Chapter 2

NANG kumalma ang kanyang ina ay doon na niya tinanong ang lahat. Nalaman niya na nalulong daw pala diumano ang kanyang ama sa sugal sa isang casino at halos umabot ng dalawang bilyon ang utang ng kanyang ama sa nagngangalang Astre Ford Miller. Hindi alam ng kanyang ina kung ano ang itsura nito o kung sino ito.

Nagulat na lang din daw siya nang bigla na lang may dumating sa bahay nila at naniningil. Kitang-kita niya raw ang takot sa mukha ng kanyang ama lalo na para sa kaniya. Ginawan naman daw ng paraan ng kanyang ama para makabayad siya sa utang kaya lang ay naubos na ang palugit nitong isang buwan at hindi siya nakaipon ng dalawang bilyon.

Palagi nga daw nag-aaway ang kanyang ina at ama dahil dito ngunit ni isang beses ay hindi siya nagsuspetsa lalo na at palagi namang okay ang mga ito sa harapan niya. Mukha naman silang masaya at walang problema kapag nakikita niya ang mga ito kaya hindi siya nag-isip ng kung ano-ano pero sa kabila pala ng kanilang mga ngiti ay may napakalaking problemang kinakaharap ang kanyang ama.

“Alam niyo ba kung saan siya nakatira?” tanong niya sa kanyang ina ngunit mabilis itong umiling.

“Hindi ko alam kung saan siya nakatira. Napaka-misteryoso niyang tao sa totoo lang. Tanging ang pangalan niya lang ang alam ko at ni minsan ay hindi ko pa siya nakita.” sagot sa kaniya ng kanyang ina na halos paiyak na naman ng mga oras na iyon.

Napasinghot ito. “Sana ay hindi nila galawin ang Daddy mo…” muling gumaralgal ang tinig nito kaya dali-dali niyang inabot muli ang kamay nito pagkatapos ay marahang pinisil.

“Huwag na kayong mag-alala Mommy. Gagawa ako ng paraan.” sabi niya rito ngunit mabilis naman siyang nilingon nito.

“Anong gagawin mo? Saan ka kukuha ng ganun kalaking pera?” tanong nito sa kaniya.

Sa totoo lang ay hindi niya rin alam. Hindi niya alam kung saan siya kukuha ng dalawang bilyon. Napakalaki nun. Sa totoo lang ay napakarami niyang mga luxury bags at mga sapatos. Ang plano niya ay ibenta ang lahat ng iyon para maipangdagdag sa pambayad nila sa utang ng kanyang ama kaya lang ay nasisiguro niyang kahit na maibenta niya ang lahat ng mga iyon ay kulang pa rin.

“Hindi pa tayo pwedeng umutang kay Tito?” tanong niya rito.

Kapatid iyon ng kanyang ama at sa pagkakaalam niya ay napakayaman din nito. Umiling ito. “Ang Daddy mo nga ay mismong nagmakaawa pa sa kaniya pero hindi niya man lang pinautang.” sagot naman ng kanyang ina na maluha-luha.

Nang marinig niya iyon ay napakuyom ang kanyang mga kamay. Nilunok na pala lahat ng Daddy niya ang kanyang pride at kinayang magmakaawa sa harap ng Tito niya pero hindi pa rin ito pinautang, ano na lang kaya ang naramdaman nito ng mga oras na iyon. Bigla tuloy siyang naawa sa kanyang ama.

“Basta akong bahala.” sabi niya sa kanyang ina.

