واقع جديد

الفصل الحادي عشر:

​انتفض خالد من جلسته وهو يقبض على الهاتف، ويحاول أن يطمئنها:

— انتِ بتقولي إيه؟! طيب بصي أنا عاوزك تهدي وتقفلي على نفسك كويس، وأنا جايب ليث ومسافة الطريق وهنبقى عندك.. تمام، اهدي خالص وخلي بالك من نفسك وأوعى تخرجي لحد ما إحنا نيجي.

​وأغلق معها الهاتف، وخرج وذهب إلى الغرفة التي يمكث فيها ليث، وفتحها بعنف فوجدوه يجلس حائراً وهو يدخن السجائر بشراهة. نظر له ليث ولم يعقب.

​تنهد خالد ونظر له:

— في حرامي في البيت عندك! سجى شافته وهي اتصلت بيا ومرعبة جداً.

​انتفض ليث من جلسته وهو ينظر له بترقب:

— أنت بتقول إيه؟!

— بقول لك حرامي دخل البيت عندك وسجى شافته، وهي عمالة تتصل بحضرتك.وانت منفض ومش راضي ترد عليها!

​جرى ليث وخلفه خالد، وركبوا السيارة، وأثناء القيادة بدأ ليث بالاتصال بالحرس الموجود داخل الفيلا، وكان يصرخ بهم بصوت عالي:

— هو أنا مشغل معايا شوية بهايم؟! في حرامي في البيت وحضراتكم نايمين على ودانكم؟! الحرامي ده لو وصل لفوق أو دخل أي غرفة من الغرف مش هيحصلش كويس!

​كان يهتف بصوت عالٍ وأغلق معهم الخط، وكان يسوق بأقصى سرعة. وعندما وصلوا كان الحرس ينتظرونه عند البوابة الرئيسية للفيلا. توقف ليث وهو ينظر لهم بثبات وترقب. اقترب منه كبير الحرس:

— اطمن يا باشا، إحنا قبضنا عليه وهو دلوقتي في المخزن الخلفي مستني أشوف أوامر حضرتك.

— حد حس بيه؟!

— لا يا فندم.

​دخل ليث بالسيارة ومعه خالد، وصعد إلى الأعلى لكي يطمئن على أخته التي كادت أن تموت رعباً. دق عليها عدة دقات ولم تفتح، فاقترب من الباب وهو يتحدث:

— افتحي يا سجى، أنا ليث.

​قامت سجى مسرعة وفتحت الباب وكانت تبكي بشدة وهي خائفة. احتضنها ليث بحنان وظل يمسح على ظهرها:

— حصلك حاجة؟!

​كانت تهز رأسها بخوف:

— لا.. أنا كنت مرعوبة لما شفته في الجنينة وفضلت أتصل بيك بس أنت مش رديت عليا فرنيت على خالد.

​ظل ليث يمسح على شعرها بحنان:

— أنا آسف يا حبيبتي.. أنتِ كويسة؟

— أه كويسة.

​كان خالد الذي صعد خلف ليث ليطمئن عليها يقف وهو يراها تبكي بدموع وخوف، وكان يود أن يذهب إليها ويضعها في حضنه ويهدئ من خوفه، ولكن هذا ليس من حقه؛ فضغط على يده بقوة وهو يغمض عينيه ويتراجع.

​ظل ليث مع أخته في الغرفة يطمئنها حتى غفت وهي بجواره، ولما تأكد من نومها خرج وهو يغلق الباب خلفه، فذهب إلى غرفة والده ودق الباب ولكنه لم يجد رد، فدخل ووجد والده نائماً فخرج وأغلق الباب خلفه.

​نزل إلى الأسفل ووجد خالد ما زال ينتظره في بهو المنزل، فجلس بجواره وهو يشد شعره بيده إلى الوراء ويغمض عينيه ويتنهد براحة. فنظر له خالد:

— هتعمل إيه؟!

— ولا حاجة، هطلع أغير هدومي وأنام، وأنت كمان اطلع معايا غير هدومك ونام في الأوضة بتاعتك، والصبح بقى نبقى نشوف مين سعيد الحظ اللي كان جاي هنا وجاي ليه.

— طيب تمام، يلا علشان هموت من النعس.

​هز ليث رأسه وصعد هو وخالد. ذهب خالد إلى الغرفة التي كان يعتاد المكوث بها عندما كان يبيت مع ليث فهذه ليست المرة الأولى.

