Chapter 2 - True Identity

Para masagot ang mga tawag mula sa customer anumang oras, may nakasabit na Bluetooth headphones sa tainga ni Mark. At sa oras na ito, tumutugtog ang kanta ng Beyond na "Early Train" sa kaniyang headphones.

Habang nakikinig sa tugtog, biglang naalala ni Mark noong unang beses niyang makilala si Jade tatlong taon na ang nakakalipas.

Pinanganak si Mark sa isa sa mga pinakamayaman at pinakamisteryosong pamilya sa mundo gaya ng pamilyang Madrigal, Ortigas at Miranda.

Pero hindi nila alam na ang pinakamisteryosong pamilya ay ang pamilya Ayala.

Mayroon silang mahigit isang trilyong piso na asset, pero sobrang tahimik lang nila. Hindi makikita ang mga pangalan nila sa listahan ng mga mayayamang tao.

Hindi lang 'yon, iba rin ang paraan ng pagpapalaki at pagtuturo nila sa kanilang mga anak kumpara sa iba.

Sobrang binigyang-pansin ng lolo ni Mark ang pagpapalaki sa kaniyang mga anak at apo.

Isang halimbawa rito si Mark. Nagsimula siyang mag-aral ng martial arts sa edad na lima at natuto rin siyang mag-piano at mag-violin.

Natapos na niya ang apat na taon ng mga aralin sa business school sa isang unibersidad sa Amerika sa edad na labing-walo.

Para mas mahasa pa ang karakter ni Mark, ipinakasal siya ng kaniyang lolo sa isang second-rate na pamilya, ang pamilya Gutierrez, tatlong taon na ang nakalilipas.

Sa nakalipas na tatlong taon, naranasan ni Mark ang lahat ng uri ng pang-aapi at pagpapahiya sa pamilya Gutierrez. Pinagtiisan niya ang lahat ng 'yon at matagumpay na natapos ang tatlong taong pagsubok.

Plano sana niyang umuwi ngayon at sabihin sa kaniyang asawa na isa siyang bilyonaryo.

“Jade, gusto kong makita kung ano ang magiging reaksyon mo balang araw kapag nalaman mo ang tunay kong pagkatao! ”

Excited na si Mark para doon!

Alas-otso na nang matapos si Mark sa pagde-deliver ng pagkain bago siya nakauwi sa bahay. Nasa isang malaking flat ang kaniyang tinutuluyan sa ika-siyam na palapag.

“Nandiyan ka na pala,” pagbungad ni Jade. “Hindi mo na kailangang magluto ngayong gabi. Nagpa-takeout na ako. Halika na at kumain na tayo.”

Maagang umuwi si Jade para ipaghanda ng pagkain ang kaniyang asawa, na hindi madalas mangyari.

Dahil noon, si Mark ang palaging nagluluto ng pagkain nila.

Nagpalit si Mark ng pambahay na tsinelas at kalmadong sinabi, “'Wag na. Nandito ako para mag-impake ng mga gamit ko.”

Habang nagsasalita siya, naglakad siya patungo sa kaniyang kuwarto.

Hiwalay ang kuwarto ni Mark sa kuwarto ni Jade. Mag-asawa sila sa papel, pero hindi sila kailanman nagtabi sa tulog sa nakalipas na tatlong taon.

Halatang galit na galit si Jade kaya pumasok siya at itinukod ang mga kamay sa kaniyang bewang.

“Ano? Gusto mo pa ring maglayas ng bahay? Dahil lang doon, gano’n ba?”

Patuloy na isinisiksik ni Mark ang kaniyang mga damit sa kaniyang maleta at galit na sinabi, “Dahil lang doon? Sa tingin mo ba maliit na bagay lang ang panlalalaki?”

Hindi na nagpaliwanag si Jade sa pagkakataong ito. Dahil alam niyang kahit ilang paliwanag pa ang sabihin niya, hindi pa rin maniniwala si Mark.

“Oh, ano ngayon!” bulalas ni Jade. “Gusto mo pa bang mag-sorry ako sa 'yo? Kumakain at umiinom ka sa pamamahay ko, dito ka nakatira, kaya kahit na may nagawa ako na kailangan kong ihingi ng tawad, kailangan mong tiisin ‘yon!”

