بين الفرحه والسراب

الفصل الخامس عشر:

​كانت صفاء وابنها رامي يجلسون مع مجموعة من الرجال، وكانوا يتحدثون عن صفقة كبيرة جداً. تحدث أحد الرجال الجالسين معهم وهو ينظر إلى صفاء بوقاحة:

— مبسوط قوي من الاستقبال اللي أنتِ عاملاه ده يا صفاء، لا فعلاً بقيتي شاطرة ويعتمد عليكِ.

​ردت صفاء وهي تتمايل نحوه بدلع:

— لا، دي أقل حاجة عندي، نخلص بس من الموضوع اللي جايين علشانه وهخلي البنات تبسطكم آخر انبساط!

— تمام، حلو قوي الكلام ده يا صفاء.

​ردت صفاء وهي تنظر للفتيات الجالسات حولها:

— يلا يا بنات ادخلوا جوه لحد ما نخلص كلام وهبقى أنادي عليكم.

​تحدثت إحدى الفتيات وهي تتمايل بغنج:

— ماشي يا أبلتي... وفعلاً خرجوا.

​وفي الجهة الأخرى، كان الضابط فهد قد استعد بالفعل لكي يقوم بالقبض على تلك العصابة وهي مكتملة الأركان، وكانوا قريبين جداً وما زالوا في مرحلة متابعة المراقبة. وكان فهد يستعد ويتحدث مع رجاله:

— أول ما يتم تسجيل الحوار بالكامل عاوزه تديني إشارة علشان أبدأ بالهجوم.

— تحت أمرك يا فندم.

​نظر فهد إلى صفوف الرجال الواقفة أمامه:

— استعدوا كويس، أنا مش عاوز أي أخطاء.. وبالتوفيق يا رجالة.

​تحدثوا جميعاً وهم يقومون بأداء التحية العسكريه له:

— تمام يا فندم.

​بدأ فهد يتحرك هو ورجاله وبدأ يقوم بتوزيعهم حول منزل حسن الموجود به صفاء ورجالها، وقام بتأمين مداخل ومخارج وسطوح هذا البيت بهدوء تام حتى لا تشعر صفاء ورجالها بما يحدث بالخارج.

​أما عند صفاء جوه:

— قل لي يا باشا، محتاجين إيه المره دي؟!

— إحنا محتاجين أطفال نفس السن بتاع المره اللي فاتت علشان البضاعة لازم تخرج في ميعادها، كمان المستشفى محتاجة أعضاء جديدة علشان العمليات المطلوبة.

— ما فيش مشكلة، سهلة قوي.. عاوزين قد ايه؟!

— يعني مش أقل من 10 أطفال.

— كتير قوي يا باشا، بس معلش ما فيش حاجة تصعب على صفاء.

​وأمسكت هاتفها وأجريت اتصالاً سريعاً، وأتاها الرد:

— الو، أيوه يا معلم سعد.

— رد عليها هذا الرجل (سعد) من الجهة الأخرى: أهلا بست الكل، عاش من سمع صوتك يا ست الهوانم، أؤمريني.

​ضحكت صفاء بطريقة مستفزة وهي تخبره:

— سيبك دلوقتي من كل ده وركز معايا، إحنا محتاجين 10 حتت على الفرازة، عندك ولا لا؟!

— لا طبعاً عندي يا ست الكل، ده أنا عندي شوية بضاعة إنما إ ايه نقاوة! بس يعني هو أنا ممكن أسال محتاجاهم ليه؟ أعضاء ولا بشر؟!

— أعضاء.. بس لو في منهم بنات حلوة ما عنديش مانع.

— طيب أنا عاوزاهم حالا في المكان...

— تحت أمرك يا ست الهوانم.

— تمام أنا هقفل معاك دلوقتي وهكون في انتظارك.

​كان فهد يجلس خارجاً ينتظر نقطة الصفر حتى يأمر رجاله بالهجوم، وكان ينظر لهم ويحدثهم بهدوء عبر جهاز اللاسلكي:

— الفرقة ألف خليها مستعدة علشان هنطلع وراهم ونهجم أثناء التسليم، أما الفرقة بقيادة الضابط هشام فهتطلع تضبط كل اللي في الشقة.

— رد عليه الرجال بهدوء: تمام يا فندم.

​وبالفعل قامت صفاء بالاتفاق مع هؤلاء الرجال القادمين لأخذ الأطفال والاتجار بهم، وكان ذلك تحت مسمع وممر رجال الشرطة، وتحت رعاية حامين الشعب المصري (أدعو الله عز وجل أن يجعلهم من أهل الخير في الأرض وأهل الجنة في السماء وكل من اجتهد في عمله وأخلص به لوجه الله).

​نظرت صفاء للرجال وهي تقف بتمايل:

— يلا بينا يا بهوات لازم ننزل عشان نستلم البضاعة.. وأنت يا رامي خليك هنا، لازم تكون مع البهوات اللي جوه لحد ما ينبسطوا على الآخر وبعدين هاتهم وتعالى ورايا علشان نحتفل.