​نسي ليث تماماً أمر يقين ودخل غرفته، ولكنه عندما دخل وجد الممرضة تجلس على الكرسي بجوار يقين وهي نائمة. نظر إلى يقين فوجدها تنام في ثبات عميق، وكانت تشبه الملائكة، ولأول مرة يراها بشعرها؛ فهي كانت بحجابها في كل المرات التي راها فيها، حتى تلك المرة التي كان يحاول فيها ذلك الوغد رامي الاعتداء عليها كانت تدافع لتحافظ على حجابها وملابسها.

​نظر لها ليث نظرة طويلة، ثم ذهب إلى غرفة الملابس وأخرج له ملابس وخرج من الغرفة بهدوء، ودخل غرفة أخرى أخذ دشاً ساخناً، وعندما خرج ذهب إلى السرير وغط في ثبات عميق.

​مر الليل بسكونه الصارخ على كل الأبطال، وبدأت أنوار النهار تظهر وبدأت أشعة الشمس تضيء الأرض بنورها وتشرق على حياة الأبطال بيوم جديد وأحداث جديدة.

​استيقظ ليث وقام بتبديل ملابسه ونزل، وعندما خرج وقف عند غرفته الموجودة بها يقين ثوانٍ، ثم ذهب إلى غرفة سجى ودق الباب عدة مرات ودخل وكانت سجى ما زالت نائمة. فدخل وجلس بجوارها بحنان، فتحت سجى عيونها وهي تبتسم له برقة:

— صباح الخير يا أبيه.

— صباح النور يا حبيبتي، نمتي كويس؟

​اعتدلت سجى في جلستها:

— أه الحمد لله.. هو أنتم عملتوا إيه مع الحرامي؟!

— ولا حاجة، الحرس مسكوه ولسه بقى النهارده هشوف مين حضرته وكان جاي عاوز إيه.

— تمام بس بليز يا أبيه، خلي الحرس يخلوا بالهم بلاش تتكرر تاني.

​اقترب منها ليث وقبل رأسها:

— ما تخافيش يا حبيبتي، دي أول وأخر مرة.

​ابتسمت له سجى وهي تهز رأسها، وقف وهو يعدل من ملابسه:

— يلا قومي بقى بطلي كسل علشان نفطر سوا.

— حاضر، انزل وأنا هنزل وراك.

— ماشي يا حبيبتي.

​خرج ليث من غرفة أخته ووجد في طريقه خالد ينزل:

— صباحو يا بوص.

— صباحو.

​وعندما نزلوا وجدوا زاهر يجلس في بهو المنزل وهو يشرب قهوته الصباحية. اقترب ليث من والده وهو يقبل رأسه:

— صباح الخير.

— صباح الخير يا عمي.

​نظر لهم زاهر باستغراب:

— صباح النور.. هو أنتم كنتم نايمين هنا؟!

هز ليث رأسه وهو يجلس بجواره:

— أه، جينا علشان كان في حرامي دخل البيت بالليل وسجى شافته واتصلت بينا.

​وقف زاهر بصدمة وذهول:

— نعم! حرامي إزاي؟! ومين؟! والحرس كانوا فين؟!

— والله أنا هفطر الأول وأصحصح كده وبعدين هعرف كل ده، الحراس مسكوه إمبارح وأنا نمت وبعدين أبقى أروح أشوف مين حضرته جاي عندنا عاوز إيه.

​وفي تلك اللحظة دخلت الخادمة تخبرهم بأن الطعام قد أصبح جاهزاً، فقاموا وتوجهوا إلى مائدة الطعام وجلسوا حولها.

​نزلت سجى بشكلها الطفولي بلبس البيت وكانت تعقد شعرها بشكل عشوائي جعل من شكلها أكثر جاذبية. عندما راها خالد ظل ينظر إليها خلسة، أما هي فصدمت وظلت واقفة لثوانٍ تدرك وجوده.

​نظر لها ليث واستغرب شكلها:

— تعالي يا حبيبتي، واقفة كده ليه؟! يلا عشان تفطري.

​تداركت سجى نفسها وذهبت تجلس بجوار والدها وهي مكسوفة وبدأت تأكل، وبدأوا جميعاً في تناول الفطور. وبعد لحظات نده زاهر على الخادمة فجاءت مسرعة إلى سيدها:

— تحت أمرك يا باشا.

— جهزي فطار وطلعيه للممرضة اللي فوق، وكمان ليقين هانم.

هزت الخادمه رأسها باحترام:

— تمام يا فندم.

​اتكأ ليث باستهزاء:

— هانم.. حلو والله!

