الفصل الثالث (صدمة أم)

أجابتها الأم بحبور واضح:

_ لا يا حبيبتي، تعالي إنتِ بس وملكِيش دعوة بأي حاجة. أنا بخلي أم سعد، جارتنا، تشتريلي كل اللي محتاجاه متوضب وجاهز للحشو، والست بصراحة مبتتأخرش أبدًا، ومرات ابنها سعد بتجيبلي الطلبات لحد البيت، ربنا يسعدهم زي ما بيساعدوني.

ثم أكملت بابتسامة ممتنة لبعض احبائها:

_ وكمان هيام ومرات عمك بيساعدوني كتير و معايا على طول.

ظلت تتجاذب أطراف الحديث مع ابنتها، تبثها حنانها من خلف شاشة الهاتف، بينما قلبها يتوق لاحتضانها ولملامسة وجهها الذي اشتاقت لكل تفصيلة فيه. كانت رهف الوحيدة التي ما زالت تمنحها شعور الأمومة الحقيقي، رغم المسافات والغربة التي تفصل بينهما.

استمر حديثهما لأكثر من ساعة، حتى استيقظ شاب متوسط الطول، وسيم الملامح إلى حد كبير، يرتدي ملابس منزلية بسيطة، وشعره مبعثر من أثر النوم. اقترب من والدته ليظهر خلفها في إطار المكالمة، ثم بدأ يداعب أخته بنظراته المرحة وهو يلوح لها بيديه: _روفي الجميلة عاملة إيه؟ وحشتيني.

بادلته رهف النظرات نفسها، ثم غمزت له بمشاكسة: _سمور عامل إيه يا راجل؟ إيه اللي صحاك بدري كده؟ كنت لسه هقطع في فروتك مع ماما.

لوّح سامر بيديه باعتراض ساخر:

_يا ساتر يا رب! مش هتسبوني في حالي إنتِ والست الوالدة؟! أنا بقولك عاملة إيه يا رخمة، تقوليلي هقطع في فروتك؟ خسارة فيكي السؤال أصلًا.

لكزته أمه بخفة في ذراعه وهي تقول بغيظ لطيف:

_ اختك عايزة تطمن عليك يا عبيط، وإنت دبش كده ليه؟

عقدت رهف حاجبيها ثم قالت بمكر وهي تضيق عينيها: 

_تصدق إنك رخم؟ وأنا اللي كنت هسأل ماما على العروسة بتاعتك وأقنعها بيها يا غتيت!

نظر لها سامر بحدة مفاجئة، بينما ارتسم الصمت على وجه فريدة فور سماعها كلمات ابنتها. شعرت للحظة أن هناك أمرًا يُخفى عنها، وأن أبناءها صاروا يتبادلون أسرارهم بعيدًا عنها.

لكنها أخفت حزنها سريعًا خلف ابتسامة باهتة، وقالت بسخرية موجوعة:

_ ههه... ماما إيه بس؟ هو بقى فيها ماما دلوقتي؟

شعرت رهف فورًا بأنها أخطأت حين رأت الحزن يمر سريعًا بعيني والدتها، بينما انسحب سامر من أمام الكاميرا متعللًا بأي حجة، هاربًا من الموقف حتى تنتهي المكالمة.

تنهدت رهف ثم قالت محاولة تدارك الأمر:

_ حبيبتي يا ماما، متزعليش نفسك... الأستاذ سامر كان حكالي أنا ونديم إنه مرتبط ببنت كويسة جدًا ومن عيلة محترمة، وكان ناوي يكلمك بنفسه، بس هو اللي غبي ومستعجل كعادته.

تملكت فريدة نفسها بصعوبة، ثم قالت بحزن خافت: _ يعني خلاص... بنت عمك اللي شرياك من صغرك يسيبها كده ويروح لواحدة إحنا منعرفش أصلها ولا فصلها؟

قالت رهف محاولة تهدئتها: 

_يا ماما، هو اللي هيتجوز مش إحنا... سيبيه يجرب ويمكن تكون مناسبة ليه.

ضحكت فريدة بسخرية موجوعة:

_أسيبه يجرب؟! والبنت الغلبانة اللي مستنياه دي ذنبها إيه؟ دي راضية بظروفه ومطلبتش منه حاجة زي باقي البنات... بس أقول إيه، ملوش نصيب في الطيب.

أنهت حديثها مع ابنتها بالدعاء لها ولأحفادها، ثم أغلقت الهاتف ببطء، قبل أن تعود كعادتها تتصفح مواقع التواصل الاجتماعي، باحثة عن تلك العلامة الخضراء الصغيرة التي تدل على وجود أحد أبنائها متصلًا الآن، فتطمئن لمجرد رؤيتها.

