CHAPTER 6

"NAHIHIBANG KA NA BA?" Sigaw ni Mommy sa akin, hindi na ito nakapagpigil pa.  Isang malakas na sampal ang dumapo sa kaliwa kong pisngi.  Sapat para matauhan ako.  Hindi ko alam kung anong pumasok sa utak ko para sabihin iyon kay Mommy.

Napasobra naman yata ang pagsisinungaling ko?

Pero napasubo na ako, wala ng atrasan ito.

"Hindi ako nahihibang," umayos ako ng tindig, kumapit ako kay Omeng para dito kumuha ng lakas, kahit ang totoo, hanggang ngayon ay gulat pa rin ito sa sinabi ko.

Wala naman kasi ito sa usapan namin.

Bugso ng sobrang galit kaya nasabi ko ang isang malaking kasinungalingan na ito.  Bahala na.  Ang mahalaga sa ngayon ay napagtagumpayan kong galitin si Mommy.

"Nasa katinuan ako, Mommy.  Mahal ko si Omeng and to hell with what you think pero buo na ang pasya kong magpakasal sa kanya."

"Anak ng teteng. . ." Narinig kong halos pabulong na sabi sa akin ni Omeng.  Gustong-gusto na nitong magsalita pero nagpipigil lang.  Siguro ay pinoprotektahan rin ang kahihiyan ko kaya sumunod na lang ito sa agos.

"Hindi ako papayag na matuloy ang kasal ninyo!" Sabi ni Mommy saka nag-walk out palabas ng opisina ko.  Napangisi ako habang sinusundan ito ng tingin palabas.  Nang tuluyan na itong mawala sa paningin namin ay saka ako muling hinarap ni Omeng.

"Bakit pati ako gusto mong ipahamak sa kagaguhan mong ito?" Sita sa akin ni Omeng, "Anak ng teteng, hindi ka ba talaga nag-iisip?"

Nagkibit lang ako ng balikat.

"Alam mo ba kung anong sasabihin sa akin ng Daddy mo, ha?  Na pinapayagan kitang paglaruan ang Mommy mo. . .tiwalang-tiwala pa naman sa akin ang Daddy mo pagkatapos. . ."

Tinitigan ko si Omeng, "Magpakasal tayo."

OMENG'S [OV

NATIGILAN ako nang marinig muli iyon kay Pamela.  Parang totoong-totoo ah.  Hindi ko maipaliwanag kung anong damdamin ang sumukob sa akin pero naalala ko ang maiinit nitong mga labi kanina.

Putsa, ayoko mang aminin, naapaktuhan ako ng labis.  Marami-rami na rin naman akong babaeng nahalikan.  Ilang beses na rin akong ninakawan ng halik ng mga babaeng hindi makapagpigil ng paghanga sa akin.

Pero ngayon ko lang na-experience ang ganitong klase ng pakiramdam.

Parang nakakaadik ang mga labi nito.

Putsa, ang lambot at talagang ramdam kong tumagos iyon hanggang sa aking kaluluwa.  Ngunit hindi ako daat na malunod sa palabas naming ito ni Pamela.

Napakurap-kurap ako habang sinasabi ko sa sarili ko na kailangang gumising ako sa katotohanan.

"Sobra na ang palabas nating to.  Hindi ko papayagang umabot sa. . ."  Pero bago pa ako makatapos sa sasabihin ko ay muli akong hinalikan ni Pamela.  This time, mas mariin, mas matagal.

Waring tumigil saglit ang mundo ko sa pag-ikot.  Parang lahat ng problema ko tinangay ng hangin sa malayo.  Lahat ng mga alalahanin ko, nawala at ang tanging natitira na lamang sa aking sensasyon ay ang nakakatarantang pakiramdam na idinudulot ng mga halik na ito ni Pamela.  Muntik ko pa ngang makalimutan ang pangalan ko. Ito ba iyong birthday gift na pinakakaasam ko?

Ngunit bago pa ako tuluyang madarang sa tukso, bago ko pa tuluyang makalimutang anak ito ng lalaking iginagalang ko, mabilis ko na itong itinulak palayo.  Hindi ko bibigyan ng dahilan si Don Modesto para magalit sa akin.

"Damn Pamela.  Hindi ka nakakatuwa!" Sigaw ko dito kahit na hirap na hirap akong pigilan ang totoong nararamdaman ko ng mga sandaling iyon.  Dahil kung ako lang ang masusunod, ayokong tapusin ang pakikipaghalikan dito, "Kung may galit ka sa nanay mo, huwag mo akong isali.  Labas ako sa away nyo kaya pwede ba. . ."

"Seryoso ko, magpakasal tayo.  Ako ng bahalang kumausap kay Daddy.  Three months lang naman," parang batang nakikiusap na sabi sa akin ni Pamela.

"At sa palagay mo papayagan ka ni Don Modesto sa kalokohan mong ito?" Tanong ko kay Pamela, parang gusto kong tumawa ng malakas kasabay ng unti-unti kong nararamdamang inis.  Ginagamit ako ni Pamela para galitin ang nanay nito.  Napakalaking insulto nuon sa akin.

Talaga bang karumal-dumal mahalin ang isang kagaya ko para ako ang mapili ng babaeng itong ganti sa nanay nito?

Kung hindi lang mabait sa akin si Don Modesto, nag-walk out na ako sa babaeng ito.

"Mamili ka, hahanap ako ng ibang lalaking pwede kong mapangasawa or papayag ka sa contract marriage natin?"