— رد عليها رامي: أمرك يا ستهم.

​وبالفعل خرجت وخرج معها مجموعة من الرجال، واجتمعوا مع ذلك الذي يدعى سعداً، فنظر لها وللرجال بترقب:

— مساء الجمال يا ست الهوانم.

— ضحكت صفاء وهي ترد: فين البضاعة يا سعد أخلص ما فيش وقت.

— مش لازم أرحب بيكِ يا ست الكل وكمان أرحب بالبهوات ولا يقولوا علينا بخلاء؟!

— أخلص يا سعد لازم نصل للضاعة الأول وبعدين أبقى رحب براحتك.

— تحت أمرك يا ستهم.

​وبالفعل بدأ في إخراج الأطفال وعرضهم على هؤلاء الرجال. وفي تلك الأثناء هجم الضابط هشام بالفعل على شقة أبو يقين، التي تحولت تلك السيدة الشمطاء إلى دار للدعارة بطريقة مخفية عن أهل تلك المنطقة حتى لا يثيروا المشاكل، ولكنها كانت محط شك بالنسبة لهم ولكن لم يستطع أي منهم إثبات أي شيء عليها. وعندما هجم هشام عليها تم القبض على جميع من في الشقة، وكان من ضمنهم رامي ومها أبناء صفاء في أوضاع مخلة للآداب، وتم تشميع الشقة!

​وكان قد أصاب أهالي المنطقة حالة من الغضب والسخط عليهم:

— تحدثت إحدى سيدات المنطقة: يا لهوي كل ده يحصل من اللي ما تتسمى اللي اسمها صفاء دي؟! طلعت مية من تحت تبن!

— تحدثت سيدة أخرى: ده ربنا رحم الاستاذ حسن الله يرحمه هو وبنته اللي عالم هي فين دلوقتي، وكده فعلاً الراجل اللي جاب يقين كان عنده حق لما قال إن ابنها كان بيتهجم على البنت.

​وفي تلك الأثناءهاجم فهد أيضاً على صفاء ومن معها، وسقطوا جميعاً حتى سعد ورجاله، وتم أخذ الأطفال للكشف عليهم وإرجاعهم إلى أهاليهم، وعادوا جميعاً إلى مقر الشرطة للتحقيق وتقفيل هذه القضية تماماً، وكان ذلك في عدة أيام قليلة.

​ولكن يقين لم تعرف حتى الآن بكل هذه التفاصيل، وكانت قد بدأت بالتعافي تماماً مما حدث لها، وما زال الجبس على يدها ورجلها، وكانت تلزم غرفتها، وكانت سجى دائماً معها وتأكل معها في الأعلى حتى لا تشعر بأي حرج أو وحدة.

​أما ليث فكان يشغل نفسه دائماً بعمله حتى أجهده العمل؛ فهو لا يريد التفكير في أي شيء يخص تلك يقين التي غزت حياته دون إذن، حتى أنها قد بدأت تغزو مشاعره أيضاً دون إذن أو قصد منها، فهو بعمله يريد قتل أي شعور يولد بداخله تجاه تلك الفتاة.

​مرت الأيام وجاء خالد من السفر وفتح أمر زواجه بسجى مع ليث مرة أخرى، ولكن ليث طلب منه الانتظار عدة أيام حتى تهدا الأوضاع في المنزل بعد حادثة يقين.

​فرد عليه خالد بانزعاج:

— طيب بقول لك إنه هتكلم معاك من غير تكليف، أنت لو ما أخدتش إجراء سريع أنا بقا مش ضامن نفسي!

— نعم يا أخويا هتعمل إيه يعني؟!

— يا ليث يا حبيبي أنت صاحب عمري وعارفني كويس، أنا قدرت سنين أخبي مشاعري تجاه أختك وحتى ما تكلمتش عنها مع أي حد ولا هي نفسها كانت تعرف، كنت بصبر نفسي علشان تكبر وأعرف عن شعورها ناحيتي، وكنت واعد نفسي أنها لو مش عاوزاني ولا حباني يبقى خلاص هقفل على قلبي وهقتل شعوري جوايا وكفاية عليا إني بس أحس إن هي مرتاحة ومبسوطة، بس لو لقيت شعورها نفس شعوري وأنها بتبادلني نفس الإحساس ساعتها لازم أعوض قلبي عن كل لحظة انتظار أو حتى تفكير.. فلو سمحت بقا ارحم قلبي صاحبك وضعفه دلوقتي.

— ضعف إيه؟! ما تجمد يلا في إيه؟! وبعدين ما تخليش قلبك يكون مسيطر عليك، أنا عاوزك أسد كده بغض النظر طبعا أنها أختي لكن أنت كمان أخويا وعاوزك أسد كده معها.

