الفصل السابع: بين صمت يوسف ووجع مريم

رواية تضحية مريم

الفصل السابع

الحفلة طولت لساعات، ومع قرب نهايتها، قربت زينب من بنتها مريم واحتضنتها جامد، كأنها بتحاول تقول لها كل حاجة بعينيها من غير كلام.

بعد شوية ودّعتها بصمت ومشيت.

الضيوف بدأوا يمشوا واحد ورا التاني، وما فضّلش في القصر غير العيلة بس…مريم كانت واقفة ساكتة جنب عليا، أم يوسف، اللي قربت منها بابتسامة صغيرة وقالتلها بلطف:

"يلا يا عروسة، تعالي نطلع على أوضتك."

مريم مشيت معاها بهدوء.

دخلوا الأوضة، ومريم قعدت على السرير المتزين بالورد والبلّورو، عينيها تايهة وقلبها متقلّب.

في نفس اللحظة، كان صوت يوسف جاي من برّه، بيتكلم بعصبية مع حد، ونبرته عالية ومليانة توتر وانفعال، لدرجة إن صوته كان باين لحد جوه الأوضة.يوسف خلّص المكالمة اللي كان بيتكلم فيها بانفعال، ودخل الأوضة اللي كانت مريم قاعدة فيها ساكتة، غرقانة في أفكارها.

بصّ عليها لحظة، وبعدها قعد على طرف السرير.

الصمت كان تقيل جدًا، لا مريم قالت كلمة، ولا هو بادر بحاجة.

فجأة قطع الصمت بصوته البارد وقال:

"اسمعي… الجوازة دي هتفضل بس على الورق. أنا لا اخترتك، ولا هاعتبرك مراتي. اتجوزتك علشان وصيّة جدي… مش أكتر."

وبدون ما يستنى ردها، قام واتجه ناحية الحمّام ودخل، سايب مريم مصدومة من كلماته، كأن الأرض اتسحبت من تحت رجليها.أول ما يوسف دخل الحمّام، مريم قامت بسرعة، وشالت الطرحة من على راسها بعصبية، ورمتها على الأرض كأنها عايزة ترمي معاها كل اللي بيحصل.

ما بقتش قادرة تطيق ولا لحظة من الجو ده.

خطت بخطوات سريعة ناحية شنطتها، فتحتها بإيدين بيرتعشوا، وسحبت منها فستان بسيط.

من غير ما تفكر، اتجهت للحمّام التاني اللي جوه الأوضة، ودخلت وقفلت الباب وراها.

مريم وقفت جوه الحمّام، وسط بخار المية السخنة، بتحاول تاخد نفسها.

ما كانتش عارفة… هي فرحانة ولا موجوعة؟

اتجوّزت واحد ما شافتش وشّه غير ساعات قليلة… ما تعرفهوش، وما حتى حاول يقرب منها.

ببرود قاتل قال لها: "الجوازة دي على الورق… مش أكتر."

أي بنت بتحلم بليلة زي دي؟

أي بنت مش نفسها في راجل يحبها، يطبطب عليها، يحس بيها؟

بس مريم… كانت مضطرة تكتم كل اللي جواها، لدرجة إنها ما بقتش عارفة تبكي على إيه بالظبط.

خرجت من الحمّام ببطء، شعرها لسه مبلول، وعيونها شايلة حزن صامت.

لبست فستان بسيط من غير أي زينة وقعدت في ركن الأوضة.

سألت نفسها بهمس جوّه عقلها:

هي فعلًا بقت "مراته"؟

ولا مجرد ضيفة في بيت غريب عنها؟يوسف، رغم قسوته، ماكانش مرتاح…

قاعد في الحمّام، المي نازلة ع وشّه، بس اللي مغرقه مش المي…

هو العتاب اللي بدأ ياكل في قلبه.

حكم ع البنت قبل ما يشوفها، قبل حتى ما يسمع صوتها.

مين قال إنها ما تستاهلش؟

ليه وافق ع الجوازة وبعدين قرر يعاملها كإنها غريبة؟

خرج من الحمّام، عينه مرهقة، وقلبه ملخبط.

بص حواليه، لقى مريم نايمة ع السرير، عينيها مغمضة…

مظلومة وهادية، كإنها مستسلمة لقدر ما اختاروش.

وقف لحظة، متردد…

كان ممكن يروح يقول كلمتين حلوين، يعتذر، يطبطب…

بس لأ، اكتفى بالصمت.

مشي بهدوء، ورمى نفسه ع الكنبة، وتمدد مريم حسّت بيوسف وهو خارج من الحمّام،

فلفّت له ضهرها وهي نايمة ع السرير.

هو ما حاولش يبص لها، وهي كمان ما التفتتش ناحيته.

الاتنين اختاروا الصمت كملجأ.

غمّضت مريم عينيها، بتحاول تهرب من كل حاجة…

من الليلة، من الوجع، من الوحدة اللي غمرتها مع إن في راجل المفروض بقى جوزها.

