Chapter 6

Chapter 6

"Alam ko namang smiling face ka Dahlia, pero parang nasobrahan yata? Kanina ka pa talaga nakangiti. Di ba nangangawit labi mo?" untag ni Liam na nasa gawing kanan niya habang nasa library sila at busy sa pagriresearch.

"Pansin ko rin," salo ni Nathalie na nakaupo sa harapan niya at bahagyang ibinaba ang binabasang libro.

"Tipong malapit nasa pagkabaliw," pabungisngis na sabi ng beking si Peachy at nag-appear pa ang mga ito ni Nathalie.

"Heh!" saway niya sa pang-aasar ng mga ito.

"Ssshhh! Mapagalitan tayo," saway agad ni Liam.

"Wanna know why I'm smiling like a crazy? You wouldn't believe it pero pumayag na kasi si Shaun Dale na magdate kami this coming Saturday!" taas noong pagmamalaki niya sa mga kaibigan.

"Weh? Talaga?" halos sabay pa na react ni Peachy at Nathalia.

"Oo! Hay naku! Ang saya-saya ko talaga. Halos hindi nga ako makatulog nang pumayag siya," kinikilig na kwento niya.

"Buti naman kung siputin ka niya?" kontra ni Liam kaya nawala ang ngiti niya.

"Bakit hindi? Tingin ko naman may isang salita siya 'no! Can't you just be happy for me? Ito na oh! Magdidate na kami. Ang tagal kong hinintay 'to!"

"Ay kami happy for you! Grabe girl. Ang laki na ng progress ha? Congratulations!" paanas na sabi ni Peachy.

"Oo nga. Me too! I'm happy for you. Malaking progress na 'yan," ani Nathalie.

"Thanks Nat, Peachy. Medyo kabado nga ako. Alam niyo 'yon? First time 'to. Imagine kaming dalawa lang on a date? Gosh! He can't stand by me even in a few minutes kasi nga asar siya sa'kin, tapos masosolo ko siya bigla? Imagine that!"

"Oo nga. Oh, tip lang, ah? ' Wag mo na masiyadong harrasin. Baka umatras bigla kalagitnaan ng date niyo. Ikaw rin..." ani Peachy.

"Oo nga girl, hinay-hinay lang. Pasweet ka ng konti. Malay mo magustuhan ka pag nagpakademure ka ng konti di ba?" segunda ni Nathalie.

"Listen to them. You're on a date. Kayong dalawa lang. Baka mamaya kalalambing mo diyan kay Shaun Dale na 'yan magtake advantage na sa'yo. Lugi ka. At baka makapanapak ako pag nabastos ka," seryosong ani Liam.

Lihim siyang natawa sa sinabi ni Liam. Ano pa nga ba? Tinablan nasa kanya si Shaun. They just made out inside her car nang hamunin niya ito.

Kaya nga malakas ang loob niyang yayain ng date ang binata dahil ramdam niyang kahit paano ay nagulo na niya ang sistema nito. Proven na pumayag nga ito sa date na request niya.

Itutuloy-tuloy na lang niya ang paglapit-lapit sa binata hanggang sa tuluyan na itong mahulog sa kanya.

Napangiti siya sa huling naisip. Mukhang hindi na imposibleng mainlove sa kanya ang isang Shaun Dale Villamor.

"Thanks for the concern Liam but I can take care of myself. Siya talaga itong dapat na mag-ingat sa akin..." biro niya kaya tawanan talaga ang dalawang kaibigan niya.

"Ang manyak ng dating mo Mars!" tawa ni Peachy.

"Seryoso? Bakit gustong-gusto mo siya? Ang daming lalaki diyan na may gusto sa'yo at iti-treat ka ng tama. Hindi 'yong kababae mong tao ikaw pa ang naghahabol? Hindi ka ba napapagod?" madilim na ang mukhang basag ni Liam sa masayang mood nila.

Bahagyang nawala ang ngiti niya. Ilang beses na nga naman kasi siyang sinasaway nito tungkol sa kahibangan niya kay Shaun Dale.

"Alam ko concern ka as a friend. And thank you. Pero ikaw? Di ka ba napapagod kaka-advice sa'kin? Alam mo, ninyong lahat na bata palang ako si Shaun Dale na ang love ko. I'm very much aware that he doesn't like me but what can I do? Susuko na lang? Tingnan na lang siya sa malayo? Hoping for the day na lingunin niya ko na wala man lang akong ginagawa? Heck no. Hindi pa ko pagod. Kaya ko pa. Kaya wag ka ng mag-alala sa'kin okay?" nagseryoso na ring aniya.

