Chapter 6 - Stand off

Sagap na sagap ng mga tainga ni Darvis kung ano ang sinabi ni Psalm. Nanigas ang mga kasu-kasuan niya at nanginig ang kaniyang laman. Hindi siya makapaniwala sa pahayag na iyon ng kaniyang asawa. Mahal siya nito. Paano nito nasabi ang ganoong bagay?

Dama niya ang malamig na aura ni Psalm habang nakatitig ito sa kaniya. Naalarma ang buong sistema ni Darvis at biglang lumawak ang kahungkagan sa puso niya. Tulad ng ibon na matagal na nakahawla at naghahangad na makalaya, ang pakiramdam ng pagkatalo ay bumuhos sa kaniya at unti-unti siyang nilunod.

Humakbang siya para mas makalapit pa sa asawa, hindi alintana ang kaniyang paligid at ang ibang naroon. Ikinubli niya sa kaniyang likod si Psalm at iritadong sinuyod ng tingin sina Pearl at ang mga magulang nito.

"Pearl, ano'ng sinabi mo sa asawa ko?" tanong niya, mahigpit na kinuyon ang mga kamao.

"Bakit ba?" malditang sikmat ni Pearl. "Wala naman akong sinabing masama sa kaniya. Siya nga itong bigla na lang sumugod dito."

Nagtagis ng mga bagang si Darvis. Paano kung sinabi ng babae kay Psalm ang tungkol sa namamagitan sa kanila, siguradong nadudurog ang asawa niya. Kinain siya ng matinding pangamba. Mapapatawad ba agad siya ni Psalm? Gaano katagal niya itong susuyuin?

Kailangan niya sigurong maghanda ng magandang sorpresa para lambingin ito. Mabilis lang namang humupa ang sumpong nito at may tiwala siyang kahit malaman nitong buntis si Pearl hindi siya iiwan ng asawa. Mahal na mahal siya nito at wala rin naman itong ibang mapupuntahan.

Samantala, pigil ang galit na nakatitig lamang si Psalm sa likod ni Darvis. Gusto niyang ipagsigawan na alam na niya ang katotohanan at ang eskandalong kinasasangkutan ng asawa kasama ang kaniyang kapatid.

Pero hindi pa ito ang tamang panahon.

Hindi pa.

Ayaw niyang makulong sa gitna ng gusot na nilikha ng dalawa at bigyan ng pagkakataon si Darvis na pigilan siya sa kaniyang mga plano. Gugulatin niya ang lalaki. Titiyakin niyang bumagsak ito at hindi na muling makabangon.

"Walang sinabi si Pearl, don't worry, medyo nagselos lang siya about something," nagsalita si Psalm at pinalaya ang matalim na buntong-hininga.

Nilingon siya ni Darvis at nahawi sa anyo nito ang pag-aalala. May dinukot ito sa bulsa ng pantalon. Isang limited edition perfume na kahugis ng paru-paro ang sisidlan at gawa sa mamahaling crystal glass. Binabalot iyon ng kulay ng bahaghari dahil sa liwanag.

"Ito 'yong perfume na gusto mong bilhin pero naubusan tayo roon sa showroom. I traveled half an hour to their main branch at the next town to get this." Binigay ni Darvis sa kaniya ang pabango.

Talaga ba? Pumunta ito sa karatig na lungsod para lang bilhin iyon at ibigay sa kaniya? Dati, kung may iuuwi ito o may pasalubong, sobrang saya niya. Pabango man o pagkain, hindi siya nagsasayang ng segundo, ginagamit agad niya o kaya ay tinitikman. Madalas niyang sabihin 'the best ang asawa'.

Pero ngayon, kahit pilitin pa niya, wala siyang mahagilap na tuwa. Malamig niyang sinipat ang pabango.

"Ayaw ko na sa amoy nito, masakit sa ilong. Hindi na kasi ito 'yong original scent na minarket ng El Aroma, may hinalo na yata sila at hindi ko nagustuhan."

