صفعه القدر

الفصل الرابع عشر

​أشرقت شمس يوم جديد على الأبطال. كانت سجى ما زالت نائمة مع يقين، فهي لم تستطع تركها ليلة أمس، وظلت معها تحاول تهدئتها حتى غفت يقين من كثرة البكاء، وبعدها غفت سجى بجوارها.

​وبعد شروق أشعة الشمس ودخولها غرفة يقين من خلال تلك الشرفة المتروكة مفتوحة، عاكسَت تلك الأجواء بشرة يقين الناعمة وجعلتها تتملل في نومتها، فاستيقظت. عندما اعتدلت في جلستها ونظرت بجوارها، فوجدت سجى ما زالت نائمة بجوارها، فابتسمت بحزن على حب سجى لها واهتمامها بها.

​قامت يقين بهدوء حتى لا تزعج سجى في نومها، وذهبت إلى الحمام وأخذت دُشاً ساخناً لكي يهدئ ألم جسدها المتشنج، وظلت فترة قصيرة تحت الماء وخرجت بعدما انتهت. وعندما خرجت، وجدت سجى قد استيقظت للتو، وعندما وجدتها تخرج من الحمام اعتدلت وابتسمت لها بحنان. بادلتها يقين بابتسامة باهتة:

— صباح الخير يا سجى.

— صباح الخير يا حبيبتي.. أنتِ صحيتِ من بدري ولا إيه؟

— لا، أنا يا دوب صحيت ودخلت أخدت شاور سريع، مش من بدري ولا حاجة.

​قامت سجى ووقفت بجوار يقين بقلق:

— عاملة إيه دلوقت؟ أحسن؟

​هزت يقين رأسها بهدوء:

— كويسة يا حبيبتي.. شكراً يا سجى.

— شكراً على إيه بس؟! ده أنا كنت خايفة عليكِى طول الليل وحزينة على كل اللي حصل معاكي.

​تنهدت يقين بأسى:

— حصل خير.

​حاولت سجى تغيير مجرى الحديث حتى تخرج يقين من حالتها السيئة:

— طيب تمام، أنا هطلع أخد شاور وأغير هدومي، وأنتِ خلصي بسرعة علشان نفطر، وبعدها عايزه أقعد معاكى وأتكلم معاكى كتير.. عايزه أقولك خالد كان عاوزني في إيه.

— معلش يا سجى أنا ما ليش نفس، روحي افطري أنتِ وابقي تعالي.

— كده؟! علشان خاطري والله أنا مش هفطر لو أنتِ ما فطرْتِيش!

— معلش علشان خاطري لو بتحبيني أنا مش عاوزه أنزل تحت، سيبيني على راحتي.

​نظرت لها سجى بحزن:

— طيب يا حبيبتي على راحتك، أنا مش هضايقك.

​خرجت سجى وذهبت إلى غرفتها وأبدلت ملابسها ونزلت إلى الأسفل. أما يقين فأبدلت ملابسها وارتدت إسدال صلاتها وبدأت في الصلاة، بعدها تقرأ القرآن وتدعو ربها أن يفرج كربها وتدعو لوالديها بالرحمة.

​أما سجى عندما نزلت إلى الأسفل، وجدت والدها وليث يجلسان على مائدة الطعام وينتظرونهم، ولكنهم وجدوا سجى فقط:

— صباح الخير يا بابا.. صباح الخير يا أبيه.

​وذهبت إلى والدها تقبل خده. رد ليث بابتسامة مشرقة:

— صباح الورد يا حبيبتي.

​أما والدها فقبل رأسها بابتسامة وسألها:

— صباح النور يا روحي.. أمّال فين يقين؟!

— يقين رفضت تنزل وبتقول مش عاوزه تفطر، حاولت معها كتير بس هي مش راضية.

​تنهد زاهر بأسى:

— لا حول ولا قوة إلا بالله العلي العظيم! إمبارح برده ما رضيتش تتغدى ولا حتى رضيت تتعشى.

— أنا هدخل المطبخ يا بابا أخد لها فطار وهطلع فوق علشان ترضى تأكل، وهاكل معاها.

— ماشي يا بنتي روحي.

​ذهبت سجى تنفذ ما قالته، أما ليث فغضب جداً من تصرف يقين، ونظر إلى والده وقال بحدة:

— أنا مش عاوز أكون بتعدى حدودي، بس حضرتك لو ما تكلمتش عن موضوعها أنا هعرفها بطريقتي، لاني مش فاضي للدلع الفارغ ده! لازم تعرف أنها مراتي وأنها لازم تحترم وجود اسمها جنب اسمي طول الفترة دي لحد ما القصة دي تخلص خالص ونبقى نفضها بقى!

​قالها وقام وترك الطعام وذهب. حزن زاهر على حال ابنه وحال تلك الفتاة، وعلى تصرفات ابنه التي جعلت منه شخصاً مترمداً؛ فهو يريد أذية تلك الفتاة فقط لأنه متزوج منها!

​صعدت سجى بالفطار ودقت على غرفة يقين التي بالكاد انتهت من صلاتها:

— أنا جبت الفطار وجيت هنا علشان نفطر سوا، واوعي تقولي لأ، عشان أنتِ لو ما كلتيش أنا كمان مش هاكل زيك.

