الفصل الرابع: خلف الباب

ظليت واكف بمكاني، أنفاسي متسارعة، وصوت دقات گلبي تملي الغرفة. الدگات على الباب جانت هادئة، منتظمة، ومستفزة بنفس الوقت. رديت بصوت مهزوز:

— "منو؟ نور؟ إذا إنتي، عوفي الأكل وراي.. أنا جاي أرتاح.” لا جواب. الدگات استمرت. بكل شجاعة، وبدون ما أفكر بالتبعات، لزمت مقبض الباب وفتحته بضربة واحدة. جانت نيتي أواجه أي أحد، حتى لو كان صكبان جاي يسوي مقلب. بس اللي شفته خلاني أتراجع خطوة لورا.. الممر جان فارغ تماماً. بس على الأرض، قبال باب غرفتي مباشرة، جان اكو "استكان شاي" مكسور، والچاي بعده حار والبخار يصعد للسقف مثل خيوط دخان متراقصة. شلت التلفون من جيبي بيدي اللي ترجف، الحساب مفتوح، ورسالة جديدة وصلت بلمحة بصر:

— "الحقيقة مو دائماً نلگاها ورا الأبواب، محمد. أحياناً الحقيقة هي اللي تگعد ويانا على نفس الميز، بس إحنا نرفض نشوفها.” طلعت للممر، ناديت بصوت عالي: "نور! نور!"

طلعت نور من المطبخ وهي ماسكة خاشوكة، وجهها جان طبيعي وما بيه أي أثر للتوتر:

— "شبيك حمودي؟ ليش جاي تصيح؟"

باوعت للاستكان المكسور اللي عالأرض، وبعدين باوعت لنور: "هذا.. هذا منو جابه لهنا؟"

نور باوعت للاستكان باستغراب: "يا استكان؟ حمودي إنت مو بخير.. الأرضية نظيفة، ماكو شي مكسور."

تجمدت بمكاني. باوعت مرة ثانية للأرض.. الاستكان اختفى! ماكو لا شاي ولا كسر. بس ريحة "الهيل" جانت تارسة الممر. بهاللحظة، حِرت بأمري. الموضوع طلع من إطار التلفون والإنستغرام، وبدا يلاحقني بمكاني الوحيد الآمن، بيتي. شعرت برعب غريب، وكأن اكو خيط خفي ديربط كل هالصدف ببعضها، خيط ما أعرف وين بدايته ولا وين نهايته. جان يوم الخميس، يوم توزيع الرواتب بمعمل "جميلة". الضجيج هالمرة جان يختلف، عمال يضحكون، وعمال يحسبون فلوسهم بالهواء. استلمت ظرفي، جان بيه تعب 12 ساعة شغل يومي، ريحة العرق والماكينات جانت عالقة بالفلوس. أبو حيدر، المشرف، باوعلي وهو يگول: "ها محمد، وجهك مو طبيعي هالأيام.. صاير تغلط بالوزن، واليوم حتى الراتب أخذته بدون ما تباوع عليه! تره الشغل أمانة هزيت راسي وطلعت. جانت بجيبي أوراق الراتب، وبإيدي تلفوني اللي صاير جحيمي. مشيت بالشوارع، وقررت أروح للسوق، لازم أجيب شي لنور. هي الوحيدة اللي تستاهل تعبي، هي اللي تخفف عني كل هموم الدنيا. دخلت لمحل هدايا، اشتريت "شال" ناعم بلون تحبه، حسيت بفرحة بسيطة، فرحة حقيقية.. بعيدة عن "مريم" والإنستغرام. بس من رجعت للبيت، فتحت تلفوني.. لگيت مريم دازة رسالة:

— "صرف العافية يا حمودي.. بس تذكر، الفلوس تجيب الملابس، بس ما تجيب الهدوء. تدري وين راحت فلوسك؟ راحت تعويض عن الكذبة اللي بدت تنكشف. تجمدت بمكاني. شلون عرفت إني استلمت راتبي اليوم؟ وشلون عرفت إني اشتريت هدية لنور؟

دخلت للغرفة، ذبيت الفلوس على الميز، وبديت أدور بكل زاوية.. هل اكو جهاز تنصت؟ هل اكو كاميرا؟ نور دخلت للغرفة وشافتني بهذه الحالة:

— "حمودي! شبيك؟ ليش هيج جاي تدور؟"

باوعتلها، عيونها جانت مليانة قلق. حسيت بغصة.. هل هذي البنية اللي دتكتبلي مريم؟ هل نور هي اللي جاي تتلاعب بأعصابي؟ الفكرة كانت مجنونة، بس بذاك الوقت، وبخضم التعب، بديت أشك بكل شي.. حتى بأقرب الناس إلي. نظرتُ لنور، كانت عيونها التي تذكرني بصور أمنا القديمة، تفيض حناناً وقلقاً. لم أعد أحتمل هذا الضغط. سحبت نفساً عميقاً وقلت بصوت متقطع: — "نور.. أنا تعبان. تعبان لدرجة إني أحس عقلي جاي يهرب مني."

جلست بجانبي، لم تسألني عما حدث في العمل، بل وضعت يدها على كتفي وقالت بهدوء:

— "أشوفك يا حمودي، أشوفك تحچي وي روحك، وتصفن بالساعات بذاك التلفون. هذا مو طبيعي. الدنيا أخذت منا هواي، بس لا تخليها تاخذ عقلك بعد. أخذت نفساً آخر وبدأت أحكي لها كل شيء: عن "مريم"، عن الحساب، عن الرسائل التي تعرف تفاصيل حياتي. نور لم تضحك، بل قالت بقلق:

— "اسمعني يا أخوي، أنت لازم تروح لطبيب، شخص مختص يساعدك ترتب أفكارك. في تلك اللحظة، رنّ تلفوني. ظننتها رسالة جديدة من مريم، ففتحته بيدي المرتجفة.. لكن الصدمة كانت أكبر. لم تكن رسالة نصية، بل كان "تسجيل صوتي" من رقم غريب، فتحته وعلت أصوات الغرفة بصوت "صكبان" وهو يضحك ويگول:

— "ها يا عريس؟ شكو صافن بالبيت؟ تعال اطلع، الشلة كلها بالمقهى، خل نتونس ونغير جو، واليوم الليلة سهرتنا للصبح! تجمدت بمكاني. صكبان؟ هو اللي ديسوي هذا كله؟ هل هو اللي ديدز رسائل مريم؟

نور باوعتلي بخوف: "منو هذا؟"

ما جاوبتها. صكبان اللي چنت أعتبره صديقي، إذا طلع هو اللي ديلعب بأعصابي، فالموضوع صار شخصي ومو مجرد كذبة.