وقام وقف مرة واحدة:

— أنا رايح أشوف الحلو اللي جه عندنا إمبارح ده إيه اللي رماه علينا ووقعه في طريقنا.

​ذهب ولم ينتظر أي رد، فقام خالد:

— طيب أنا هروح معاه أشوف في إيه.

— كمل أكلك يا ابني.

— الحمد لله يا عمي شبعت.. عن إذنكم.

​وذهب خلف ليث. وعندما دخلوا المخزن وراى ليث ذلك المربوط على الكرسي ووجهه ملطخ بالدماء وفاقداً للوعي -وكان رامي- ابتسم باستهزاء وهو يرفع رأسه إلى الأعلى:

— ده أنت مصر بقى! عموماً أنا كنت هبعت أجيبك بس أنت وفرت علي المشوار.

​جلس على الكرسي الموجود أمام هذا الحرامي، ثم نظر إلى حارسه وهو يأمره:

— فوقوه.

​ذهب الحارس وقام بسكب المياه عليه لكي يفوق، وبالفعل صحا.

— ممكن أعرف إيه اللي جابك هنا؟!

​تحدث رامي بحقد:

— جاي أخد خطيبتي اللي أنت خطفتها وأخدتها من وسطنا بكذبة مالهاش لازمة.. اسمع، يقين دي بتاعتي ومش من حق أي حد إنه يلمسها غيري أو حتى ياخدها مني!

​وقف ليث بعصبية ولكمه بشدة عدة مرات، ثم أمسك شعره وهو يهدده:

— اسمها ما يجيش في بالك مرة ثانية، مش على لساني لأن لو سمعته على لساني مرة ثانية وعد مني هقطعه! وهي مش خطيبتك دي مراتي! فاهم؟! يعني تمحي صورتها واسمها ووجودها من حياتك تماماً، ولو ما عرفتش بقى أنا هعرفك وأعلمك إزاي تمد إيدك على حاجة تخصني!

​وظل ليث يضرب به بحقد وغل، حتى اقترب منه خالد وهو يحاول أن يبعده عنه:

— كفاية يا ليث، هيموت في إيدك!

​ابتعد عنه ليث وهو يلهث، وكان رامي قد فقد وعيه وجسده أصبح ممتلئاً بالدماء. نظر ليث إلى حراسه وهو يأمرهم:

— عايزه يرجع طبيعي تاني عشان أعرف أربيه على حق.

​ثم خرج ومعه خالد ورئيس الحرس الذي أمره بتغيير طاقم الحرس كله وأمره بوضع كاميرات في كافة أنحاء المنزل، كما أمره بجلب كلاب حراسة وزرعها حول أسوار الفيلا. وبعدها ذهب خالد إلى منزله، ودخل هو إلى المنزل منهكاً متعباً، وكان والده ينتظره بقلق:

— خير يا ابني، مين ده وايه اللي حدفه علينا؟!

— أبدا، ده مجرد حرامي وخلاص خد عقابه وبعثته للبوليس.

​أراد ليث ألا يعلم والده بوجود رامي، ولا يريده أن يعلم أنه هو من دخل الفيلا ليلاً متسللا حتى لا يقلق، وكان قد أمر خالد والحرس بعدم الإفصاح لوالده عن أي شيء حدث وقال لهم ما يجب أن يقال لوالده.

​تنهد زاهر بقلق:

— طيب ودخل إزاي والحرس كانوا فين؟!

— دخل من الأسوار الخلفية للفيلا والحرس أنا غيرتهم وأمنت المكان كويس، وكمان جبت كلاب حراسة حوالين أسوار الفيلا.

​تنهد زاهر وهو يفرض ظهره على الكرسي:

— طيب تمام، ربنا يستر.

— يا رب.

​وفي تلك اللحظة سمعوا صوت صراخ يقين، فصعدوا وهم يركضون إلى الأعلى ليروا ماذا حدث لها. فتح ليث باب الغرفة بسرعة فوجد الممرضة تحاول أن تهدئ من روع يقين ومعها سجى، وكانت في حالة من الهلع وعدم الاطمئنان.

​ولكن سرعان ما تداركت نفسها وهدأت ولما انتبهت وجدت نفسها في مكان غريب مع أوناس لم تعرفهم من قبل، فكانت سجى تجلس بجوارها على السرير من جهة والممرضة تجلس بالجهة الأخرى، فشعرت بعدم الراحة. ولما ابتعدت بنظرها وجدت زاهر يقف وهو ينظر لها بقلق، وعندما راته عرفته فقامت معتدلة وهي تتحدث بصوت هادئ مرتعش لزاهر:

— أنا فين ومين دول؟!

