CHAPTER 5: Making Up

Magdamag na iniyakan ni Chynna ang nangyaring iyon. Hindi na nga niya alam kung anong oras na ba siya nakatulog nang nagdaang gabi. Basta't ang natatandaan lang niya, ni anino ni Geoff ay hindi pa niya nakita nang siya'y makatulog.

Mabigat na mabigat tuloy ang pakiramdam niya nang siya'y magising. Masakit ang ulo niya pati na ang kanyang mga mata.

Pikit-mata niyang kinuha ang kanyang cellphone sa bedside table, at nagulat siyang alas nuwebe na pala ng umaga. Tumingin siya sa kanyang tabi at nakitang wala si Geoff doon. Bukod do'n ay maayos na maayos at walang lukot ang unan na siyang ginagamit ng kanyang asawa.

"Umuwi kaya siya?" bulong na tanong niya sa kanyang sarili.

Magsisimula na naman sana siyang maiyak nang biglang bumukas ang pintuan.

"Good morning, Boo!" nakangiting bati ni Geoff sa kanya. May dala itong tray na naglalaman ng pagkain. "Tamang tama pala na naihanda ko na ang breakfast mo... Niluto ko ito para sa'yo."

Malaki ang tampo ni Chynna sa asawa... Ngunit nang makita niya ang gwapong mukha nito na nakangiti sa kanya, tila gustong kalimutan ng puso niya ang paglimot nito sa monthsary nila kahapon. Ganunpaman, sinasabi ng utak niyang hindi maaari iyon kaya naman hindi niya ginantihan ang matamis na ngiti nito. Pinanatili niyang blangko ang kanyang itsura habang lumalapit ito sa kanya.

"I'm so sorry about last night, Boo." wika ni Geoff nang mailapag nito ang tray sa ibabaw ng breakfast table. Tinabihan siya nito at pagkatapos ay yumakap sa kanyang beywang.

"Kaya mo na pala akong balewalain."

Sa narinig ay agad pinagtama ni Geoff ang paningin nila ni Chynna. "It's not what you think, Boo... After kasi naming mag golf ay niyaya pa ako ng tatlo. Nakakahiya naman kung hindi ko sila masasamahan—"

"Ahh ganoon ba? Ayaw mong mapahiya sa kanila kaya ako na lang ang nilaglag mo?" nasa tono ni Chynna ang hinanakit.

Napaupo naman nang diretso si Geoff. Tila nagulat ito sa sinabi ng asawa.

"Please try to understand, Boo... Matagal kaming hindi nagkita-kita, and at the same time, nagcelebrate kami dahil naisara namin ang deal sa mga investors kahapon."

"Eh 'di sana hindi ka nangako!" Hindi na napigilan pa ni Chynna ang pagsambulat ng sama ng loob niya. "Naghanda ako kahapon, Geoff... kasi sabi mo uuwi ka nang maaga... Kinalimutan ko ang pagtatampo ko sa'yo kasi sabi mo babawi ka! Tapos ano? Sa wala lang pala mauuwi ang lahat ng effort ko kasi mas pinili mong isantabi ako?!"

Tuluyan nang umiyak si Chynna. Si Geoff naman ay pinipilit siyang yakapin upang pakalmahin siya kahit pa tinatabig-tabig niya ang mga kamay nito.

"Please, hayaan mong makabawi ako sa'yo..." nagsusumamong wika ni Geoff. Hinahalik-halikan niya ang gilid ng ulo ni Chynna. "Kumuha ako ng leave of absence para makapag spend ako ng time sa'yo. As a matter of fact, nagbook na ako ng flight natin to Maldives. Hindi ba't matagal na nating plano 'yon?"

Wala sa loob na napatango si Chynna. Nang marahang punasan ni Geoff ang mga luha sa mata niya ay unti-unting natunaw ang hinanakit sa puso niya. Ramdam naman niya ang sinseridad ng asawa at ngayon lang din naman nito nagawa ang bagay na iyon. Alam niyang hindi naman nito iyon sinasadya kaya naman patatawarin na niya ito at kakalimutan na niya ang nangyari.

"Huwag mo nang uulitin, ha?"

"I won't." Itinaas pa ni Geoff ang palad niya na tila nanunumpa. "Promise."

Matapos kumain ng breakfast ay agad na gumayak ang dalawa patungo sa airport. Mahaba-haba ang flight nila kaya't gugugulin ni Chynna iyon sa pagtulog. Kailangan niyang magrecharge para naman hindi naman siya mukhang ngarag na ngarag sa oras na tumuntong ang mga paa niya sa lugar na pangarap niya.

Ang kiliting dulot ng mainit na hininga ni Geoff ang gumising kay Chynna.

"Wake up, Boo. We're about to land."

Nagising naman ang diwa ni Chynna at agad na nakaramdam ng excitement. Sumilip siya sa bintana, at habang dahan-dahang bumababa ang eroplanong sinasakyan nila ay tila tumigil ang kanyang paghinga nang makita ang napakagandang tanawin. Para sa kanya, ang Maldives ay tila isang pangarap na nakahabi sa dagat. Ang asul na kulay ng tubig nito ay parang pintura ng langit na umapaw sa karagatan. Ang maliliit na isla ay tila mga hiyas na nakakalat at napapalibutan ng puting-puting buhangin. At mula sa himpapawid, kitang-kita rin ang nagniningning na mga coral reefs na animo'y mga salaming dinisenyo ng kalikasan. Nagmistulang yumuko ang langit upang hagkan ang dagat, at siya ay isang mapalad na saksi sa mahiwagang pagsasanib na iyon.

"Beautiful, isn't it?"

"Sa mga magazine ko lang kadalasang nakikita ang ganito..." Tila nananaginip na sagot naman ni Chynna. "Sobrang ganda..."

Nagpakawala naman ng mahinang pagtawa si Geoff. "Well, maganda naman talaga... pero syempre, wala namang mas gaganda pa kaysa sa asawa ko." Matapos sabihin iyon ay marahang kinabig ni Geoff ang mukha ni Chynna paharap sa kanya at pagkatapos ay nilapatan nito ng mainit na halik ang labi ng asawa.