Chapter 5 - Underworld

“Sige, 'wag ka nang magsalita ng kung ano-ano diyan,” naiinip na sambit ni Sean. “Bilisan mo at sumakay ka na sa kotse. Pumunta ka muna sa hotel para batiin ang mga bisita. Maghintay ka hanggang sa matapos ang birthday party ngayong araw, saka mo tanggapin nang buong-puso ang parusa. Pagkatapos ay pakinggan mo ang paliwanag ni lola tungkol sa annulment.”

Napuno ng galit ang mga mata ni Mark: “Sinabi ko nang ayoko!”

Nagalit din si Sean. “Ikaw na walang kuwentang tao ka, naghahanap ka talaga ng sakit ng katawan, ano?”

Habang nagsasalita, binuksan ni Sean ang p***o ng kotse, bumaba, at mabilis na sumugod papunta kay Mark na nakasakay sa motor. Agad niya itong inambahan ng sipa!

Sa hindi inaasahang pagkakataon, inilihis ni Mark ang motor at matagumpay na naiwasan ang sipa ni Sean.

Pagkatapos, bumaba si Mark sa motor at malakas na sinipa si Sean sa tiyan!

Isang playboy si Sean. Araw-araw siyang may kasamang girlfriend kaya napakahina ng katawan niya. Sa isang sipa lang ni Mark, tumalsik na siya agad.

“Ikaw... ikaw na walang kuwentang tao ka, talagang lumalaban ka pa!”

Nagulat si Sean. Sobra-sobra ang panggagagong ginawa niya kay Mark sa nakalipas na tatlong taon.

Kahit anong panggagago ang ginawa niya kina Jade at sa pamilya nito sa kaniyang harap, kailanman ay hindi nangahas na gumanti si Mark sa kaniya.

Pero ngayong araw, ang nakikitirang manugang na si Mark ay binugbog siya, ang tagapagmana ng pamilya Gutierrez!

Mabilis na tumayo si Sean at kumuha ng isang kutsilyo sa compartment ng kaniyang Maserati.

“Ako na ang magpaparusa sa ‘yo para kay lola! Tatadtarin kita hanggang sa mamatay ka!”

Whoosh whoosh whoosh!

Tatlong beses na sunod-sunod na inatake ni Sean si Mark, pero madaling naiwasan ni Mark ang lahat ng ‘yon.

Nagsimulang mag-martial arts si Mark sa edad na lima at hindi kailanman huminto sa loob ng mahigit sampung taon. Ang mga guro na kinuha para sa kaniya ay mga nangungunang master sa loob at labas ng bansa.

Ang isang tulad lang ni Sean na may isang kutsilyo ay hinding-hindi masasaktan ang isang gaya niya.

Ang kamay ni Mark ay kasingbilis ng kidlat, at sa isang pitik, tinamaan nito ang pulso ni Sean na may hawak na kutsilyo, dahilan para mabitawan at mahulog agad sa lupa ang hawak nito.

Bago pa man muling mapulot ni Sean ang kutsilyo, inunahan na siya ni Mark at sunod-sunod na pinagsusuntok sa mukha.

Bumagsak sa lupa si Sean at hindi na nangahas pa na lumaban kay Mark.

Tiningnan ni Mark ang nakahilatang lalaki sa sahig. “Bumalik ka at sabihin mo sa mga miyembro ng pamilya mo na hindi niyo na ako aso na pupunta at aalis lang kapag tinawag niyo. Walang sinuman ang pwedeng mag-utos sa akin maliban kung gusto kong pumunta!”

Pagkasabi niyon, pinatakbo ni Mark ang kaniyang motor para i-deliver ang susunod na pagkain.

Nabugbog si Sean at pasa-pasa ang kaniyang mukha, pero hindi siya pumunta sa ospital. Magandang pagkakataon ito para makuha ang awa ng kaniyang lola, at hindi niya ito sasayangin.

Nagmaneho siya pabalik sa resort dala ang kaniyang mga sugat. Sa oras na ito, sakto namang lalabas ng resort ang kaniyang lola at ang iba pa, habang naghahanda papuntang hotel para salubungin ang mga bisita.

