Kabanata 3

Nakasandal lang si Kayena sa pader habang nakaupo sa sahig. Nakatulala at nag-iisip, puno pa rin siya ng pag-aalala para sa kanyang ina na hindi pa rin niya alam hanggang sa mga oras na iyon kung ano ang lagay nito, bagamat nakita at nakausap niya na ito sandali.

Ilang sandali pa ay muling tumunog ang cellphone niya. Nagreply na si Ingrid sa kaniya. “Wala akong alam masyado tungkol sa kaniya e. Bakit mo natanong?” 

“Ah, wala naman. Nabanggit kasi siya sa akin ng Daddy ko.” reply niya. “Natanong ko lang naman pero huwag mo na iyong isipin pa. Kalimutan mo na lang. Sige na, alam kong pagod ka rin kaya magpahinga na tayo.” 

Isang like lang naman ang nireply nito sa kaniya. Ibinaba niya ang kanyang cellphone sa kanyang tabi at muling tumulala. Hindi pa rin siya inaantok ng mga oras na iyon.

Samantala, sa kabilang banda ay hindi naman maiwasang hindi magtaka ni Ingrid. Kahit na kanina pa siya nakahiga ay hindi siya dalawin ng antok. Sa totoo lang, ang lalaking pinagkakaguluhan kanina sa paliparan ay walang iba kundi si Terrence Montero. Hindi niya nga akalain na makakasabay pa nila ito. 

Ang totoo kaya siya bumalik sa bansa ay dahil gusto niyang pumasok sa kumpanyang pag-aari nito dahil gusto niyang mapalapit dito. Habang naiisip niya ang gwapo nitong mukha ay bigla na lang pumasok sa isip niya ang itsura ni Kayena kanina. Nahuli niyang nakatingin din ito kanina kay Terrence at tinanong pa siya nito. Tapos ngayon ay nagtatanong na naman ito. Hindi kaya interesado ito sa lalaki? 

*****

Nang pumarada ang Rolls Royce sa mansyon ng mga Montero ay kaagad na bumaba si Terremce. Nakasunod sa likod niya ang assistant nitong si Alec. “sir, kanina pa dumating ang mga tao at dala na nila ang naglagay ng gamot sa inumin niyo.” sabi nito sa kaniya.

Hindi siya sumagot sa halip ay naging malamig lang ang kanyang mga mata. Hindi niya akalain na may maglalakas ng loob na gawin ang bagay na iyon sa kaniya. Pagkarating nila sa hardin ay naroon ang apat na taong nakaluhod. 

Dinukot niya mula sa kanyang bulsa ang kahon ng sigarilyo at nagsindi. Humithit siya ng isang beses saka nagbuga ng usok. Huminga siya ng malalim at napapikit. Ang totoo ay halos hindi pa humuhupa ang nararamdaman niyang init sa kanyang katawan kahit na… ipinilig niya ang kanyang ulo at ibinalik ang tingin sa mga taong nakaluhod sa harapan niya. 

Naalala niya pa kung paano siya kagatin ng babae kanina sa cr kahit na sinabi niya na babayaran niya ito. Nagmatigas pa ito ngunit sa huli ay hindi rin naman nakatanggi sa kaniya.

“Alam niyo na kung anong gagawin niyo sa kanila.” sabi niya at tinalikuran ang mga ito. Masyado siyang busy para pagtuunan niya pa ng pansin ang mga taong ito.

Sinabayan siya ng lakas ni Alec at inabot ang ilang gamit sa kaniya. “Sir, nakuha ito ng mga tauhan noong maglinis sila ng banyo.” 

Isang ID at isang bracelet. 

Kinuha niya ang Id at tiningnan ang pangalang nakasulat. “Ingrid Santos.” bulong niya at tumitig sa mukha nito. Masasabi niyang maganda ito ngunit hindi ganun kaganda, yung tipong kababaliwan niya. Hindi siya sumagot kaya nagpatuloy si Alec.

“Pina imbestigahan ko na rin po siya sir at nalaman kong galing siya sa isang middle class na pamilya at nag-aral sa ibang bansa gamit ang scholarship. Ang kumpanya na pinanggalingan niya masasabi kong hindi nagpapahuli. Nakapag apply na siya sa kumpanya niyo at natanggap kaya siya umuwi dito sa bansa.” 

Pinulot ni Terrence ang bracelet at inamoy at doon niya nakumpirma na ang amoy nito ay kapareho ng amoy ng babaeng iyon sa banyo. Hindi niya akalain na magiging ganito kalakas ang epekto ng amoy nito sa kaniya dahil bigla na namang nagwala sa kanyang pantalon ang kanyang alaga. 

Biglang bumalik sa kaniya ang lahat ng nangyari sa pagitan nilang dalawa at naging mabibigat ang paghinga. “Dalhin mo siya sa akin bukas. Gusto ko siyang makausap.” sabi niya.

“Okay po sir. Siya nga po pala. Kanina pa po kayo hinihintay ni Madam.” sabi nitong muli sa kaniya na ikinatango niya lang bago sinulyapan ang relo sa kamay niya. Anong oras na pero gising pa rin ito at hindi pa nagpapahinga? 

Ano kaya ang sasabihin nito?

Naglakad siya patungo sa silid ng abuela. Kumatok muna siya sa pinto bago tuluyang pumasok sa loob. Nakita niyang nakaupo ito sa upuan nito at gising pa nga. Kaagad na nagliwanag ang mukha nito ng wala sa oras nang makita siya.

“May kailangan po ba kayo Lola?” marahan niyang tanong dito at lumapit. Umupo siya sa tabi nito.

Tumitig ito sa kaniya bago nagsalita. “Ang totoo niyan Terrence ay gusto ko ng magkaapo. Hindi na kita mahintay pa na mag-uwi rito ng girlfriend mo para ipakilala sa akin kaya ako na mismo ang naghanap ng babaeng pwede mong mapangasawa.” sabi nito sa kaniya.

“Lola…” sabi niya at napa buntong hininga. Sa totoo lang ay hindi ito ang unang beses na ginawa nito ang bagay na iyon sa totoo lang. Kung hindi siya magkakamali ay pang-apat na itong babae na napili nito para sa kaniya.