Chapter 5

Pag-alis sa Leviste Group, balak sana ni Felicity na dumiretso sa bahay ng kanyang lola. Ngunit nang nasa kalagitnaan pa lamang siya ng biyahe nang tumunog ang kanyang cellphone.

Nang makita niya ang pangalan ng kanyang Tito Alex sa screen, biglang namuo ang luha sa kanyang mga mata. Mula nang magising siya kahapon, sunod-sunod na dagok ang kanyang hinarap. Pakiramdam niya'y wala siyang ibang mapagsandalan.

At sa buong pamilya, ang tanging taong palaging itinuturing siyang parang sariling anak ay ang kanyang tito—lalo na matapos pumanaw ang kanyang ama.

Agad niyang sinagot ang tawag. "Tito?"

"Felicity..." nag-aalaga na bungad ni Uncle Alex niya. "Nag-away ba kayo ni Mr. Leviste?"

Natigilan agad siya.

Nag-away?

Sa pagkakakilala niya kay Hendrix, hindi ito ang klase ng taong nakikipagtalo. Simula nang magising siya, halos hindi pa nga ito nagsasalita ng lampas limang pangungusap. Sobrang lamig ng lalaking iyon para mag-aksaya ng oras sa pakikipag-away.

"Kung talagang nahihirapan ka na, hindi mo kailangang ipagpatuloy ang kasal na iyan," mabigat na sabi ng kanyang tito. "Ang kaligayahan mo ang pinakamahalaga sa amin. Hangga't may makakain ako, hinding-hindi ko hahayaang magutom kayo ni Freya."

Naninikip kaagad ang dibdib ni Felicity, ngunit may kakaiba sa tono ng kanyang tito. Sa alaala niya, isa itong masayahin at positibong tao.

Ngayon

.

.

.

Halatang puno ito ng pag-aalala.

"Tito..." mahina niyang tanong. "May problema ba?"

Mabilis na tumahimik ang kabilang linya, matagal bago muling nagsalita si Uncle Alex. "Ang mga kumpanyang dapat pipirma na ng kontrata sa atin ngayong araw ay bigla na lang umatras. Sinabi nilang kailangan pa raw nilang pag-isipan." mahinang sabi nito,  "At ang mga bangkong nakatakdang mag-renew ng mga loan natin ngayong taon... isa-isang tumawag. Pare-pareho lang ang dahilan nila. May problema raw sa loob ng kumpanya." Huminto siya sandali bago muling nagsalita. "Ang masama pa... kailangan na nating bayaran ang lahat ng utang sa loob ng isang linggo." 

Hindi na niya itinuloy, hindi na rin kailangan, dahil hindi naman tanga si Felicity.

"Si... Hendrix ba ang may kagagawan nito?"

Halos hindi siya makapaniwala, mahal na mahal nito noon ang kanyang stepsister na si Elise. Sisiraan ba talaga nito ang negosyo ng kanyang tito dahil lamang umalis siya sa trabaho?

"Felicity..." Halatang kinabahan si Uncle Alex, "May tainga ang mga pader. Huwag mong banggitin ang pangalan ni Mr. Leviste ng basta-basta."

Sapat na iyon.

Sigurado na siya.

Si Hendrix ang nasa likod ng lahat.

Matapos magpalitan ng ilang salita upang palakasin ang loob ng isa't isa, ibinaba niya ang tawag at pagkatapos ay tumingin siya sa driver. "Bumalik tayo sa Leviste Group."

Nang ilapag ni Felicity ang isang tasa ng bagong timplang kape sa lamesa ni Hendrix, hindi man lang ito nag-angat ng tingin.

Tahimik itong nagpapatuloy sa pagbabasa ng mga dokumentong nasa harapan. Nanatili siyang nakatayo sa tabi ng mesa, paulit-ulit niyang iniisip kung paano niya simulan ang pagmamakaawa para sa kanyang tito.

Ngunit lumipas ang sampung minuto… Hindi pa rin siya pinapansin ni Hendrix.

Sa huli, si Gabriel na ang lumapit. "Secretary Abella," mahinahon nitong sabi, "Medyo abala pa si Mr. Leviste ngayon. Bakit hindi ka muna bumalik sa opisina mo? Maaari kang bumalik pagkalipas ng kalahating oras."

Tumango si Felicity, ayaw na rin niyang magmukhang desperada. Habang naglalakad palabas, lalo niyang napagtanto na ang kasal nilang dalawa ay mas komplikado kaysa sa inaakala niya.

Pagbalik sa kanyang opisina, agad niyang binuksan ang computer. Isa-isa niyang hinanap ang mga impormasyon tungkol sa sarili at kay Hendrix. Bilang pinuno ng pamilyang Leviste sa Davao, halos araw-araw laman ng balita si Hendrix.

Halos bawat galaw nito ay may epekto sa buong mundo ng negosyo. Ngunit nang isama niya sa paghahanap ang mga salitang "Hendrix Leviste wife" at maging ang sarili niyang pangalan...

Halos walang lumabas.

May ilang artikulong nagsasabi na maaaring lihim na kasal ang CEO ng Leviste Group. Ngunit puro malalabong haka-haka lamang ang mga iyon. At kapag binubuksan niya ang mga link...

Bigla na lamang nawawala ang laman ng pahina na parang sinadyang burahin at doon niya unti-unting naunawaan ang katotohanan.

.

.

.

Tunay ngang kasal sila, ngunit isa iyong lihim na mahigpit na itinago. At malinaw na si Hendrix mismo ang nagpapalinis ng lahat ng balita tungkol doon.

Sa sobrang inis, si Elise naman ang hinahanap niya. Limang taon na ang nakalipas, usap-usapan sa buong Davao ang engrandeng engagement nina Hendrix at Elise. Nagpalipad pa umano si Hendrix ng pribadong eroplano papuntang Paris para lamang kunin ang milyun-milyong pisong rosas para sa seremonya. 

Pati ang haute couture wedding gown ni Elise ay naging tampok sa lahat ng social events. Ngunit nang lumabas ang resulta… Nanlalaki ang mga mata ni Felicity, walang kahit isang balita tungkol sa kasal nina Hendrix at Elise.

Sa halip...

Ang lahat ng headline ay tungkol sa marangyang kasal sa Amerika ng nakababatang kapatid ni Hendrix na si Hugo Leviste...

At ang kanyang asawa

.

.

.

Ay walang iba kundi si Elise.

Mistulang nabura sa kasaysayan ang dating engagement nina Hendrix at Elise. Napasandal si Felicity sa kanyang upuan at litong-lito sa buong pangyayari.