الحلقة 6

في أحد الكافيهات،

جاسم: "عوزانا نروح المستشفى ليه؟ أنا بكره الأماكن دي يا جنا."

جنا: "قولتلك صاحبتي هناك، هي تعبانة وأنا عاوزة أزورها."

جاسم: "بس المصحة مش مكان كويس إننا نروح عليه."

جنا: "براحتك، أنا رايحة الأسبوع الجاي، عاوز تيجي أوكي، مش عاوز كمان أوكي."

جاسم بتنهيد: "خلاص هروح."

جنا: "وبعدين قريبتك هناك، أنت قولتلي كده."

جاسم: "آه هناك، بس حتى أنا معرفش شكلها، مرحتش مع جدتي عندها علشان حضرتك كنتي مخنوقة وعاوزة تخرجي."

جنا: "أهي فرصة نطمن عليها هي كمان."

جاسم: "ههههه لا انسي، أنا مليش دعوة بكل الحوارات دي، أنا هاجي معاكي أنتِ، مليش دعوة بيها."

جنا: "براحتك."

في صباح يوم جديد، صباح مشرق تقريبًا،

في المصحة،

سليم: "جاهزة يا أميرة لتعليم المشي؟"

هزت راسها.

راحلها وطوق خصرها وساعدها علشان تقوم من على السرير، وبدأت تتعلم المشي وهي شايفه سالي قدامها بتخطو بخطوات بتساعدها علشان تتعلم أسرع.

أميرة بدأت التعلم وبدأت تحرك رجلها بهدوء، تحت ابتسامة سليم ليها، فأخيرًا تدريبه ليها جاب نتيجة حلوة، كمان هي سريعة التعلم، لو فضلت على الحال ده قريب جدًا هترجع لحالتها الطبيعية.

بعد محاولة قعدت لساعات ورا بعض من المشي وفهم الحاجات اللي حواليها من أدوات، بقت تتحرك لوحدها كويس من غير ما حد يساعدها.

راح سليم علشان يقف جنة الباب وشاورلها إنها تقرب منه.

هزت راسها بابتسامة وراحت ناحيته، كانت هتقع أكتر من مرة بس لحقت نفسها، أصلاً سليم ماتحركش خالص من مكانه سبها تعتمد على نفسها .

سالي: "دكتور سليم كفاية عليها كده، جسمها هيوجعها."

سليم: "بالعكس، هي دلوقتي نشيطة، بصي في عينيها وأنتِى هتشوفي الحماس."

سالي: "بس الحمد لله هي سريعة في التعليم."

سليم: "لو فضلنا كده لفترة كويسة، قبل الشهر هنكون وصلنا لنتيجة أحسن بكثير."

قربت منه أميرة وحضنته، احم بالحقيقة هي كانت هتقع بس وقعت عليه هو، هي جت كده! ابتسمت وهي بتبصله، وهو ابتسم ليها كمان.

بعد شوية دخلت أنهار وابتسمت وهي شايفه أميرة بتمشي، وبصت لسليم وسالي بابتسامة.

أنهار: "صباح الخير."

بصوا كلهم ليها.

قربت أنهار من اللي بتبص ليها بسكات.

أنهار: "هاي يا ملاكي، أنا أنهار خالتك."

ابتسمت ليها أميرة.

أنهار: " يا عمرى   قمر حتى وأنتِى بتضحكي."

سليم: "أنا هسيبكم مع بعض شوية، آنسة أنهار أي حاجة تحصل نادي عليا."

هزت راسها ليه.

جيه يخرج فاختفت ابتسامة أميرة وراحت علشان تمشي وراه، بس إيد أنهار منعتها، فبصت ليها بغضب وبعدتها عنها.

أنهار: "دكتور سليم!"

وقف لأنه كان خلاص هيخرج، لقى أميرة وراه وبتبص لأنهار بغضب.

سليم: "أميرة، أنتِى هتفضلي مع خالتك شوية."

بصتله بغضب وهزت راسها بـ لأ.

سليم: "أنا كده هزعل منكِ."

بصتله وبعدين ربعت إيديها قدام صدرها وبصتله.

سليم: "أميرة، بطلي عند واسمعي الكلام."

هنا ولأول مرة تتكلم معاهم،

أميرة: "لا."

ابتسم سليم وبصلها: "قولي تاني كده، اتكلمي."

أميرة بصتله بسكات وراحت على سريرها ونامت عليه وتغطت بالغطا.

أنهار بسعادة : "هي بدأت تتحسن؟"

سليم بسعادة: "علمتها المشي، الإشارة والكلام كنت هبدأ فيه بكرة، بس الواضح إنها خدت الخطوة دي لوحدها دلوقتي، كده أسبوع كمان وتكون خلصت العلاج."

أنهار بسعادة: "ريهام هتفرح أوي أوي لما تعرف إن حالة أميرة بتتحسن أوي بالشكل ده."

سليم: "ياريت تبلغيها تيجي بكرة، هنعمل محاولة تاني بكرة."

أنهار: "أكيد المرادي هتقبل وجود أمها حواليها."

