5

Nang bahagya akong magpalinga-linga ay napansin kong siya lang mag-isa. Tinitigan ko siya at kita sa kanyang mga mata na inaantok na siya marahil ay pagod siya dahil sa kanyang trabaho ngayong araw.

"Hindi ba kasama mo sila Brian at Ysrael kanina? Nakita ko kasi kayo noong dumating ako dito." Sabi ko at bahagya pang napakamot sa batok ko dahil nakita ko ang pagkagulat sa mukha ni Justin matapos kong sabihin iyon.

“Ow, nauna na silang umalis sa'kin dahil may pupuntahan pa daw sila," Sabi niya habang may tinatype sa cellphone niya.

"Ikaw? Pauwi ka na din ba?" Tanong ko sa kanya kahit halata naman na pauwi na siya. Pinahahaba ko lang talaga ang usapan namin dahil gusto ko pa siyang maka-usap pero busy siya sa pagkalikot ng cellphone niya. Hablutin ko kaya? Pero huwag na hindi naman kami ganoon ka-close para gawin ko iyon. Isa pa baka magalit siya sa'kin kapag ginawa ko iyon.

"Pauwi ka na ba?" Pabalik na tanong niya saka lumingon sa'kin. Tumango naman ako bilang sagot sa kanya samantalang siya naman ay ngumiti sa'kin. Gosh! Dahil sa ngiting iyon ay bumilis ang tibok ng puso ko. Ang gwapo naman kasi nitong taong ito.

"Sabay ka na sa'min gabi na rin baka wala kang masakyan pero kung may susundo naman sa'yo ay sasamahan ka na lang muna namin hanggang sa dumating na ang taong maghahatid sa'yo pauwi." Saad niya at ibinalik sa bulsa ang kanyang cellphone.

"Ahm, walang susundo sa'kin. Siguro maghihintay nalang ako ng masasakyan." Nahihiya kong sagot kahit na gusto ko talagang sumabay sa kanya.

Saglit siyang nag-isip bago muling nag-salita,"Ikaw naman parang hindi ka kakilala. Pinsan ka ng girlfriend ni Jayson, hindi ba? Mapapagalitan pa ako no'n kung hindi kita isasabay at hahayaan kitang maghintay diyan." Saad niya sa'kin. Natatandaan niya ako?

"Okay lang talagang sumabay ako?" Tanong kong muli sa kanya.

"Oo naman kaya tara na." Saad niya at saktong may humintong itim na kotse sa harap namin. Pinagbuksan niya ako ng pinto kaya sumakay na rin ako dahil iyon naman talaga ang nais ko.

Magkatabi kami sa upuan ni Justin sa backseat at sobra akong nagpapasalamat dahil medyo madilim sa loob ng kotse. Hindi niya makikita ang pamumula ng mukha ko at hindi niya din makikita na sobra akong nakangiti ngayon na halos mapunit na ang mukha ko habang katabi siya. Baka pagkamalan pa akong baliw kapag nagkataong makita niya ang itsura ko at sa mental ako i-diretso kaysa sa bahay namin.

"So, you're a model?" Tanong niya sa'kin kaya napalingon ako sa kanya.

"A freelance model." Pagtatama ko sa kanya habang inaaninag ang mukha niya mula sa mumunting ilaw na nagmumula sa labas.

"Ow, bakit freelance lang? By the way, sabihin mo sa driver kung saan ka ibababa." Sabi niya at agad namang lumingon ang driver sa'min kaya sinabi ko sa kanya kung saan ako bababa mamaya.

"Amm.. Nag-aaral pa kasi ako kaya freelance lang muna ako para hindi ako mahirapan sa schedule." Sagot ko sa kanya at pinilit na pakalmahin ang sarili ko.

Pagkatapos ng pag-uusap namin na iyon ay katahimikan na. Nakakapanibago dahil nakakabingi ang katahimikan na mayroon kami ngayon. Nilingon ko siya at nakita kong tulog na siya habang may nakakabit na wireless earbuds sa kanyang magkabilang tenga. Marahil ay pagod talaga siya ngayong araw. Napalunok ako ng hindi ko maiwasang titigan siya kung hindi ko siguro napansin na lumilingon ang driver sa’min ay hinaplos ko na ang kanyang mukha. Napabuntong-hininga na lang ako at napatingin sa labas ng kotse. Napaawang ang labi ko ng maramdaman kong pumatong ang ulo ni Justin sa balikat ko.

"J-Justin?" Saad ko at tinapik siya ng mahina sa balikat ngunit umayos lang siya sa pagkakasandal sa'kin.

"Sobra po sigurong napagod si Sir kaya ganyan..." Sabi ng driver at tumingin sa rear mirror.

"B-Baka nga..." Utal na sabi ko at hinawakan ang mukha niya upang ayusin siya mula sa pagkakasandal sa balikat ko. Napangiti naman ako ng maamoy ko ang strawberry flavor na shampoo niya. Tama lang talaga ang desisyon ko na sumabay sa kanya ngayon dahil kung hindi ako sumabay ay hindi ko mararanasan ito.

"S-Sorry, dapat ginising mo na lang ako." Sabi niya ng magising siya at agad umayos ng upo. Napaiwas naman ako ng tingin sa kanya para hindi niya makita ang paghihinayang sa mukha ko.

"A-Ayos lang naman iyon," Sabi ko sa kanya at hindi mahanap ang mga salita na nais ko pang sabihin, "Dito niyo nalang ako ibaba malapit na rin naman po ito sa bahay namin." Biglang saad ko dahil nakaramdam ako ng awkwardness sa pagitan naming dalawa.

Matapos kong magpaalam sa kanila ay agad na din naman silang umalis. Nang makalayo na sila ay dali-dali akong tumakbo papunta sa bahay at agad na pumasok sa loob saka nagsisigaw sa kilig. Si Justin ata ang magiging dahilan ng maaga kong pagkamatay.

****

Rinig ang malakas naming tawa sa apat na sulok ng sala dito sa bahay dahil sa kinuwento ni Claire tungkol sa honeymoon nila ni Ysrael sa Japan.

"Huwag ka na kasi magluto baka maaga mong mapatay si Ysrael. Mabyuda ka kaagad," sabi ko sa kanya na halos maiyak na sa kakatawa. Kawawang Ysrael dahil masasabi kong hindi mo pa nangunguya ang pagkain na niluto ni Claire ay iluluwa mo na kaagad.

"Che! Mga walang hiya. Mamatay sana kayo kakatawa," inis na sabi ni Claire at nginusuan kami na aabot ata hanggang labas ng bahay.

"Turuan ka nalang namin magluto." Suhestiyon ni Aurelia ng mapakalma niya ang sarili niya mula sa pagtawa.

"Bright idea!" Tuwang-tuwa na sabi ni Claire na kulang nalang ay magningning ang mga mata.

Ginayak na muna namin ang mga kakailanganin namin sa pagluluto. Ang napagdesisyunan naming lutuin ay ang spaghetti, carbonara, at fried chicken. After naming magluto ay pumunta na kami sa Sync Entertainment dahil nirequest ni Jayson na magpadala ng pagkain kay Ren. May trabaho kasi siya ngayong araw doon at ang modelo niya ay sila Justin at Ysrael. 

Makikita ko na naman si Justin ngayong araw. Anong approach naman kaya ang gagawin ko para makausap siya? Kakausapin ko ba siya kung anong nangyari sa kanya nitong mga nagdaang araw? Kakamustahin? Tatanungin anong kinain niya kaninang umaga? O aalukin ng pagkain mamaya?

Hays! Bahala na nga.