Chapter 06 

Halos pigilan ni Cielo ang paghinga nang magsimulang sumuot sa kanyang ilong ang amoy ng pamilyar na pabango ni Nathan. Crisp, outdoor, and woody scent. Iyon mismo ang paborito niyang perfume para sa lalaki. Ang amoy ng balat ni Nathan na nagpapabaliw sa kanya noon.

Nagtama ang kanilang paningin at hindi mapigilan ni Nathan na titigan ang mukha ng babae na para bang may makakatakas sa kanyang paningin sakaling kumurap siya. Sa apat na taong nagdaan, ngayon lamang niya muling naramdaman ang isang pamilyar na pakiramdam. Bumaba ang tingin niya sa mga labi ni Cielo na laging nanunukso sa kanya noon na angkinin.

Idiniin ni Cielo ang kanyang ulo sa headrest ng upuan para dagdagan ang espasyo sa pagitan ng bawat mukha nila ni Nathan. Naisip niya na sakaling siilin siya ng halik ng lalaki sa loob ng sasakyan, siguradong sukol siya dahil masikip at wala siyang matatakbuhan, kaya napapikit na lamang siya.

Hindi nagtagal, napansin ni Cielo na hindi na niya maamoy ang pabango ng lalaki. Dahan-dahan niyang binuksan ang kanyang mga mata. Napauwang ang mga labi niya nang makita ang papalayong bulto ni Nathan habang papalabas ng malaking silid na iyon. Napakunot ang noo niya sa ginawang pag-iwan sa kanya ng lalaki nang mag-isa.

Pagkuwan ay napakibit-balikat siya at saka pinaalalahanan ang sarili, “Parang hindi mo kilala ang ugali niya.”

Bumaba siya ng sasakyan at saka isinara ang pinto bago sinigurong naka-lock ang prototype. Tahimik siyang naglakad palabas at nagpasyang bumalik na lamang muna sa kanyang opisina.

Naglalakad siya sa pasilyo nang mag-ring ang kanyang cellphone. Nang silipin niya kung sino ang tumatawag, mabilis na puminta ang isang ngiti nang makita ang pangalan ng anak sa screen.

Pinihit muna niya ang half dummy ng pinto ng kanyang opisina bago sinagot ang tawag.

“Hello, my love!” malambing niyang bati na sinabayan pa ng napakatamis na ngiti.

“Mommy! Puwede po ba kami magpunta ni Lala sa mall?” malambing na tanong ni Sky.

“May kailangan ka bang bilhin sa Mall?” balik-tanong niya sa bata.

Umiling muna si Sky sa kabilang linya. “Wala po pero I want to go to the Toy Store!”

“Sige na po, Mommy. Please!”

Pumasok si Cielo at saka isinara muli ang pinto. Pagpihit niya para pumunta sa kanyang mesa, halos mapalundag siya sa gulat nang makitang prenteng nakaupo sa couch si Nathan at madilim ang tingin sa kanya.

“Can I call you back later?” bulong niya sa kanyang kausap habang nakikipaglaban siya ng tinginan kay Nathan.

“Mommy?”

Inilapit pa niya lalo ang kanyang bibig sa phone. “I love you! I’ll call you back, promise!”

Mahina man ang boses ng babae ay narinig lahat iyon ni Nathan at parang gusto niyang manapak ngayon sa inis. Napatayo siya mula sa couch at inilang hakbang lamang si Cielo na napako na sa kinatatayuan niya.

Napaatras si Cielo ngunit sumagi na ang kanyang likod sa kahoy na pinto. Umiigting naman ang panga ni Nathan na nilapitan ang babae at saka itinukod ang dalawang kamay sa bawat gilid ng ulo ng babae.

Sa tangkad na 6 feet and two inches at sa laki ng kanyang katawan, kulong na kulong ni Nathan ang balingkinitang katawan ni Cielo.

“Hindi ako gumastos ng sampung milyon sa iyo para makipaglandian ka sa lalaki mo habang narito ka sa kumpanya ko,” mariing sabi ni Nathan.

Hindi sumisigaw ang lalaki pero ramdam ni Cielo na parang galit ito at hindi niya iyon papayagan.

“Tss,” hindi napigilan ni Cielo na pikon na mapangiti. “Alam ko kung ano ang pinirmahan kong kontrata, Mr. Quinn. Ang sampung milyon ay paunang bayad lamang para sa karapatang ibinigay ko sa iyo upang i-produce ang imbensyon ko.”

Lalong umigting ang panga ni Nathan sa pagsagot ng babae sa kanya. Kahit kailan ay hindi siya sinagot ni Cielo nang ganito.

“Ipapaalala ko rin sa iyo na hindi mo ako empleyado,” halos paos na sabi ni Cielo. Takot na mapalakas ang boses at may makarinig na ibang tao sa labas ng opisinang iyon.

Yumuko si Nathan para abutin ang tainga ni Cielo. Sinadya niyang ilapit nang husto ang kanyang mga labi bago bumulong. “But you’re still working for my company and me.”

May kung anong kuryente ang nabuhay sa katawan ni Cielo at pakiramdam niya ay nanlambot ang kanyang mga tuhod. Napalunok siya at saka huminga nang malalim.

“But you don’t own me, Mr. Quinn. Wala kang karapatang kontrolin kung sino ang gusto kong kausapin.” Tahimik niyang pinuri ang sarili nang masabi ang buong iyon nang hindi pumipiyok.

Nahigit niya ang kanyang hininga nang maramdaman ang marahang pagdampi ng labi ng lalaki sa ibaba ng kanyang tainga.

“W-What are you doing?” nagpa-panic niyang tanong.

Muling umangat ang labi nito sa kanyang tainga. Ramdam na ramdam ni Cielo nang samyuin ni Nathan ang kanyang balat. “Bolann tú fós mo chuidse, a spéir.”

Nanlaki ang kanyang mga mata sa sinabi ng CEO at saka mabilis na itinulak palayo sa kanya ang lalaki, kahit pa alam niyang balewala iyon sa matipunong katawang nasa harap niya.

“Layuan mo ako, Nathan!”