Padabog na isinara ni Mark ang kaniyang maleta at sinabi, “Pinagtiisan ko ang pamilya niyo nang tatlong taon! Pinagserbisyuhan kita na parang prinsesa, pero sa nakalipas na tatlong taon, hindi mo man lang ako tiningnan nang diretso sa mga mata!”

“Pinahiya at ginulpi ako ng nanay mong si Beatrice sa publiko ng ilang beses, at hindi ako kailanman nagreklamo. Wala kayong narinig ni isang salita mula sa ‘kin!”

“Ginagawa rin akong katulong ng tatay mong si Romulo. Pinapagawa niya sa akin ang lahat ng uri ng maruruming trabaho kaya ilang beses din akong nasaktan. Ang perang kinikita ko sa pagde-deliver ng pagkain, napupunta lang lahat sa pagpapagamot ko!”

“Inaapi ako ng tito mo at ng mga anak niya, pero hindi mo man lang 'yon nakita! Kaya mula ngayong araw, ayoko nang magtiis pa. Jade, maghiwalay na tayo!”

Nang marinig na binanggit ni Mark ang tungkol sa pakikipaghiwalay, natulala si Jade at agad na tumawa.

“Ang lakas ng loob mong makipaghiwalay sa ‘kin! 'Wag mo akong sisihin na hindi kita pinagsabihan kapag nakipaghiwalay ka. Hindi ka na makakatira sa malaking condo unit na 'to at hindi ka na makakapagmaneho ng Audi!”

Napangisi si Mark nang may pagmamata. “Malaking condo? Audi? Hindi ko kailangan 'yan!”

“Sige,” pagsang-ayon ni Jade. “Matagal ko na ring gustong makipaghiwalay sa 'yo. Hindi ko alam kung anong kabaliwan ang ginawa ng lolo ko noon at ipinapakasal niya ako sa'yo na isang walang kuwentang tao! Ang pamilya ko ay isa sa mga top-class na pamilya sa bansa, na may higit sa sampung bilyong piso. Walang karapatan ang tulad mong mahirap na maging asawa ko!”

Nag-impake na ng mga gamit si Mark at ayaw na niyang marinig pa ang patuloy na pang-iinsulto nito sa kaniya.

“Sige,” sabi ni Mark. “Bukas ng umaga, pumunta tayo sa Regional Trial Court para mag-file ng annulment.”

“'Wag bukas.” Agad na tumanggi si Jade. “Bukas ang ika-80 kaarawan ng lola ko. Bago mag-alas diyes ng umaga, pupunta ang buo naming pamilya sa bahay ng lola ko para magtipon. Bukod doon, kailangan ko munang sabihin ang bagay na 'to sa pamilya ko.”

Ang kasal ng dalawa ay orihinal na inayos ng mga nakatatanda sa pamilya.

Tatlong taon na ang nakakaraan, wala pang magawa at walang karapatan si Jade para tumutol sa kasal na inayos ng kaniyang pamilya para sa kaniya.

Ngayon, wala pa rin siyang karapatang magdesisyon na makipaghiwalay nang walang pahintulot ng kaniyang pamilya.

Sa mga malalaking pamilya na gaya nila, maraming bagay silang hindi magawa.

Alam din ni Mark na hindi makakapagdesisyon si Jade para sa sarili niya.

“Kung gano’n, ipaliwanag mo 'to sa pamilya mo sa lalong madaling panahon. Hihintayin ko ang tawag mo. ”

Pagkatapos niyon, umalis si Mark bitbit ang kaniyang maleta.

“Bwisit! Walang kuwenta! Kapag nagkahiwalay na tayo, magsisisi ka. Sa loob ng ilang araw, babalik ka ring nakaluhod para magmakaawa sa akin!”

Patuloy na hinabol ni Jade si Mark at pinagmumura ito hanggang sa may p***o ng elevator pero hindi ito pinansin ni Mark at nagwalang-kibo lang.

Dahil alam niya kung gaano katawa-tawa ang mga pinagsasabi nito sa kaniya.

Ang isang taong may daan-daang bilyon na yaman, luluhod at magmamakaawa sa maliliit na pamilya na may ari-ariang isang bilyon lang?

Jade, mag-isip-isip ka na!