الحلقه 9

أميره شدت فى حضن جدها بسكوت تام.

بعد يومين، فى بيت سليم.

كان قاعد فى أوضته بيشتغل، لحد ما دخلتله والدته.

نبيله: سليم.

ساب اللى فى إيده، وبصلها وهو مبتسم: خير يا ست الكل؟ أمرك.

نبيله، بعد ما قعدت قدامه، مدتله إيدها بصورة: مين دى يا سليم؟ أنا لقيت الصورة دى فى جيبك.

سليم بتوتر: دى... دى...

نبيله بابتسامة: مين؟ اتكلم يا واد، أنا أمك واتمنالك كل خير، قول يا حبيبى متتوترش.

قام سليم ناحية الباب وقفله.

نبيله: يااه، الموضوع خطير أوى كدا؟

سليم، بعد ما قعد قدامها: انتى عارفة بنتك، بعد ما جات هنا علشان تستقر مع جوزها، وهى على طول حاشرة مناخيرها فى كل حاجه.

نبيله: هههههه، هى طول عمرها كدا، يلا قولى بقى مين دى؟

سليم بابتسامة: أميرة.

نبيله: اسم على مسمى، أميرة وهى فعلًا أميرة، بس مين بقى؟

سليم: أنا أعرفها من وقت طويل، و...... وحكالها كل الحكايه.

نبيله بمعاتبة: كدا يا سليم، تسيب البنت وهى بالحالة دى؟ إشحال انت كنت بتقول إنها صاحبتك، بغض النظر عن إن انت عارف إن ده غلط وإن مافيش صداقة بين ولد وبنت، بس برده انت تعرفها من سنة، ده ينفع؟ تسيبها فى الوضع ده؟ هى دى جدعنة شاب مع بنت بلده فى الغربة يا ابنى؟

سليم بحزن: غصب عنى والله، كان لازم ألحق الطيارة، مكنتش أعرف إن هيحصل معاها كدا.... وكملها كل الحكايه.

نبيله بحزن: يا حبيبتى يا بنتى، أكيد كانت أمها يا عينى منهارة، وجعة القلب على الضنا وحشة يا سليم.

سليم: طبعًا، مش بنتها الوحيدة.

نبيله: عينى عليكى يا بنتى.

سليم: حاليًا هى رجعت زى الأول، وشوية شوية هتبقى أحسن من الأول.

نبيله: بإذن الله، بس انت بتحبها صح؟ اللى يخلى صورتها فى جيبك، يبقى لازم بتحبها.

سليم بحزن: للأسف آه.

نبيله: للأسف ليه بقى؟

سليم: أنا فين وهى فين؟ يا أمى، أميرة حلم بعيد أوى، نجمة بتمناها، بس صعب أوصلها.

نبيله: انت فين إيه؟ إيه الكلام ده يا سليم؟ انت أشطر دكتور وأحسنهم يا حبيبى، حالتنا المادية كويسة، والاجتماعية كمان، وإحنا ناس كويسين، ولا يمكن نأذى بنات الناس.

سليم بتنهيدة: أنا وانتى وعارفين كل ده، بس هل هما بيفكروا كدا زينا؟

نبيله: ربنا يكتبهالك وتكون من نصيبك يا ابنى.

سليم: آمين.

فى اليوم التانى، فى مكتب سليم.

حضر شريف أبكر شوية عن موعد زيارة حفيدته، لكنه فى الأصل كان جاى علشان سليم.

دخل سليم، بعد ساعة من تأدية شغله، للمكتب، واتفاجئ لما شاف شريف.

سليم باستغراب: أهلًا شريف بيه، حضرتك هنا من إمتى؟

شريف: من نص ساعة، كنت جاى علشان عايز أتكلم معاك شوية، هل فاضى علشان نقدر نتكلم، ولا أجى فى وقت تانى؟

سليم بابتسامة: يا خبر، إيه الكلام ده؟ لا طبعًا فاضى، ولو مش فاضى أفضى، لحضرتك.

بعد ما قعدوا.

شريف: فى الحقيقة، أنا كنت جاى أسألك على رأيك فى أميرة، وبكل صراحة أنا شخص صريح، ومش بحب المجاملات ولا اللف والدوران.

سليم باستغراب: آسف، مش فاهم، يعنى إيه رأيى فى أميرة؟

شريف: يعنى إنت بتشوفها إزاى؟

سليم بعدم فهم: بشوفها إزاى؟.... يعنى اللى هو عادى، هى مريضة عندى، وأنا الدكتور المسؤول عنها.

شريف: بس؟

سليم: أنا شاكك إن حضرتك بتلمح لحاجة أنا مش قادر أفهمها لحد دلوقتى.

شريف بغموض: يعنى حاجة زى كده.

سليم: طيب، ممكن حضرتك تشرحلى أكتر علشان أقدر أكون متفاعل معاك؟ لأنى بجد مش فاهم حضرتك عاوز توصلى إيه.

شريف: إنت تعرف أميرة من زمان، صح؟ من تصرفاتها معاك وتعلقها بيك يدل على إنها ماتعرفكش لسه من قريب، كأنها تعرفك من وقت بعيد، علشان كده متمسكة بيك.

