الثلاثون

عند فايز...

نظر فايز إلى فتحي ببرود وهو يقول:

أساعدك إزاي يعني؟

كان فتحي يقف أمامه في حالة من التوتر والقلق، ثم قال برجاء واضح:

يا باشا، أنا هتسجن، من فضلك اوقف معايا.

رفع فايز حاجبه باهتمام خفيف وقال:

وأنا هستفاد إيه من ده كله؟

اقترب فتحي منه أكثر، ثم قال بخبث:

هتستفاد إني أكون معاك، وأساعدك.

هجيبلك معلومات عن المناقصة الجديدة.

تغيرت نظرة فايز قليلًا، وقال باهتمام حقيقي:

إزاي؟

خفض فتحي صوته وهو يقول:

- عندي فكرة جهنمية

- واللي هي؟

ساله فايز باهتمام مترقب، فابتسم فتحي ابتسامة خبيثة وقال:

- هقولك يا باشا.

ثم اقترب منه أكثر، وبدأ يهمس له بالخطة، بينما ارتسمت على وجه فايز ملامح رضا شريرة.

*******

في فيلا سليم...

كان عمر يجمع أغراضه داخل الحقيبة بعصبية واضحة، وكأنه يحاول الهروب من كل ما يشعر به.

دخل سليم الغرفة، ثم نظر إليه بحزن وقال:

برضه يا عمر عاوز تعمل اللي في دماغك كده يا ابني؟

تنهد عمر بضيق دون أن ينظر إليه:

- معلش يا جدي، سيبني على راحتي.

اقترب منه سليم أكثر وقال بألم:

- ليه كل ده يا ابني؟ ما تخليش الشيطان يتغلب عليكو.

أنا كبرت، ومش حمل فراق، كفاية أبوك، ومن قبله عمك.

ثم جلس بتعب وهو يكمل بصوت متأثر:

- يا ابني، إنتوا اللي فاضلينلي.

انتبه عمر سريعًا لتعبه، وترك الحقيبة متجهًا نحوه يسأله بقلق:

- جدي إنت تعبان؟ خلاص اللي إنت عاوزه أنا هعمله.

فقال الجد بحزم رغم نبرته المتعبة:

- ترجع حاجتك مكانها، وتصالح بنت عمك، وتقعد مع أخوها تحددوا كتب كتابكم.

ده لو مش عاوزها تبقى دخلة.

قبض عمر على كفيه بقوة، بينما ظهر الصراع واضحًا على ملامحه:

يا جدي.

لكن سليم قاطعه بحزم:

اعمل اللي قولتلك عليه يا ابني.

البنت مموّتة نفسها من صباح ربنا.

أغمض عمر عينيه للحظة، ثم مرر يده على وجهه بإرهاق وقال:

حاضر، حاضر يا جدي.

*****

عند فهد وملك...

أخرج فهد شيكًا من درج مكتبه ومده إلى ملك قائلًا:

- ملك خدي الشيك ده، عشانك.

نظرت إليه بدهشة وقالت:

عشاني أنا ليه؟

رفع فهد حاجبه وقال باستغراب:

- هو إيه ليه؟

إنتِ ناسية اللي عملتيه؟

هزت رأسها سريعًا وقالت بتواضع:

- لا يا فندم، أنا ماعملتش حاجة ده شغلي.

ابتسم فهد ابتسامة خفيفة وقال:

-وأنا قولتلك قبل كده، أنا ماببخلش على اللي بيشتغلوا معايا.

وإنتِ كسبتي الشركة كتير.

في صفقة الأجهزة، وكمان الأخطاء اللي اكتشفتيها في الملفات.

نظرت ملك إلى الشيك بصدمة وقالت:

يا فندم، دا المبلغ كبير أوي!

ده عشرين ألف جنيه!

نهض فهد من مكانه وهو يرتدي جاكيته بهدوء، ثم قال بثقة:

إنتِ تستاهلي أكتر من كده.

ثم التقط مفاتيحه وأضاف:

يالا خدي الشيك وروحي جهزي حالك لما أوصلك.

ارتبكت ملك وقالت بسرعة:

- لا يا فندم، مش كل مرة هتعب حضرتك.

نظر إليها فهد بجدية خفيفة وقال:

لا تعب ولا حاجة، يلا جهزي حالك.

....

يلا يا سارة، هنتأخر!

قالتها ملك وهي تلتفت إليها على عجل، لترد سارة بابتسامة مطمئنة:

ـ يا بنتي ما تقلقيش، مش هنتأخر.

خرج صوت والدة سارة من الخارج:

ـ جهزتوا يا بنات؟

أجابتها سارة سريعًا:

ـ أيوة يا ماما.

ـ طيب يا حبايبي، عشان ما تتأخروش.

غادرت الفتاتان المنزل متجهتين إلى أحد المولات الكبيرة، حيث قضتا وقتًا طويلًا بين المحال، تشتريان الكثير من الملابس والأغراض لكلٍ من ملك وسارة.

وبعد جولة طويلة بين الطوابق والمحلات، ألقت سارة بنفسها على أحد المقاعد بتعب واضح، وهي تئن:

ـ آااه حرام كده! رجلي مش قادرة.

ضحكت ملك بخفة وقالت:

ـ تعالي نقعد شوية.