​ابتسم خالد إلى ليث وهو ينظر له:

— أنا عارف كويس أنك بتحبني يا ليث، لكن مش معنى إني بحب ومحتاج أراضي قلبي باللي بحبها إني مش راجل، ومش معنى أن الراجل منا يضعف لست يكون متملك في حبها وضعيف لا، ولا معنى كده أن رجولتي ممكن تأثر، بالعكس! الرجولة إنك تكون راجل مع حبيبتك ومرتك وأم ولادك مش راجل عليها، تكون حنين وعطوف ورقيق معها هي بس، وتكون حيطة خرسانة صلبة صعبة حد يتخطاها مع كل الناس إلا معها هي بس.

​كان خالد يتحدث وهو يضع يده على كتف ليث ويكمل:

— أتمنى من كل قلبي إن قلبك يقع في واحدة وساعتها بس هتحس باللي أنا بقول لك عليه ده.

​ابتسم ليث إلى خالد وقال باطمئنان:

— أنا دلوقتي أقدر أديكم أختي وأنا مطمن عليها أكثر من الأول.

​قالها وحضن خالد.

— المهم يا ليث سيبك من كل ده، أنا عاوز رد النهارده وحالا لازم تكلم عمي دلوقتي.

— يا ابني إهمد استنى فترة كده وبعدين كل شيء هيبقى تمام.

— الكلام ده على جثتي يا عم، أنا عاوز أكلم أختك وأتعامل معها براحتي بس مش عارف، وحياة أبوك تعال معايا لحسن والله أطلع لأبوك وأكلمه فوق دلوقتي لوحدي!

— خلاص يا مجنون أنت إيه اللي حصل لك؟! ما كنت عاقل!

— والله اسأل أختك.

​وفي تلك اللحظة دخل عليهم زاهر وهو يبتسم ويقول:

— مساء الخير يا ولاد.

— مساء الخير يا بابا.

— مساء الخير يا عمي، كويس أن حضرتك جيت علشان في موضوع مهم عاوز أكلم حضرتك فيه.

​جلس زاهر وهو ينظر له بتعجب:

— خير يا خالد في إيه؟!

— خير يا عمي، الصراحة كده يا عمي أنا عاوز أتجوز سجى وأنا كلمت ليث كذا مرة بس الأمور ما كانتش سامحة خالص، بس بصراحة أنا هكلم حضرتك ومن غير كسوف أنا هموت على سجى ومن زمان وانتظرت كتير بس لما جت الفرصة أنا خلاص ما بقيتش قادر، وعلى فكرة أنا طلبت منها أني أقابلها وقابلتها وسألتها عن رايها وهي تمام، وليث كان على علم بالامر ده.

​كان زاهر مندهشاً من جرأة خالد، فهو كان يعلم بشعور سجى تجاه خالد وفرح لأجلها؛ فهي اختارت الشاب الصحيح من وجهة نظره، ولكنه كان يخاف من أن خالد لا يبادلها نفس الشعور، ولكنه تأكد من شعور خالد ناحيتها عندما كان يسافر لهم بالخارج عدة مرات عندما علم أنه يبادلها نفس الشعور فرح جداً لأجلها وكان يدعو لهما دائماً، ولكنه لم يتخيل أبداً أن يتحدث خالد ذلك الشاب العاقل الثابت بهذه الهوائية، ولكنه في نفس الوقت بداخله كثير من أجل ابنة.

​تحدث زاهر بابتسامة ثابتة وهو ينظر إلى ليث:

— وأنت رأيك إيه يا ليث؟!

— أنا مش هلاقي راجل لأختي يحبها ويخاف عليها أكثر من خالد، واعتبرني هنا يا بابا بعد أذن حضرتك طبعا من أهل العريس.

​نظر له خالد بابتسامة وقام وحضنه بود وهو يقول له:

— ربنا يبارك لي فيك يا صاحبي.

​ثم ابتعد عن ليث وجلس مرة أخرى وهو ينظر لزاهر بترقب:

— إيه رأيك يا عمي؟!

— والله أنا من ناحيتي موافق، بس هاخد رأي سجى برده مهما كان لازم أتاكد مش ممكن تكون غيرت رأيها.

— نعم لا طبعاً.. طيب ممكن طلب تاني لو ما فيهاش رخامة يا عمي؟!

— لا كده طلباتك بقت كتير، قولي يا سيدي خلينا نخلص.

​ابتسم له خالد وهو يكمل:

— ما اتحرمش منك أبداً يا عمي، بس أنا عاوز الخطوبة وكتب الكتاب مع بعض يوم الخميس الجاي والفرح يكون بعدها بشهر.

​نظر له زاهر وليث بصدمة وهم ينطقون في نفس اللحظة:

— نعم؟!

​نظر له ليث وهو يسأله بتعجب:

— أنت عبيط يالا في إيه؟!

— اسمعوا بس...

— استنى يا ليث، قولي يا خالد.

