CHAPTER 4: Unremembered

"Ayyang, pakiabot naman ng butter." utos ni Chynna habang hinahalo ang pancake mixture sa bowl.

Alas sais pa lang ng umaga ay abalang-abala na siya sa kusina dahil sa paghahanda ng almusal nilang dalawa ni Geoff. Matagal-tagal na rin niyang hindi nagagawa ito. Naging busy kasi siya mula noong nagtake siya ng short culinary course. Si Geoff naman, bukod sa pinapatakbo nitong publishing company, ay kabilaan din ang mga naging out of the country meetings dahil ito na rin ang naging CEO ng Montecarlo Holdings na siyang negosyo ng kanilang pamilya.

Puro paboritong pagkain ni Geoff ang hinanda niya. Aside sa lowcarb pancakes, ay mayroon ding omellete and bacon. Fresh blueberries and strawberries naman ang para sa dessert. Gumawa na rin siya ng bulletproof coffee para sa inumin ni Geoff.

"Nakahanda na po ang table, Ma'am."

"Okay. Pakilagay mo na ito sa table at tatawagin ko lang ang Sir mo." Inabot niya ang tasa ng mainit na kape kay Ayyang.

Pagkahubad ng suot na apron, dumeretso na si Chynna sa elevator upang umakyat sa third floor kung saan naroon ang kanilang kwarto. At sa pagbukas niya ng pintuan ng silid, nakita niyang gising na ang kanyang asawa na nakaupo sa kama habang nakasandal sa headboard ang ulo. Nakapikit ito habang nakasapo sa kanyang noo.

"Masakit ba ang ulo mo?" Agad na tanong niya nang tabihan ito.

Marahan naman tumango-tango si Geoff kaya naman agad niyang minasahe ang ulo nito.

"Ikaw naman kasi... Bakit ba masyado kang nagpakalasing kagabi?"

"Birthday kasi ni Jigs. Hindi ako makatanggi eh. Tapos ayaw pa akong pauwiin nina Cliff at Lester."

Ang tatlong lalaking tinutukoy ni Geoff ay mga dati na nitong kaibigan noong nag-aaral pa ito ng kolehiyo sa California. Minsan na rin silang nakilala ni Chynna nang imbitahan ni Geoff ang mga ito na magdinner sa mansyon.

"Halika na, baka lumamig ang mga pagkain. Paiinumin na rin kita ng pain reliever para matanggal 'yang headache mo." Tumayo na si Chynna at bahagyang hinila patayo ang asawa.

Magka-akbay nilang tinungo ang dining area. At nang makaupo si Geoff ay agad inasikaso ito ni Chynna.

"Siya nga pala, Boo... Do you have any plans for today?" nakangiting tanong ni Chynna kay Geoff.

Twenty seventh of the month kasi at ngayon ang ika-anim na buwan nila bilang mag-asawa. Matamang tinitigan ni Chynna ang asawa, umaasang mayroon itong inihandang sorpresa katulad ng mga nakalipas na monthsary nila. Ngunit napawi ang ngiti niya nang makita ang pagkunot ng noo nito.

"Ano bang mayroon ngayon?"

"Hindi mo naaalala?"

Napailing si Geoff at tumingin sa kanyang cellphone.

"Fvck! Twenty seventh pala ngayon..." Tumingin ito kay Chynna na tila nanghihingi ng pasensya.

Napatango-tango na lang si Chynna. Pilit na itinatago ang pagkadismaya.

"Okay lang. Masyado ka lang sigurong busy kaya nakalimutan mo." Itinuon ni Chynna ang  paningin sa kanyang plato.

Agad namang tumayo si Geoff at nagtungo sa likuran ni Chynna. Niyakap nito ang asawa at hinalikan ang tuktok ng ulo nito.

"I'm so sorry, Boo..."

Hinawakan naman ni Chynna ang braso ni Geoff at marahang tinapik-tapik iyon.

"Okay lang. If you like, nood na lang tayo ng movie later then kain na lang tayo sa paborito nating restaurant. Wala ka namang pasok sa office today, right?"

Lumuwag ang pagkakayakap ni Geoff kay Chynna at napatuwid siya ng tayo. Hinawakan niya ang magkabilang balikat ng asawa at bahagyang pinisil-pisil iyon.

"Boo... ano kasi eh..." Umupo si Geoff sa katabing upuan ng kay Chynna.

"Bakit?"

"Nakapangako kasi ako kila Jigs na maggo-golf kami ngayon. Hindi ako pwedeng umatras kasi matagal na iyong naka-set. Besides, may inimbita silang mga prospect investors para sa bagong business na itatayo namin."

Sa narinig ay napahinga nang malalim si Chynna upang alisin ang pagkadismaya. Unang beses na nangyari ito sa kanila.