“Nandiyan na pala si Sean.”

Nakilala agad ni Samantha, ang ina ni Sean, ang pamilyar na sasakyan ng kaniyang anak. Tinuro niya ang sasakyan sa matandang ginang.

Napangiti naman si Mrs. Gutierrez at tumango. “Mabilis talaga kumilos si Sean.”

Inakala ng lahat na dala ni Sean si Mark pabalik, pero sa hindi inaasahang pagkakataon, mag-isa itong bumaba ng kotse at punong-puno ng sugat at pasa ang kaniyang mukha.

Durog ang puso ni Mrs. Gutierrez. Ang ikatlong henerasyon ng pamilya ay may iisang lalaki lang na si Sean. Kung may mangyaring masama rito, mapuputol ang lahi ng pamilya Gutierrez!

“Apo, bakit ka nabugbog nang ganiyan? Sinong gumawa sa'yo nito?” alalang-alalang tanong ng matandang ginang.

Umiyak si Sean at sinabi, “Lola, 'yong walang kuwentang asawa ni Jade ang bumugbog sa akin!”

“Ano?!” Galit na galit si Ramil at itinuro ang sarili niyang pamilya. “Nangahas ang walang kuwenta mong manugang na saktan ang tagapagmana! Kailangan niyo akong bigyan ng paliwanag tungkol dito!”

Nataranta rin sina Romulo at Beatrice. Manugang nila si Mark, at ang utang na ito ay siguradong sa kanila ibubuntong.

“Ang walang kuwentang lalaking ‘yon, nagdadala lang ng sakit ng ulo sa atin. Kapag nakita ko 'yon, sasampalin ko talaga ang bunganga niya!” bulalas ni Beatrice.

“Tatawagan po ba natin ang pulis, Lola?” tanong ni Sean sa kaniyang lola.

Kailanman ay hindi ginusto ni Mrs. Gutierrez na dinadamay ang kapulisan sa mga ganitong bagay.

“Problema ito ng pamilya. 'Wag kang mag-alala, sisiguraduhin kong matatanggap niya ang parusang nararapat sa kaniya!”

Pagkatapos, tumingin ang matandang ginang kay Ramil at sinabi, “Ramil, alam kong may mga kakilala kang kaibigan sa underworld. Hayaan mong turuan nila ng leksyon ang hayop na 'yon at dalhin siya pabalik sa akin!”

“Opo!”

Tumingin si Ramil sa sugat sa mukha ng kaniyang anak at gustong balatan si Mark. Agad niyang tinawagan ang isa sa kaniyang mga kaibigan sa underworld.

Pagkalipas ng kalahating oras, sa hagdanan ng isang building sa isang gusali…

Isa itong multi-story building na walang elevator. Katatapos lang mag-deliver ng pagkain ni Mark at pababa na sana sa hagdan.

Biglang may dalawang lalaki ang lumitaw sa harap niya na may taas na higit 1.85 meters, may timbang na humigit-kumulang 200 kilograms, at may mga tattoo sa katawan!

“Ikaw si Mark, 'di ba? Sumama ka sa amin,” tanong ng isa sa mga may tattoo na lalaki.

Tumingin si Mark sa dalawang lalaki at nalaman agad na siguradong ipinadala sila ng pamilya Gutierrez.

“Huling araw ko na 'to sa pagde-deliver ng pagkain ngayong araw. Hindi ako pupunta kahit saan,” sabi ni Mark.

Si Mark ay taong may panimula at may pagtatapos. Naitala na siya bilang chairman ng Roxas Group, at ngayong araw na nga ang kaniyang huling araw sa pagde-deliver ng pagkain.

Walang mataas o mababang trabaho para sa kaniya, kaya gusto niyang tapusin nang maayos ang kaniyang trabaho bilang food delivery rider.

“Mukhang ayaw mo sa maayos na usapan, gusto mo sa santong paspasan!”

Hindi na nagpadalos-dalos pa ang dalawang lalaki at sinugod na agad si Mark.