Kabanata 6

"MOMMY," tawag ni Sonia kay Abella kaya't nawala na lang ito sa iniisip niya. Tinuunan niya ang anak nang tawagin siya nito. "I wanna go to my play room. Please, take me there," sabi pa ni Sonia.

"Yes, baby. Excuse us," tugon naman ni Abella sa kanila at saka hinatid si Sonia sa play room nito. Dahil ayaw naman ni Semir na maiwan sa kaniyang ama at sa kapatid sa labas, umalis siya sa dining area at sinundan ang kaniyang kapatid sa play room. Samantala, marahan namang nalungkot ang mukha ni Dahlia. Nang mapansin 'yon ng kaniyang ama, kaagad siya nitong kinuwentuhan at muling nagkuwentuhan.

Nang maihatid naman ni Abella ang kaniyang anak na si Sonia, kasunod si Semir sa play room nila, kaagad siyang nagtungo sa kinaroroonan ng kanilang telepono. Tumingin-tingin pa siya sa paligid baka biglang umakyat ang kaniyang asawang si Gregorio. Nang makasiguro, kaagad dinial ang numero ni Armano. "Naiwan siya sa baba. Bilisan ninyo," sabi niya rito bago niya muling ibinaba ang tawag. Huminga siya nang malalim dahil alam niyang ito ang tanging paraan upang makuha ang lahat ng sa kaniya.

Paparating na sina Armano at mga tauhan nito upang patayin si Gregorio, at upang makuha na rin nila ang dapat nilang makuha sa kaniya bago pa magamit bilang panlaban. Samantala, habang abala sa pagkukwentuhan sina Gregorio at Dahlia, nagtaka na lang ang bata kung bakit hindi bumalik ang tita Abella niya. "Itay, baka naman po inaantok na si tita Abella? Mas mainam po siguro kung umuwi na ako?" tanong ni Dahlia sa kaniyang ama.

"Maya-maya na, anak. Babalik si tita Abella mo. Medyo mabagal lang siyang maglakad. Hintayin muna natin siya tapos uuwi na tayo," tugon naman ni Gregorio. Ngumiti na lang si Dahlia bilang tugon.

Ilang sandali pa, nagsiparada na ang tatlong van na pinagsakyan ni Armano at mga tauhan nito. Dala ang kanilang mga armas, dahan-dahan at mabilis silang bumaba saka pumalibot sa buong paligid ng mansyon ni Gregorio. Ilang sandali pa, pumasok silang bigla sa pinto kaya't napatingin na lang sina Gregorio at Dahlia sa ingay.

"Itay, ano po 'yon?" takang tanong ni Dahlia sa kaniyang ama.

"Baka may bumagsak. Teka, ako na lang ang titingin," sabi naman ni Gregorio bago ito tumayo at naglakad papuntang salas. Ilang sandali pa, nakita na lang niya ang paglitaw ng isang lalaking nakaitim na suot at tinutukan siya ng baril. Bago pa man ito mabaril ay kaagad nang umiwas si Gregorio. "Anak! Magtago ka!" sigaw niyang bigla kay Dahlia na nagulat naman dahil sa putok ng baril na 'yon. Mabilis namang pumunta si Dahlia sa may kusina at binuksan ang isang cabinet kung saan siya kasya at saka nagtago.

Samantala, kaagad namang kinuha ni Gregorio ang kaniyang baril na kaniyang itinago sa kung saan. Nanlaban siya sa balak patayin siya. Ngunit nang tignan niya ang iba't ibang parte ng bahay, nakita niyang may mga kasama pa ito. Mabilis na lang siyang umiiwas at saka nanlalaban.

Nang matunugan naman nina Abella at mga bata ang putukan, kaagad silang nagkulong sa play room. "Mommy! What's that?! Something happening!" sabi ni Sonia na takot na takot sa mga putok ng baril.

"Nothing, baby. Just cover your ears. Don't worry, mommy's here," tugon naman ni Abella sa anak. Tila ba nagtaka si Sonia dahil walang bahid ng pag-aalala sa kaniyang ina para sa kaniyang ama na nasa dining area.

Bigla na lang bumukas ang pinto ng kanilang play room at tumambad sa kanila ang isang lalaki na may itim na balot sa mukha. Natakot ang magkapatid na Sonia at Semir ngunit mabilis silang pinatahan ng ina. "Don't worry, hindi siya masamang tao. He's here to save us."

Tumahimik ang dalawa at saka nilapitan ni Abella ang lalaki. Nang tanggalin nito ang suot niya sa mukha, nabigla na lang ang dalawang bata nang makita si Armano. "Tito Armano?" takang tanong nina Sonia at Semir.

"Halina kayo. Abella, kailangan kong makuha ang tape na na kay Greg. Saan nakalagay 'yon?" tanong kaagad ni Armano.

"Ano ka ba? Hayaan mo na ang bagay na 'yon. Sunugin mo 'tong buong mansyon. Isama mo na si Greg at ng anak niya na nasa baba. Umalis na tayo rito kasama ng mga bata," sabi naman ni Abella.

"Naroroon ang video ng daddy ko. Paano kung--"

"Trust me, Armano. Just demolish thia house and nothing will happen. Hindi na niya makukuha ang tape and at the same time, mamamatay na rin siya," tugon naman ni Abella. Napatingin na lang si Sonia sa kapatid niyang si Semir dahil sa sinasabi ng kaniyang ina at ng kaniyang tito Armano. Na papatayin nila ang kanilang ama.

"Tara na. Baka may makakita pa sa 'tin," tugon naman ni Armano bago sila umalis kasama ng dalawang bata. Tuloy pa rin ang putukan sa baba ngunit sinigurado nila na hindi sila makikita ni Gregorio na patuloy sa pakikipaglaban. Naisipan nilang dumaan sa may kusina palabas, papunta sa sasakyan upang tuluyan na silang makatakas at masira ang buong mansyon.