— أنا بحب سجى جداً، وحاولت كتير أاحافظ عليها حتى من نفسي، أنا مش عاوز بعد كل ده يحصل تجاوز بينا مهما كانت الظروف، والصراحة بقا أنا مش ضامن نفسي وأنا معها ممكن أعمل إيه!

— ما تحترم نفسك يالا في إيه؟! أنت ناسي أنك بتكلم أخوها أبوها؟!

— لا مش ناسي، بس في نفس الوقت أنا بكلم أخويا وأبويا وبحاول أبقى على طبيعتي ومحترم في نفس الوقت، وبعدين ما تخافش أنا بحب سجى وبخاف عليها أكثر من نفسي، بس أنا أقصد حتى لو هيكون مجرد تجاوز بالكلام، ولما تبقى خطيبتي مش هعرف أتكلم ولا أتعامل براحتي، إنما لما تبقى مراتي هتتكلم زي ما أنا عاوز والفرح يبقى بعدها على طول.. ارحمونا بقى الله يخبيكم!

​نظر له ليث نظرة اشمئزاز مصطنع:

— إيه أسلوب الشحاتة ده؟!

​ضحك زاهر كثيراً من أعماق قلبه على خالد وكلامه، ثم نظر له نظرة طويلة أحس خالد وقتها وكأنها دهور مر عليه.

— طيب على خيرت الله أنا موافق، بس برده لما أخد رأي سجى الأول.

​وقف خالد وهو يقفز إلى أعلى:

— ينصر دينك يا عمي!

​وبالفعل أرسل زاهر إحدى الخادمات لكي تنادي سجى التي كانت تجلس مع يقين وتتابع إحدى قصص الروايات. قامت الخادمة بالخبط على الباب باحترام:

— ردت سجى: ادخل.

— دخلت الخادمة وهي تنظر لها: آنسة سجى، زاهر بيه عاوزك تحت.

— خير في حاجة ولا إيه؟!

— مش عارفة.

— طيب تمام انزلي وأنا جاية وراكي.

​خرجت الخادمة ونظرت سجى إلى يقين وهي تبتسم بحنان:

— هنزل أشوف بابا ماله وراجعة.

— أوكي بس ما تتأخريش.

— طيب تمام.

​وبالفعل نزلت سجى راكضة وهي لا تعلم بوجود خالد وليث معاً مع والدها. وعندما راها خالد نظر لها وابتسم، فنظر له ليث وأراد أن يزعجه فقال له:

— وتحترم نفسك يا لا دي أختي!

— في إيه يا عم؟! هي حتى النظرة محرمة؟! عرفت بقا أن الجواز هو الحل!

​وعندما راته سجى ولاحظت نظراته وسمعت كلماته خجلت كثيراً، ولكنها حاولت أن تبدو على طبيعتها أمام أخوها ووالدها:

— خير يا بابا؟!

​ثم ذهبت إلى ليث وحضنته وقبلته من خده وهي تقول:

— وحشتني قوي يا أبيه.

— نظر لها خالد وهو يقول: وأنا؟!

— لكن لكزه ليث بخفة في كتفه.

​أما هي فنظرت إليه وهي تقول:

— هاي خالد.

— ابتسم لها: هاي.

​نظر لها والدها بحنان:

— اقعدي يا سجى يا حبيبتي.

​جلست سجى أمام والدها وهي تسأل بحيرة:

— خير يا بابا؟!

— خير يا حبيبتي، خالد متقدم وعاوز يتجوزك هو طلب إيدك مني ومن أخوكِ.

​اتكسفت سجى جداً، وهذا كان واضحاً جداً عليها. ولكن عندما رأى خالد كسوفها اقترب من ليث وهو يقول:

— قول لأبوك ينجز وقول لأختك تنشف كده قدامي علشان أنا بنهار!

​نظر له ليث بصدمة:

— يخرب بيتك اتلم لحسن أنت حر!

​كان زاهر ينظر إلى ابنته بحنان:

— إيه رأيك يا سجى؟!

​فأراد ليث إثارة غيظ خالد وخوف سجى فتحدث بمرح:

— أإمممم سكتت يبقى أكيد مش موافقة، خلاص يا خالد كل شيء قسمة ونصيب.

​وقف خالد بصدمة وهي ينظر له:

— جرى إيه يا عم؟! همت مش في المثل بيقولوا السكوت علامة الرضا؟!

— أعتقد لا.

— بقولك إيه يا سجى أبوس دماغك اتكلمي لحسن أخوكِ عاوزني أقوم أرمي نفسي من على سطوح البيت بتاعكم دلوقتي!

​ضحكت سجى بخفة عليهم وسكتت.

سألها زاهر مرة أخرى:

— ها يا حبيبتي أنا عاوز ردك.

— ردت سجى بخجول: موافقة يا بابا.

— تنهد خالد: أحمدك يا رب!