​وكانت تنظر إلى سجى والممرضة، ثم بعد ذلك تذكرت ما كان يحدث لها على يد ذلك الوغد رامي فبدأت تتأكد من ملابسها وظلت تنظر حولها بتوتر وقلق، ثم سألت والدموع تنزل من عيونها بصوت متقطع:

— وإيه اللي حصل لي؟! أنا أخر حاجة فاكراها..

​ولم تستطع إكمال ما كانت تود أن تقوله وأغمضت عيونها بالألم. اقترب منها زاهر وجلس بجوارها بعدما قامت له الممرضة ووضع يده يمسح على كتفها بحنان:

— ما تخافيش يا بنتي، أنت كويسة ما فيش حاجة حصلت.

​فنظرت له برجاء والدموع ما زالت تسقط من عيونها:

— إيه اللي حصل؟! ممكن أعرف أنا جيت هنا إزاي ومين جابني هنا وأنا فين؟!

— اطمني يا بنتي، أنتِ في بيتي ودي بنتي سجى فاكراها كنتِ بتلعبي معها وأنتوا صغيرين.

​نظرت يقين لسجى ووجدت سجى تبتسم لها وهي تقول:

— نورتي البيت يا حبيبتي.

​نظرت لها يقين والدموع ما زالت عالقة على وجهها:

— شكرا.

​كان هذا الحوار تحت عيون ليث الذي كان ينظر لها نظرة خوف وشفقة. كان خوفها وتوترها يقع على قلبه كعبء كبير وكان مندهشاً من شعوره هذا، ولكن شكلها وخوفها كانا كافيين أن يجعلا عقله يتوقف تماماً. ظل ليث سرحان في شكلها وقلقها وكان يود أن يقترب منها ويضمها بشدة ويطمئن خوفها هذا، وكان يشعر بالضيق والغضب من قرب والده منها بهذا الشكل ويغار جداً عليها.

​ولكنه لم يلتفت لكل هذه المشاعر، كل ما كان يريده في تلك اللحظة هو تهدئة خوفها الواضح والصريح، وكان يعلم أنه إذا اقترب منها الآن سوف يزداد هذا الخوف أكثر. كما أنه كان يحاول أن يثبت لنفسه أن كل تلك المشاعر ما هي إلا شفقة على حال تلك الفتاة ليس إلا.

​تنهد زاهر وهو يحكي لها ما حدث:

— اللي حصل إن أنا وليث ابني روحنا عندكم البيت وشفنا اللي حصل، وشفنا اعتداء الحيوان اللي اسمه رامي عليكِى، والحمد لله أننا وصلنا في الوقت المناسب وهو ما قدرش يعمل لك حاجة.

​أغمضت يقين عيونها بألم ودموعها تتساقط بغزارة وهي تحمد ربها بكثرة أنه حماها من بطش ذلك الوغد الحقود. فتابع زاهر:

— وبعدين وديناكى المستشفى ولما اطمئنا عليكِى ليث أصر إنك لازم تيجي هنا وتبقي في وسطنا وأحنا حواليكِ علشان نبقى مطمنين أكتر واتطمني.. أنتِ مش هترجعي ليهم تاني لحد ما نقدر نجيب حقك -وقال في سره دون أن ينطق: وحق أبوكي-.

​سألت يقين وهي تنظر له بكسوف واضح:

— ممكن أعرف لما حضرتك جيت ودخلت انقذتني هل كان في شيء..؟

​ثم سكتت بكسوف وهي تضغظ على فمها بالقلق. فهم ليث ما تريد أن تسأل عنه فرد بصوت واضح ومسموع وكل رجولة خشنة:

— كنتِ مستورة والحيوان ده ما قدرش يلمح حتى ولو طرف صغير منك.

​فتحت عيونها وهي تتمنى أن يكون ما سمعته صحيحاً وليس حلماً تمنته، فنظرت إلى زاهر ووجدتة يبتسم لها ويطمئنها:

— ليث هو اللي دخل الأول أهو رد عليكِ.

​تعجبت يقين وهي تسأل:

— مين ليث؟!

​نظر زاهر باتجاه ليث، نظرت هي باتجاه نظره فوجدته شاباً وسيماً يبدو عليه القسوة ولكن عيونه كانت تملاها الحنان وهو ينظر لها، فخجلت من نظراته تلك. فسألت بخجل:

— مين ده؟!

— ده ليث ابني، وهو اللي أنقذك من إيد الحيوان اللي اسمه رامي.

