الفصل الثالث

تجمد كل من سميحة وسروة في مكانهما حين سمعتا طرقاً عنيفاً ومتتالياً على الباب الخارجي، كأن من يطرق ينوي تحطيم الباب.

نهضت سميحة بسرعة وخرجت لتفتح الباب، فتفاجأت بجارهم يقول لها بصوت عالي:

"الأستاذ نصير وقع في الشارع والإسعاف خدته على المستشفى دلوقتي!"

حدقت إليه سميحة بصدمة:

"إيه! مستشفى إيه دي؟"

رد عليها:

"مستشفى******* مش بعيدة، ولو عايزين حد يوصلكم أنا موجود."

أومأت برأسها:

"ااه.. طب ثانية واحدة هنلبس وجايين على طول كتر خيرك."

أغلق الباب وأسرعت لغرفة سروة، شدتها من ذراعها وهي تصيح بها:

"قومي بسرعة أبوكي وقع ونقلوه على المستشفى!"

اتسعت عيون سروة بصدمة وتجمعت الدموع في عينيها، فشدتها عمتها بقوة أكبر قائلة بتوبيخ:

"مش وقت عياط دلوقتي قومي نشوف أبوكي اللي هيجراله حاجة بسببك يلا البسي بسرعة."

وصلوا إلى المستشفى خلال دقائق، وحين سألوا عن أخيها الذي قدم منذ قليل، أخبروهم أنه تعرض لأزمة قلبية وجبت دخوله غرفة العمليات.

انهارت سروة حين سماعها ذلك بينما تماسكت عمتها حتى تستطيع السيطرة على الموقف، ساندت سروة حتى وصلوا أمام غرفة العمليات وانتظروا بترقب وخوف.

وسط هذا الانتظار الثقيل أمام باب غرفة العمليات، كان في الجانب الآخر من العالم عالمٌ مختلف تماماً يعيش فيه تاج الدين، بعيداً عن هذه العاصفة.

كان تاج يسير برفقة روفان في المجمع التجاري، والملل يتسلل إليه بعد ساعات من التنقل بين المحلات، دون أن يمنحا خطتهما بالجلوس معاً أي فرصة، رغم أنه اقتطع هذا الوقت بصعوبة من جدوله المزدحم لإنهاء ترتبيات حصوله على الدكتوراه واستعداده للعودة لمصر.

التفتت إليه روفان وهي تتفحص إحدى الواجهات، وقالت بنبرة دلال متحكمة:

"تاج.. تعالي ندخل المحل ده كمان، الشوز اللي في الفاترينة شكله تحفة ولازم أقيسه."

نظر إلى ساعته وأجابها بنبرة حاسمة وهادئة:

"روفان، إحنا بقالنا ساعات بنلف، ومن بداية اليوم مقعدناش حتى نتكلم مع بعض! أنا يدوب لاقي وقت بالعافية وسط الضغط اللي أنا فيه عشان نتقابل، مش عشان نقضي اليوم كله في المحلات."

لوت شفتيها بضيق طفولي قائلة وهي تتحرك نحو الداخل:

"جرى إيه يا تاج؟ أنت علطول بتشتكي؟ ما أنت نازل معايا مخصوص عشان نتبسط، وافقني بقى ومتبقاش نكدي."

قطع حديثهما رنين هاتفها، لتجيب مسرعة على إحدى صديقاتها. استمع تاج للمكالمة باقتضاب، وحين طالت أخرج هاتفه للعب به بملل حتى تنتهي من مكالمتها.

تبدلت ملامح روفان فجأة إلى الحماس وهي تقول:

"بجد؟ الحفلة والتجمع بتاع النهاردة اتحدد خلاص؟ طيب اقفلي اقفلي، أنا مسافة السكة وأكون عندكم علطول!"

أغلقت الهاتف والتفتت لتاج الذي ينظر لها بتعجب قائلة :

"تاج، والحفلة بتاعت أصحابي اللي قولتلك عليها هتبقى بكرة، وهما هناك دلوقتي متجمعين بيخططوا ليها، ومينفعش بجد أفوتها دي حفلة استنيناها كتير .. أنا هروح لهم بقى علشان نخطط سوا اللبس والميك اب وكل حاجة يدوب نلحق! وأنت روح كمل اللي وراك."

نظر إليها بدهشة واستنكار من طريقتها:

"تروحي فين؟ أنتِ بتتكلمي بجد يا روفان؟ يعني أنا مأجل أوراق وشغل وواقف معاكي بقالي ساعات عشان نقعد سوا، وفي الآخر أول ما صاحبتك تكلمك تسيبيني وتمشي عادي كدة؟"

حركت كتفيها بدلع غير مبالٍ بضيقه، واقتربت منه قائلة ببرود:

"يا حبيبي ما إحنا مع بعض من الصبح أهو! وبعدين الحفلة دي مهمة جداً بالنسبالي ومينفعش أغيب عنها.. يلا باي عشان متأخرش عليهم."

