Kabanata 5 The Agreement I Won't Sign

“Papirmahin mo siya ng kasunduang magbibigay sa'yo ng karapatang magpatuloy sa pamamahala.”

Napahigpit ang hawak ni Alessia Escalante sa hawakan ng hagdan nang marinig ang sinabi ni Monica.

Ganoon din ang ginawa nila sa kanyang unang buhay.

Mula sa itaas ng hagdan, tanaw niya ang bahagi ng sala. Nakatago siya sa likod ng pader upang hindi mapansin nina Rafael at Monica.

“Wala kang dapat ipag-alala,” sagot ng kanyang ama. “Walang interes si Alessia sa negosyo. Mas gusto niyang habulin si Damian kaysa matutong magpatakbo ng kumpanya.”

Masakit marinig iyon mula sa sariling ama.

“Pero nakita mo kung paano siya sumagot kanina,” giit ni Monica. “Binanggit pa niya ang karapatan niya sa kumpanya sa harap ng mga Villacorta.”

“Galit lang iyon dahil hindi siya pinapansin ni Damian.”

“Paano kung seryoso siya?”

“Alessia doesn't know anything about business. Ako pa rin ang kakailanganin niya.”

Napakagat sa labi si Alessia.

Sa unang buhay, ganoon nga ang nangyari.

Pagsapit niya sa edad na bente singko, ipinatawag siya ni Rafael upang papirmahin sa isang Voting Trust Agreement.

Ipinaliwanag nitong maaari niyang ipagpatuloy ang paggamit ng voting rights ng mga shares na minana ni Alessia sa Meridian Logistics & Infrastructure Corporation (MLIC). Sa gayon, hindi na siya kailangang makialam sa mga desisyon ng kumpanya.

Kasal na siya noon kay Damian. Wala siyang interes sa negosyo at mas gusto niyang pagtuunan ng pansin ang pagiging mabuting asawa.

Kaya pumirma siya nang hindi binabasang mabuti ang kasunduan. Napakatanga niya sa kanyang past life.

Sa loob ng limang taon, nanatili sa itinalagang trustee ang paggamit ng kanyang voting rights. Nagpatuloy din si Rafael sa pamamahala sa MLIC.

Hindi na siya nakialam sa mga desisyon ng board. Kontento na siya sa buwanang perang ipinadadala ng ama mula sa kinikita ng kanyang pamana.

Ngayon, naisip niyang napakarami niyang binalewala noon.

“Siguraduhin mong pipirma siya,” narinig niyang sabi ni Monica.

Hindi na niya hinintay ang sagot ni Rafael.

Umatras siya mula sa hagdan at bumalik sa silid nang hindi gumagawa ng ingay.

Pagkasara ng p***o, naupo siya sa kama. Hindi maaaring malaman nina Rafael at Monica na narinig niya ang kanilang plano.

Kailangan muna niyang maunawaan ang mga karapatang iniwan sa kanya ng ina.

May naalala siyang malaking envelope na ibinigay noon ng abogadong humawak sa estate ng ina.

Lumapit siya sa kabinet at inilabas ang kahon ng mga lumang dokumento mula sa ibabang istante.

Nandoon pa rin ang envelope.

Nakasulat sa harap ang pangalan niya.

Alessia Monteverde Escalante

Binuksan niya iyon at inilatag sa kama ang mga papeles.

May mga kopya ng dokumento tungkol sa kanyang mana, impormasyon sa shares, at mga pahinang nagpapaliwanag kung paano pansamantalang gagamitin ang voting rights hanggang sa kanyang ikadalawampu't limang kaarawan.

Hindi niya maunawaan ang lahat ng legal terms.

Ngunit malinaw ang isang bagay.

Siya ang nag-iisang tagapagmana ng mga shares ni Isabella sa MLIC. Mayaman na ang kanyang ina bago pa man siya ipinanganak, at ang mga shares na iyon ang nagbibigay ng controlling interest sa kumpanya.

Sa edad na bente singko, matatapos ang pansamantalang kasunduang nagpapahintulot kay Rafael na gamitin ang voting rights.

Siya ang magiging CEO at magkakaroon siya ng kapangyarihang bumoto sa pagpili ng mga direktor pati na ang mga malalaking desisyon ng kumpanya.