​نظرت له وهي تشكره بامتنان:

— شكراً جداً لحضرتك.

​نظر لها وهو يبتسم دون رد، ولكنها أملت تسأله برجاء:

— هو حضرتك قولت إنى كنت مستورة؟!

هز ليث رأسه:

— أه، اطمني.

فاكملت برجاء:

— وشعري كان متغطى كويس؟!

​ابتسم ليث لها وهو يهز رأسه:

— أه حتى شعرك كان متغطى اطمني.

​ونظر حينها إلى شعرها الذي كان يشبه لون البندق، وتمنى في لحظة عابرة أن يذهب ويلمس ذلك الشعر، ولكن سرعان ما نفض تلك الفكرة من رأسه.

​أما هي فأخذت بالها من نظراته وتعجبت، فوضعت يدها على رأسها لكي تأكد من إحكام غطاء رأسها، ولكنها وجدت شعرها بدون غطاء وقد تم كشفه على رجال أغراب! فصرخت بأعلى صوتها وهي تجذب غطاءها وتغطي نفسها بالكامل.

​فأدرك ليث سبب صراخها وخرج فوراً وخرج وراءه زاهر. فضحكت سجى وهي تحاول تهدئتها:

— خلاص خرجوا.

سألت هي من أسفل الغطاء:

— بجد؟!

— والله خرجوا يا بنتي.

​أنزلت الغطاء من عليها وبدأت في البكاء مرة أخرى، فاقتربت منها سجى بخوف:

— مالك؟! في حاجة بتوجعك؟!

هزت يقين رأسها:

— لا.. بس في رجالة غريبة شافوا شعري وأنا كنت واعدة ربي أن ما حدش يشوف شعري غير جوزي بعد بابا.

— طيب ما هو ما حدش غريب، ده بابا وكمان أبيه.. مش أنتِ بتعتبري بابا زي عمو حسن الله يرحمه؟!

— الله يرحمه ماشي.. بس برده.. وكمان بتقولي أبيه عادي كده؟!

— أيوه..

- يعني أعمل إيه؟! أبيه .هو أبيه ده كان أبويا ولا جوزي؟! طبعاً لا ما يصحش.

— لا ما هو أبيه فعلاً.. ولكن سكتت سجى مرة واحدة عندما تذكرت أن يقين لا تعلم أن ليث زوجها ومن المفروض ألا تعلم حتى لا تسوء حالتها الصحية.

فاكملت:

— طيب ما أنا بشعري أهو.

— يا حبيبتي دول أبوك وأخوكِ، تقبلي حد غيرهم يشوف شعرك؟! طبعاً لا! البنت دي ملكة وتاج الملكة هو شعرها ومش من حق أي حد يشوف أو يلمح طرف صغير منها ولا من شعرها.

​لمس هذا الكلام قلب سجى وحزنت على حالها وهي ترد:

— بس أنا أصلاً مش محجبة.

— فعلاً، أنا آسفة بس أنا وعدت نفسي ووعدت ربى بكده.

— خلاص، أنتِى مش كنتِى قاصدة يعني، وبعدين أنتِى كنتِى فاقدة الوعي وده مش قرارك دي حادثة غير مقصودة وأكيد مش هتتكرر تاني، خلاص بقى اهدي.

— ربنا يسامحني يا رب، سامحني.. والله أنا كنت فاكرة كل ده أني بحجابي وما كنتش أعرف إنه مش على راسي.. سامحني يا رب!

​وظلت تدعو ربها برجاء.

— طيب أسيبك أنا وأخرج، ولما تحتاجيني قولي للدادة أو للممرضة ينادوا عليا وأنا هبقى أجي أقعد معاكى شوية لو ما فيهاش رخامة يعني.

​ابتسمت لها يقين بمحبه:

— طبعاً تعالي في أي وقت.

​ابتسمت سجى بسعادة وهي ترد:

— والله شكلنا كده هنبقى صحاب.

ابتسمت لها يقين بتكلف.

​خرجت سجى، وقامت يقين بعد أن ساعدتها الممرضة لكي تتوضأ وتغير ملابسها وبدأت تصلي فرضها وظلت تبكي وتدعو ربها أن يسامحها على خطأها وكما ظلت تحمده وتحمده وتحمده فضله عليها لأنه حماها.

​أما عندما خرج ليث ووالده، نزل ليث وهو يريد الهروب من فيض تلك المشاعر التي اجتاحته، ولكن استوقفه والده وهو يسأله بتعجب:

— رايح فين يا ليث؟!

