الفصل الثالث والثلاثون

دلفت إلى الغرفة لتجمد الدماء في عروقها..

كان هناك شخص غريب، يمسك بحقنة ويفرغ سائلاً في المحلول المغذي لعاليا! لم يكن طبيباً! دب الرعب والذعر في أوصالها، واقتربت بخطوات مرتجفة لتتبين ملامحه..

"أنت مين؟!".. صرخت ليلى وهي تدرك الصدمة.. مهلاً، إنه هو! مازن!

بسرعة البرق، ضغطت على زر الطوارئ، وحاولت بكل قوتها نزع الأنبوب من يد أختها. حاول منعها والهجوم عليها، فارتفع صراخها يملأ الممر. هرع الممرضون ودخلت الممرضات ونادوا الأطباء والأمن، وقاموا بتكتيفه وشل حركته، ثم اتصلوا بالشرطة فوراً.

صاحت ليلى وهي تنشج بالبكاء: "شوفها بسرعة يا دكتور! أنا شفته بيحطلها حاجة في السيروم!".

طمأنها الطبيب وهو يتفقد الأجهزة: "اهدي يا ليلى وتماسكي.. إحنا فحصناها، هو ملحقش يوصل السائل لجسمها لأنك فصلتيه بسرعة فائقة. هاتولها حاجة تهديها.. متقلقيش إحنا طلبنا الشرطة وهتوصل حالاً".

وصلت الشرطة واقتادت مازن مكبلاً، وتوجهت ليلى للإدلاء بشهادتها بينما فرض الشرطي حراسة مشددة على غرفة عاليا. اتصلت ليلى بأهلها بصوت يرتجف لتخبرهم بما حدث.

في مكتب التحقيق، قال الضابط برفق: "اهدي بقى واحكي لي إيه اللي حصل بالظبط".

تحدثت ليلى والدموع تنهمر كالمطر: "مازن اتصل بيا وقالي انزليلي تحت، ولما نزلت ملقتهوش. رنيت عليه مردش، قلت يمكن مشي وطلعت.. معرفش ليه حسيت بقلق فظيع! ولما دخلت الأوضة لقيته بيحقن المحلول المغذي بتاع عاليا بحاجة. معرفتوش في الأول وفكرته دكتور بس مكنش لابس بالطو، وكمان افتكرت إن ده نفس التيشرت اللي كان لابسه الصبح لما اتقابلنا!".

جهشت بالبكاء وتابعت بصوت متقطع: "مكنتش.. مكنتش اتخيل إني قاعدة مع اللي حاول يقتل أخت ويعتدي عليها! دلوقتي بس عرفت وفهمت إني أنا اللي ساعدته في ده من غير ما أحس! كنت بحكيله تفاصيل كتير عن البيت وعن عاليا، وكان دايماً بيسأل عنها وسط الكلام.. واليوم اللي حصل فيه ده، أنا اللي قولتله إنها راجعة من السفر ومفيش حد في البيت! وأنا كمان اللي قولتله الصبح إن الشك في حازم وحسام بيقل، وعاليا قربت تفوق وهتقول مين اللي عمل كدا.. علشان كدا جه يحاول يقتلها تاني ويموت السر!".

أنهت كلامها وانخرطت في نوبة بكاء مريرة. شعر الضابط بشفقة بالغة نحوها؛ فقد خدعها من أجل الوصول لأختها، وصدقته المسكينة. فكر الضابط رامي في نفسه: "يا لها من فتاة رقيقة.. كيف طاوعه قلبه أن يفعل بها هذا؟ مهلاً يا رامي.. ما الذي تفكر فيه؟ أنسيت القضية وشُغلت بالفتاة؟ ليس هذا الوقت المناسب!".

تنحنح قائلاً بجدية: "متقلقيش يا آنسة ليلى، هو خلاص بقى معانا وهنحقق معاه وهنجيب حقها وحقك إنتي كمان. وكدا كدا كنا هنجيبه لأن تقرير البصمات كشف كل حاجة، وحازم كان مبلغ عنه بالفعل.. هو وفر علينا وقت ولبس نفسه قضية جديدة".

تم الإفراج عن حازم وحسام، واعتذر كل منهما للآخر بعد أن أدركا أنهما وقعا تحت تأثير الصدمة وسوء الظن. توجه حازم إلى منزله لتبديل ملابسه، أما حسام، فقد ركض بكل جوارحه إلى غرفة عاليا.

جلس بجانبها، وأمسك يدها الدافئة قائلاً بنبرة تفيض عشقاً وخوفاً: "حبيبتي.. أنا كويس متقلقيش عليا، إنتي لسه نايمة كل ده؟ كدا تسيبيهم يقبضوا عليا؟! معقول يا عاليا أنا أأذيكي؟ ده يبقى آخر يوم في عمري! بس فداكي أي حاجة، المهم إني لحقتك".

تابع وهو يحاول رسم ابتسامة وسط دموعه: "متخافيش.. خلاص اتمسك. قومي إنتي بالسلامة بقى، أنا جيتلك على طول أول ما طلعت.. شوفي شكلي عامل إزاي؟ بقيت رد سجون قد الدنيا ههههه.. دقني طولت وبقى شكلي وحش، وبفكر أربيها وأربي شعري كمان! عارف إنك مش بتحبي كدا، فلو مصحتيش بسرعة هربيهم بقولك اهو! خلاص متزعليش.. أنا هروح أطمن ماما عليا وأغير هدومي وأجيلك تاني.. شكلهم هيرفدوني من الشغل وأبقى عواطلي!".