May ibang kahulugan ang sinabi niyang iyon pero hindi naman na-gets ng asawa niya.

"Okay, sabihin mo lang kung may gusto ka, ipabibili ko sa mga tao ko kahit saang shop pa iyan."

Sa halip na sumagot ay sinulyapan ni Psalm si Pearl. Namumula ang mukha nito at bakas sa mga mata ang galit na halos maiiyak na ang kapatid. Nagseselos ba ito? Nakakatawa. Kabit na may karapatang magselos? Siya nga legal na asawa ay nakakayang kontrolin ang sarili kahit nasa kaniya lahat ng karapatang magalit.

"Bakit ka nga pala nandito?" Muli niyang binalingan si Darvis.

Umilap ang mga mata ng lalaki. Umukit doon ang anino ng panic. Pero nakabawi rin ito at kalmadong tumitig muli sa kaniya.

Si Pearl naman ay lumapit at nakangiting kumapit sa braso ni Darvis.

"Ate, buntis kasi ako. Nakiusap ako kay Kuya na samahan niya ako sa check-up ko ngayon. Alam mo na, malakas siya at takot sa kaniya ang lahat kaya kampante ako kung siya ang kasama ko." Nakaangat ang isang kilay at naglalaro ang panlalait sa ngiti ni Pearl. "Di ba, Kuya?" malambing nitong ungot sa lalaki.

Yamot na umiling si Darvis at hinila ang braso mula sa pagkakahawak ni Pearl. "Y-yes, nakiusap siya sa akin. Pero 'wag mong mamasamain 'to, honey."

Naningkit ang mga mata ni Psalm. "Nang-iinis ka ba? Alam mong galit ako diyan kay Pearl tapos pumunta ka talaga rito para samahan siyang magpa-check up?"

Namutla si Pearl nang mapansin nito ang pagdilim ng mukha ni Darvis.

"A-ate..."

"Tumahimik ka," angil niya. "Ano, Darvis? Hindi ka mag-e-explain?"

Natameme ang asawa niya. Nakakatawa. Ang head ng Florencio clan, makapangyarihan at kinatatakutan ay umurong ang dila. Halatang wala itong ma-imbentong rason.

Tumikhim si Rolando na kanina pa nakamata lamang at naghihintay lang ng pagkakataong sumabat sa kanila.

"Tama na nga iyan, Psalm. Parang malaking kasalanan iyang ginawa ng asawa mo. Nagmamalasakit lang siya sa kapatid mo," utas ng daddy niya.

"Ganyan na ba kalala ang ugali mo?" Sumingit pa si Perlita.

"Tama na!" awat ni Darvis. Hindi nakahuma si Psalm nang hawakan ng lalaki ang kamay niya. "Sino'ng nagbigay sa inyo ng pahintulot na pagsalitaan ng ganyan ang asawa ko?" Bakas ang bangis sa tono nito pero gusto niyang kilabutan dahil sa ang hirap nang paniwalaan alin man sa mga salita ng asawa niya.

Natahimik ang mga magulang niya at umatras palayo. Tanging si Pearl ang nanatili sa kinatatayuan nito, nakasimangot.

"Kuya, gusto lang naman ng mga magulang kong makipag-bonding kay Ate kahit ngayon lang. Wala silang masamang intention, huwag ka nang magalit, okay?"

Lumambot ang mukha ni Darvis. Hindi nito maikakaila na apektado pa rin talaga ito kay Pearl pilitin man nitong itago iyon.

"Aalis na kami, next time na lang kita sasamahan," nagpaalam ang lalaki at inakay na si Psalm.

Pero biglang sumigaw si Pearl, saklot ang tiyan. "Ang sakit ng tiyan ko! Sobrang sakit! Ahhh...Mom, Dad! Baka may mangyari sa anak ko! Ang anak ko...tulungan n'yo kami!"