— خارج.

​قالها وذهب، أما والده فحدث نفسه بأمل:

— يا ريت يا ليث تتقبل البنت دي وتبقى مرآتك بجد، ساعتها أنا هبقى مرتاح ومطمئن عليك.. يا رب لو فيها خير لابني يدق قلبه ليها ويحبها وهي كمان تحبه وتفضل معنا.. وساعتها هقدر أقابل حسن الله يرحمه وأقوله أنا قدرت أحمي بنتك وأصون الأمانة.

​أما عند صفاء التي كانت في عالم آخر مغيبة تماماً بما تفعله، فقد قامت بتجهيز البيت جيداً حتى تستخدمه لاستقبال أعمالها المشبوهة ولم تلتفت أبدا لغياب ابنها عنها، وكان ذلك في صالح الحكومة التي بدأت تأكد من أعمال صفاء المشبوهة.

​مرت أيام كتير على الأبطال، وعدى شهر تعافت فيه يقين تماماً من كل الضغوط النفسية التي كانت تعاني منها منذ وفاة والدها، وكان ليث يحاول تجاهلها تماماً ويحاول أن يشغل نفسه بالعمل، وكان يعطي أوامر دائماً للحرس على تعذيب رامي بشتى ألوان التعذيب.. أراد ليث أن يجعله يتمنى الموت ولا يجده، وكان الحراس يقومون بتأديبه ويطلبون له الطبيب حتى يساعده على التعافي مرة أخرى ويعود إلى معاقبته مرة أخرى.

​مرت فترة طويلة، وكانت صفاء قد بدأت تتأكد من اختفاء رامي وبدأت تشعر بالقلق عليه وبدأت أيضاً بالبحث عنه والسؤال عليه ولكن لا إجابة.

​أما في مديرية الأمن بداخل مكتب اللواء مدحت الذي كان يعقد اجتماعاً ضرورياً لجميع ضباط القسم ويتشاور في قضية صفاء وأولادها. كان مدحت يتراس مائدة الاجتماعات وهو يخاطب الضباط الموجودة:

— كده واضح جداً أنها قضية دعارة كبيرة بالإضافة إلى قضية قتل مع سبق الإصرار والترصد، وكمان قضية محاولة اغتصاب، يبقى كده تمام قوي.

​تحدث أحد الضباط بعملية:

— طيب هنستنى إيه تاني يا فندم؟! الأدلة واضحة وكل شيء مضبوط، وأثناء القبض عليهم هتكون حالة تلبس يعني هتبقى قضية كاملة ومنتهية.

​تحدث مدحت وهو ينظر إلى فهد:

— بس أعتقد حضرة الظابط فهد عنده رأي تاني.

​تحدث فهد بعملية:

— يا فندم من خلال المراقبات عرفنا أن الست دي هتقابل ناس كمان أسبوع، أعتقد الناس دول لهم علاقة بقضية ثانية خالص.. حاسس أن الست دي في حد وراها وهو الداعم الرئيسي ليها.

​تنهد مدحت بعملية:

— طيب تمام، وعلشان كده إحنا هنصبر أسبوع كمان لحد ما الناس دول يجيوا ولو في أي جديد بعد أسبوع..

​تحدث فهد وهو ينظر إلى مدحت بتعجب:

— بس في حاجة غريبة يا فندم.

— خير يا فهد؟!

— الولد اللي اسمه رامي اختفى من ساعة اليوم اللي أعتدى فيه على الضحية يقين، ومن ساعتها مش عارفين نوصل لأي حاجة عنه، وحتى أمه بدأت تكتشف غيابه وبدأت تدور عليه ولكن مش لاقية أي معلومات، وكل الأخبار دي طبعا تأكدنا منها من خلال المراقبات.

— طيب تمام، شكل جروب كامل للبحث عن رامي بشكل مكثف ولازم يكون موجود في البيت خلال الهجوم.. ولكن تأكد يا فهد مراعاة السرية التامة عاوزين القضية دي تتم على خير.

— تحت أمرك يا فندم.

— تمام تقدروا تتفضلوا تكملوا شغلكم.

​قام جميع الضباط بأداء التحية العسكرية لمدحت وخرجوا. وعندما خرج الجميع دق هاتف مدحت برقم زاهر صديقه المقرب، فأجاب عليه وجاءه الرد من زاهر:

— ألو.. إزيك يا مدحت عامل إيه؟!

— كويس الحمد لله.. فينك يا عم من وقت ما تكلمنا آخر مرة وأنت مختفي؟!