همست لنفسها بحماس: " كويس أنه أنا اشتريت الشوز دي دلوقتي هتليق جدا على الفستان اللي كنت مقررة البسه".

استدارت ومشت بخطوات سريعة، تاركة إياه يرمق أثرها بضيق حاد وعينين مشتعلتين بالغضب من طريقتها التي لا تراعي فيها سوى رغباتها فقط، وغادر المكان غاضباً.

وفي المستشفى بمصر، مرت الساعات ثقيلة حتى خرج الطبيب، فقالت سميحة بلهفة:

"أخبار نصير إيه يا دكتور؟"

قال الطبيب بهدوء:

"دلوقتي هننقله للعناية المركزة، اليومين الجايين دول مهمين أوي لاستقرار حالته، إن شاء الله لو عدوا على خير هيخرج منها بسرعة."

ثم ذهب فبكت سروة بشدة، أمسكتها عمتها من ذراعها بقوة:

"دلوقتي بتعيطي على إيه! على أبوكي اللي هيروح فيها بسببك! مفكرتيش فيه وأنتِ بتعملي عملتك السودة دي! ليه؟ ليه عملتي كدة ليه قولي!"

دفعتها دون أن تنتظر منها إجابة وذهبت حتى تجد العناية التي سيوضع بها أخيها.

كانت سروة منهارة على الأرض، نظرت لأعلى وهي تناشد الله بحرقة:

"يارب أنت عالم بيا يارب، أنت عالم بكل حاجة حصلت لي! يارب أنا عاجزة ساعدني يارب."

نهضت ببطء ولحقت بعمتها حتى غرفة العناية المركزة التي نُقل إليها والدها.

كانت تنظر له بألم وحسرة ووجهه الشاحب والأجهزة المحيطة به تكسر قلبها، تود لو كان بإمكانها أن تبوح بكل شيء وتريح كاهلها من هذا الحمل الثقيل الذي يكاد يقتلها ويُهلك من حولها.

بعد قليل سُمح لواحد أن يدلف ليرى المريض ولكن سروة علمت أنها لن تكون ذلك الشخص، نظرة واحدة لوالدها المريض كانت كفيلة بأن تخبرها أنه لن يود رؤيتها كما أن عمتها من أخبرت الممرضة بحدة بأنها من ستدخل.

دلفت عمتها للغرفة بعد أن قامت الممرضة بإلباسها رداءً طبياً وقناعاً على وجهها. جلست على كرسي بجانب السرير وعيونها تنظر لأخيها بحزن وأسى على حاله.

أمسكت بيده وشدت عليها وهي تناشده بجزع:

"قوم يا نصير أنت متعرفش رقدتك دي عاملة فيا إيه، قوم يا حبيبي أنت سندي في الدنيا بعد ربنا."

ظلت تمسح على جبهته الشاحبة والدموع تهبط من عينيها وهي تحاول تشجيعه وبث الأمل في روحه الغائبة، وتابعت بنبرة خافتة مليئة بالرجاء:

"والله كل حاجة هتتحل يا خويا، مفيش حاجة ملهاش حل في الدنيا دي، ربك كبير ومبيسبش حد في ضيقة."

سكتت للحظات وهي تستمع إلى صوت أجهزة ضبط نبضات القلب المنتظمة برتابة، وتفكر في الغد بكثير من الخوف، ثم تذكرت مكالمة ابنها منذ قليل، فتنفست ببطء وهمست بحنان:

"تاج كلمني يا نصير.. كلمني وكان فرحان أوي، نجح وأخد الدكتوراه وخلاص هيرجع لنا مصر قريب ويبقى وسطنا وسندنا.. أنت كنت دايماً بتفرح بنجاحه وتعتبره زي ابنك بالظبط، قوم عشان تستقبله معايا وتفرح بيه."

ومع نطقها لاسم "تاج" توقفت فجأة واتسعت عيناها بذهول من جرأة الخاطرة التي خطرت على بالها للتو، وهمست لنفسها بتفكير وعينين تلمعان بلهفة:

"اه معقول وليه لا؟"

شدت بقوة أكبر على يد نصير وهي تقترب من أذنه بلهفة وصوت يملأه التصميم:

"قوم يا نصير والفضيحة اللي أنت خايف منها عمرها ما هتحصل، قوم وسروة هتتجوز وتتستر قدام عيون كل الناس، أنا هجوزها ابني تاج!"