Chapter 4 - Bully

Mabigat ang mga patakaran ng pamilya Gutierrez. Sa pinakamagaang parusa, hindi ka makakalakad ng ilang araw. Sa pinakamalala naman ay pwede pang mabali ang mga daliri mo.

Agad ding tinawagan ni Jade si Mark.

“Ano 'yon?” Mabilis na sinagot ni Mark ang telepono.

“Pinapapunta ka ni Lola rito.”

“Ayoko.” Agad na ibinaba ni Mark ang telepono.

Hindi inaasahan ni Jade na tatanggihan siya ni Mark nang ganoon kabilis. Ibinaba niya ang telepono at sinabi sa kaniyang lola, “Ayaw niya pong pumunta.”

Nang mapansin ang nakakailang na sitwasyon, mabilis na nagsalita si Beatrice, “Ma, ika-80 kaarawan niyo po ngayon. Asikasuhin muna natin ang okasyon niyo at 'wag niyo na pong pansinin ang walang kuwentang 'yan.”

Ngunit matigas ang ulo nito. “Kahit sinong pag-aari ng pamilyang ‘to, tao man o aso, ay kailangang magpunta sa oras na inutos ko!”

Pagkasabi niyon, tumingin siya kay Sean. “Apo, pumunta ka at dalhin mo siya sa akin!”

“Sige po.”

Pinatunog ni Sean ang mga daliri niya. Siya ang madalas mam-bully kay Mark kaya susulitin niya talaga ang pagkakataong ito.

Pagkaalis ni Sean, bumalik si Mrs. Gutierrez sa kaniyang kinauupuan, hinawakan ang poodle, at kumalma sandali.

Pagkatapos ay sinabi niya, “Pinapunta ko kayo rito nang maaga ngayong araw dahil may gusto akong sabihin sa inyo.”

Sina Ramil, Romulo, at ang iba pa ay maayos na napaupo, habang naghihintay sa mga tagubilin ng matanda.

“Kahapon lang, mayroon na silang bagong in-assign na chairman sa Roxas Group. Walang nakakaalam kung ano'ng pangalan niya o kung saan siya galing.”

“Tulad ng alam ninyong lahat, matagal nang magkasosyo sa negosyo ang Gutierrez Real Estate at Roxas Group. Kamakailan lang ay nakipag-areglo tayo para sa isang 600 million pesos na investment, pero hindi pa sila nakakapirma ng kontrata. Kaya naman kailangan nating mapanatili ang magandang relasyon sa bagong chairman ng Roxas Group.”

Ang Gutierrez Real Estate ay isa sa mga ari-arian ng pamilya nito. Kabilang dito ang Okada community kung saan nakatira si Jade, na siyang isa rin sa mga d-in-evelop ng pamilya nila.

Ngunit nagkaroon ng problema sa pondo ang Gutierrez Real Estate kamakailan. Kaya naman kailangan na kailangan nila ang 600 million na investment mula sa Roxas Group.

Pagkarinig sa mga sinabi ni Mrs. Gutierrez, alam ng lahat na kung sino man ang unang makakabuo ng magandang ugnayan sa bagong chairman ng Roxas Group at makakakuha ng investment ay makakatanggap ng parangal mula sa kaniya.

Ang parangal na ito ay pwedeng maging promosyon sa posisyon sa kumpanya ng pamilya, o pwedeng direktang nauugnay sa pamamahala ng kumpanya at sa mamanahing ari-arian sa huli!

Unang nagsalita si Romulo. “Ma, ipagkatiwala niyo po sa akin ang bagay na 'to. Gagawin ko ang lahat para makabuo ng magandang relasyon sa bagong presidente ng Roxas Group!”

“Bakit sa'yo ipagkakatiwala?” tutol naman ng kapatid nitong si Ramil. “Ako naman ang ‘laging namamahala sa paghahanap ng pondo, at kami ni Sean ang humahawak nito!”

Nang makitang handang tumulong ang dalawa, napangiti si Mrs. Gutierrez at sinabi, “Ika-80 kaarawan ko ngayon. Ang mga taong pupunta para magdiwang kasama ko ay mga prominenteng tao mula sa iba't ibang larangan dito sa Manila. Habang inaasikaso niyo ang mga bisita, magtanong-tanong kayo tungkol sa bagong presidente. Kung sino ang unang makakakuha ng impormasyon, siya ang mamamahala nito.”

“Opo, Ma!” sabay na sinabi nina Ramil at Romulo.

Umalis si Sean sa villa at pinatakbo ang kaniyang Maserati sa kalsada na nabasa ng tubig-ulan.

Umihit ng sigarilyo si Sean at tinawagan si Mark.

“Ano'ng kailangan mo?” tanong ni Mark.

Narinig ni Sean ang boses ni Mark at tumawa. “Mark, sinabi na sa amin ni Jade ang lahat tungkol sa'yo. Hindi ko inakalang ganyan ka pala!”

Medyo nagulat si Mark. “Sinabi ni Jade... ang lahat sa inyo?”

“Pagkatapos niyang ikwento, grabe ‘yong iyak niya. Talagang tumulo ‘yong laway pati sipon. Mali ring sabihing kasalanan ni Jade. Bakit kasi siya nagpakipot? Hindi man kasingganda ng katawan niya ang katawan ni Shaira, ‘di ba maganda naman siya? Bakit hindi na lang siya pumayag?”

Ang buong akala ni Mark ay umiyak na ito dahil sa konsensiya. Napabuntonghininga na lang siya. “Hayaan na natin ang nakaraan.”

“Nasaan ka? Mag-usap tayo,” tanong ni Sean.

“Nagde-deliver ako ng pagkain dito sa Don Galo.”

“Pupunta ako diyan. Hintayin mo ‘ko.”

Tinapakan ni Sean ang accelerator at nakarating sa Barangay Don Galo sa loob lang ng ilang minuto, sakto para makitang lalabas na si Mark sakay ng kaniyang motor.

Hindi bumaba ng kotse si Sean. Binuksan niya lang ang bintana sa passenger seat, at sinabi kay Mark, “Sumakay ka sa kotse. Gustong makipagkita sa'yo ni lola.”

Ang buong akala ni Mark ay makikipagkita ang matandang ginang para magmakaawa para sa kaniyang apo.

Madiing sinabi ni Mark, “Kahit magmakaawa pa ang lola mo para kay Jade, walang mangyayari. Tuloy ang annulment na 'to!”

Nagtatakang tumingin si Sean sa kaniya. “Ano'ng pinagsasabi mo, boy? Magmamakaawa sa'yo ang lola ko? Gusto ng lola ko na parusahan ka!”

Dahil sa nakakasilaw na sikat ng araw, halos hindi maidilat ni Mark ang kaniyang mga mata.

Sobrang nagulat si Mark. “Paparusahan ako ng pamilya niyo? Bakit?”

Galit na minura siya ni Sean. “Bakit? Naghanap ka ng ibang babae, tapos magtatanong ka pa kung bakit? Oo, gusto kong nakikitang nagkakaganito si Jade pero myembro pa rin siya ng pamilya namin. Kaya kung may nagawa kang kasalanan sa pamilya ko, dapat lang na parusahan ka!”

Natulala si Mark. “Naghanap ako ng ibang babae? Sinabi ‘yon ni Jade?”

Hindi kailanman inakala ni Mark na pagkatapos siyang lokohin ni Jade ay ibabaling pa nito ang sisi at ipapahamak siya!

Napakawalang-hiyang babae!

May hangganan dapat ang panggagago sa tao!