​ابتسمت لها يقين بود:

— ماشي يا ستي هاكل.

​وضعت سجى الطعام على السرير وبدأوا في تناول الطعام، وبدأت سجى تحكي وهي تأكل:

— أنتِ متأكدة أنك كويسة يا يقين؟!

— ليه بتقولي كده؟!

— مش عارفة، حاسة أنك متضايقة مني أو زعلانة.

— أنا عمري ما ازعل منك أبداً، أنتِ بجد غالية عندي جداً.. المهم سيبك من كل ده، قوليلي بقا خالد كان عاوز منك إيه إمبارح؟!

​قال لي إنه بيحبني ومن زمان جداً، وإنه كان مستني يسألني إمبارح علشان يعرف رايي وبعدها هيقول لأبيه وكمان لبابا ويطلبني منهم للجواز. ابتسمت لها يقين واحتضنتها:

— ألف ألف مبروك يا حبيبتي، ربنا يتمم لك على خير!

— الله يبارك فيكِى يا يقين، وعقبالك يا رب.

— يا رب يا حبيبتي.

​وظلوا معاً في الغرفة يجلسون ويتسامرون في أمور مختلفة. أما ليث فوصل إلى الشركه، وعندما علم خالد بوجوده ذهب إليه مسرعاً. دخل خالد على عجلة وهو ينظر إلى ليث:

— كنت فين يا عم عمال أتصل بيك طول الليل وتليفونك مقفول؟! أبوك كلمني اتصل بيك علشان كنت متضایق، وحاولت كتير بس برده ما كانش في فايدة.. كنت فين؟! وإيه اللي حصل؟!

— سيبك من كل ده، ورانا إيه النهارده؟!

علم خالد عدم رغبة ليث في الحديث، فاحترم رغبته وفضل الانتظار حتى يهدأ، وبدأوا في العمل.

​أما سجى ويقين فما زالتا في الغرفة يتناولون الأحاديث؛ فكانت سجى حريصة على التخفيف من حزن يقين الواضح جداً.

​وبعد مرور فترة طويلة وأثناء وجودهما معاً، جاء زاهر ودق على باب الغرفة. قامت سجى لفتح الغرفة ووجدت والدها، فوقفت يقين احتراماً له. ابتسم لها زاهر:

— ممكن أدخل أتكلم معاكى شوية يا يقين؟ مع إني حابب ننزل نتكلم تحت.

— تحت أمرك يا عمو، خير؟ تمام يلا ننزل تحت.

— تمام يا حبيبتي، هنزل وأنتِ تعالي ورايا.. هستناكي في المكتب، في موضوع مهم لازم أتكلم معاكى فيه.

— خير يا عمو؟!

— خير يا بنتي إن شاء الله اطمني.

— تمام، أنا هنزل ورا حضرتك على طول.

​خرج زاهر ونزل إلى الأسفل، أما هي فجلست على طرف السرير ونظرت إلى سجى بحيره:

— تفتكري في إيه؟! موضوع إيه ده اللى عمو عاوزني فيه؟! شكلها حاجة مهمة قوي.

— اطمني يا بنتي، بابا قال خير يبقى خير.. يلا قومي انزلي شوفيه، وأنا هدخل أوضتي شوية وهبقى أجي أشوف في إيه منك.

— طيب تمام.

​قامت يقين بتبديل ملابسها ونزلت وذهبت إلى غرفة المكتب حيث ينتظرها زاهر. وعندما دقت على بابه أذن لها بالدخول، فدخلت وجلست على الكرسي الأمامي للمكتب وهي تنظر إلى زاهر بترقب وحرص وتسأل:

— خير يا عمو؟!

— خير يا بنتي إن شاء الله، بس أنا عاوزك تعرفي إن أنا وأبوكِى الله يرحمه عملنا كده بس علشان مصلحتك، عشان نحميكِ أنتِة من اللي عاوزين يأذوكِى.

— تحموني من إيه؟! وإزاي؟! ومين الناس دي؟!

​حكى لها زاهر عما حدث بينه وبين والدها حسن قبل فترة من وفاته، و عن علم والدها بمعاملة زوجة أبيها لها . دون ذكر موضوع قتل والدها حتى لا تنهار، حتى إنه حكى لها عن معرفة والدها عن حوار محاولة زوجة أبيها في تزويجها لابنها رامي دون علمها وعلم والدها، فخاف عليها جداً وخاف أن يكشف نفسه أو يفضح تلك المرأة لأنه كان يريد أن ينتقم بالقانون. و لكي يتاكد من أنها ستكون بأمان، فلم يكن أمامه سوى حل واحد!

​كانت يقين في حالة من الصدمة وهي تسمع كلمات زاهر عن معرفة والدها بمعاناتها مع تلك الزوجه، كما زادت صدمتها عند سماع حوار محاولة إجبارها على الزواج من رامي، وعندما وقف عند الحل وسكت... سألت بصدمة:

— حل إيه ده؟!

— الحل كان إنه احنا نجوزك قبل محاولة الست دي، علشان لو عملت حوار أنها تجوزك لابنها ده من غير علمك أو علم أبوكِى.. يكون جواز باطل ويتعرف إنه تزوير وتتحبس! فطبعا أنا ووالدك الله يرحمه ما كانش قدامنا غير إننا نجوزك.

