2

Hindi ako mapakali habang nakatayo hindi kalayuan sa pinto ng conference room.

Kanina pa on-going ang meeting at tungkol lang 'yon sa appointment ng bagong CEO.

Napahinga ako ng malalim bago ako tumingin sa lalaking walang emosyong nakaupo sa dulo at nakikinig sa nagsasalita sa harapan.

Napaiwas naman ako ng tingin nang lumingon siya sa akin at nagtama ang mata naming dalawa.

Tumaas pa ang isang kilay niya kaya naman mabilis akong napaiwas ng tingin.

Sh*t. Bakit siya pa kasi ang papalit kay Mr. Tan?

At bakit siya pa kasi ang naging apo ng boss namin? Nakakainis naman!

"That's all for today. Meeting adjourned."

Napaayos ako ng tayo nang marinig ko ang sinabi ni Mr. Tan. Nagtayuan na rin naman ang mga boardmembers at nakipagkamay sa lalaking nakatayo na rin ngayon katabi ng lolo niya.

Napairap ako. Hindi ko inakala na siya pala ang papalit sa boss ko. Hindi ko inakala na sa kompanyang 'to pa kami muling magkikita.

Napahinga ako ng malalim dahil official ng CEO si Xandros. Pero mamaya pang gabi ang official announcement niya bilang kapalit ng lolo niya.

"Sam," napalingon ako kay Lirese nang marinig ko ang pagtawag niya sa akin. Hindi naman ako nakasagot nang dumaan sa harapan naming dalawa sina Mr. Tan at ang bagong appointed na CEO.

"Bakit?" bulong ko bago kami sumunod ng lakad sa mga boss namin.

"Mukhang iiwanan na kita," sabi niya kaya napataas ang kilay ko.

"Anong iiwan?" nagtatakhang tanong ko habang sinisipat-sipat ang lalaki sa unahan ko.

Ano ba 'to?! Sinasadya niya bang bagalan ang paglalakad?! Eh, kung tapakan ko kaya 'yang sapatos niya!

"Bakit nakasimangot ka d'yan?" natatawang tanong naman ni Lirese kaya napabalik sa kan'ya ang paningin ko.

"Wala," sagot ko na lang.

Hindi siya nagsalita kaya napatingin ako sa kung saan siya nakatingin, at nakita ko siyang nakatingin kay Mr. Tan.

"Mag-re-resign na ako. Isasama ako ni Mr. Tan sa ibang bansa bilang personal assistant niya," sabi niya kaya mabilis napabalik sa kan'ya ang tingin ko.

"WHAT?! AALIS KA?!" bulyaw ko.

Parang nanlamig naman ang katawan ko nang ma-realize ko kung gaano kalakas ang boses ko.

Napatingin tuloy ako sa harapan namin. Nakatingin na sa akin si Mr. Tan at si Xandros na nakataas na naman ang kilay kaya pilit akong natawa.

Nakakahiya!

"S-Sorry po," sabi ko na lang.

Natawa naman si Lirese bago siya nagsalita.

"Sir Xandros, this is Samira Anne Fuego. She's your secretary," sabi niya.

Nanatili naman sa akin ang tingin ni Xandros kaya peke akong ngumiti at saka humakbang ng isa para batiin siya.

"Good day po," sabi ko na lang.

Hindi naman siya sumagot habang ngumiti at tumango lang si Mr. Tan.

Napasimangot naman ako nang hindi niya man lang ako binati pabalik. Kahit pagngiti ng peke 'di man lang ginawa!

Natawa na naman si Lirese bago umiling at saka kami nagpatuloy sa paglalakad.

Nakakainis 'tong lalaking 'to. Napahiya ako ro'n, ah.

Napatingin ako sa likuran ni Xandros bago ako sumimangot.

Ibig sabihin, siya na talaga ang boss ko. At maiiwan pa akong mag-isa sa isang 'to.

"Kailan ka aalis?" tanong ko kay Lirese para ma-divert ang atensyon ko.

Ngumiti naman siya bago siya nagsalita.

"Ngayong araw. Hanggang mamaya na lang dahil mamayang gabi ang party para kay Sir Xandros," sabi niya.

Hindi naman ako nakapagsalita. Nakakalungkot. Nauna sa akin si Lirese rito sa kompanya.

Siya ang naging senior ko at siya rin ang nagturo sa akin. Mahigpit siya 'pag dating sa trabaho, pero outside work ay ka-close ko naman siya.

"Masaya ako para sa'yo. Pero nakakalungkot naman kasi iiwan mo na 'ko," malungkot na sabi ko.

Natawa naman siya bago nagsalita.

"Masaya rin ako para sa'yo. Kaya galingan mo bilang secretary ni Sir Xandros, you'll gonna like him," sabi niya kaya napatingin akong muli sa lalaking nasa harapan ko.