استسلمت للنوم… أو يمكن تظاهرت بيه،

يمكن تلاقي في عالم الأحلام شوية راحة…

عالم أرحم بكتير من الواقع.

رجع أحمد وزينب للمزرعة،

لكن زينب طنّشته تمامًا، جريت على أوضة محمد علشان تطمّن عليه.

ولما شافته هادي، قلبها ارتاح شوية،

دخلت أوضتها بسرعة وقفلت الباب بالمفتاح.

بدأت تبدّل هدومها، وفجأة… الباب اتفتح بعنف.

دخل أحمد من غير ما يستأذن.

صرخت زينب وهي بتحاول تغطي نفسها:

"إنت! إيه اللي جابك هنا؟! اطلع برااا!"

قرب منها بعينين مولّعين:

"نسيتي إنك مراتي؟ نسيتي إنك لسه على اسمي؟!"

صرخت زينب بصلابة:

"ابعد عني يا أحمد! أنا خلاص ماعدتش ليك… ماتلمسنيش!"

قرب أكتر وقال بصوت متهدج:

"بس أنا وحشتيني يا زينب… وحشتيني بكل حاجة فيكي."

بصت له بعزم وقالت:

"أنا مش هسلّمك حتى شعرة مني… اللي بينا انتهى."

لكن أحمد رفع صوته وقال بتهديد:

"لو ما وافقتيش ترجعيلي، هتندمي…

أنا دلوقتي بقيت كبير ومعايا نفوذ.

هخليكي ترجعي غصب عنك، ولو ما رضيتش… المزرعة دي مش هتكملي فيها، ومحمد هيبقى عندي أنا!"

سكتت زينب، قلبها بيرجّ، عينيها مدمّعة، وكل حاجة جواها بتتهد.

جواها صوت بينادي: "إزاي أوصلتلك تاني؟ إزاي أسمحلك تجرحني بعد ما قويت؟"

بس الخوف على محمد كان أقوى من وجعها.

وبعد لحظة…

قالت بصوت مكسور:

"طيب…"

الكلمة خرجت منها كطعنة، مش كرضا.

استسلمت… بس جواها نار، نار ساكتة بتولّع من غير ما تبان.

بعد شوية، كان أحمد نايم عل السرير، وزينب جنبه بتعيط في صمت…

بتعيط على حالها، وعلى الطريق اللي ودّاها لعتمة زي دي.

بصّ لها أحمد وهمس بنبرة فيها ندم ماقدرش يخفيه:

"ليه بتعيطي يا زينب؟ نسيتي الحب اللي كان بينا؟"

رفعت عينيها له، ودموعها مولّعة خدودها، وقالت بصوت مليان وجع:

"حب؟! اللي كان بينا ماكانش حب يا أحمد… كان قهر. قهر كبير مايتنسيش."

قامت بسرعة، جريت على الحمّام، وقفلت الباب وراها كأنها بتقفّل على الماضي كله.

فضل أحمد يبص للباب المقفول، ملامحه اتغيّرت، وعينه جمدت،

وقال بصوت واطي لكن فيه تهديد:

"هتدفعي التمن يا زينب… التمن الغالي على السنين اللي بعدتي فيها عني…

وعلى بنتي وابني اللي خدتيهم وسبتي قلبي يتحجر."في صباح هادي، يوسف كان نايم، لحد ما أيقظه صوت الأذان وقت الفجر.

قام من على كنبه، حاسس بوجع في ضهره، وراح على الحمّام عشان يتحضّر للصلاة.

اغتسل، توضّأ، وبدّل هدومه، وبعدين خرج من أوضته بخطوات هادية.

مشا في الشوارع الهادية متجه للمسجد، والسكينة ماليه المكان، وأصوات التسبيح بتعانق السما.

مريم حسّت بحركة يوسف في الأوضة، ولما سمعت صوت الباب وهو بيخرج بهدوء، فتحت عينيها ببطء.

قومّت من على سريرها، راحت على الحمّام وتوضّأت، بعدين لبست هدوم الصلاة، وجلست على سجّادتها، وبدأت تصلي بخشوع.

رفعت إيديها للسماء، وبتدعي ربنا بقلب مكسور:

"يا رب… دلّني، خُد بيدي، وسهّل لي أمري…

لو في صبري خير، قوّني… ولو في خروجي نجاة، ارزقني القرار الصح."

وفي اللحظة دي… مريم ماكنتش لوحدها،

كانت بين إيدي الرحمن، بتحكي له كل حاجة ما تتقالش لحد تاني.يوسف رجع للقصر، دخل الأوضة بهدوء، ولقى مريم لسه قاعدة على سجادة الصلاة.

ماحبش يزعجها، فمشا على طول على غرفة الملابس يبدّل هدومه.

حس بالسكينة اللي حواليها… وكان جوّه حاجة غريبة بتحرّك فيه حاجة مايعرفهاش.

أما مريم، حسّت بحركته، بس ما التفتتش ليه.

كملت دعائها، كأن بيناها وبين ربنا كلام طويل ما ينفعش حد يقطعه.