​أكمل زاهر وهو ينظر لها ويكمل:

— وخالد عاوز خطوبة وكتب الكتاب الخميس الجاي والفرح يكون بعد شهر.

​وقفت سجى بصدمة:

— نعم؟! لا طبعاً.

— نظر لها خالد باستفهام: هو إيه اللي لا؟!

— تحدثت سجى بتبرير: يعني مش هلحق أستعد، أنا كده مش هلحق خالص.

— تنهد خالد وهو يضع يده على قلبه بطريقة مضحكة: يا شيخه قولي كده نشفتي دمي! أنتِ قولي بس أه وسيبي الباقي عليا.

​كما أن ليث نظر لها وابتسم بحب:

— وعليا أنا كمان..

— نظر له خالد وابتسم وهو يقول بطريقة كوميدية: روح يا شيخ الهي تنستر!

— نظر له ليث بصدمة مصطنعة: يا نهار أبيض! أنتِ لازم توافقي الواد كده بيروح مني...

​ضحكت سجى بخفة عليهم وسكتت قليلاً ثم قالت:

— أنا موافقة بس...

— تحدث خالد مسرعاً: ما فيش بس الله يبارك لك! خلاص كل اللي عليكِ أنك تستعدي نفسياً والباقي بقا سيبيه عليا.

​هزت سجى رأسها بهدوء وعلى وجهها ابتسامة خجل. محمد خالد واقترب ليث من سجى وحضنها وقبل رأسها وهو يتمنى لها السعادة ويقول:

— ألف مبروك يا حبيبتي، أنا مش مصدق أنك كبرتي وبقيتي عروسة وخلاص هتتتجوزي.

​اقترب منه خالد وهو ينظر له بغضب مصطنع ويقول بطريقة كوميدية:

— لا صدق يا أخويا، وخلاص بقا راعي شعوري في إيه؟! وأنت في إيه مبسوط قوي وهو حضنك؟!

— رد عليه ليث بتعجب: نعم يا أخويا أنا أخوها يلا في إيه؟!

— على راسي يا عم، بس برده راعي شعوري.

​ضحك ليث وهو يقول:

— ماشي يا سيدي هراعي شعورك.

​ثم اقترب من خالد وحضنه وهو يقول:

— ألف مبروك يا حبيبي.

— الله يبارك فيك يا صاحبي وعقبالك.

— ابتسم ليث ابتسامة باهتة وهو يقول: ما أعتقدش...

— هو إيه اللي ما أعتقدش؟! أنا متاكد أنه هيحصل وقريب قوي كمان...

​استغرب ليث من جملته ولكن لم يعاقب عليها، أما زاهر فقام واحتضن ابنت بحنان أبوي وهو يمسح على شعرها ويقول:

— ألف مبروك يا حبيبة بابا.

— ميرسي يا بابا.. طيب أنا هطلع علشان أعرف يقين.

​انتبه ليث بقولها عندما سمع اسم يقين. سألها زاهر:

— هي أخبارها إيه دلوقتي؟!

— كويسة يا بابا الحمد لله بقيت أحسن.

— أنا كنت عاوزها تنزل بس هي مش بترضى، وأنا مش عاوز أضغط عليها وبقول أسيبها كمان عشان رجلها.

— فعلاً، بس أطمن هي مش زهقانه خالص أنا معاها وبنستمع بعضها البلكونة أوقات بنشم هوا ونجدد نشاط.

— ماشي يا حبيبتي أنا شوية كده وهطلع أطمن عليكم.

— ماشي يا بابا عن إذنكم.

​انزعج خالد أنها صعدت وتركته؛ فكان يتمنى أن تجلس معه ويتكلم معها ويحكي لها عن شعوره في تلك اللحظات، ولكنه هدأ نفسه وأقنعها أن يعترف لها بشعوره وهي زوجته أحسن، لأنه لا يريد أي تجاوز بينه وبينها حتى يرضى الله عن تلك العلاقة تماماً.

​لاحظ ليث ضيق صديقه، اقترب منه وهو يسأله:

— تحب أنادي عليها لو محتاج تقول لها حاجة؟!

— لا مش عاوز، علشان كده بقول لك أني عاوز أكتب الكتاب علشان أقدر أتكلم معها براحتي.

​ابتسم ليث على رغبة صديقه في إقامة علاقة متكاملة طبقاً لشروط الدين مع أخته.

​صعدت سجى وهي في قمة سعادتها وفرحتها، ودخلت غرفة يقين وأغلقت الباب وهي تجري عليها وتضمها وكانت تبتسم بسعادة وتقول:

— أنا فرحانة قوي يقين!

​بادلتها يقين العناق وابتسمت لرؤيتها هكذا وسألتها:

— ربنا يديم فرحتك يا حبيبتي، بس في إيه؟! إيه اللي حصل؟!

— خالد أتقدملي وبابا وأبيه ليث يوافقوا، مش بس كده دول حددوا الخطوبة وكتب الكتاب يوم الخميس الجاي والفرح هيكون بعد شهر.