ظهر التوتر الشديد على ملامح سليم، وده أكد لشريف ظنونه.

سليم بتوتر وهدوء: قصد حضرتك إيه؟ أنا مش فاهم.

شريف: لا، إنت فاهمنى عالى كويس، والدليل على كلامى توترك ده.

سليم بتنهيدة: حضرتك، دى كانت حكاية قديمة، مافيش داعى نقلب فى القديم.

شريف: معلش، ريحنى واحكيلى، مش يمكن يكون ده فيه فايدة ليك؟

سليم هز راسه، وبدأ يتكلم، وسردله كل الحكاية بدون اختصار.

شريف: كنت متأكد إنك تعرفها، لأنها حتى لو مش فاكراك، بس متمسكة بيك لحد دلوقتى.

سليم: ممكن أعرف إيه الداعى دلوقتى نفتح مواضيع قديمة؟ وأحداثه ماتت مع السنين.

شريف: أنا شوفت قد إيه أميرة متعلقة بيك، وأنا الحقيقة مش حابب إنى أخسرها هى وبنتى تانى، كفاية عليا فراق الـ18 سنة دول، كفاية أوى، مش حابب أرجع أحس الإحساس ده تانى، والمرادى الخسارة أكبر، المرة الأولى كانت بنتى، والمرة دى زاد عليها حفيدتى.

سليم: تمام، بس أنا لسه لحد دلوقتى مش فاهم حضرتك عاوز إيه، أو أنا المطلوب منى أعمل إيه؟

شريف: بص، أنا فكرت كتير، وشوفت إن أنسب حل هو القرار اللى أنا أخدته، وكنت حابب أسمع رأيك فى القرار ده بدون إجبار، إحنا لسه بنتشاور.

سليم: تمام، بس إيه هو القرار ده؟

شريف: القرار، فى مصلحة أميرة، هو إنك تتجوزها.

بصله سليم بصدمة: أتجوزها... اتجوزها إزاى؟ مش فاهم.

شريف: إنت دلوقتى، من شوية، قولت إنها كانت أعز صديقة عندك من زمان، وإنك اتعرفت عليها لما كانت فى بعثة لفرنسا.

سليم: مظبوط.

شريف: أنا متأكد دلوقتى إن الصداقة دى أساسها الحب، ولا إنت رأيك إيه؟

سليم بتلعثم: هو.... أصل... أنا...

شريف بابتسامة: نقول مبروك؟ أنا فعلًا حابب إنك تاخد بالك منها، إنت أنسب حد ليها، أكتر حد بيقدر يفهمها، أكتر حد ممكن يقدر يحميها، لأنك أكتر واحد هى بتثق فيه، وأنا متأكد إن العالم اللى برا دى لا يمكن يفهم هى بتمر بإيه قدك إنت.

إنت الوحيد اللى هيقدر يشرحلهم هى بتمر بإيه، وعلشان كده إنت الوحيد اللى أنسب ليها.

سليم: ممكن أعترف لحضرتك بحاجة؟ ماحدش يعرفها غير اتنين بس، حضرتك ووالدتى.

شريف: اتفضل.

سليم: أنا فعلًا بحب أميرة، بس إحساسى بالذنب بعد ما سبتها فضل ملازمنى لحد النهارده، خايف ما أقدرش أحافظ عليها، خايف أخذلك حضرتك وثقتك فيا.

شريف: أنا واثق فيك، تأكد عمر نظرتى فى اللى حوليا ما كانت بتخيب، وأنا شايف فيك الراجل الصح، وأنسب اختيار لحفيدتى.

سليم بتنهيدة وابتسامة: أنا موافق، بس أخبار مدام ريهام إيه فى القرار ده؟

شريف: لسه ماقولتلهاش، بس هقولها فى أقرب فرصة، أهم حاجة تقنع والدتك، وأنا هعلن الخبر ده يوم الحفلة.

سليم بابتسامة: بإذن الله.

     ♡:--------------®----------------:♡

فى أوضة أميرة، كانت واقفة قدام المراية، وهى باصة لهيئتها بإعجاب.

كانت لابسة هدوم شيك.

أميرة بإعجاب: واو مامى، الاستايل جامد، أنا حبيته، البراند دى جديدة صح؟

ريهام بضحكة: الاستايل ده مناسب ليكى جدًا، ويا مجنونة الموضة، آه البراند جديدة.

أميرة: فعلًا، أنا حبيته، بفكر أشترى كام حاجة كمان من عندهم.

هنا دخل سليم ومعاه شريف.

كان سليم باصص لأميرة بإعجاب، لكنه رافض تمامًا إن حد يشوفها بالشكل ده، ولما بيفكر إن العيون هتكون عليها، الغيرة بتولع فى عروقه.

أميرة بسعادة: هاى جدو.

ثم زادت ابتسامتها: هاى سليم.

شريف بابتسامة: قلب جدو، ريهام تعالى، عاوز أتكلم معاكى.

أومأتله، وراحت وراه.

قربت أميرة من سليم: إيه رأيك؟ حلو صح؟.. مامى زوقها يجنن.

كانت مبتسمة باتساع.