"H-Hindi ba ako pwedeng sumama?"

"H-Hindi pwede, Boo. I'm so sorry."

"Okay, fine." Hindi maitago ang pagtatampo sa tinig ni Chynna. Tumayo siya sa kinauupuan niya at handa na sana siyang umalis ngunit maagap na nahawakan ni Geoff ang kamay niya.

"I'm sorry talaga, Boo. Huwag ka naman sanang magalit."

"Hindi ako galit. Disappointed, oo."

"Uuwi ako nang maaga mamaya. Promise, babawi ako."

Upang matapos na ay tumango na lamang si Chynna. Panghahawakan na lang niya ang pangako ni Geoff na babawi ito mamaya.

May bigat man sa loob niya, pipiliin pa rin niyang ipaghanda ang araw na ito. Nagluto siya ng mga pagkaing paborito nilang mag-asawa. Bumili rin siya ng flowers, balloons at iba pang pangdekorasyon para sa romantic dinner nila mamaya na ise-set up niya sa garden. Buong maghapon niyang inabala ang sarili upang iwaksi ang negatibong nangyari kaninang umaga.

Nang masigurong nakaayos na ang lahat, ay nagpasya na siyang maghanda ng sarili. Sisiguraduhin niyang magandang-maganda siya sa gabing ito. Isang black mini dress ang napili niyang suotin. Simple lang ang pagkakayari niyon pero napaka elegante. Ang buhok naman niya ay naka high ponytail para ma-emphasize ang scoop back style ng dress na suot niya.

Alas sais na ng gabi ngunit wala pa rin si Geoff.

"Ano ba 'yan... Sabi niya uuwi siya nang maaga..." anas niya nang sulyapan ang Cartier watch na suot niya.

Napagpasyahan niyang tawagan na ang asawa, ngunit hindi naman nito sinasagot ang tawag niya.

Nagpasya siyang magtungo sa balcony upang silipin kung parating na ang sasakyan ni Geoff, ngunit wala pa rin ito.

Dumating pa ang ilang minuto, at nang sumapit ang alas siyete ay nagpasya na siyang doon na lamang niya hihintayin si Geoff sa may garden. 

Nakakaramdam na siya ng gutom, ngunit titiisin niya na lang 'yon hanggang sa dumating ang asawa niya.

Sinubukan niyang tawagan muli siya Geoff ngunit napag-alaman niyang naka-off na ang cellphone nito.

Ganunpaman, pilit pa rin niyang binibigyan ng katwiran ang lalaki. Inisip na lang niyang baka naipit ito sa traffic. Kilala naman niya ito na hindi sumisira sa pangako.

Unti-unti nang sumasama ang loob ni Chynna, at nang kumulog nang malakas ay halos mangiyak-ngiyak na siya.

"Not now... please?" mahinang pakiusap niya.

Tumingala siya sa langit ngunit hindi na niya nakita ang mga bituing nagniningning doon kanina. Malamig na rin ang hanging dumadampi sa balat niya tanda ng nagbabadyang ulan.

"Ma'am, uulan na po yata." naninimbang sa sabi ni Ayyang.

Saglit niyang sinulyapan ang kasambahay at awtomatikong nakuha naman nito ang ibig niyang ipahiwatig.

Gusto pa niyang hintayin si Geoff... Alam niyang hindi siya bibiguin nito.

Ngunit kasabay ng pagbuhos ng ulan, ay ang siya ring pagbagsak ng mga luha niya. Tuluyan nang nawala ang pag-asa niyang tutupad pa si Geoff sa ipinangako nito sa kanya.

"Tayo na po, Ma'am. Basang-basa na po kayo..." aya ni Ayyang sa kanya na may dalang malaking payong. "Baka magkasakit po kayo, eh."

Bago tuluyang tumayo si Chynna, ay pinagmasdan niya ang paligid. Pakiramdam niya ay tinusok ng libu-libong karayom ang puso niya nang makitang nabalewala lang ang lahat ng pinaghirapan niya. Ang mga pagkaing niluto niya ay nasabawan na ng tubig ulan. Ang mga bulaklak na isinaayos sa paligid, ngayon ay nagkasira na. Ang nagniningning na fairy lights na nilagay niya, ngayon ay wala nang buhay.

Pakiramdam niya'y napakasaklap ng nangyari sa kanya. Nawalan lang ng saysay ang lahat ng effort niya. Ganito pala ang pakiramdam ng biglang naisantabi. Masakit para sa kanya na inuna pa ni Geoff ang mga kaibigan nito kaysa sa kanya. Masakit man isipin, ngunit tila nagkaroon siyang bigla ng kaagaw sa kanyang asawa.