Kabanata 5

Sa pagpuwesto namin sa bar counter, nagsabi si Heriane ng iinumin naming cocktail sa bartender na naroon. Habang hinihintay ay nagkukuwentuhan kami nang bigla namang may taong bumangga sa likod ko.

"Sino ba 'tong taong 'to?" naiinis kong bulong sa sarili ko, ngunit humarap ang lalaki dahil tila narinig niya ako.

"Oops, I'm sorry," sabi ng lalaki nang matulak niya ang likod ko. Matalim ko siyang tinignan pero nakangiti lang siya sa 'kin. Parang balewala lang sa kaniya.

Ang bastos nito, ah?!

"Ah, hi, sir Ivran. I'm Heriane, and this is my friend, Senra," agad namang pagpapakilala ng kaibigan ko at saka nakipagkamay sa lalaking ito.

"Oh, hi," sabi naman ng lalaki at saka niya ako muling hinarap. "Hindi ko sinasadyang mabangga ka," sabi niya sa 'kin.

"Senra, makipagkamay ka na. Si sir Ivran 'yan," nagngingitngit na bulong ni Heriane sa 'kin. Kahit naiinis ay nakipagkamay na ako sa Ivran na 'to.

Uminom at nagkwentuhan kami ni Heriane. Pansin ko na marami ang mga babaeng sing-edad namin ang nandito. Nakasuot sila ng maikling damit at nakikipag-usap sa mga lalaki. Meron pa na tila inaaya nila then saka sila aalis.

"Wait," dinig kong sabi ni Heriane habang nakatingin nang malagkit kay Mr. Thompson. "Senra, sasaglit lang ako, ha? Ikaw muna rito," sabi niya.

Tumango na lang ako at ngumiti bago umalis si Heriane. Sumama na siya kay Mr. Thompson na mukhang excited na excited.

Napainom na lang ako ng cocktail dahil sa ilang. Anong gagawin ko rito? Ayoko namang gawin 'yong ginagawa ng karamihan.

Umupo ako sa gilid at pinagmasdan ang mga taong nasa paligid ko. Ang iba, busy sa pakikipagkwentuhan, tawanan, at inuman. Talagang tahimik lang dahil yung tugtog, hindi pang-party.

"Alone?" tanong bigla ng lalaking sumulpot sa gilid ko. Nang tignan ko ito, si Mr. Ivran lang pala.

Ngumiti ako nang tipid sa kaniya.

Natawa siya sa inasal ko at naupo sa tabi ko na may pagitan. "You still look mad at me, Ms. Senra. I didn't mean to—"

"Pwede po ba, sir Ivran, h'wag niyo po akong ini-english. Tsaka halata naman pong mag-isa lang ako rito, tatanungin niyo pa ako," pagmamaldita ko sa kaniya.

"Woah, chill," awat niya at muling natawa sa 'kin. "I already apologized, Ms. Senra. Well, kung ayaw mo 'kong mag-english, kaya ko namang mag-Tagalog."

Hindi ko siya inimikan. Tinignan ko lang siya at gayundin naman siya sa 'kin. Seryoso ako, habang siya ay nakangiti sa 'kin.

"Bakit po kayo nandito? May asawa po kayo, 'di ba?" tanong ko sa kaniya.

"I haven't," sagot niya. Medyo gumaan ang pakiramdam ko. "But I already have fiancée," dugtong pa niya. Tumango na lang ako. Akala ko, iba ang status niya kaysa sa mga taong nandito.

"May fiancée na po pala kayo, e, bakit pa kayo nandito?" tanong ko pa.

"To celebrate with my friend. Bakit, may masama bang makipag-celebrate?" tanong din niya. Sandali akong napaisip at umiling.

"P-Pero bakit marami pong dalagang babaeng nandito?" tanong ko ulit.

"Hmm... bakit nga ba? Bakit ka rin ba nandito?"

Natahimik ako sa tanong niyang 'yon. Oo nga, 'no? Hindi ko naman sila kilalang lahat maliban sa kaibigan kong si Heriane.

Natawa si Mr. Ivran dahil sa pananahimik ko.

"See?" aniya.

"E-E nandito lang naman po ako dahil sa kaibigan kong si Heriane. Sinamahan ko lang po siya," sagot ko na lang.

"Well, mukhang busy ang kaibigan mo. Pwede ba akong mag-stay rito to have a conversation with you? I mean, wala namang mali. We can be friends, actually," sabi ni Mr. Ivran.

Kahit nag-aalangan ang isipan ko ay tumango na lang ako. Mukha namang mabait siyang tao. Approachable.

Iniinom ko pa rin ang cocktail ko habang siya ay may dalang beer.

"So, what's your job?" tanong niya.

"Ahh... ehh... baka husgahan mo 'ko, e," sambit ko.

"Why? Wala namang masama kung nagtatrabaho ka, 'di ba?" tanong niya. Sandali pa akong napaisip pero may point naman siya.

"Uhmm... nagtatrabaho ako sa IV Club kung saan ako pinasok ng best friend kong si Heriane. Kahapon lang ako nag-start doon. Buti nga, pinayagan ako ng manager na pumunta rito, e," sabi ko.

Sandaling napahinto si Mr. Ivran then unti-unti siyang tumango sa 'kin.

"I see..." sambit niya. "Ano namang work mo ro'n?"

"Entertainer. Dancer. Actually, first time kong nag-work then sa ganitong trabaho pa. Desperada na kasi akong makatulong sa Mama ko, e."

Ngumiti si Mr. Ivran sa 'kin. Nakakainis siya kanina, pero masarap din pala siyang kausap at mabait pa.

"Wanna drink? Cheers."