الفصل الثالث عشر

حسام (بلهفة فور انتهاء القراءة): طيب يا عمي.. بإذن الله عاوزين نحدد ميعاد الخطوبة الرسمية في أقرب وقت، وتنزل معايا العروسة عشان نختار الشبكة اللي تليق بمقامها.

— عبد الله (بأريحية): والله اتفقوا سوا يا ابني وشوفوا الميعاد والوقت اللي يناسبكم ويناسب شغلكم.. أنا كدا عملت اللي عليا ووقفت وقفتي، الباقي والترتيبات ليكم أنتم الشباب.

بعد مغادرة الأهل الصالون ليعطوا العروسين مساحة للحديث وحدهما:

— حسام (بنظرة مليئة بالحب الفياض والراحة): مبروك يا عروستي.. مبروك يا قلب حسام.

— عاليا (بصوت يرتجف خجلاً): الله يبارك فيك يا حسام.

— حسام (بضحك): لسه مكسوفة أوي برضه؟ وشك بقا شبه الطماطم خالص من الخجل هههههه.

— عاليا: الله بقا يا حسام بس هههههه!

— حسام: وبعدين.. أول مرة تشوفيني ها؟ ماشي يا ستي مقبولة منك.

— عاليا (بمزاح درامي): بضحك معاك.. بهزر يا رمضان إيه مابتهزرش ههههه؟

— حسام: لا يا أختي بهزر طبعاً.. عارفة يا عاليا؟ أنا مبسوط أووووي.. كتير أوي، وفوق ما تتخيلي. ياما حلمت بالقعدة دي وتخيلتها في خيالي، ودعيت ربنا في كل سجدة يجمعنا في الحلال ويقرب البعيد.. والحمد لله ربنا استجاب لدعائي.

نظرت إليه عاليا بتأثر شديد وعيناها تلمعان:

— عاليا: أنا حاسة إني في حلم جميل وخايفة أصحى منه.. وحاسة إن كلامك ده كتير عليا أوي ومستاهلوش.. مكنتش أتصور في يوم إن في حد ممكن يقولي الكلام ده حتى في أعمق أحلامي! أنا دايماً يا حسام كنت شايفه نفسي قليلة ومينفعش أتحب بسبب اللي مر عليا.. بس أنا حبيت نفسي وشوفتها من جديد بس لما شوفتها بعينيك أنت.. أنا اكتشفت نفسي وروحي من أول وجديد معاك.

— حسام (بجدية وحنان وهو يقترب خطوة): ده مش مجرد كلام يا عاليا.. أنتي جميلة جداً، ومش بس من بره وشكل وفستان، لا.. أنتي جميلة وصافية من جواكي، وإنسانة نقية بمعنى الكلمة.. وأرجوكي، إياكي تخلي أي حد في الدنيا مهما كان يهز ثقتك في نفسك أو يقلل منك أبداً تاني.. أنتي غالية.

(ثم صمت قليلاً وسألها بعفوية): هو صحيح.. حازم فين؟ ملمحتهوش وسط القعدة؟

— عاليا: مش عارفة والله.. مظهرش من امبارح خالص، وبيتهيألي إنه لسه معرفش أي حاجة عن موضوع قراية الفاتحة والخطوبة ده.. ليه؟ كنت عاوزه في حاجة ولا إيه؟

— حسام: لا طبعاً.. وهكون عاوزه في إيه يعني؟ بس استغربت إني مشفتوش في مناسبة عائلية زي دي وهو عايش معاكم.

— عاليا (بوضوح وصراحة): على فكرة يا حسام.. حازم هيفضل في النهاية ابن عمي، ودي حاجة وواقع أنا مش هعرف أغيره ولا أهرب منه، ولازم تتعود وتعرف إنك هتشوفه كتير في العيلة وفي الشركة.. هو ابن عمي وبس، ولو كان في قلبي أو عقلي حاجة تانية ناحيته بنسبة 1%، مكنش زماننا قاعدين القعدة دي النهاردة.. فاهمني؟

— حسام (بابتسامة رضا وثقة تامة): فاهمك طبعاً ومتأكد من دا وباصم عليه بالعشرة.. ومطمن معاكي.

في اليوم التالي.. داخل مقر الشركة:

حدثت مشكلة وإرباك كبير في أحد المشاريع المستعجلة بسبب نقص توقيعات وغياب غير مبرر. كانت ليلى تقف في الممر ممسكة بهاتفها وتحاول الاتصال مراراً وتكراراً دون جدوى، فتمتمت بغضب:

— ليلى: رد بقا يا حازم أوف ياربي.. ده قفل التليفون خالص في وشي!

خرجت عاليا من مكتبها وعلى وجهها علامات الجدية الصارمة:

— عاليا: ها يا ليلى.. رد عليكي وفهمتي هو فين؟

— ليلى (بتأفف وضيق): لا مردش.. وقفل الموبايل خالص دلوقتي.

— عاليا (بعصبية وغضب من الإهمال): طيب وبعدين في التعطيل ده؟ وهو إزاي يختفي كدا فجأة وميبغش الشركة أو السكرتارية إنه مش جاي ومقضيها غياب؟ إيه التسيب وعدم المسؤولية دي! غياباته كترت أوي الفترة الأخيرة ومفيش أي مبرر واضح للغياب ده، وكدا بجد كتير أوي وزاد عن حده والعمل بيتعطل!

