1

"Mommy, work ulit?" tanong ni Kyle, ang anak ko.

"Opo. Kailangan ni mommy mag-work kasi malapit ka na mag-aral, eh," sabi ko bago ako ngumiti sa anak ko.

Almost four years old pa lamang si Kyle pero hindi katulad ng ibang bata, mas malawak ang pang-unawa niya sa mga bagay-bagay.

"Pagbalik po ba mommy may book ti Tyle?" inosenteng tanong niya sa akin.

Bahagya akong natawa dahil hindi pa rin kayang sabihin ni Kyle ang pangalan niya nang maayos. Tumango rin ako bilang pagsagot.

Mahilig din si Kyle sa mga libro kaysa sa mga laruan.

"Samira, ihatid ka pa ba namin sa sakayan, anak?" tanong ni nanay na siyang nag-aalaga sa anak ko.

Umiling naman ako bago ako nagsalita at iniabot sa kan'ya ang sobre ng pera.

"Hindi na, nay. Kailangan ko na rin kasing umalis dahil ngayon ipapakilala ang apo ng boss namin sa trabaho," sabi ko bago ako ngumiti at tumingin sa anak ko.

"Kyle, be good to nanay-lola, okay?" sabi ko.

Tumango naman siya kahit na halata sa mga mata niyang naluluha na siya dahil iiwan ko na naman siya rito.

"Opo, mommy. Hindi Tyle magkulit, pwamit," sagot niya bago tumakbo sa akin at mabilis na niyakap ang tuhod ko.

Napalunok naman ako upang iwasan ang nagbabadyang pagtulo ng mga luha sa mga mata ko.

"Babawi si mommy sa'yo, okay? Basta maging mabait si Kyle ni mommy, ha?" sabi ko bago ko siya hinalikan sa noo.

Tumango naman siya bago umalis sa pagkakayakap sa akin at saka pinunasan ang mga luha niya. Umupo naman ako sa harapan niya para halikan siya sa pisngi.

"Don't cry na," sabi ko. Tumango naman siya kaya bahagya akong ngumiti.

Aaminin ko na sa tuwing tumitingin ako sa anak ko, pakiramdam ko nakatingin pa rin ako sa kan'ya. Pakiramdam ko, kaharap ko pa rin ang lalaking 'yon...ang lalaking dahilan kung bakit buo ako ngayon, dahil binigyan niya ako ng isang anak.

"Nay, tipid muna kayo ni tatay, ha? Sapat 'yang pera na 'yan para sa inyong tatlo. Nakapamili naman na ako ng stocks niyo kaya wala na kayong dapat alalahanin pa," sabi ko.

Tumango naman na si nanay kaya hindi na ako nagsalita pa at umalis na.

Hindi ito ang unang beses na iniwan ko si Kyle sa mga magulang ko. Sa katotohanan nga, halos sila na ang nagpalaki sa anak ko dahil kailangan kong magtrabaho sa Manila upang buhayin sila.

Sa Pampanga nakatira sila nanay habang ako naman ay sa Taguig. Kaya kailangan ko ng magmadali papasok dahil ngayon ipapakilala ang bagong hahawak ng kompanyang pinapasukan ko. Mag-re-resign na kasi bilang CEO si Mr. Tan na siyang may-ari ng Tan Traders.

"Samira! Good morning! Bagong araw, bagong boss!" biro sa akin ni Rafaela na kasabay kong naglalakad papasok sa loob ng lobby.

Natawa naman ako dahil alam ko na ang ibig niyang sabihin.

"Bagong boss, bagong?" tanong ko habang nakangisi.

Lumawak naman ang ngiti sa labi niya bago siya tumawa.

"Lalandiin!" maharot na sabi niya kaya natawa ako lalo.

"Bye, Sec! See you!" sabi niya kaya tumango ako bago ako ngumiti at saka sumakay sa loob ng elevator.

Dalawang taon na akong nagtatrabaho bilang Secretary ng CEO. At masasabi kong exceptional si Mr. Tan. Walang papalit sa kan'ya sa ugali, pati na rin sa morals at values na mayroon siya na talaga namang hinangaan ko sa kan'ya. Kaya sana, ang pumalit sa kan'ya ay katulad niya rin.

"Samira, ayusin mo na ang loob ng conference room. Doon didiretso sila Mr. Tan at ang bagong CEO," bungad sa akin ni Lirese, ang assistant ni Mr. Tan.

Tumango naman ako bago ko ibinaba sa mesa ko ang mga gamit ko. Kinuha ko na rin ang folders na paglalagyan ko mamaya ng mga printed papers na nakalagay na ngayon sa loob ng conference room.

"Kailangan ko nang magmadali!" sabi ko sa sarili ko bago ako tumakbo papunta sa conference room at saka inayos ang mesa.

Kinuha ko na rin ang mga papel na pina-print ni Lirese at inilagay 'yon sa loob ng mga folders na dala ko.

Patuloy lang ako sa pag-aayos at paglalagay ng mga papel. At nang matapos ay nag-set up na rin ako ng projector. Naglinis na rin ako ng bahagya upang maging malinis sa loob ng kuwarto.

Napahinga naman ako ng malalim nang matapos ako sa ginagawa ko. Nilibot ko pa ang paningin ko sa paligid para makita kung maayos na ba ang lahat.

At nang masigurado, naupo na muna ako sa swivel chair upang magpahinga.

Wala akong magawa dahil naiwan ko ang phone ko sa bag ko sa sobrang pagmamadali.

Kailangan kasi ako rito mamaya sa loob kaya ang gagawin ko na lang ay ang maghintay.

Napabuntong hininga naman ako bago nagawi ang paningin ko sa folder na inayos ko kanina.

Doon ko lang din na-realize na hindi ko alam kung ano ang nakasulat sa mga papel na pina-print ni Lirese. Hindi ko rin alam kung tungkol saan ang meeting.

Kinuha ko ang folder bago ako tumayo at binasa ang laman no'n.

Hindi naman big deal kung basahin ko ang laman ng folder dahil kung tutuusin ay trabaho ko 'to.

Sadyang hindi ko lang talaga alam kung tungkol saan ang meeting ngayon, maliban sa ipapakilala raw ang bagong magiging CEO ng kompanya.

Confidential pa kasi ang pag-me-meeting-an ngayon kaya ang gumawa ng report ay si Lirese. Habang nag-focus naman ako sa outside tasks para sa meeting na 'to.

"Hmm," patuloy lang ako sa pagbabasa hanggang sa nagawi ang paningin ko sa ibabang parte ng report.

Halos manginig naman ako sa kaba at halos kapusin ako sa hininga matapos kong mabasa ang pangalan ng lalaking papalit kay Mr. Tan.

"Hi? Is this the conference room?"

Agad akong napalingon sa pinto kung saan ko narinig ang boses ng isang lalaki.

Nagtama pa ang mga paningin namin bago ko naramdaman ang mabilis na pagtibok ng puso ko.

Pakiramdam ko bahagyang bumagal ang pag-ikot ng mundo.

At halos matumba ako sa pagkagulat ng ma-realize ko kung sino ang nasa harapan ko.

Xandros Kayler Nolan, ang ex-boyfriend ko...

...at siyang ama ng anak ko.