Chapter 37

*MATURE CONTENT

Napagpasyahan kong sa bahay na patuluyin si Mateo. Natatakot kasi akong baka bukas ay hindi na naman siya magparamdam sa akin kaya kahit tutol siya ay pinilit ko pa rin.

"I am okay Sandra," giit niya habang magkasunod kaming pumasok ng bahay.

Wala ngayon si tatay at Vivian kaya malakas ang loob kong dito siya patulugin. Pupuntahan daw nila ang kasal ng pinsan ni Vivian sa probinsya. Paniguradong inimbitahan lang naman nila si tatay para sa pera.

Hindi ko pinansin ang sinabi ni Mateo at nagpatuloy sa paglalakad patungong dining area. Hindi ako kumain ng tanghalian kaya nakaramdam na ako ng gutom ngayon.

"Kumain na ba kayo manang?" Nagpaluto ako ng hapunan sa kanila at nakahain na iyon pagdating namin.

Tumango siya kaya kami na lamang ni Mateo ang tahimik na kumain.

"Hihintayin na lang kitang makatulog pagkatapos ay uuwi na ako," aniya pagkatapos namin.

Nagsalubong ang aking kilay sa pagpupumilit niyang umuwi.