Pagtatagpo

"Okay ka lang anak ko?" hinawakan ng Ina ni Nelson ang makabilaang pisngi ng binata na kaagad namang iwinakli nito, tumayo mula sa lupa at marahas na idinura ang dugo mula sa kaniyang bibig.

"Sino ba 'yong lalaking iyon? Sino siya para suntukin ako?"

Tumabi sa kanya ang kaniyang Ina pati narin ang pamilya Imperial at tumingin sa papalayong bulto ng apat. Hindi nila kilala kung sino ang kasama ni Saphira na tatlong lalaki.

Ngumiti ng mapanuya ang lola ni Danica.

"Baka ito ang mga lalaki na pinagkukunan niya ng pera ngayon dahil wala na siya sa puder ng Imperial?" napa tango naman kaagad si Nelson sa naisip at napa ngisi.

"Ganiyan naba siya ka desperado? Gagamitin niya ang mga lalaki para lang sa pera?" natatawang tugon naman ni Nelson at nagtawanan nalamang silang lahat.

"Hindi eh, parang may mali anak ko." biglang putol ng Ina ng binata sa tawanan. Nagsalubong ang kanilang mga kunot sa noo.

"Anong ibig mong sabihin Cynthia?" tanong ng lola ni Danica.

"Kung nakaya ni Saphira na makapasok sa beach resort na ito, ibigsabihin malalaking tao ang kaniyang mga kasama."

Nagkatinginan naman ang pamilya Imperial sa bawat isa. May punto nga naman si Cynthia, hindi kasi kung sino lang ang nakakapasok sa lugar na ito. Kailangan may koneksyon ka at sapat na salapi upang makapasok.

Halata sa mukha ng pamilya Imperial ang pagka dismaya.

SA KABILANG BANDA NAMAN...

"Nandito na kami mga pepols!" malakas na sigaw ni Andrus habang may naka plakadang ngiti sa labi na abot hanggang tainga.

Pagkapasok nila sa cabin, agad silang sinalubong ng malamig na simoy ng aircon at amoy ng bagong linis na kahoy. Maluwang ang loob, isang modernong tropical design na may halong rustic charm.

Habang sa kanan naman ay may malalaking salaming bintana na tanaw ang asul na dagat at mga puno ng niyog na bahagyang sumasayaw sa hangin. Ang liwanag ng araw ay dumadaloy papasok, lumalaro sa sahig na gawa sa pinakinis na kahoy.

Sa gitna ng eksklusibong cabin, naroon ang isang malinis at malaresort na pool, hindi kalakihan ngunit sapat para na para sa kanila. Ang tubig ay malinaw, at sa ilalim nito ay may ilaw na kumikislap na parang mga bituin kapag dumidilim na. Sa paligid ng pool, may mga recliner chairs at malalambot na sofa, perpekto para sa pagpapahinga matapos lumangoy o mag-sunbathing sa labas.

Sa kaliwa, may malaking dining area na may mahabang mesa na yari sa bamboo wood, may mga nakahandang baso, plato, at mga basket na may prutas. Sa dulo naman ay ang mini kitchen, simple pero kumpleto may gawaan ng kape, maliit na prigider, at shelves na puno ng snacks at alak.

Napa ngiti ang dalaga sa nasaksihan ng dalawa niyang mata. Para itong isang paraiso para sa mga taong gustong kumawala sa masalimoot at masakit na reyalidad.

"Ang ganda hindi ba?" napukaw kaagad ang atensyon ni Saphira dahil sa boses na iyon at tumingin sa kanyang tagiliran at saka tumango.

"Oo, walang katulad..."

"Andres, Insan, hali na kayo. Mas nauna pang pumasok sa inyo si Lior eh," Kinaladkad na ni Andrus si Saphira patungo sa labas ng cabin kung saan matatagpuan ang swimming pool.

Ang mga nagtatawanan na naka upo sa kaniya kaniya nilang mga upuan ay biglang natigilan at tumingin sa kanya.

"S-Saphira a-apo ko?" nabaling ang tingin ng dalaga sa matandang naka upo sa pinaka dulo ng mahabang lamesa. Namumula ang mata nito habang papunta sa gawi niya na naka ngiting inalalayan ni Andres.

"Siya naba ito Andrus?" marahang inabot nito ang pisngi niya. Hindi siya maka galaw, pakiramdam niya ay paunti unti siyang nauubusan ng hininga dahil sa mga nangyayari.

"Ikaw naba ang matagal nang nawawalang apo ko, ija?"

"A-Ako po si Saphira," iyon lamang ang naging tugon niya sa matanda kasabay nito ang mainit at malambot na yakap sa kanya. Parang natunaw lahat ng problema ni Saphira sa mga sandaling iyon.

Naisip niya bigla, ganito ba talaga ang pakiramdam kapag may pamilya ka?

"Masayang masaya ako at sa wakas nakita na kita apo ko," may galak ang boses nito at humiwalay sa pagkakayakap at lumingon sa likuran ang matanda.

"Anak, narito na ang anak mo." tumingin pabalik ang matanda sa dalaga, "Siya ang Papa mo, Saphira." napa tingin si Saphira sa lalaking naka upo sa kaliwang bahagi ng lamesa.

Nasa edad sengkuwenta anyos na ito, may maliit na puting balbas at naka suot ng tuxedo na para bang may meeting pa na pupuntahan. Nagtagpo ang kanilang mga mata ngunit umiwas lamang ito ng tingin sa kanya.

Hindi man sabihin ni Saphira ngunit nakaramdam siya ng sakit sa bandang puso niya dahil sa naging mailag na reaksyon nito.

Hindi mawari ni Saphira kung bakit wala siyang kahit anong naramdaman sa Ama 'raw' niya. Pinakilala siya isa-isa sa mga taong naroon, halatang hindi ito nasisiyahan sa kaniyang presensya.

Habang si Andrus at Andres ay abala sa pagluto ng bangus at si Lior naman ay tahimik lang na naka masid sa gilid.

Pagkatapos ng pagpakilala ng lahat, pinaupo na siya katabi ng sinabi nilang lola niya. Nilagyan siya nito ng kahit ano-anong karne at gulay sa plato niya.

"Kumain ka ng marami apo ko," malambing itong ngumiti sa kanya. Naiilang na ngumiti din siya pabalik dito at kumain hindi alintana ang matatalas na mga mata na nakatingin sa gawi niya.