Hindi ito nakasagot.

"Ganito na lang. Since may time frame din naman ang pact namin ni Shaun Dale, itong dating stage namin for two months, kapag ito hindi talaga nagwork, itataas ko na ang white flag. Nabigyan kasi ako ng chance to prove to him na ako ang para sa kanya, so I took the chance. Kasi why not? Malay niyo magwork, eh, di masaya. Pero kung hindi pa rin, samahan mo na lang akong magmove on para hindi ka na worried. Keri?" tanong pa niya kay Liam.

Napabuntong hininga ito at tumango.

"Okay sige. Aabangan ko yan. At least ngayon may ultimatum ka na para sa sarili mo. Handa ko na ba shot puno?" nakangiti ng biro nito kaya hinampas niya ito sa balikat.

"Ang sama mo. Parang sure na sure ka diyang hindi siya magkakagusto sa'kin ah? Remember mas closer na siya sa'kin ngayon."

"Alam ko. Pero mas nagiging close na rin siya kay Lauren. Sabi pa sa'kin ng pinsan kong 'yan invited niya si Villamor sa birthday niya next month. At doon niya sasagutin para maipakilala niya rin kina Tito. Kaya tingin ko hindi aabot ng 2 months yang dating stage niyo, dahil next month magiging official na sila. Ano pa laban mo dun?"

Naalerto siya sa kwento ni Liam.

"OMG! Mars! Umiksi na ang time frame mo para akitin si Papa Shaun. Next month! Next month!" tila mas nataranta pa na reaction ni Peachy.

"Kailan birthday niyang si Lauren?" tanong ni Nathalie kay Liam.

"22."

"Oo nga Mars! Double time para mabihag mo si Shaun!" inalog pa ni Nathalie ang braso niya kaya napalunok siya sa pagkataranta.

"This can't be happening..." halos matulalang sabi niya.

"Tick tock tick tock, your time is running girl!"

"Ang problema na lang ay kung maaga niyang sagutin si Shaun..." dagdag stress na sabi ni Peachy.

"Hindi 'yan. Strikto si Tito. Papa ni Lauren. Sundalo kasi 'yon. Kabilin-bilinan niya sa mga anak niya na kapag makikipag-gf or bf dapat dalhin sa bahay para makilatis niya. Kaya hindi pa naman siguro kaso ewan ko lang din, medyo unpredictable din kasi ugali ni Lauren, ano ba naman 'yong isikreto na lang muna nila, ano ba namang malay ni Tito dun di ba?" ani Liam kaya mas lalo siyang nastress.

Napatakip siya sa tenga at napatayo.

"Saan ka pupunta?" maang na tanong ni Nathalie nang samsamin niya ang mga gamit niya sa ibabaw ng table at ipagsasaksak sa bag niya.

"Going home. Bye!" kaway niya sa mga ito.

Nastress talaga siya ng bongga. Wala ng 2 months ang palugit niya para makuha ang loob ni Shaun Dale.

Aabot kaya siya? Can she make him fall in love with her in a month? Ano kaya kung maghubo na siya sa harapan nito? Char!

Imposible! Sigaw ng utak niya.

Bata palang sila nagpapacharming na siya dito pero hindi talaga siya pinapatulan. Dekada na iyon. Iyon pa kayang 1 month?

Nakailang girlfriend na si Shaun Dale at kapag may girlfriend ito ay nananahimik siya sa isang sulok. Nagmumukmok. Tila nagiging shield nito ang mga nagiging girlfriend para hindi niya ito kulitin.

Hindi niya kasi ugaling mang-agaw. Ayaw niyang may masagasaan para lang sa sarili niya. In short hindi siya balat ahas.

Kaya inaabangan na lang niya na maging single ulit ito saka siya ulit eentrada. Pero palagi naman siyang bigo. Ang tagal na niyang nakapila pero palagi siyang nasisingitan.

Ngayon pa kaya na mukhang magkaka-girlfriend na naman ito? At parang mas seryoso pa kasi ipapakilala sa parents.

Laban! Hiyaw naman ng puso niya.

