Chapter 57

Mahigpit kong hinawakan ang strap ng suot kong backpack habang matamang nakatitig sa gate ng bahay nina Troy. Kung kanina ay desidido ako na pumunta sa kanila at makita siya, ngayon naman ay nagdadalawang-isip na ako.

“Miss Louise?”

Bigla akong natauhan nang marinig ko ang boses ng isa nilang kasambahay. Nang makita ako nito ay agad nitong binuksan ang gate.

“Bakit ho narito kayo sa labas? Kanina pa po ba kayo?” nag-aalalang tanong nito.

Umiling naman ako.

“Hindi po, kararating ko lang.”

Hindi ako mahilig magsinungaling, pero ngayon ay nagawa ko. Pinapasok ako nito agad. Naging marahan lang ang paglalakad ko. At bawat hakbang ko ay napapalunok ako. Alam kong hiniling sa akin ni Riye na bumalik dito at samahan ang kuya niya. Pero ilang araw na ang lumilipas ngayon lang ako nakapagdesisyon tungkol sa bagay na ito.

Ilanga raw kong pinag-isipang mabuti kung kaya ko na bang harapin si Troy.