Chapter 03

“Hindi ka ba nakakaintindi?” pahabol na sigaw ng galit na galit na lalaki kay Cielo nang makita niyang binalewala na siya ng babae.

“Maganda ka sana, pero walang manliligaw na engineer sa iyo dahil mayabang ka. Bulok naman ang kotse mo!” natatawa pang sabi naman ng isa habang sinusundan si Cielo papasok ng main building.

Hindi niya pinansin ang mayayabang na engineer at lumapit na lamang sa receptionist na ngayon ay ngiting-ngiti sa apat na lalaking kapapasok sa double glass door.

“Good morning, engineers!” matamis ang ngiting bati ng receptionist na hinawi pa ang mahabang buhok patungo sa likod ng kanyang tainga.

“Good morning, Pretty!” malawak ang ngiti ng payat na lalaki. 

Kinilig naman ang receptionist sa papuring natanggap at umaktong parang nahihiya. “Precious po ang pangalan ko, Engineer Enzo.”

“Precious…” singit ng isang lalaki na kanina ay sinabihan siyang may may-ari ng parking lot. “Pangalan pa lang tunog mamahalin na hindi tulad ng bagong salta.”

Naghagikgikan ang mga lalaki na nakapaligid sa kanya. Napailing na lamang si Cielo sa inaasal ng mga ito.

Dahil halatang iniinis ng apat na lalaki ang babaeng bagong dating, doon lamang ito binalingan ni Precious. Nawala ang ngiti sa labi ng receptionist nang makita na maganda ang babae sa kanyang harapan. Naisip niya na may kaagaw na siya sa atensyon ng mga engineer, kaya inismiran niya ang babae. 

Eksaktong dumating ang isang babae na pareho ang unipormeng suot ng sa receptionist. “Precious, kapag dumating si Engineer San Juan, asikasuhin daw maige. Utos galing sa headquarters.”

“Silang apat pa lang ang narito,” sagot ng babae.

Nagtinginan ang mga lalaki sa narinig. Wala silang alam na madaragdagan ang engineer sa factory.

“May bagong engineer? Para saang department?” tanong ng kanina ay galit na engineer.

Sasagot sana ang bagong dating na receptionist, pero naunang nagsalita si Cielo. “I am Engineer Cielo San Juan.”

Sabay-sabay na napalingon sa kanya ang anim. Gulat na nagtinginan muli ang apat na engineer.

Ngumiti naman ang bagong dating na receptionist at agad siyang iginiya sa loob. “Welcome to JNQ Motors, Engineer! Dito po tayo!” 

Hinatid ng receptionist na nagpakilalang Michelle si Cielo sa opisina ng HR Manager. 

“Mr. Panlilio, nandito na po si Engineer San Juan,” anunsiyo ni Michelle bago pinapasok si Cielo sa opisina ng HR Manager.

Bahagyang gumalaw ang kilay ni Mr. Panlilio nang makitang isang payat at batang babae na nakasuot pa ng dress na pang-opisina at high heels. Pakiramdam niya ay masyadong bata at maganda ang babae na parang hindi makabasag-pinggan ang engineer sa kanyang harapan. Naisip niya na baka ang babae ay iha-hire lang nila bilang engineer dahil hindi naman sila kinukulang sa mga magagaling na mechanical engineers.

Tumayo pa rin siya at propesyunal na inilahad ang kanyang kamay. “Welcome to JNQ Motors, Ms. San Juan. I am Mr. Panlilio, the HR Manager. While waiting for the CEO's assistant, let’s start with the onboarding process.”

Naisip ni Mr. Panlilio na matutuwa sa kanya ang CEO kapag ayos na ang lahat ng onboarding papers ng bagong engineer.

Gusto sanang ipaliwanag ni Cielo sa HR Manager ang kanyang kontrata sa JNQ, pero naisip niya na sumunod muna sa agos dahil baka kailangan ang prosesong iyon para magkaroon siya ng access sa factory tulad ng pagkakaroon ng ID.

Tinawag ng HR Manager ang isa niyang empleyado at agad ipinasa si Cielo. Niyaya siya ng babae sa work station nito para roon mag-fill-out ng mga form.

Eksaktong binibigyan ng instructions ng HR Staff si Cielo nang dumating ang executive assistant ng CEO na si Nora. Nanlaki ang kanyang mga mata nang makitang binibilinan ng requirements para sa ordinaryong empleyado si Cielo.

“Ms. Mahusay, who told you that Engineer San Juan needs those onboarding requirements?” hindi napigilan ni Nora na uminit ang ulo. Maganda ang mood ng CEO ngayon at ayaw niyang bigyan ito ng rason na magsungit na naman dahil siya ang nahihirapang mamagitan para sa mga empleyado.

Narinig ni Mr. Panlilio ang boses ni Nora, kaya nagmamadali siyang lumabas. “Those were my instructions, Ms. Quinn.”

Tumaas ang dalawang kilay ni Nora. “Am I not clear yesterday that Engineer San Juan is the project owner and she should be treated as one of the executives?”

Namula ang mukha ni Mr. Panlilio at hindi niya inaasahang sisigawan siya ni Nora sa harap ng staff niya at ng bagong saltang engineer na wala pang karanasan.

“Parating na ang CEO, umayos kayong lahat!” nagpipigil na sabi ni Nora bago nginitian si Cielo. “Halika ipapakita ko sa iyo ang production site at ang magiging opisina mo rito.”

Tahimik na tumayo si Cielo at sumunod kay Nora. Inis na inis naman si Mr. Panlilio na sumunod sa dalawang babae. 

Unang dinala ni Nora si Cielo sa tinawag nitong War Room dahil doon bubuuin ang parts ng unang unit ng bago nilang project. Ipinakilala rin niya si Cielo sa mga makakatrabaho nito. Lihim na nagtaasan ang kilay ng mga naroon dahil puro sila lalaki at ang magsu-supervise sa project ay isang bata, sexy at magandang babae. 

Nakita ni Mr. Panlilio ang reaksiyon ng mga tauhan, kaya naisip niya na samantalahin ang naramdamang pag-apak sa ego ng mga ito upang makaganti kay Cielo sa pamamahiyang naranasan kanina mula sa Executive Assistant ng CEO. Nang lumabas ang dalawang babae ay nagpaiwan na siya. 

“Sir, babae at bata talaga ang magiging boss namin sa bagong project?” angal ng engineer na siyang naunahan ni Cielo kanina sa parking slot. “Wala pang experience ang fresh graduate na iyan!”

“Eh ‘di bigyan natin ng experience!” pilyong suhestiyon naman ni Enzo.

“Tama! Tingnan natin kung makapagyabang pa siya sa atin,” umangat ang isang sulok ng labi ng isa pang engineer na nanlait sa lumang sasakyan ng babae.

Nagsipagtawanan ang mga lalaki at nabuo ang isang plano laban kay Cielo.