Chapter 5: The First Applicant

Maaga akong dumating sa opisina kinabukasan. Pagkabukas ko pa lang ng computer ay andun na agad ang inbox ko na punong-puno na naman ng mga emails mula sa mga nag-apply. Nakakatuwa at nakaka-overwhelm din dahil halos lahat may impressive na credentials.

“Maganda ‘to. More chances of winning.” bulong ko sa sarili habang isa-isang tinitignan ang resumes.

Bandang 9am, dumating na ang unang applicant. Babaeng naka corporate attire, maayos ang postura, at pero halatang kabado. Pinapasok ko siya sa maliit na meeting room at inumpisahan ang interview.

“Good morning. Can you tell me a little about yourself?” bungad ko habang nakangiti.

Graduate daw siya sa FEU, may 2 years experience bilang admin assistant, at magandang magsalita ng English. Habang nagsasalita siya, napapaisip ako: Okay naman. Presentable, articulate, at parang kaya naman ang trabaho ko.

Nang natapos na kami ay agad ko siyang dinala sa opisina ni Sir Alex.

Pagpasok namin ay nakasandal ito sa swivel chair, nakataas ang isang kilay, at seryosong nakatingin sa babaeng kasama ko. Mukhang inaantay na nito ang pagdating namin.

“Your name?” malamig niyang tanong bago pa man kami makalapit.

Nagpakilala ang applicant, nanginginig pa ang boses. Pero ng makasagot ito ay bigla na lang itong yumuko at nagbukas ng laptop. Ni hindi pa nga kami nakakaupo.

“That will be all. You can go now.” Sabi nito habang nagkunwaring busy na sa pagtatype.

Halatang parang binuhusan ng malamig na tubig ang babae. Ako man ay nabigla sa inasal ng boss at hindi ko inaasahan na ganoon nito kabilis iinterviewhin ang unang applicant.

“Sige na, mauna ka na sa labas at susunod ako.” Mahinang sabi ko sa babae na agad namang tumalikod.

Inantay ko munang tuluyang makalabas ito bago humarap kay Sir Alex na ang atensyon ay nasa laptop pa rin na kaharap. Sa totoo lang ay hindi ko nagustuhan ang inasal nito.

“Sir, okay naman po siya at qualified para sa posisyon. Bakit niyo po agad na-turn down?”

Tumingin lang siya sa akin, walang kahit na anong expression ang mukha nito.

“She’s not good enough.”

Napairap ako ng palihim. “Eh Sir, ni hindi nyo nga pa nga nakita yung resume niya. Bakit hindi nyo man lang sya binigyan ng chance?”

“I just don’t like her.” Napamaang ako sa sagot nito. Napajudgemental naman.

Hindi ako nakasagot kasi parang hindi ko maintindihan anong basehan nito sa sinasabi.

Nang hindi ako sumagot ay tumayo ito at lumapit sa akin. Nakatayo pa rin kasi ako sa harap ng mesa nito. Nang tumingin ito sa akin ay iniwas ko ang mga mata. Nakaramdam kasi ako ng pagkainis. Naranasan ko na kasi ang mareject at mapahiya noong nag aapply pa ako sa ibang kumpanya.

Tumikhim ito na alam kong nakamasid pa rin sa akin. “Tell me, how can I possibly work with someone I don’t even like?” Napaangat ang ulo ko sa huling salitang sinabi nito.

Ibig sabihin ba nito ay gusto nya ako? Este, gusto niya bilang katrabaho. Sabagay, hindi naman ako magtatagal ng tatlong taon kung hindi niya ako gusto.

“Pero paano niyo naman magugustuhan yung hindi nyo pa naman nakakasama o nakakausap man lang, Sir?” Takang tanong ko na ginantihan ang titig nito.

“Why do you keep asking so many questions? I told you already—I just don’t like her, end of discussion.” Halatang iritable na ito kaya agad na lang tumalikod. Bumalik na ito sa pagkakaupo.

Ayan ang linya ni Sir Alex, kapag ayaw na niyang pag usapan ang isang bagay.

Wala na nga akong nagawa at umalis na lamang. Sa inis ko nga ay hindi na ako nagpaalam pa.

Paglabas ay agad kong hinanap ang aplikante.

“Sophie, asan na yung babae kanina?” Tanong ko sa front desk receptionist namin.

“Ah, yung ininiterview niyo ni Sir Alex? Wala na umalis na, umiiyak pa nga. Ano bang nangyari?” Sagot nito na halatang gusto pang sumagap ng tsimis.

Nakaramdam ako ng matinding awa sa babae. Alam ko ang pakiramdam na ganoon pero wala akong magagawa kung ayaw ng boss sa kanya.

Pagbalik sa desk ko, napabuntong-hininga na lang ako. Hindi ko alam kung sinasadya ba si Sir Alex ang pahirapan ako, o talagang sobrang taas lang ng standards niya.

Pero isang bagay ang malinaa at yun ay siguradong hindi magiging madali ang tatlong buwn na ito para sa akin.