​وقفت يقين بصدمة:

— نعم؟! يعني إيه؟! يعني إيه تجوزوني وإزاي؟! يعني أنا دلوقتي متجوزة؟!

— أيوه يا بنتي.

​كانت يقين تقف أمامه وهي تحاول أن تصمد أمام تلك الصدمات التي أخذتها واحدة تلو الأخرى ولم ترد على زاهر، ولكنه أكمل:

— ده كان الحل الوحيد علشان نقدر نحميكِى كويس.. وقدرنا طبعا بتدبير ربنا وإرادته إننا ننهي الموضوع، وسبحان الله خلص قبل وفاه حسن بفترة قريبة جداً حوالي 10 أيام، وكان ربنا رتبها من عنده علشان نقدر نحميكِى في الوقت المناسب.

​جلست يقين من الصدمة وهي تسأل:

— طيب أنا ليه ما عرفتش؟! ومين ده اللي وافق يعمل كده علشان يحميني؟!

— حسن الله يرحمه كان رافض جداً إنك تعرفي أي حاجة، لأنه كان خايف عليكِى من الست اللي اسمها صفاء دي، خايف تكتشف الموضوع.. وحسن كان عارف إنك لما تعرفي هتزعلِ منه قوي، بس هو قال إن شوية الزعل دول أهون بكثير من إنك تترمي في طريق الكلب النجس اللي اسمه رامي.

— ممكن أعرف مين اللي اتجوزني ده؟! وقبل إن هو يحميني؟!

— ابني ليث.

​صدمة أخرى ضربت رأسها حتى أنها أصبحت تشعر ببعض الدوار الذي يضرب رأسها منه كل تلك الصدمات!

— أنا آسف يا بنتي، أنا عارف إنك كان لازم تعرفي من زمان بس كنت مستنيكِ تهدي وتتخطى كل الحوارات اللي كنتِ فيها.. موضوع وفاه والدك ومحاولة اعتداء رامي عليكِى وكل الحاجات اللي فاتت، كنت خايف تعرفي في الوقت ده يجرالك حاجة.. وأهو الحمد لله كل شيء بيجي في ميعاده.

​وقفت يقين وهي تكاد تجزم أن روحها تسحب من قلبها الآن. نظرت لزاهر بثبات كاذب:

— ممكن اطلع أرتاح؟!

​لاحظ زاهر اصفرار وجهها وسألها بخوف:

— أنتِ كويسة يا بنتي؟!

— كويسة.

— طيب تمام اطلعي أرتاحي، ولو في أي حاجة حابة تسألي عنها تعالي في أي وقت وأنا هجاوبك.

​هزت يقين رأسها وخرجت من غرفة المكتب وهي تشعر بدوار شديد يكاد يفتك برأسها، حاولت السيطرة عليه.

​وعندما خرجت من غرفة المكتب، كان ليث يقف أمامها وتعجب من شكلها عندما خرجت فكانت وكأنها مغيبة، ذهبت لكي تصعد السلالم. أما هو فدخل إلى غرفة المكتب فوجد والده يجلس ويضع رأسه بين يديه:

— خير يا بابا في إيه؟! يقين مالها؟!

— ما فيش، أنا قولتلها على جوازكم وحكيت لها كل حاجه.

— عرفت موضوع قتل والدها؟!

— لا طبعا، أنا لو قولتلها حاجة زي كده أعتقد كان زمانها راحت فيها أو حصلها حاجة.

​وهوب... سمعوا صوت خبط شديد، وبعدها سمعوا صوت صراخ سجى باسم يقين! قام زاهر مفزوعاً وهو يخرج من الغرفة وجرى ليث، وعندما خرج وجد يقين ترقد على الأرض غائبة عن الوعي ويوجد دم على رأسها، وهذا دليل على وقوعها من على السلالم! جرى عليها هو وزاهر. نظر ليث إلى سجى يسألها:

— في إيه؟!

— مش عارفة، أنا كنت لسه خارجه وسمعت صوت ولاقيتها واقعه كده.

​حملها ليث وهو يجري بها:

— بسرعة يا سجى افتحي باب العربية وادخلي.

​جرت سجى أمامه وفتحت باب العربية، ووضع هو يقين على كرسيها وركب مكان السائق، وركب زاهر بجواره وبدأ في القيادة بسرعة شديدة.

​وصل في وقت قصير جداً إلى المستشفى، وعندما وصل نزل وحملها بخفة ودخل بها إلى المستشفى ووضعها على ترولي قد جلبه له الممرضون حينما راوه وسمعوه وهو يطلب طبيباً. أخذ الأطباء والممرضون يقين ودخلوا بها إلى غرفة الطوارئ، أما هو وسجى ووالده فظلوا ينتظرون بالخارج.

​مرت فترة طويلة جداً لا يعلمون مدتها، وكانت سجى تجلس بحضن والدها تبكي على يقين، أما ليث فكان يأخذ الممر ذهاباً وإياباً وشعور الخوف والقلق مسيطر على قلبه. وبعد فترة طويلة خرج الطبيب، فذهب سريعا للطبيب يسأله في لهفة:

— خير يا دكتور؟!