سليم: "ياريت، أنا متفائل."

في المساء في قصر الزاهي،

دخلت بشموخ وغرور، عندها منه كتير أوي.

شريف: "أهلاً بأختي الغالية، نورتي مصر بعد الغيبة الطويلة دي."

شيرين بكبرياء: "أنا جيت علشان أطمن عليكم وأشوف ريهام وبنتها."

جت ريهام ومعاها أمها.

ريهام: "عمتو!" وراحت ناحيتها وحضنتها.

شيرين: "كل ده غياب؟ ولا كان ليكي أهل!"

ريهام وطت راسها للأرض.

شريف: "الماضي فات واتنسى."

شيرين وهت بتهز راسها: "هممم، فين بنتك؟ هي اسمها إيه؟"

ريهام بابتسامة: "أميرة."

شريف حكى ليها الحكاية من الأول.

شيرين: "همم كويس إنها بقت بخير، هنشوفها امتى؟"

هنا دخلت أنهار: "قريب أوي يا عمتو، أنا كنت عندها دلوقتي."

ريهام: "هي عاملة إيه دلوقتي؟"

أنهار: "مش هتحصدي، بتمشي لوحدها وكمان بدأت تتكلم، دكتور سليم بيقول أسبوع بالكتير وترجع أحسن من الأول."

ريهام بسعادة: "الحمد لله أخيرًا، دا أنا كنت هموت على ما تتحسن."

أنهار: "دكتور سليم عاوزك تروحي بكرة تشوفيها."

ريهام: "أكيد هعمل كده."

شيرين: "ومين دكتور سليم ده علشان يتحكم فيها ويقول تشوف مين وماتشوفش مين؟"

ريهام: "عمتو، دكتور سليم بيكون الدكتور المسؤول عن حالة بنتي، ليه عندي جميل كبير لو قعدت أسددهوله طول حياتي مش هوفيه حقه."

شيرين: "زيه زي أي دكتور عادي، مش فارقة."

ريهام بهءوء وابتسامة: "غلط، بالنسبالي هو ملاك، أنا لفيت على دكاترة كتير وكبار بس كلامهم كان واحد، نسبة رجوعها 50% ويأسوني من حياتي ومن رجوعها ليا، إلا الدكتور سليم هو الوحيد اللي اداني الأمل وقالي إنها بإذن الله هترجع، وتعب أوي لحد ما الحمد لله بنتي بخير، وده لوحده يديني كامل الثقة فيه."

شيرين: "علي ابني كمان دكتور وأنا هخليه يمسك المهمة دي، هو هياخد باله منها."

ريهام بحزم بس مع ابتسامة: "آسفة يا عمتو، بنتي مرتاحة مع دكتور سليم."

شيرين بغيظ: "أنتِ بتتحديني يا ريهام؟"

ريهام: "خالص، أنا بشرح لحضرتك، واللي خلاني مشيت ورا قلبي وبعدت عن البيت يخليني أعمل كده وأكتر من كده تاني علشان بنتي أميرة، مش بنتي بس دي دنيتي كلها، مش هسمح بالتحكمات والقيود اللي كانت خنقاني هنا قبل ما أسافر تتكرر تاني مع بنتي، أنا آسفة بس معنى كلامي بنتي اتعودت تعمل اللي هي عاوزاه وأنا اتعودت أعملها كل اللي هي عاوزاه ومش هيتغير ده، علشان مكنش بزعل حضرتك أنا هستنى أسبوع لحد ما تتعود عليا وبعد كده هعرض عليها دكتور علي، وافقت تمام، رفضت مش هسمح إنها تتجبر على حاجة أبدًا مهما حصل."

بصت ليها شيرين بغيظ وبعدين راحت على أوضتها بغرور.

منال: "ليه كده يا بنتي؟ أنتِ كده بتعادي عمتك."

شريف: "لا هي صح، أنا كنت خايف من إن طبع شيرين بالتحكم لسه بيأثر على ريهام زي الأول، بس اتفاجأت من رد الفعل."

ريهام بهدوء وحكمة: "بابا الموضوع مش كده، كل الحكاية إن أنا أم اتعلمت إزاي تربي بنت لوحدها واتعذبت جدًا من الوضع اللي هي كانت فيه، فمش بعد ما رجعتلي وبقت بخير هقبل إنها تضيع مني، دكتور سليم قالي إن سبب حالتها كان إنها خافت من حاجة حصلت معاها وخلتها حابة تهرب، والطريقة الوحيدة هي إنها نامت ورفضت إنها ترجع تصحى، وأنا مش هسمح ليها ترجع تاني للحالة دي مهما حصل، حتى لو اضطريت المرادي أمشي ومرجعش تاني."

منال: "إيه الهبل اللي بتقوليه ده يا ريهام؟ عاوزة تبعدي عني تاني!"

شريف: "أنا معاكي في كل حاجة أنتِ شايفاها صح."

هزت راسها ريهام بشكر لأنه واقف في ظهرها وبيشجعها، وحلفت تقف في وش أي حد هيقرب من بنتها.