Oo nga! Nakaabante na siya. Ngayon pa ba siya susuko? May chance na siya. Dating na nga, eh. All she have to do is give her best to win his heart.

Bumigay na ito sa halik niya kaya dapat ituloy-tuloy na. Isa pa, same level lang sila ni Lauren. Hindi pa nito boyfriend si Shaun Dale.

Pero dapat mas mapabilis ang kilos niya. Mahirap na, baka maunahan na naman siya. Kapag nangyari iyon ay maghihintay na naman siya sa kawalan kung kailan ulit mawawalan ng girlfriend si Shaun para makaporma siya.

Sa lalim ng iniisip ay hindi na niya namalayang may nakabunggo siya pagliko niya sa hallway.

Bumagsak sa sahig ang chessboard na hawak ng nakabangga niya kasama ang mga chessman.

"I'm sorry!" tarantang aniya at dagling yumukod para pulutin ang mga nalaglag na chessman ng kung sinumang nakabunggo niya.

"Ang clumsy mo talaga..."

Kaagad siyang napatingala sa nagsalita dahil pamilyar sa kanya. Speaking of which...

"Shaun Dale. Ikaw pala yan?" nag all smile siya at awtomatikong nagtatalon ang puso niya.

What are the odds right? She's so lucky dahil kanina pa nga niya ito hinahanap.

"Sige na okay na. Ako na diyan," pormal na pigil nito sa ginagawa niya. Yumukod din ito at kinuha sa mga kamay niya ang chessman para ibalik sa loob ng chessboard.

Napapitlag pa siya ng bahagya dahil nadagil ng mga daliri nito ang daliri niya. Ahhh...ang lakas talaga ng effect nito sa kanya.

Kaya hindi niya alam kung paano niya nasurvive makipagmake out dito ng hindi nahihimatay.

"Wag mo nga akong titigan ng ganyan. Para kang sira..." saway nito at nagmamadaling kinuha sa sahig ang ibang mga nagkalat na chessman.

Napakurap siya dahil tinitigan na pala niya ito ng hindi namamalayan.

Nang makuha nito lahat ay tumayo na ito at isinara ang chessboard.

Tumayo na rin siya at hinarap ito. She did her best to be at ease. Sa gwapong mukha palang nito parang nauutal na siya.

"Ahhh..."

Umangat ang dalawang kilay nito dahil wala siyang masabi. Sa totoo lang nahiya siya dito bigla nang maalalang hinalikan niya ulit ito at sinabihan pa ng I love you nung isang araw. Hay ang kapal talaga ng mukha niya, eh.

"B-Busy ka?" sa wakas nakapagsalita din siya.

"Oo."

Wow! Diretso ang sagot ah? Di naman halatang ayaw nitong makasama siya.

"Ahhh...San punta mo? Sama ko!" pangungulit niya nang mahamig ang sarili.

"May practice ako ng chess. Hinihintay ko lang mga kasama ko."

Pambato kasi talaga ito ng school kapag may contest ng chess. At madalas champion ito.

Nilagpasan na siya nito. Nakaramdam naman siya ng lungkot at naalala ang sinabi ni Liam.

'Ang daming lalaki diyan na may gusto sa'yo at iti-treat ka ng tama...'

Napabuga siya ng hangin habang habol ng tingin si Shaun Dale. May point naman ang kaibigan niyang iyon. Is it really worth it na humabol-habol pa kay Shaun Dale kahit na halata namang ayaw nito sa kanya?

Nangilid kaagad ang luha niya. Anong pinagkaiba niya sa asong sunod nang sunod? Hayyy...wag munang ipilit ang sarili for today's video.

She's about to leave...

"Dahlia."

Tinawag siya ni Shaun kaya napalingon kaagad siya.

"Y-Yes?"

"Akala ko ba sasama ka? Bakit nakatayo ka lang diyan?"

Sumikdo kaagad ang puso niya sa sinabi nito. Dagling nagliwanag ang mukha niya.

"I-I thought you're busy?"

"Oo. Kaso wala pa naman sila. Punta muna kong canteen, ikaw bahala ka kung ayaw mo."

"Ay hindi sama ko!" nagmamadaling humabol siya dito at pasimpleng pinunasan ang gilid ng mata.

All smile siya habang naglalakad kasabay ito.

Mukha ayaw ng universe na pasukuin siya.

Eh, di lavarn!