CHAPTER 4

CHAPTER 4

Nanlaki ang aking mga mata at nalaglag ang aking panga nang marinig ko iyon mula sa mga labi ni Sir Julian.

"Sir, pasensya na po. Hindi naman po magkakaroon ng problema kung magtatrabaho ako habang buntis ako, Sir. Hindi na po mauulit 'to," pagpapaliwanag ko.

Hindi ako pwedeng mawalan ng trabaho. Dahil ngayon pa lang ay nag-iipon na ako para mayroon akong igagastos sa panganganak ko. Mag-isa ko lang siyang bubuhayin, kaya kailangan ko ng pera. Malaki ang kinikita ko rito sa kumpanya.

Napailing siya at mas lalong nagalit sa aking sinabi. Dahan-dahan niyang ibinaling ang kanyang tingin sa kasama naming nurse na nakatayo sa gilid.

“Can you leave us alone for a moment? I just want to talk to her privately,” malamig na utos niya. Napayuko agad ang nurse at halos makita ko ang pangamba sa kanyang mga mata sa tigas ng boses ni Sir Julian.

Lumapit agad ito sa akin nang marinig namin ang pagsara ng pinto, isang senyales na lumabas na ang nurse.

“When did you find out you were pregnant?” tanong niya sa akin. Nang hindi ako makasagot ay mas lalo siyang lumapit sa pwesto ko. Umatras ako nang umatras hanggang sa napaupo na ulit ako sa kama. Iniwas ko ang aking tingin sa kanya at yumuko ako bago binuksan ang aking bibig upang sagutin ang tanong niya.

“Kamakailan ko lang din po nalaman, Sir. Pangako po, sisikapin ko pong hindi maapektuhan ang trabaho ko...”sabi ko at bahagya pang nanginig ang aking boses. Natatakot kasi ako na baka paalisin niya ako ngayong nalaman niya na buntis ako at naapektuhan nun ang aking trabaho rito sa kumpanya.

Dumagdag pa sa aking kaba ang distansya naming dalawa ngayon, sa sobrang lapit niya ay naamoy ko siya. Parang pinaghalong amoy ng bulaklak at kahoy ang amoy niya. Hindi masakit sa ilong.

“Who's the father?”

Tila tumigil ang mundo ko sa tanong na iyon. Bumilis ang pagtibok ng aking puso. Kung pwede ko lang sabihin na siya ang ama nitong dinadala ko. Kung pwede lang sana... Ngunit alam kong hindi ako mabibigyan ng pagkakataon na sabihin sa kanya dahil ayaw kong makasira ng isang relasyon.

“Sir, sorry pero hindi na po work related ang tanong n'yo,” sabi ko. Ngunit hindi pa rin mawala ang takot sa aking boses.

Humakbang siya ng isang beses paatras, pagkatapos ay nilagay niya ang kanyang kamay sa loob ng magkabilang bulsa bago dinilaan ang pang-ibabang labi. Pormal kami pagdating sa trabaho, kahit kailan ay hindi namin napag-uusapan ang tungkol sa aking personal na buhay.

Nang magtagpo ang mga mata naming dalawa ay nanigas ang aking buong katawan nang makita ko kung gaano kalamig ang mga titig nito sa akin. Tumatagos iyon kahit sa aking kaluluwa.

“Who's the father, Callie?” tanong niya sa pangalawang pagkakataon. Mas nakakapangilabot na ngayon ang kanyang boses. Malalim at may diin ang bawat pagbigkas ng mga salita. Na tila ba nawawalan na ito ng pasensya sa akin.

Kailangan kong magsinungaling! Hindi ko pwedeng sabihin kung sino ang ama ng aking anak. Wala akong ibang pagpipilian. Hindi niya pwedeng malaman ang totoo.

“One night stand lang po, Sir. Parehas po kaming lasing nang may nangyari sa aming dalawa. Wala na po siya sa aking tabi nang magising ako kaya hindi ko alam kung sino ang ama ng batang dinadala ko,” pagsisinungaling ko pa.

Wala naman akong boyfriend. Sa anim na taon ko rito, sobrang pukos ko sa aking pagtatrabaho ay wala na akong oras upang maghanap ng kasintahan dito sa Cebu. Nung high school at college ako ay meron naman. Pero mas mahirap pa lang isingit ang paghahanap ng kasintahan kapag nagtatrabaho ka na. May responsibilidad pa kasi ako. Nasa isip ko kasi na kailangan ko munang unahin ang aking trabaho dahil pinapaaral ko pa ang bunso namin. Ang pagkakaroon ng kasintahan ay isinantabi ko muna hanggang sa magkaroon ako ng sapat na oras. At magkakaroon na ako ng anak, sigurado ako na lahat ng aking atensyon ay ibibigay ko na sa aking anak.

“One night stand, huh?”

Humakbang siya ulit hanggang sa dumikit ang tuhod niya sa aking tuhod. Napaangat ako ng tingin sa kanya, ang kanyang mga mata ay hindi kumukurap na tila ba sinusubukan niyang basahin kung nagsasabi ba ako ng totoo o hindi.

“Make sure that you are telling the truth, Callie. Because I will find out,”

Tinaas niya ang kanyang kamay at unti-unting dumampi ang likod ng kanyang daliri sa aking pisngi. Tumaas ang aking balahibo at parang lalabas na ang puso ko.

“And if I find out you are lying… you will regret it.”