— نظر له الطبيب بعملية: أنا ممكن اعرف حصلها إيه؟!

— مش عارف، بس هي تقريباً داخت وهي طالعة السلم فوقعت واخدت السلم كله لحد تحت.

— هي حصل لها كسر في اليد والساق وارتجاج بسيط جداً في المخ، بس الحمد لله ما فيش أي نزيف داخلي، وهي دلوقتي كويسة بس نايمة بسبب المخدر اللي أخدته لأن هيبقى في وجع شديد جداً في جسمها بسبب الوقعة والكسور دي، بس إن شاء الله تعدي على خير وألف سلامة عليها.

​سأله زاهر:

— الله يسلمك يا دكتور، طيب نقدر ندخل نشوفها؟!

— أه طبعا تقدروا.

— شكرا جدا لحضرتك يا ابني.

— على إيه يا فندم ده واجبي.. عن إذنكم.

​استأذن الطبيب وذهب، أما زاهر وسجى وليث فدخلوا جميعاً إلى غرفة يقين. وعندما وجدت سجى يقين ترقد لا حول لها ولا قوه ويوجد جبس على يدها ورجلها كما أن هناك شاشاً أبيض ملفوفاً حول رأسها، فبكت وذهبت إليها وقلبت رأسها وهي تقول من وسط دموعها:

— ألف سلامة عليكِ يا حبيبتي!

​ثم نظرت إلى خصلات شعرها الباين من الحجاب، فقالت وهي تنظر حولها:

— يقين هتزعل قوي لو لقت شعرها باين كده!

​وقامت بتعديل الحجاب لها برفق ولكنها كانت خائفة أن تتسبب في ألم يقين فبكت بعجز:

— أنا مش عارفة، حاسة إني ممكن أوجعها.

​اقترب ليث بدون كلام وأخذ الغطاء من يدي أخته وقام بوضعه بخفة وإحكام حول رأسها، وضم أخته إلى حضنه وربت على كتفها بحنان:

— ما تخافيش، هي هتبقى كويسة.

— يا رب يا أبيه.

​وجلسوا جميعاً حولها ينتظرون أن تستيقظ يقين ويطمئنوا عليها. استمر هذا الوضع لفترة من الوقت حتى بدأوا يقلقون من عدم استيقاظها. نظرت سجى إلى ليث وهي تسأله بقلق:

— هي ليه لسه لحد دلوقتي غائبة عن الوعي؟! دي من الصبح وهي نايمة!

​قال زاهر أيضاً وهو ينظر إلى يقين بقلق:

— الصراحة أنا كمان بدأت أقلق عليها، احنا لازم نشوف الدكتور يدخل يطمنا عليها.

​رد عليهم ليث وهو يحاول أن يطمئنهم:

— الدكتور قال إنها هتاخد وقت عشان واخدة مخدر قوي بسبب الألم.

​بكت سجى قائلة:

— أنا مش عارفة مالها؟! إيه اللي حصلها؟! دي كانت كويسة جداً وكنا قاعدين مع بعض وما كانتش تعبانة خالص!

​ذهب إليها ليث وضمها إليه برفق وحنان وظل يمسح على شعرها:

— يا حبيبتي اطمني، هي أكيد هتبقى كويسة.. وعلشان تبقي مطمنة أنا هنادي على الدكتور بنفسي يطمنك عليها.

​ذهب في الوقت الذي قام فيه ليث ينادي على الطبيب، الذي دخل بدوره وهو يسأله:

— خير يا جماعة في جديد حصل؟!

— سأله ليث بترقب يحاول إخفاءه: لو سمحت يا دكتور طمني، احنا بدأنا نقلق علشان هي ما صحيتش لحد دلوقتي.

— لا ما فيش قلق ولا أي حاجة اطمن، أنا قولت لحضرتك أنها واخدة منوم هيخليها نايمة فترة طويلة جداً.. ثم نظر إلى ساعة يده: يعني احتمال هي تفوق في أي لحظة دلوقتي.. كمان في حاجة عايز أقولكم عليها.

— نظر له زاهر: خير يا ابني؟!

— حضراتكم لازم تكونوا مستعدين لأي رد فعل منها، لأنها عندها صدمة عصبية.. تقريباً كده تعرضت لضغوط عصبية كتير الفترة دي.

​رد زاهر وهو ينظر بعينيه إلى الأسفل بخزي وقلق:

— فعلاً هي الصراحة الفترة دي تعرضت لضغوطات كتير جداً، بداية من موت والدتها وموت والدها بعد فترة مش طويلة، وكمان محاولة اعتداء.. يعني الصراحة عانت كتير.

​نظر الطبيب إلى يقين بشفقة:

— لا حول ولا قوه إلا بالله العلي العظيم! ربنا يكون في عونها.. طيب تمام، هي هتفوق دلوقتي وهتبقى كويسة بس نفسياً الصراحة أنا لسه مش عارف إيه ممكن تكون التطورات، ..

​تنهد زاهر بأسى وحزن:

— ربنا يسترها يا ابني.

​كانت سجى تنظر إلى يقين بأعين دامعة حزناً على حالها، ولكنها لاحظت محاولة فتح يقين لعيونها وقيامها بتحريك يدها. ذهبت إليها تسألها برفق:

— يقين يا حبيبتي أنتِ سامعاني؟! افتحي عينيكِ.