​ردت يقين بفرح:

— ألف مليون مبروك يا حبيبتي، بس ليه السرعة دي؟!

— والله مش عارفة، أنا أترضت بس خالد وأبيه ليث قالوا لي إنهم هيرتبوا كل حاجة، وخالد قالي كل اللي عليكِ أنك تجهزي نفسك نفسياً وسيبي الباقي عليا.

— يبقى خلاص سيبي الباقي عليهم، طيب أنتِ لازم تجهزي من دلوقتي لازم تختاري فستانك وتجهزي حاجات كتير.

— فعلاً، بس أنا عاوزاكِ معايا.

— أنا مش هعرف اتحرك وأتعامل بالجبس ده.

— هو المفروض يتفك أمتى؟!

— كمان يومين.

— طيب خلاص إحنا هنسيب كل حاجة عاوزه خروج لحد ما تفك الجبس، ودلوقتي بقا نقعد نختار ستايل الفستان علشان يجهز وكمان أكلم الميك آب آرتست علشان تستعد.

— طيب وده هيحصل إزاي؟!

— من التليفون طبعا!

​وبالفعل جلسوا معاً وبدأوا في ترتيبات بعض الأشياء، ومر يومين وهم في أتم الاستعداد، وكان خالد وليث يقومون بالترتيبات اللازمة لهذه المناسبة.

​وذات صباح، كان زاهر جالساً يتناول الإفطار ونزل ليث وجلس معه، فسجى ويقين منذ إصابة يقين وهم لم يحضروا معهم الطعام أبداً، وذلك لصعوبة تنقل يقين ورفضها الدائم.

​ابتسم ليث لوالده:

— صباح الخير يا باشا.

— صباح الفل يا حبيبي، إيه أخبار الترتيبات؟!

— أطمن يا باشا كله تمام ما تقلقش.

— طيب الحمد لله، في موضوع كده يخص يقين عاوز أكلمك فيه.

— خير؟!

— مدحت كلمني وعرفني أنهم قبضوا على الست اللي كانت متجوزه حسن الله يرحمه وأولادها وكل اللي كانوا مشتركين معهم.

— طيب كويس، ووصلوا لإيه؟!

— والله التحقيقات شغالة، بس اللي تم اكتشافه قضية دعارة وتجارة أعضاء وبشر.

— يا نهار أسود! كل ده دي شبكة بقا!

— أه، علشان كده خد وقت كبير جداً علشان يقدروا يوقعوا عدد كبير منهم.

— تمام ربنا يقويهم، في حاجة مطلوبة مني؟!

— مدحت قالي إنهم لازم ياخدوا أقوالها، في حاجات كتير تخص القضية.

— وده لازم يعني؟!

— والله سألت مدحت قالي لازم.. أنا خايف على البنت من الصدمة لما تعرف الحوارات دي كلها، أنت لازم تبقى موجود معها وقتها.

— تمام ما فيش مشكلة.

— كمان هي المفروض هتروح المستشفى النهارده علشان تفك الجبس وتعمل شوية فحوصات.

— تمام.

​قالها ليث ثم أمسك هاتفه وأرسل رسالة إلى سجى يخبرها أن تقول ليقين أن تستعد للذهاب إلى المستشفى لكي يأتي ويأخذها، وبالفعل أخبرتها واستعدت يقين بمساعدة سجى.

​تحدثت يقين وهي تنظر لنفسها بتأمل:

— أنا كده تمام، يلا ساعديني بقا لو سمحتِ يا سجى علشان ننزل.

​كادت سجى أن تساعدها، ولكنهم سمعوا صوت دقات على الباب.

— تحدثت سجى: ادخل.

​دخل ليث بهيبته التي تخطف الأنفاس وهو ينظر إلى يقين:

— جهزتي؟!

​نظرت له يقين بتعجب وهي تسأله:

— جهزت لـ إيه؟!

— عشان نروح المستشفى.

— بس أنا هروح مع سجى.

— لكن سجى مش فاضية، إيه الكلام ده؟! هي عندها حاجات أهم عشان تهتم بها.

​تجمعت الدموع في عين يقين وهي تقول:

— تمام، أنا أقدر أروح لوحدي.

— طيب تمام، طالما تقدري اتفضلي.

​نظرت له سجى بصدمة، ونظرت له يقين نظرة حسرة وألم على حالها.

تحدثت سجى مسرعة:

— بس أنا لازم...

​ولكن قاطعها ليث قائلاً:

— تقدري تطلعي يا سجى علشان خالد جه تحت ومحتاج رأيك في حاجة مهمة.

​حاولت سجى التحدث وهي تقول:

— بس...

​نظرت لها يقين بشبح ابتسامة وهي تقول:

— ما فيش بس يا حبيبتي روحي وأطمني أنا هبقى كويسة.