— موجود والله بس قولت أسيبك الفترة دي علشان عارف أنك مشغول بالقضية إياها.. قولى إيه آخر الأخبار، وأعذرني على تدخلي بس أنت عارف القضية دي مهمة بالنسبة لي قد ايه.. وكمان أنا عاوز أطمن على البنت واتاكد أن حسن خلاص بقى نايم مرتاح ومطمئن، وده مش هيحصل إلا لو الناس دول خدوا جزاؤهم.

— إن شاء الله يا زاهر اطمن، بس اصبر شوية هانت كلها أيام وكل شيء ينتهي.

— يا رب يا مدحت.. أنا فعلاً عاوز أطمن على البنت أنا خايف أخرجها من البيت تقابل حد منهم أو الولد اللي اسمه رامي ده يأذيها.

— تمام، خلي بالك يا زاهر وفتح عينيك.. الولد اللي اسمه رامي مختفي ومش عارف هو فين ولا بيخطط لإيه ومش عارفين ممكن يكون ناوي على إيه.

— إزاي يعني؟!

— مش عارف، اختفى من يوم اعتداءه على البنت.. ممكن يكون مختفي بيخطط لكارثة أكبر، خلي بالك وخلي ليث ياخد باله، وأنا هنا مش ساكت في فريق اتكوّن للبحث عنه.

— طيب تمام، ربنا يستر.

— يا رب.

— طيب يا مدحت هسيبك أنا علشان تشوف شغلك.

— ماشي يا حبيبي ربنا معاك.

— ومعاك يا صاحبي.

​وأغلقوا الخط.

​أما بقى يقين فقد اعتادت على سجى وأحبتها، كما أن سجى أحبتها وبدأوا يحكوا لبعضهم البعض كل الأسرار. وفي يوم كانوا جالسْن معاً في حديقة المنزل يتناولون الحديث ويضحكون بمرح. نظرت يقين إلى سجى بخبث:

— بس قوليلى ياسو..

— نعم؟!

— إيه شعورك اتجاه الأستاذ خالد؟!

​ضغطت سجى على فمها بكسوف:

— شعوري إزاي يعني؟!

— يعني أنا حاسة إنه معجب بيكى قوي.

​اعتدلت سجى وهي تسأل بلهفة:

— بجد؟!

— والله، ده اللي أنا واخدة بالي منه، ومش بس كده أنا كمان واخدة بالي أنو أنتِى كمان معجبة بيه وبتحبيه.

​توترت سجى وهي تحاول النفي:

— ها.. لا، بحبه إزاي يعنى؟! ده أبيه خالد ما ينفعش.

— ما فيش حاجة اسمها ما ينفعش، في حاجة اسمها حب وحلال وحرام.

— يعني إيه؟!

— يعني هو بيحبك وأنتِى كمان بتحبيه ما فيش مشكلة، المهم بقى نعمل حلال ربنا.

— اللي هو إيه؟!

— اللي هو الجواز طبعاً، أنا عاوزاكِى تكوني واثقه فى نفسك وتكوني جوهرة ثمينة ما حدش يقدر يلمسها أو يشوفها ولا حتى يتخيلها غير اللي يستاهلها.

— طيب وده أعمله إزاي؟!

— أتكلم معاكى بصراحة ومش هتزعلي؟!

— أتكلمي يا يقين، أنتِى عارفة أنا بقيت أحبُك قد إيه بجد، أنا بقيت أعتبرك اختي وكنتى ضايعة وما صدقت لقيتك وبثق في كلامك جداً قولي بقى.

— عاوزاكِى تغيري ستايل لبسك شوية، أعتقد أنك لو لبستِى لبس مقفل شوية هتكوني جميلة قوي.. أنتِى أصلاً جميلة في كل حالاتك بس هتكوني أجمل.

— بجد أنا نفسي أعمل كده من زمان بس مش عارفة أتشجع على ده.

— أنا بقى بشجعك ومش هتخسري بالعكس هتكسبي كتير.

— طيب تمام، إيه رأيك بكره أنزل أنا وأنتِى نشتري لبس جديد، بتبقى فرصة للتجديد.

— لا بلاش، أنتِى روحي وأنا هستناكِ هنا وابقي فرجيني لما ترجعي.

— لا، أنتِى لازم تيجي معي علشان تساعديني أختار كويس.. تعرفي يا يقين أنا كمان نفسي قوي ألبس الحجاب!