​انتبه الجميع لسجى، وبالفعل وجدوا يقين قد بدأت تستيقظ. ذهب الطبيب ووقف بجوارها، ونظر لها ليث من بعيد، وكان زاهر يقف وهو ينظر لها بترقب. وقف الطبيب بجوار يقين وهو ينظر لها ويسألها:

— انسه يقين، أنتِ سامعاني؟!

​هزت يقين رأسها بوهن:

— أه.. سامعاك.

— طيب قوليلي، أنتِ حاسة بإيه؟!

​وضعت يقين يدها السليمة على رأسها بوجع:

— أنا كويسة.. مش حاسة بحاجة.

— طيب تمام، أنا هخرج ولو حسيتِ أنك مش مرتاحة خلي حد ينادي عليا علشان أساعدك.

​هزت يقين رأسها بدون رد ولا حتى أي رد فعل، كانت كل ما تفعله هو النظر أمامها وكأنها مغيبة عن العالم.

​خرج الطبيب وخرج وراءه ليث وزاهر ليطمئنوا منه. وقف ليث أمام الطبيب يسأله:

— خير يا دكتور طمني، أنا شايف أنها مش بخير أبداً!

— هي بتحاول تظهر عكس اللي هي حاسة بيه، بس طبعا هي مش هتستمر على كده كتير.. هي حاسة بألم شديد جداً في كل جسمها نتيجة الخبطة والكسور والكدمات.. كمان أنا مش هاديها أي مسكنات علشان عاوزها تتكلم وتخرج اللي جواها، أنا عارف إن ممكن اللي أنا بعمله ده يبقى غلط بس أنا بحاول أساعدها علشان الموضوع ما يتطورش.

— طيب في أي خطورة عليها أو أي حاجة لازم ناخد بالنا منها؟!

— حضرتك تقرب لها إيه؟!

— أنا أبقى جوزها.

— طيب تمام، حضرتك خليك معها وتحاول تخليها تخرج كل اللي جواها لحد ما تقول أنها بتتوجع، وفوراً لازم تبلغني وأنا هنتظر ردك.. كمان ما فيش داعي خالص لوجود الحج والانسه اللي جوه هنا، مش مسموح أصلاً غير بمرافق واحد، وأنا أفضل بما أنك زوجها يبقى حضرتك اللي تبقى موجود معها.

— تمام يا دكتور شكراً لحضرتك.

— شكرا على إيه ده واجبي، وألف سلامة عليها مره تانيه.

​ذهب الطبيب وترك ليث وزاهر معاً خارج الغرفة:

— بابا، خد سجى وخلي السواق يرجعكم الفيلا علشان أنتم تعبتوا قوي النهارده، وأنا هفضل معها هنا.

— يا ابني أنا شايف إن أنت بالذات ما ينفعش تفضل هنا.. الدكتور رشح وجودك معها علشان عارف إنك جوزها، وهو معتقد طبعا أنكم بتحبوا بعض فطبيعي هتكون أنت العلاج الأول والأخير ليها، بس هو لو عرف أنه سبب اللي هي فيه دلوقتي هو جوازك منها أكيد هيطلب منك تروح.

​نظر ليث إلى والده وقد بدأ يظهر عليه الغضب:

— هي اللي مغصوبة عليا وأنا اللي يعني دايب في هواها؟! أنا كمان مغصوب عليا زي ما هي.. اتغصبت عليا، أعتقد حضرتك أكيد عارف ده.. لو سمحت خد سجى وروحوا وأنا هحاول أسيطر على غضبي وأتعامل معها، وأطمن مش هعمل مشاكل.

​قالها ودخل إلى الغرفة ودخل والده وراءها، ووجدا سجى تجلس بجانب يقين وهي تمسح على شعرها بحنان ورفق، أما يقين في حالة سكون تام. نظر ليث إلى أخته سجى:

— حبيبتي يلا قومي علشان تروحي.

— لا يا أبيه أنا عاوزه أفضل مع يقين.

— يا حبيبتي لازم تروحي، وأطمني هي هتبقى كويسة، أنتِ بس روحي أرتاحي وتعالي الصبح اطمني عليها.

​جاءت سجى تتكلم، ولكن زاهر قاطع كلامها وهو ينظر لها بثبات:

— يلا يا سجى، اسمعي كلام أخوكِى.

​هزت سجى رأسها وهي حزينة بقلة حيله، ولكنها ذهبت إلى يقين وقامت بتقبيل رأسها وهي تخبرها:

— يقين يا حبيبتي، أنا هروح دلوقتي غصب عني والله، بس أنا هاجيلك الصبح بدري علشان اطمن عليكِ.

​وذهبت مع والدها على مضض. خرجت سجى ووالدها زاهر وذهبا إلى المنزل، وظل ليث معها في الغرفة وجلست على الكرسي الموجود بجوارها، وظل ينظر لها فترة طويلة بصمت.

​ولكنه قطع صمته وهو يسأله:

— حاسة بإيه دلوقت؟!