​خرجت سجى وهي حزينة لأجل يقين، ولكنها لم تقوى على مواجهة ليث. وعندما خرجت قامت يقين وحاولت المشي عدة خطوات حتى أنها كادت أن تسقط، ولكن يدي ليث كانت الأسرع فأمسك بها بقوة حتى أنها فزعت من مجرد إحساسها بالوقوع فأغمضت عينها تستسلم لواقعها، ولكنها شعرت بيد صلبة تمنعها من السقوط.. فتحت عيونها ببطء فوجدت ليث يمسكها بقوة، حاولت الوقوف والصمود وهي تقول:

— شكراً.

​اقترب منها ليث أكثر حتى أنها توترت من هذا الاقتراب الزائد عن حده فنظرت له وهي تقول:

— لو سمحت أبعد كده ما يصحش أبداً.

​لم يرد عليها ليث ولكنه اقترب منها أكثر حتى كاد أن يلتصق بها، ونظر في عيونها وهو يقول:

— هو إيه اللي ما يصحش يا زوجتي العزيزة؟!

— أولاً أنا مش زوجتك، ثانياً أنك تقرب مني بالشكل ده عيب وما يصحش.

​ابتسم لها ليث ابتسامة جانبية وهو يقول بلامبالاة:

— تمام هنبقى نشوف الموضوع ده بعدين.

— بعدين إزاي يعني؟!

​ولكن لم يعطها ليث فرصة للكلام وقام بحملها فوراً وبدأ ينزل بها تحت اعتراضها ورفضها، حتى وجدته يضعها في السيارة وقام بوضع حزام الأمان لها ثم التف حول السيارة وركب بجوارها ولكن دون أي كلام، حتى أنها فضلت السكوت ولم ترد أبداً الدخول في أي حوار معه ولا حتى أي جدال، فإن كان قد أصر على الذهاب معها فليكن دون أي مشاكل.

​ظلت يقين فترة مشوشة وشاردة الذهن حتى أنها لم تشعر بأن السيارة توقفت وأنهم قد وصلوا بالفعل إلى المستشفى، لم تشعر بكل تلك الأوقات القليلة التي مرت عليهم حتى قام ليث بفتح باب العربية لها ثم تنحنح حتى يلفت انتباهها.

​وبالفعل نظرت باتجاه الصوت فوجدته يقف أمامها بهيبته وهو ينظر لها، تأكدت من وصولهم إلى المستشفى وحاولت النزول ولكنه اقترب منها، حاولت الكلام أو الاعتراض ولكن بلا جدوى، فقد حملها بالفعل وقام بالدخول إلى المستشفى ثم إلى غرفة الطبيب بعدما دله الممرضون.

​قام الطبيب بالكشف عليها وقام بعمله وفك الجبس، وكانت يقين تبكي ليس ألماً من الجبس ولكن ألماً على حالها، ولكنها حاولت الهدوء حتى لا تثير شفقة أحد عليها، وعندما انتهى الطبيب طلب من الممرضة إبلاغ ليث، فدخل ينظر إلى الطبيب ويطمئن منه:

— خير يا دكتور طمني.

— التقارير كلها بخير والمدام الحمد لله بقت كويسة.. ثم نظر إلى يقين وهو يقول لها: حمد لله على سلامتك يا مدام.

​ابتسمت يقين بتكلف:

— شكراً لحضرتك، طيب رجلي كده أقدر أدوس عليها عادي؟!

— أه طبعا تقدر تدوسي عليها عادي جداً، بس خلي المشي يكون بحذر وخلي بالك رجلك لسه في مرحلة التعافي.

— شكراً جداً لحضرتك.

​قالتها وحاولت الوقوف ولكنها كادت أن تفقد توازنها لولا يدي ليث التي أسندها، ولكنها ابتعدت عنه مسرعة كمن لدغه عقرب، ونظرت له قائلة:

— أنا بقيت أحسن أقدر أمش لوحدي.

​تركها ليث وهو ينظر لها بغيظ واضح وذهب، وذهبت هي وراءهم ولكن خطواتها كانت ضعيفة وقليلة مقارنة بخطواته فهي لا شيء، فهو قد وصل قبلها إلى السيارة وانتظرها بعض الوقت، وعندما وصلت هي كان قد ركب السيارة فقامت هي بالصعود إلى جانبه ومن ثم قام بقيادة السيارة دون كلام حتى وصل إلى المنزل، ونزلت من السيارة بهدوء، وتحرك ليث بسيارته من جنبها فوراً وتركها ما زالت واقفة.

​وكانت سجى مشغولة مع خالد في اختيارات الأمور التي تخص خطبتها وفرحها، وذهب ليث بسيارته إلى حيث لا يعلم، فهو يشعر بثقل على قلبه ولا يعلم مصدره، ولا يعلم لماذا يشعر بمثل هذا الشعور، وما سبب هذا الضيق الذي يشعر به ولكنه لا يعلم، كل ما كان يريده أن يحاول التخفيف على نفسه بشتى الوسائل.