— ليلى (بدافع الدفاع عنه): عاليا.. براحة شوية واهدي، فيها إيه يعني لما يكون تعبان أو مخنوق وعاوز يفصل عن الشغل شوية؟

— عاليا (بحدة مهنية): تعبان أو عاوز يفصل يبقى يسيب خبر رسمي، ويخلص الشغل المتراكم والمستعجل اللي واقف على إمضته، وياخد إجازة براحته بعد كدا ومحدش هيقوله لأ! عموماً.. أنا مش هعدي الموقف والتسيب ده بالساهل، ولازم حازم يتعاقب ويتحاسب بسبب المشكلة الكبيرة اللي حصلت في المشروع من تحت راسه وإهماله!

— ليلى (بدهشة وسخرية): تعاقبي مين يا عاليا؟! أنتي نسيتي نفسك؟ ده صاحب الشركة وشريك فيها!

— عاليا (بقوة وثبات هز أركان المكان): كلنا شغالين هنا وفي مركب واحدة يا ليلى! ولو هو مش بيعمل لمصلحة الشركة وبيحافظ عليها وهو من أصحابها، ساب إيه بقا للموظفين والناس الغريبة؟ المفروض يكون هو القدوة وأول واحد يتواجد وأكتر واحد بيعمل لمصلحة الشغل!

— ليلى (وهي تراجع نفسها أمام قوة أختها): تمام.. اهدي شوية وأنا هفضل وراه وأتصل بيه لحد ما يرد ويجي.

— عاليا (ببرود): تمام.. اتفضلي على مكتبك وشوفي شغلك.

أرسلت ليلى رسالة نصية شديدة اللهجة لحازم تخبره فيها بلهجة قاطعة بما يدور. وعندما فتح حازم هاتفه ورأى الرسالة ومحتواها، قفز من مكانه بسرعة والشرر يتطاير من عينيه، وركب سيارته وقادها بأقصى سرعة جنونية، وبعد ساعة واحدة كان قد وصل إلى مقر الشركة، ودخل متوجهاً إلى مكتب عاليا بسرعة البرق ودون أن يطرق الباب، واندفع نحو مكتبها صارخاً بلهفة وجنون:

— حازم: أنتي صحيح هتتخطبي؟! الكلام ده بجد؟!

انتفضت عاليا بفزع من دخوله المفاجئ الهمجي، ونظرت إليه باستغراب واشمئزاز وقالت بنبرة حاسمة:

— عاليا: أولاً.. تخبط على الباب زي أي بني آدم محترم قبل ما تدخل مكتب مديرة المشاريع!

— حازم (بمقاطعة وصراخ وعينين حمراوين): بلا تخبط بلا زفت دلوقتي! جاوبيني علطول.. أنتي هتتخطبي فعلاً؟!

— عاليا (بثبات وبرود تام أثار جنونه): أيوا.. وقرينا الفاتحة كمان امبارح بليل، بس حضرتك اللي مكنتش موجود ومش متابع ومقضيها غياب وتسيّب و...

— حازم (بصدمة): هو؟ هو مش كدا اللي كان في الحفلة؟ المهندس ده؟

— عاليا: قصدك البشمهندس حسام اللي كان منور في حفلة خطوبتك على أختي؟ اه.. هو بعينه.

أغمض حازم عينيه بألم شديد وحسرة تكاد تقتله، واقترب من مكتبها بخطوات منكسرة وصوت مرتعش:

— حازم: عاليا.. أنا أسف، أنا عارف ومتأكد إني اتسرعت وغلطت في حقك.. بس بلاش تعاقبيني بالطريقة القاسية دي وتتجوزي من حد تاني! أنا مستعد أعمل أي حاجة في الدنيا علشان تسامحيني ونرجع لبعض زي زمان.. أنتي ليه لحد دلوقتي مش عاوزه تقوليلي على اللي حصل يومها وتبرئي نفسك؟

— عاليا (بضحكة ساخرة قوية هزت كيانه): أعاقبك؟!!! أعاقبك إيه يا حازم وبطريقة إيه؟ أنت فاكر الجواز والارتباط ده لعبة وعقاب وعناد؟ أنا بحب حسام جداً ومن كل قلبي.. بس عارف؟ أنت حتى لسه لحد الآن واللحظة دي مش واثق فيا، ولسه شاكك فيا وجاي تقولي "تبرئي نفسك وتقولي اللي حصل يومها"! أنت مفيش فايدة فيك.

— حازم (بندم): معقولة.. معقولة نسيتيني بالسرعة دي كلها يا عاليا؟ ومبقاش ليا مكان؟

— عاليا (وهي تنظر في عينيه مباشرة بقوة): اه.. نسيتك، نسيتك تماماً كحبيب وشخص كان ليه وجود، بس منستش أبداً قسوتك عليا وافترائك ودوسك على كرامتي.. وأنا دلوقتي مش بعاتبك؛ لإن اللي بيعاتب حد بيكون لسه باقٍ عليه وعنده أمل منه، لكن أنا خلاص.. شلتك من حساباتي تماماً، وحتي لو مش هكمل حياتي مع حسام، مستحيل ثم مستحيل هرجعلك في يوم من الأيام، وافهم ده كويس وفوق لنفسك! أنت خطبت ليلى أختي، ياريت بقا تركز معاها ومع حياتك يا "خطيب أختي"، ومتكررش الغلطات والأنانية دي تاني معاها.. وتاني مرة قبل ما تدخل مكتبي...

التفت حازم مغادراً وهو مكسور الخاطر وقال بنبرة متهكمة:

— حازم: عارف.. عارف، المرة الجاية هخبط على الباب!

— عاليا (بصوت جهوري صارم): حازم.. استني عندك! مكانك!

التفت حازم إليها بابتسامة أمل سريعة، وظن أن قلبها رق له في النهاية ولم يهن عليه كسرة خاطره:

— حازم: كنت عارف.. كنت عارف إن مش ههون عليكي يا عاليا وإنك لسه...

—