​لم ترد علي يقين والتزمت الصمت التام، ولم يرد هو الضغط عليها وجعلها تتكلم، ولكنه أكمل حديثه:

— أنا عارف إنك عندك حق في كل اللي أنتِ حاسة بيه دلوقتي، بس أكيد والدك في الوقت ده ما كانش بيفكر في أي حاجة غير إنه هو يحميكِ، هو ما كانش عاوز يظلمك ولا كان في نيته إنك تلاقي نفسك بين يوم وليلة متجوزه واحد كده من غير أي مقدمات ومن غير حتى ما تعرفي.. أنا نفسي ما كنتش متخيل فكرة إني أرجع ألاقي في واحدة تبقى مراتي كده من غير أصلا ما أعرف حتى اسمها، بس لما قعدت مع نفسي وحطيت نفسي مكان والدك الله يرحمه لقيت إن أي راجل فينا ممكن يرمي نفسه وسط النار علشان بس يحمي عرضه ويحمي بنته فقبلت الفكرة.. أنا مش بقولك تسلمي للأمر الواقع، بس على الأقل اتحملي لفترة صغيرة لحد بس ما نوصل لحل مع الناس دي، وبعدين يا ستي أبقي اعملي اللي أنتِ عاوزاه، وساعتها كل واحد فينا يقدر يروح لحاله.

​أنا هسيبك تتكلمي وتطلعي كل اللي جواكي، أنا عاوزك تتكلمي، أنتِ لازم تتكلمي.. حتى يا ستي لو مش عايزة تتكلمي قدامي أنا هسيبك وهخرج بره.. لو بتحبي باباكِ بجد بلاش تخليه يحس أنه كان سبب في أذيتك ويفضل نايم مش مرتاح.

​ثم قام وخرج وقفل باب الغرفة خلفه.

​ظلت يقين ساكنة لثوانٍ، ثم بدأت بعد ذلك تسقط الدموع من عيونها وبدأت تبكي بشدة، وبدأت تخاطب والدها وكانه موجود معها:

— الله يرحمك يا بابا.. أنا مش عاوزه أقولك أنت ليه عملت فيا كده؟! أنا بس عاوزه أقولك إني حاسة إني رخيصة قوي يا بابا! أنا عارفة إن اللي أنت عملته ده علشان كنت عاوز تنقذني، بس أنا حاسة إني تعبانة قوي يا بابا ومش فاهمة حاجة.. قلبي بيوجعني عليك وعلى نفسي، أنا حاسة إني مش فاهمة أي حاجة من ساعة ما أمي ماتت وأنا حاسة إني مسجونة في زنزانة بيتنا، ولما أنتِ مت وسبتني أنت كمان الحصار اشتد عليا! ده غير المعاملة اللي كنت بستحملها بس علشان كنت خايفه عليك.

​عارف يا بابا، الست اللي أنت اتجوزتها بعد ماما دي ياما ضربتني وعذبتني وكانت بتهددني إني لو قولتلك هتموتني! تخيل أنها في مرة قالتلي إنها ممكن تبعني وتقولك إنى هربت مع واحد تاني علشان تخليك مكسور وتفضحني وتفضحك وتخليك تموت بحسرتك عليا وأنت زعلان مني! أنا ياما استحملت، بس برده أنت مت.. أنا مش باعتراض على حكم ربنا أبداً لا طبعا، أنا بس بكلمك علشان حاسة أن قلبي عمال بيوجعني قوي يا بابا.. أنا لما عمو زاهر قال إن حضرتك جوزتني لواحد أنا ما أعرفوش ومن غير ما أعرف علشان بس تحميني، حسيت بكسرتك وقتها، حسيت وكأن في سكين بارد دخل جوه قلبي، حسيت وكأن المكان بقا فاضي حتى من النفس اللي بتنفسه.. أنا مش زعلانه منك أبداً يا بابا والله مش زعلانه منك، أنا بس زعلانه على نفسي.. بس خلاص أنا هرضى كالعاده بقدري، الحمد لله يا رب.

​وظلت يقين تبكي وتبكي حتى علا صوت بكائها، حتى إن صوت بكائها قد وصل إلى مسامع ليث خارج الغرفة، فدخل حتى يرى ما بها فوجد الدموع تملا وجهها حتى إن عيونها أصبحت منتفخة ومحمره من كثرة البكاء، ولكنه بدأ يظهر على وجهها بجانب البكاء عدم الارتياح.

​اقترب منها بحرص وهو يسألها:

— أنتِ كويسة؟! قوليلي حاسة بإيه؟!

​لم ترد يقين عليه، ولكن ازداد بكاؤها. خرج ليث مسرعاً لكي ينادي على الطبيب. جاء الطبيب واقترب منها فوجدها تبكي:

— حاسة بإيه دلوقتي؟!

— ردت يقين وهي تبكي وتنظر للطبيب: جسمي كله بيوجعني، مش قادرة.

— معلش أنا هديْكى حالاً علاج وشويه وهتبقي كويس إن شاء الله.

​وبدأ الطبيب بوضع العلاج لها عن طريق الحقن الوريدي، وبدأت هي تهدأ قليلاً. نظر الطبيب إلى ليث وهو يطمئنه:

— هي هتبقى كويسة بعد شوية.

— تمام، شكراً لحضرتك يا دكتور.