​أما بقى سجى التي كانت تجلس بالأسفل مع خالد بعدما انتهت من اختياراتها هي وخالد وكان والدها معها يشاركها الاختيار وعندما انتهوا، سأل زاهر ابنتها:

— كده خلاص يا سجى؟!

— تمام يا بابا كده خلاص.

— طيب ممكن لو سمحتِ يا بنتي تطلبي لي الغداء ولما ليث ويقين ييجوا يبقوا يتغدوا مع بعض.

​سألت سجى باستغراب:

— هما صحيح تأخروا كده ليه؟!

— رد عليها خالد بابتسامة: تلاقيهم خلصوا وليث حب يخرجها شوية.

— ردت سجى باستغراب: غريبة! دول تقريباً مش بيطيقوا بعض، دول كانوا بيتخانقوا مع بعض قبل ما يخرجوا وهي زعلت جداً منه.

​سألها زاهر باستغراب:

— بيتخانقوا ليه إيه اللي حصل؟!

​حكت له سجى عن موضوع خلاف يقين وليث قبل الخروج.

حزن زاهر لأجلهم وهو يقول:

— ربنا يستر، أنا مش عارف ليث حاطط البنت في دماغه ليه.. أنا والله نفسي ربنا يهديه ويقبل بها في حياته ويتمم جوازه بها، أنا حاسس أن البنت دي هي اللي ممكن تعدل حال الولد ده.

— ردت سجى: يا ريت يا بابا بجد أنا حبيت يقين قوي وفعلاً دخولها لحياة أبيه هيغيره، ده غير أنها تستاهل حد زي أبيه يحبها ويخاف عليها.

— رد عليهم خالد: بس أنا أعتقد أن ليث مشدود للبنت دي جداً وممكن يكون معجب بيها أو بيحبها كمان.

— سأله زاهر بفرحة: بجد يا خالد؟! هو قال لك كده؟!

— الصراحة يا عمي لا، أنا بس يمكن أكون عارف ليث أكثر ما يكون هو نفسه عارف نفسه، بس كل المؤشرات بتقول إنه مشدود ليها جداً.

— تنهد زاهر بيأس: ياريت يا ابني أنا بدعي ربنا كل صلاة أنه يجمع بينهم بجد ويبقوا أزواج بجد، لو ليث أجب بها وحبها هتكون مشكلتي الوحيدة اتلت.

— رددت سجى بضيق: بس إيه المشكلة أن يقين كمان ما فيش قبول من ناحيتها خالص ودايماً رافضة أي كلام عنه أو عن أي حاجة تخصه!

— رد خالد: لو ليث وقع في حبها أوعدك يا حبيبتي أنها كمان هتقع وتحبه جداً.

— رد زاهر بأمل: يا ريت يا خالد يا ابني، أنت عارف كلامك ده ريحني جداً.. طيب قومي يا سجى لو سمحتِ اطلبي الغداء وأنا هأتصل بليث أطلب منه يرجع على الغداء.

— حاضر يا بابا.

​وقف خالد وهو ينظر لهم:

— طيب أطير أنا بقى.

— سأله زاهر بتعجب: تروح فين؟! أنت مش سامع أني بقول تحضر الغداء؟! اتغدى الأول وبعدين أبقى شوف نفسك رايح فين.

— طيب تمام.

​وبالفعل ذهبت سجى تطلب الغداء لهم، أما زاهر فأتصل بليث الذي رد عليه فوراً:

— الو أيوه يا بابا.

— أيوه يا ابني، أنتتوا فين دلوقتي؟!

— رد ليث باستغراب: إحنا مين؟!

— أنت ويقين، في إيه يا ليث؟!

— رد عليه ليث باستغراب أكبر: بس أنا لوحدي يقين مش معايا!

​وقف زاهر بصدمة:

— إزاي ده؟! هو أنت مش أخدتها علشان توديها المستشفى وتفك لها الجبس وتطمن عليها وتطمنا عليها؟!

— أيوه فعلا، بس أنا رجعتها البيت على طول إحنا ما كملناش تقريبا نص ساعة في المستشفى.

— إزاي ده؟! أمّال هي فين؟! هي ما رجعتش البيت!

​وقف ليث من الصدمة وركب سيارته مسرعاً وهو يقول:

— يا بابا أنا وصلتها لحد باب البيت وشفتها وهي بتدخل وبعدها مشيت!

​جاءت سجى في تلك اللحظة فنظر إليها زاهر وسألها:

— سجى بنتي، يقين رجعت وأنتِ قاعد هنا مع خالد؟!

— لا يا بابا أنا هنا من ساعة ما خرجت وهي ما جتش.

​سأل زاهر ليث بترقب:

— أنت فين يا ليث؟!

— رد عليه ليث بغضب وخوف لا يعلم سببه: أنا 10 دقائق وهكون عندك.

— تمام يا ابني.

​أغلق الخط...

​يتبع...