دخل حسام منزله ولم يكد يغلق الباب وراءه، حتى لمحتْهُ شقيقته منة فصرخت بأعلى صوتها: "ماماااا! حسام جه!".

التفوا حوله بفرحة عارمة، وهتفت منة بنبرة متلهفة: "حسام! أنت طلعت إزاي؟ هي عاليا فاقت؟ ولا مسكوا اللي حاول يقتلها؟".

وما إن أنهت كلماتها حتى سمعوا صوت ارتطام قوي بالأرض. التفتت الأنظار نحو مصدر الصوت، لتكون المفاجأة.. إنها مي!

صاح حسام بفزع: "يا نهار أسود! دي جت إمتى؟ هو أنا ناقص مصايب!".

صرخت والدة مي بلوعة: "يا حبيبتي يا بنتي! شيلها يا حسام نفوقها يا ابني، شكلها سمعتنا واتخضت!".

حملها حسام بلهفة إلى الداخل، وحاولوا إفاقتها بالبرفيوم دون جدوى. صرخت منة: "بس ابعدوا كدا!". وأتت بكوب من الماء البارد وسكبته على وجهها.

شهقت مي بشدة وقامت بفزع وهي تصرخ: "عاليا! عاليا! في إيه؟ عاليا مالها؟! ".

هدأتها والدة حسام قائلة: "اهدي بس يا بنتي هي كويسة.. ولا إيه يا حسام؟".

قال حسام وهو يحاول التقاط أنفاسه: "اهدي شوية وأنا هحكيلك كل حاجة".

جلس حسام وشرح لها تفاصيل الكابوس من بدايته وحتى الوقت الحالي، وسط ذهول وصدمة الجميع الذين لم يكونوا على علم بما حدث.

سألتها منة بعقد حاجبيها: "إنتي رجعتي من السفر إمتى يا مي؟".

أجابت مي وعيناها تتلفتان يميناً وشمالاً: "رجعت النهارده، ملقتش ماما في البيت والجيران قالوا إنها بايتة بره بقالها كام يوم، فتوقعت إنها جت هنا. قلت أعملها مفاجأة.. وأنا اللي كنت زعلانة علشان عاليا وحسام مش بيردوا عليا وجاية وناوية اتخانق معاهم! طلعت أنت في مصيبة وهي يا حبيبتي في دنيا تانية! طيب أنا عاوزه اروحلها دلوقتي!".

حاولت الوقوف لكنها داخت مرة أخرى، فاستوقفتها والدتها قائلة: "طيب اهدي الأول وارتاحي شوية وكلي حاجة.. إنتي كدا هنحجزلك أوضة جنبها بالطريقة دي!".

سألتها منة محاولة تشتيت روعها: "طيب إيه اخبار المسابقة؟".

أجابت مي بنبرة باهتة: "الحمد لله دخلت التصفيات النهائية.. بس تعالي هنا يا بت إنتي! مش بيتبل في بوقك فولة؟ صبرتي إزاي متقوليليش حاجة عن اللي بيحصل ده كله؟!".

ردت منة بأسى: "والله أنا كنت ملهية في المشاكل دي، وكمان علشان كنتي هتنزلي وتسيبي المسابقة مردتش بقى أعرفك.. واديكي عرفتي وأغمى عليكي، كنتي هتعملي إيه هناك لوحدك؟".

أومت مي برأسها باكية: "عندك حق.. كان ممكن أموت فيها والله. انتو متعرفوش أنا بحبكو قد إيه وبحب عاليا إزاي.. ولو أي حد فيكو جراله حاجة أنا أموت وراه".

قالت الأم وهي تضمهن: "بعد الشر عليكي يا حبيبتي وبعد الشر عليكو كلكم.. ربنا يخليكم لبعض ونفضل ملمومين على طول".

وقف حسام قائلاً بتعب: "طيب أنا هقوم أخد دوش وأنام ساعة علشان اروح أطمن على عاليا.. عاوز أول ما تفوق تلاقيني جنبها".

ودعته والدته بحنان: "طيب يا حبيبي قوم، وأنا هجهزلك أكل.. شوف وشك أصفر إزاي وخاسس!".

قبل يدها قائلاً: "تسلميلي يا أمي".

مواجهة في منزل الرشيدي

في منزل الرشيدي، جلس حازم مع أخته وقال بنبرة لائمة: "وكنتي بتقابليه من إمتى يا ليلى؟".

أجابت ليلى بإنكسار: "من زمان".

تابع حازم بحرقة: "وملقتيش غير ده تثقي فيه وتحبيه؟!".

انفجرت ليلى بالبكاء: "حظي كدا! كل ما أحب حد واثق فيه ميطلعش بيحبني.. باين كدا العيب فيا وفي اختياراتي، ومش من حقي أحب زي باقي الناس!".

حاول حازم تلطيف نبرته: "مش قصدي يا ليلى.. بس بس إنتي عارفة إن مازن ده كان السبب في اللي وصلت ليه زمان من ضياع.. إزاي تثقي فيه؟!".

ردت ليلى بوجه شاحب: "خدعني! فهمني إنه بيحبني وهيتغير علشاني.. وأنا كنت ضعيفة ومحتارة، كنت محتاجة أحس إني بتحب وفي حد بيهتم بيا. طلع واخدني كوبري علشان يوصل لأختي وأنا صدقته، ودي غلطتي.. إيه؟ هتفضل تجلدني بيها؟! أنت كمان غلطت.. كنت بتتكلم عنها قدامه لحد ما دخلته دماغها!".

أطرق حازم برأسه وقال بأسف: "عندك حق.. دي غلطتي أنا كمان. مش مهم أي حاجة دلوقتي، المهم إنها تخف وكل حاجة هتتصلح".