​خرج الطبيب وجلس ليث بجوار يقين، وقد اغتاظ منها بسبب عدم ردها عليه عندما سالها ماذا تشعر، ولكنها ردت على الطبيب فور أن سأله، ولكن ظل يخاطب نفسه بحكمة:

— اهدى يا ليث لحد بس الفترة دي ما تعدي على خير ونخلص، وبعدين بقا صدقيني الغلطة هتبقى بحساب يا ست يقين!

​وظل جالسا بجوارها هكذا دون حوار، وظلوا في المستشفى لفترة طويلة. كانت سجى تبقى معها خلال فترات النهار، ويذهب ليث للمنزل للراحة واستبدال ملابسه .ويبقى هو معها خلال فترات الليل. وكانت في تلك الفترة تحاول يقين تجاهل ليث تماماً، وكانت لا تريد التعامل أو الحديث معه أصلاً، وهذا كان يزعج ليث تماماً.

​مرت مجموعة من الأيام حتى جاء الطبيب ليطمئن عليها، وكان زاهر يجلس معها. نظر زاهر إلى الطبيب يسأله:

— خير يا ابني، هي أخبارها إيه دلوقتي؟!

— لا الحمد لله، إحنا بقينا كويسين خالص، أنا حتى إن شاء الله ناوي أكتب لها على خروج النهارده وتبقى تكمل علاج في البيت إن شاء الله.

​نظرت سجى التي كانت تقف بجوار يقين وهي تسأل الطبيب بابتسامة واسعة:

— ده بجد يا دكتور؟! يعني يقين هتخرج النهارده؟!

— أه إن شاء الله.. وألف سلامة على حضرتك يا مدام يقين.

​انزعجت يقين جداً من هذا اللقب. لاحظت سجى هذا الإزعاج فاقتربت تهمس لها برفق:

— مالك بس يا يقين، زعلانة ليه؟!

— لا، أنا مش زعلانة ولا حاجة، أنا بس اتضايقت شوية.

— من إيه بس يا قلبي مين اللي زعلك؟!

— الدكتور بيقولي يا مدام، هو كان شافني أتجوزت قبل كده؟!

​دخل ليث الغرفة وسمع جملتها ونظر لها وهو يرفع حاجبه... ضحك زاهر وهو ينظر لها:

— معلش يا بنتي، هو بس عشان عرف إن ليث يبقى جوزك.

— ويعرف ليه يا ريت يا عمو، محدش يعرف بحاجه زي دي!

​نظر لها ليث بانزعاج وهو يسألها:

— والمدام مش عاوزه حد يعرف ليه بقا إن شاء الله؟!

— أولاً أنا مش مدام أنا آنسة، وثانياً من حقي ما حدش يعرف لأن كده حضرتك بتدمر سمعتي!

​نظر لها ليث باندهاش:

— نعم؟! أدمر سمعتك؟! والجواز دلوقتي بقا بيدمر السمعة؟!

— لا بس أنا من حقي أحب وأتحب، ولو موضوع جوازي منك ده انتشر ما حدش هيحبني!

— نعم يا اختي؟!

​تدخل زاهر لينهي الحوار بينهم لأنه يعلم أن ابنه سوف يغضب ولا يضمن ماذا سوف يفعل إذا غضب:

— خلاص يا ليث، يا ريت تروح تنهي إجراءات علشان هنخرج النهارده.

— تحدث ليث بعصبية خفيفة: ليه نروح؟! ما تخلي الهانم تفضل هنا كمان شوية يمكن عاجبها المستشفى واللي فيها!

— ردت عليه يقين: والله أنا مش هرد عليك!

— لا يا اختي ردي وعرفيني عاوزه تقولي إيه؟!

​تدخل زاهر سريعا:

— خلاص لو سمحت يا ليث من فضلك، يلا خلينا نخرج وأنتِ يا سجى ساعدي يقين ولبسيها خلينا نمشي.

— حاضر يا بابا.

​خرج ليث منزعجاً وذهب لينهي أمر خروجها من المستشفى، ولكنه كان يريد أن يخنقها بيده، ولكنه سكت وذهب احتراماً لوالده لأجواء المستشفى.

​أما هي فبعد خروجه من الغرفة هو ووالده:

— واحد متعجرف! أنا آسفة يا سجى، بس أخوكِى ده مش عارفة أنتوا مستحملينه إزاي..

— ضحكت سجى عليها وهي ترد: أخص عليكِ يا يقين،ده أبيه ليث قمر وحنين قوي.

— قوي يا اختي!

​ضحكت سجى بمرح:

— طيب يلا لحسن ييجي يموتني أنا وأنتِ دلوقتي.

​وبالفعل بدأت سجى في مساعدة يقين في لبسها، وتم تجهيزها تماماً للخروج. وبعد شوية سمعوا صوت خبط على الباب. نظرت سجى إلى الباب وهي تقول:

— اتفضل.

​دخل زاهر وابنه ليث وهو يسألهم:

— خلاص يا بنات؟!

— أه يا بابا خلاص، بس هي محتاجة مساعدة علشان تقدر تمشي لأنها مش هتعرف تمشي لوحدها بسبب الجبس.