Ang bagal talaga niya maglakad!

Napahinga ako ng malalim bago ako napangiti ng pilit.

"Sana," labas sa ilong na sagot ko.

Like him? I don't think so. Ngayon pa lang, nakikita ko nang 'di kami magkakasundo.

---

Napahinga ako nang malalim habang tinitignan ang orasan ko.

Almost six na kasi ng gabi pero wala pa rin ang sundo ko.

Nakasuot lang ako ng maroon bodycon dress na may slit sa kanan na hanggang hita.

Nandito ako ngayon sa harapan ng kompanya dahil dito ako susunduin ng magaling na lalaking 'yon!

Si Nicholo Feir kasi dapat ang magsusundo sa akin rito. Siya ang kaibigan ko at nag-iisang gumagabay sa akin dito sa Manila.

Nakakainis dahil mukhang nakalimutan niya akong sunduin!

"Anong oras na. Kaasar!" inis na sabi ko bago ako napalinga sa paligid.

Akma ko na sanang kukunin ang phone ko upang tawagan siya. Ngunit natigilan ako nang may makita akong sasakyang papunta sa gawi ko.

Kumunot ang noo ko. Teka, hindi 'to sasakyan ni Niko.

"You'll be late," bungad ng lalaki na nagmamaneho ng sasakyan na huminto na ngayon sa harapan ko.

Napaiwas naman ako ng tingin nang makita ko kung sino 'yon.

"Sir Xandros," untag ko na lang bago ako napalunok.

"Get in. We're going on the same way anyway," walang emosyong sabi niya kaya ko siya tinignan bago ko nilingon ang orasang suot ko. Kinagat ko pa ang pang-ibaba kong labi.

Nakakainis ka, Niko! Ang timing mo!

"Okay lang ako, Sir. May susundo naman sa akin," sabi ko.

Tumaas naman ang kilay niya at akma na sanang magsasalita nang bigla na lamang may humintong sasakyan sa harapan ng sasakyan niya.

"Sorry, late! Napa-overtime ng konti," sabi ni Niko bago kinuha ang bag na hawak ko. Napasimangot naman ako bago ko siya tinignan.

"Bw*set ka. Mali-late pa 'ko dahil sa'yo," walang kwentang sabi ko.

Akma na sanang hahawakan ni Niko ang kamay ko para alalayan akong makababa ng hagdan nang halos mapatalon kami sa gulat, dahil bigla na lamang may bumusina nang napakalakas.

Napalingon kami ng sabay sa pinanggalingan ng tunog. Ngunit huli na dahil mabilis 'yong nakaalis papalayo sa amin.

"Sino 'yon?" kunot noong sabi ni Niko kaya pinalo ko siya.

"Boss ko 'yon. Ang chismoso mo, tara na!" pag-aya ko bago kami mabilis na sumakay sa sasakyan niya at saka niya ako hinatid sa venue.

Sa totoo lang, maaga pa naman. Pero hindi naman pwede na ma-late ang secretary ng CEO lalo na't ngayong gabi ang official designation niya sa posisyon niya.

Hindi ko nga alam kung bakit, pero ramdam kong may namumuong tensyon sa pagitan naming dalawa. Hindi ko alam kung galit ba siya sa akin o ano.

"Dito na. Mag-ingat ka, 'wag mo 'ko agad ipagpalit, ha. Busted na nga, broken pa," biro ni Niko kaya mabilis kong hinampas ang braso niya.

Matagal ko nang alam na may gusto siya sa akin. Pero mas pinanatili na lang namin ang pagkakaibigan namin dahil ayaw kong masira kaming dalawa.

Tanggap na tanggap niya rin si Kyle, pero hindi ko pa talaga kayang magpapasok ng lalaki ngayon sa buhay ko.

"Sira! Sige na, rito na 'ko," sabi ko bago ako akmang bababa ngunit inunahan ako ni Niko.

Mabilis siyang bumaba at saka ako inalalayan na makababa rin sa sasakyan niya.

Natawa pa ako bago ko kinuha ang bag ko sa kamay niya.

"Sige na. Baka ma-inlove ako sa'yo, sige ka," biro ko.

Natawa naman siya bago kinurot ang pisngi ko.

"Ang tagal naman," sabi niya kaya natawa ako bago ko siya hinampas sa kamay.

"Heh!" untag ko na lang bago ako akmang aalis na.

Ngunit bago ko pa man magawa ay bigla akong natigilan nang may mapansin akong lalaking nakatingin sa amin hindi kalayuan sa akin.

Napalunok ako nang magtama ang mata naming dalawa.

At nang makita niyang nakatingin ako sa kan'ya ay agad siyang tumalikod at pumasok na sa loob ng venue.

Halos mapugto ko naman ang hininga ko dahil sa kaba.

Xandros, anong kailangan mo?