جلستا أمام أحد المقاهي الصغيرة داخل المول، وأمامهما أكواب العصير الباردة. ظلت سارة تتأمل وجه صديقتها للحظات قبل أن تقول بمكر:

ـ أنا حاسة بلمعة جديدة في عينيكي كده!

رفعت ملك حاجبيها بدهشة مصطنعة وهي ترتشف العصير:

ـ لمعة إيه يا أم لمعة إنتِ؟! ههههه.

ضحكت سارة ثم ضيقت عينيها: ـ اضحكي... اضحكي ودوّبي الكلام براحتك، بس أنا حساكي متغيرة بجد. في حاجة أنا ما أعرفهاش؟

تنهدت ملك بخفوت وقالت:

ـ بصي يا ستي, تقدري تقولي إن في حاجة، بس أنا مش عارفة إيه هي.

اقتربت سارة منها بحماس:

ـ آآه! قولتيلي بقى!! ومن إمتى الكلام ده؟

هزت ملك كتفيها بحيرة:

ـ والله ما عارفة.

ابتسمت سارة بخبث:

ـ ويبقى مين سعيد الحظ؟

اسبلت ملك اهدابها قليلًا وقالت بصوت خافت:

ـ مستر فهد صاحب الشركة.

اتسعت عينا سارة بدهشة:

ـ وهو؟!

عضّت ملك شفتيها بحيرة:

ـ مش عارفة يا سارة هو راجل صعب إنك تفهميه ورغم كدا فيه شخصيات كتير عكس بعض جنتل، وقاسي، وكريم، وحازم، و وعصبي و.....

قاطعتها سارة بسرعة وهي ترفع يدها:

ـ حيلِك حيلِك! أنا بسألك عن مشاعره ناحيتك، مش بقولك اوصفيه!

ضحكت ملك بخجل، بينما أكملت سارة بنبرة أكثر جدية:

ـ خلي بالك يا ملك، إنتِ مالكيش تجارب كتير في الحياة، فما تثقيش في حد بسهولة.

تنهدت ملك وهي تعبث بالكوب بين يديها:

ـ يا بنتي، الحكاية أصلًا من طرف واحد بس.

عقدت سارة حاجبيها:

ـ تقصدي إنه ملمحش ليكي بأي حاجة؟

هزت ملك رأسها ب لا.

فاقتربت سارة منها أكثر وقالت بحنان وهي تشار على موضع قلب ملك:

ـ بصي يا ملك قلبك دا غالي، ومش أي حد يسكن فيه، فهماني يا ملك؟

أومأت ملك برأسها ببطء وتمتمت:

- فاهماكي أكيد، بس مشاعرنا مش بإيدينا.

ابتسمت سارة وهي تربت على يدها:

ـ أكيد بس برضه خلي بالك.

أنهت ملك عصيرها ثم نهضت وهي تقول بحماس لتداري خجلها:

ـ يلا بقى نكمل الحاجات عشان ما نتأخرش.

وقفت سارة وهي تتمتم بتذمر مضحك:

ـ يلا بينا وربنا يستر على رجليا.

*******

أمام الشركة...

كانت ملك تستعد لركوب السيارة بجوار فهد، بينما كان هو يفتح لها الباب بهدوء كعادته، دون أن ينتبه كلاهما إلى تلك العيون التي كانت تراقبهما من بعيد.

وقفت عبير في مكانها تتابع المشهد بترقب، ثم أخرجت هاتفها سريعًا واتصلت على روجيدة.

و بعدما التقطط لهما عدة صور:

- ألو أيوة يا روجيدة هانم.

جاءها صوت روجيدة بلهفة:

- خير؟ في جديد!!

قالت عبير بسرعة وهي تتابع السيارة بعينيها:

- في حاجة مهمة لازم تعرفيها.

ملك السكرتيرة لسه راكبة مع فهد بيه.

ساد الصمت لثوانٍ من الطرف الآخر، قبل أن يأتي صوت روجيدة متوترًا وغاضبًا:

- إيه؟!

ابتسمت عبير بخبث وهي تكمل:

- أيوة يا هانم، ودي مش أول مرة.

استمعت قليلًا لما تقوله روجيدة، ثم قالت:

- حاضر يا هانم أي حاجة هتحصل هقولك على طول.

وأغلقت الهاتف، بينما نظرات الشماتة لا تفارق وجهها.

*******

في فيلا رشدي...

كانت روجيدة تتحرك بعصبية داخل الغرفة، بينما والدتها تتابعها بقلق.

قالت روجيدة بانفعال:

شفتي يا مامي؟!

البيه كل يوم يوصلها!

لا، ومش كده وبس دي كمان كانت معاه في ألمانيا!

ضيقت والدتها عينيها بعدم ارتياح وقالت:

- لا الحكاية دي ماتطمنش.

لازم نتصرف بسرعة.

نظرت إليها روجيدة بتوتر:

- هنعمل إيه يا مامي؟

ابتسمت والدتها ابتسامة غامضة تحمل الكثير من الخبث، ثم قالت بثقة:

ماتقلقيش كل مشكلة وليها حل.

قالتها وساد الصمت، بينما كانت نوايا الشر تبدأ في التشكل بهدوء.