​تحدثت يقين بفرحة غامرة:

— بجد والله؟! أنا كان نفسي أقولك كده بس قولت التعديل يبدأ واحدة واحدة، وأنتِى جميلة وقلبك أبيض ومليان خير فكنت متأكدة أن ربنا هيهديكِ.

— بجد يا يقين ربنا ممكن يقبلني ويحبني ويهديني؟!

— أيوه طبعاً، ربنا كبير ورحيم وهو عليم بينا كلنا، والدليل اللي أنتِى لسه قايلاه دلوقتي حالاً أنك عاوزة تلبسي الحجاب حتى من غير ما حد يطلب منك.

​حضنت سجى يقين بسعادة:

— أنا مش عارفة أنتِى كنتِى فين من زمان؟!

— موجودة أهو.

​وفي تلك اللحظة جاء عليهم ليث، قامت سجى وجرت عليه وهي تحضنه بحنان، ضمها ليث له:

— عاملة إيه يا حبيبتي؟!

— كويسة قوي يا أبيه.

— يا رب دايماً.. ممكن يا حبيبتي لو سمحتِى تدخلي تطلبي من الخدم يحضروا الغداء؟

— حاضر.

​وجاءت لتهرول إلى الداخل فنادت عليها يقين:

— استني خديني معاكِى.

​ولكن نظر لها ليث:

— استني يا آنسة يقين في موضوع مهم جداً عاوز أخد رايك فيه.

​تعجبت يقين وهي تسأله في حيره:

— خير؟!

فتحدثت سجى:

— خلاص خليكِى وأنا هروح أطلب منهم يحضروا الغداء.

​جلست يقين تنتظر كلام ليث وكانت متوترة فهي لا تحب التواجد في مكان منفردة مع أي شخص غريب، فأراد ليث كسر هذا التوتر وهو يحدثها:

— إزيك يا آنسة يقين عاملة إيه دلوقتي؟!

​ردت يقين وهي تفرك بيدها بتوتر:

— بخير والحمد لله.

— طيب تمام يا رب دايماً، حاسة نفسك أحسن من الأول؟!

— الحمد لله رب العالمين أحسن كتير، وشكرا جدا لحضرتك.

— على إيه؟!

— على أنك أنقذتني يومها، لو ما كنتِ جيت في الوقت اللازم كان الله أعلم إيه اللي كان ممكن يحصل، بس أنا كنت متأكدة أن ربنا هينقذني وفعلاً حصل وبعتك ليا.

​تعجب ليث من كلامها وثقتها من أن ربنا فعلاً هينقذها.

— ما فيش شكر ولا حاجة، المهم أنا كنت عاوزك في حاجة مهمة تخص اليوم ده.

​تغيرت ملامح يقين وبدأ التوتر والقلق يشتد عليها:

— خير؟!

— خير إن شاء الله، ممكن تقومي تيجي معايا؟!

​خفقت يقين جداً وبدأ الخوف والقلق يظهر على وجهها بوضوح:

— أروح معاك فين؟!

— ما تقلقيش.

— أنا آسفة بس لازم أعرف هروح فين، وكمان عمو زاهر يعرف؟!

— بلاش، أنا مش عاوز حد يعرف أنتِى رايحة فين.

​بدأت يقين تتحدث وأصبح الخوف ظاهراً على وجهها وصوتها:

— وأنا المفروض بقى أثق في حضرتك وأمشى معاك بعد اللي أنت بتقوله ده؟! حضرتك واعي؟!

​أدرك ليث سبب خوفها وأمسك هاتفه وقام بالاتصال على أبيه وفتح المايك، وعندما أجاب والده:

— ألو.. أيوه يا ليث خير؟!

— خير يا بابا، آنسة يقين معايا هاخدها 10 دقائق أطمن، هي معايا.

— مادام هي معاك وهي موافقة هبقى أكيد مطمن بس ما تأخرش عن 10 دقائق علشان ما أقلقش عليكم.

— حاضر.

​وأغلق معه الخط وهو يخاطبها:

— أعتقد أنك كده بقيتِ مطمنة، وكمان ربنا شاهد علينا أنى والله مش عاوز أذيكِى خالص، وإحنا مش هنخرج بره الفيلا إحنا هنبقى جوه الفيلا وكمان معانا حرس.

​استغربت يقين وهي ترد:

— ليه؟! عاوز إيه؟!

— في حاجة مهمة تشوفيها وتحكمي فيها لأنها حاجة تخصك.

— تخصني أنا؟!

— أه، يا ريت تتفضلي معايا لأن الوقت اللي أديته لبابا قرب يخلص.

​يتبع