Kuung kinakailangang lumuhod siya sa harap ng lalaking iyon para makiusap na pakawalan niya ang kanyang ama at bigyan lang sila ng isang taong para mabayaran ang utang nito ay gagawin niya. Handa niyang gawin ang lahat para sa ikaliligtas ng kanyang ama. Kahit na ano.

~~~~~

HINDI naging madali ang pagtatanong kung saan niya matatagpuan ang lalaking iyon. Ni hindi nila nagawang magsumbong sa pulis dahil baka mamaya ay mas lalo lang pahirapan ang kanyang ama o mas worst ay baka patayin na ito ng tuluyan.

Isang araw pa lang ang lumipas ngunit alam niya na napakarami na ang pwedeng mangyari sa loob ng isang araw na iyon kaya ayaw na niyang mag-aksaya pa ng oras. Ni halos ang matulog ay hindi niya nagawa dahil sa labis na pag-aalala sa kanyang ama.

Mabuti na lang at may naging lead siya kung saan niya ito pwedeng makita o kahit na makausap man lang ang tauhan nito.

Pagpasok niya sa isang silid ay agad niyang nakita ang malamig na mukha ng isang lalaki at sinuyod siya ng tingin mula ulo hanggang paa. Biglang nagtaasan ang balahibo sa kanyang katawan dahil sa takot. Sunod-sunod ang naging paglunok niya.

Ilang sandali pa ay nakita niya ang pagtaas ng sulok ng labi nito. “Sigurado ka ba talaga na gusto mong makita si boss?” tanong nito sa kaniya.

Napalunok siyang muli. Ngayon at malapit na siya rito ay hindi na siya aatras pa. Kailangan niyang makita ang kanyang ama at kailangan niyang masiguro na ligtas ito.

Wala mang kasiguraduhan ang plano niya ay wala sa isip niya ang sumuko.

Sinalubong niya ang mga mata nito at tumango. “Sigurado ako. Gusto ko siyang makausap.” sagot niya rito.

Biglang napuno ng pagka-amused ang mga mata nito habang nakatingin sa kaniya at pagkatapos ay biglang dinampot ang cellphone na nakapatong sa mesa. Narinig niya ang pagring na para bang tinatawagan ito at ilang sandali pa ay sinagot na yata ng kung sino man ang tinatawagan nito. Tumalikod ito sa kaniya at siya ay nanatili lang na nakatayo doon, malapit sa pinto sa takot na baka kung ano ang gawin nito sa kaniya.

Hindi niya narinig ang sinabi nito sa kausap ngunit pagkalipas lang ng ilang sandali ay tuluyan na nitong ibanaba ang hawak nitong cellphone at muli siya nitong nilingon. Malalamig pa rin ang mga mata nitong nakatingin sa kaniya.

“Pumayag si boss na makausap ka niya pero sa isang kundisyon.” sabi nito kaagad pagharap nito sa kaniya.

Agad na napalunok si Zia. “anong kundisyon?” tanong niya rito kaagad.

“Kailangan mong mapiringan para hindi mo malaman kung saang lugar siya matatagpuan.” sabi nito sa kaniya at dahil dito ay hindi na siya nagdalawang isip pa.

Mabilis siyang tumango. “Deal. pumapayag ako sa gusto mo.” sagot niya rito.

Nang marinig ang sagot niya ay bigla na lang itong natawa ng wala sa oras. “Ang lakas ng loob mo. baka hindi mo alam kung sino siya? At higit sa lahat, kapag nagpunta ka doon sa tingin mo ba ay makakalabas ka pa? Sa tingin mo ba ay bubuhayin ka niya pagkatapos niyong mag-usap?” tanong niya sa akin.

Biglang bumilis ang tibok ng puso niya. Biglang namuo ang pawis sa noo niya at pagkatapos ay naging marahas ang kanyang paghinga. Susuko na ba siya dahil sa mga banta nito? Hindi na ba siya tutuloy dahil sa pananakot nito? Pero paano ang kanyang ama? Anong mangyayari sa kanyang ama kung hindi niya ito ililigtas? Baka patayin nila siya.

Napakagat-labi siya. Kahit na unti-unti na siyang nilalamon ng matinding takot ay hindi pa rin pwede na umatras siya. Nangako siya sa kanyang ina na gagawin niya ang lahat para iligtas ang kanyang ama.

“Wala akong pakialam. Basta gusto ko siyang makausap.” matapang na sagot niya rito.