ولأن لا أحدًا منهم لم يكن متواجدًا، بدأت ترسل إليهم بعض الصور المحملة بالأدعية والعبارات الدينية التي تحفظها على هاتفها. كانت تتفنن في جمع تلك الملصقات والرسائل، وتستخدمها يوميًا للتواصل مع صديقاتها وجاراتها، نساء يشبهنها كثيرًا، يجمعهن فراغ الوحدة ويحاولن الهروب منه داخل هذا العالم الإلكتروني البارد.

وبعد أن نشرت دعاءها اليومي على صفحتها الخاصة، أغلقت هاتفها واتجهت نحو غرفة سامر، الذي هرب سريعًا إلى غرفته فور انتهاء المكالمة.

وقفت أمام الباب ثم قالت بعتاب هادئ: 

_ ها يا أستاذ... مش ناوي تفهمني إيه الكلام اللي كانت أختك بتقوله ده؟

زفر سامر بضيق، فقد كان يعلم أن موقفه لا يُحسد عليه. صحيح أنه لم يتقدم رسميًا بعد، لكنه أخفى عنها الأمر طويلًا، وهو يعرف جيدًا مدى تعلقها بفكرة زواجه من ابنة عمه.

قال بخجل: 

_حاضر يا ماما... هقولك على كل حاجة.

لكنها قاطعته سريعًا:

_ الأول قوم صلي فرض ربنا، وأنا هعملك حاجة تفطر بيها وبعدها نتكلم.

أومأ برأسه مطيعًا، ثم توجه إلى المرحاض ليتوضأ، قبل أن يقف للصلاة وقلبه ممتلئ بالتوتر. دعا الله في سجوده أن يلين قلب أمه ويمنحه رضاها.

بعد انتهائه، خرج ليجدها قد أعدت له كوبًا من الشاي بالحليب وبعض المعجنات الساخنة التي يحبها. جلست تنتظره بصمت، بينما هو يدرك أن الحديث القادم لن يكون سهلًا.

جلس بجوارها، ثم قال بخزي واضح: 

_ ماما... أنا آسف إني خبيت عليكِ، بس دي حياتي، وأنا معملتش حاجة غلط غير إني مأقولكيش. وده بس لأني عارف إنك مصرة على هيام، وأنا مش شايف نفسي معاها.

نظرت إليه فريدة بدهشة ممزوجة بالألم، وقالت: — وده يديك الحق تاخد خطوة زي دي من غير ما ترجعلي؟ وبعدين بنت عمك مالها؟ ما إنت كنت بتموت فيها! إيه اللي اتغير؟ وبعدين مين الناس اللي وافقوا عليك من غير ما يشوفوا أمك وأهلك؟! ولا قلتلهم إنك ملكش حد؟

ثم أكملت بصوت مكسور: 

_ اللي ملوش كبير يشتريله كبير يا بني... ولا خلاص مبقاش ليا لازمة وسطكم؟

شعر سامر بوخز الضمير، فاقترب منها قائلًا: — حقك عليا يا أمي... والله ما قصدت أزعلك. وبعدين أنا لسه ماخدتش خطوة رسمية، الموضوع مجرد تعارف، وإنتِ أول واحدة هتيجي معايا لو حصل نصيب. حتى إخواتي كلهم عارفين، وكنت ناوي نتكلم النهارده.

هزت رأسها بيأس وهي تقول: 

_ براحتك يا بني... مش أنا اللي هتتجوز. بس قولي، هي هترضى تعيش معايا؟ ولا هتأجر شقة وتاخدك بعيد زي الباقي؟

تاهت نظرات سامر للحظة، فهو نفسه لم يكن يملك إجابة واضحة، ثم قال مترددًا:

_لسه مقررنـاش... كل حاجة بتيجي بوقتها يا ست الكل. المهم إنك توافقي، والباقي ربنا يسهلـه.

ضحكت فريدة ضحكة ساخرة قصيرة، فقد كان دائمًا يؤكد لها أنه لن يتركها مهما تزوج، لكنها بدأت تشعر أن الأيام تغيّر الجميع.

ورغم ألمها، بدأ عقلها ينشغل فورًا بشيء آخر؛ كيف سيتحمل كل تلك الأعباء؟ من أين سيأتي بمصاريف الزواج والسكن والأثاث والشبكة؟ كانت تعلم أن ما تملكه لا يكفي، لكنها في الوقت نفسه لم تكن قادرة على التخلي عنه أو تركه يواجه الحياة وحده.

تنهدت بعمق، ثم تمتمت بحزن: — ربنا المعين يا بني... ويقويني أقدر أساعدك. بس أشوف إخواتك هيقفوا جنبك إزاي...؟