kapag ako’y umuwi pa sa bahay, siguradong hahabol sa ’kin si Bunso,” natatawang sabi ko sa kanya.

“Oo na, siya, sige na. Ikaw ay humayo at—” tumigil ito bago ako tinaasan ng kilay, “Subukan mo magparami! Grumaduate ka muna bago mag-asawa ha!”

“Si Tiya talaga!” nasabi ko na lang at saka ako nakangiting lumabas ng silid.

Agad kong nakita ang aking kaibigan na si Diane na abalang naglalagay ng blush on. Tumingin ako sa malaking orasan na narito sa karinderya.

It’s already 5 in the afternoon at bago magpunta sa bar, we will go to Miza’s apartment.

“Let’s go?” sabi ko kay Diane.

“Tara,” at saka nito kinuha ang kanyang bag at tumayo na.

“Nasaan na pala si Shane?” tanong ko sa kanya habang naglalakad kami patungo sa sakayan.

“Katagalan mo, pinadiretso ko na doon kay Miza,” sagot nito sa akin.

“Ito naman, nagbihis pa ako siyempre,” sabi ko sa kanya. “First time kong pupunta, gusto mo ba mukha akong basahan, baka hindi ako papasukin at mapagkamalan akong pulubi.”

“Oa mo naman, ’te, sa pulubi. Siguro homeless, puwede,” nang-aasar na sabi niya.

“Hindi ba iisa ’yon?” tanong ko sa kanya.

Napatawa naman siya. “Awan sa’yo, ’te, ayan na ang jeep, sumakay ka na.”

Sinimangutan ko siya bago ako sumakay sa e-jeep at agad naman siyang sumunod.

Tahimik lang ang naging biyahe namin. Maya-maya ay tumigil ang e-jeep sa tapat ng isang eskuwelahan.

“Dito tayo ide-deploy bukas, ’di ba?” tanong sa akin ni Diane.

“Yes,” maiksing sagot ko. “Sana mabait ang mapuntahan kong cooperating teacher.”

“Akin sana pogi tapos hot, katulad nung mga nababasa ko sa kuwento,” kinikilig-kilig na sabi ni Diane at may pagyakap-yakap pa sa braso ko.

Inirapan ko agad siya. “Nand’on tayo para mag-aral, hindi para kumiri.”

“Sinasabi mo lang ’yan kasi ’di mo pa nararansanang ma-in love,” natatawang sabi niya sa akin. “Kapag naranasan mo na ang tusok ng pana ni Kupido, ewan ko na lang sa’yo.”