Walang nakasaad na obligado siyang ipagkatiwala ang mga karapatang iyon sa ama.

“Bakit hindi ko ito pinahalagahan noon?” bulong niya.

Tiningnan niya ang pangalan ng kumpanya.

Meridian Logistics & Infrastructure Corporation (MLIC). May mga logistics hub, warehouse, freight transportation services, at infrastructure projects ang MLIC. Bilyonarya pala siya base sa assets na iniwan sa kanya ng namayapang ina.

Hindi niya kabisado ang operasyon o ang kasalukuyang kalagayang pinansiyal nito. Wala siyang alam.

Pero maaari siyang matuto.

Kailangan niyang malaman kung anong mga proyekto ang pinangangasiwaan ng kumpanya at kung anong mga kasunduan ang pinasok ni Rafael.

Higit sa lahat, bakit ayaw nitong pakawalan ang kontrol sa MLIC?

Kinuha niya ang cellphone upang itala ang mga dokumentong kailangan niyang hanapin.

Ngunit may pumasok na mensahe mula kay Damian Villacorta.

“Are you seriously canceling our engagement?”

Napairap si Alessia.

Kanina lamang ay nag-usap sila sa labas ng kanyang silid. Hindi pa rin ba sapat ang sinabi niya?

“Sinabi ko na. Hindi ako magpapakasal sa'yo.”

“You can't just walk away from an agreement between our families.”

“Hindi ako bahagi ng kontrata ninyo, Damian.”

“Tell that to our fathers.”

Napabuntong-hininga siya.

Muling nag-message ang lalaki.

“My father wants another meeting with your family tomorrow. We need to discuss the partnership.”

Napatingin si Alessia sa mga dokumentong nakalatag sa kama.

Malaking real estate developer ang Villacorta Land & Development Corporation (VLDC), samantalang logistics at infrastructure ang negosyo ng MLIC.

Mahalaga ang partnership, lalo na sa mga proyektong nangangailangan ng lupa, warehouses, at transport facilities.

Ngunit bakit kailangang nakatali rito ang kanyang pagpapakasal?

“Bakit kailangan akong kasama?” tanong niya sa mensahe.

“Because you're the one replacing Aria in the marriage arrangement.”

Napailing siya.

“Hindi ako papalit sa kanya. Hintayin mo siya. Maniwala ka. She wouldn’t make it sa modelling career niya kaya babalik ang babaeng pinakamamahal mo. Give her one year.”

“Wow, ‘yan ang sabi ng babaeng walang pangarap sa buhay. Kailan ka pa naging manghuhula, Alessia?”

“Bahala ka kung ayaw mong maniwala. Pero dadalo ako para marinig ang usapan tungkol sa negosyo.”

“Does that mean you're reconsidering?”

“No. Business meeting lang.”

Nang magpadala pa ito ng mensahe, hindi na siya sumagot.

Binalikan niya ang envelope.

Nakasulat doon ang pangalan at contact details ng abogadong humawak sa estate ni Isabella.

Kailangan niyang makausap ito nang hindi nalalaman nina Rafael at Monica.

Dalawampu't apat na taong gulang na siya. Hindi niya dapat sayangin ang natitirang panahon bago ang kanyang ika-25 kaarawan.

Itinabi niya ang mga dokumento sa drawer ng bedside table.

Habang naghahanda nang matulog, muling tumunog ang cellphone.

Mensahe mula kay Rafael.

“Alessia, basahin mo ang attached document. Pag-usapan natin bukas. Para ito sa ikabubuti mo kapag naging twenty-five ka na. Hindi mo na kailangang problemahin ang MLIC.”

May kalakip na P*F file.

Binuksan niya iyon. Voting Trust Agreement

Nanikip ang dibdib ni Alessia.

Ganoon din ang uri ng kasunduang pinirmahan niya sa unang buhay.

Ngunit nang makarating sa huling pahina, may napansin siyang hindi niya inaasahan.

May nakalagay nang pangalan sa bahaging para sa itinalagang voting trustee.

Hindi iyon ang pangalan ng kanyang ama.

Kundi ang pangalan ng babaeng pumatay sa kanyang ina.

Monica Escalante.