​اقترب ليث بدون كلام ومال نحو يقين التي انزعجت بدورها من قربه الشديد وما كانتش عارفة هو عاوز إيه، بس قطع صوت بالها لما شالها مرة واحدة وبدا يخرج بها من الغرفة، وهي كانت في قمة كسوفها، وخرجت وراهم سجى وزاهر وهما يحملان أشياء يقين.

​خرج ليث بها ووضعها في عربيته، وركب زاهر جنب ليث ليركب بدوره مكان القيادة، وظلوا جميعاً في حالة من السكوت والهدوء حتى وصلوا إلى المنزل ونزلت سجى وزاهر. نظرت يقين إلى سجى وهي تنده عليها:

— استني يا سجى.

​وقفت سجى تنظر لها وهي ترد:

— خير يا يقين؟!

— تعالي ساعديني.

​جاءت سجى لكي تتحدث، ولكن قاطعها صوت ليث:

— اطلعي أنتِ يا سجى.

​انسحبت سجى وهي تكتم ضحكاتها على غضب يقين من حركات ليث. نظرت يقين بغضب إلى ليث وهي تخبره:

— بس أنا عاوزه سجى.

​نظر لها ليث نظرة لم تفهمها أبداً، ولكنها تفاجأت عندما مال عليها وشالها مرة أخرى وصعد بها ودخل بها إلى غرفتها، فوجدت سجى تنتظرها بالغرفة! وعندما وضعها ليث على السرير ذهب بدون كلام...

​عندما خرج ليث، ضحكت سجى بصوت عالي على يقين. اتنرفزت يقين جداً وهي تقول لها:

— ممكن أعرف أنتِ بتضحكي على إيه؟!

— بضحك على شكلك وأنتِ محمرة من الكسوف وكمان وأنتِ عمالة تحاولي تنادي عليا وأبيه ليث مشاني!

— طيب اسكتي بقا علشان والله أنا عاوزه أعيط.

​اقتربت منها سجى وهي تتربت على كتفها قائلة بمرح:

— طب خلاص حقك عليا.

— أخوكِ ده رخم قوي ومتحكم ومتسلط!

— أخص عليكِ، ده أبيه ليث حنين وجميل ورجولة كده.. طب تعرفي لو ما كانش أبيه ليث أخويا أنا كنت اتجوزته!

​نظرت لها يقين باشمئزاز:

— يا سلام! طيب يا اختي ربنا يرزقه بواحدة ولهنا بيه زيك كده يتجوزها.

— لا خلاص، بقى اتجوز وأنا نفسي اللى أتجوّزها دي تفضل مراته معاه ربنا يهدي الحال بينكم.

​تبدلت معالم وجه يقين للجمود والحزن قائلة:

— لو سمحتِى يا سجى الموضوع ده مش عايزة أتكلم فيه خالص ومش عاوزه أفتكره أصلاً.

​اقتربت منها سجى وجلست بجوارها على السرير:

— طيب ليه؟! على فكرة أنا دلوقتي مش بتكلم كأخت لليث.. لا، أنا بتكلم كأخت ليكِى أنتِ وصديقتك ولا أنتِ شايفه حاجة غير كده.

— يا سجى يا حبيبتي، أنتِ أختي وصديقتي وربنا العالم، بس الموضوع ده مش زي ما أنتِ فاهمة خالص.. الموضوع ده مرحلة وهتعدي الجوازة دي أصلاً باطلة ومش كاملة وعند ربنا ده مش جواز!

— ليه بس كده يا...

— يا حبيبتي، الجواز ده شرط القبول والإشهار وموافقة الطرفين، وأنتِ عارفة أن الجوازة دي تمت عكس كده تماماً.. لا أنا عرفته ولا هو عارف، يعني جوازة تمت غصب عن الطرفين ده غير طبعا إن ما فيش إشهار!

​حضنت سجى يدي يقين وهي تقول لها:

— يا حبيبتي، ربنا يصلح لك الحال، والله أنا نفسي تبقي كويسة وتبقي في أحسن حال.

— ابتسمت يقين إلى سجى: ربنا يبارك فيكِ يا حبيبتي، بس سيبك بقى من كل ده وتعالي قوليلي عملتِى إيه مع خالد؟! إيه الجديد؟!

— والله ما فيش جديد، موضوع تعبك ده جاي وقف كل حاجة، حتى أبيه ليث ما اتكلمش أصلاً معايا رغم إن خالد كلمه، بس خالد قالي إنه بعد خروجك من المستشفى هيكلم ليث بعد ما يوصل بالسلامة إن شاء الله.

​سألتها يقين باستغراب:

— يوصل فين؟!

— المفروض أبيه ليث كان يسافر هو وخالد علشان يخلصوا شغل معين في الشركة بتاعتهم هناك، بس ليث بعد تعبك فضل جنبك وخالد سافر لوحده، بس هانت كلها يومين ويرجع.

— ربنا يرجعه بالسلامة يا حبيبتي.. يعني هانت، يعني كلها شوية وقت وهفرح بيكِى قريب إن شاء الله.

— يا رب يا يقين.

​.اما عند صفاء فكانت تجلس مع مجموعه من الرجال هى وابنها رامي الذي ابتدا يتعافي من جروحه، كمان كان في بنات كتير واقفة جنب الرجالة دي وكانوا بيتكلموا عن صفقة كبيرة جداً...

​يتبع...