نيران الغيره

الفصل الثاني عشر:

​اختارت يقين أن تثق بليث وتذهب معه وهي لا تعلم إلى أين هي ذاهبة وماذا سوف يريها، وكانت تدعو ربها أن يمر هذا الموقف بسلام.

​أخذها ليث ودخل بها إلى ممر ضيق، وهناك كانت غرفة مظلمة وبها حائط سري. وبعد فتح هذا الحائط، ظهر ممر طويل ومملوء بالحراس. وقفت لحظات خائفة ومتوترة، ولكنها اختارت أن تمشي بجواره وما زال لسانها يذكر الله، حتى وصلت إلى آخر الممر.

​وقف هو أمامها بنبرة حازمة:

— عاوزك قوية، ما تقلقيش وأوعى تخافي، أنا جمبكِ.

​وبعدها قام بفتح باب الغرفة. استغربت يقين جملته، وما إن فتح الباب حتى وجدت بداخلها شخصاً ملقى على الأرض. وعندما انفتح الباب، رفع ذلك الشخص رأسه، وما إن راها حتى قام يركض ناحيتها!

​ارتعدت أوصال يقين عندما علمت أن هذا الشخص هو "رامي" وعندما رأته، وهو يقترب منها، ولكن قبل أن يصل إليها كان ليث يقق بينهما. صدم رامي بليث، ولكنه لكمه لكمة قوية أسقطته أرضاً. سقط رامي وهو يصرخ باسمها ويطلب منها:

— خليه يخرجني من هنا يا يقين!

​ولكن فاجأته لكمة قوية أخرى من يدي ليث على وجهه وهو يتحدث بغضب جحيمي:

— أنا مش قولتك اسمها ما يجيش على لساعك تاني؟! المرة الجاية هقطعه ومش هتردد ثانية واحدة!

​فزع رامي من نظرات ليث وهز رأسه في خوف. ثم نظر ليث إلى يقين الخائفة والتي بدأت في البكاء من شدة هلعها، فذهب بجوارها وحاول أن يطمئنها:

— اهدي.. أنا جمبكِ. الكلب ده اللي يضايقك وقرب من حاجة مش بتاعته.. كان عاوز ياخد حاجة مش ليه، وأنا أدبته شوية. عاوزك تقوليلي: هل كده كفاية ولا تحبي أعمل إيه تاني؟ خدي حقك منه وأوعى تخافي!

​حاولت يقين التحلي بالقوة وهي تنظر له:

— لا، كفاية لحد كده.. واضح قوي إنه شاف كتير هنا، مع انه لو فضل عمره اللي فاضل كله يتعذب ده مش هيكفي حقي، بس سيب الباقي لربنا وللدنيا.

​أعجب ليث بردها، وهز رأسه إليها وهو يأمر الحراس:

— اتفضلوا خدوه من هنا وارموه بعيد، واتخلصوا من أي حاجة تخصه، وخلوا بالكم.. عايز الكلام ده على نضيف!

— تحت أمرك يا فندم.

​أخذ ليث يقين المصدومة وخرج. وقبل الدخول إلى الفيلا، نظر لها:

— بلاش حد يعرف باللي شفتيه ولا اللي حصل النهارده.

​لم تسأله يقين عن السبب، لكنها هزت رأسها بالموافقة دون تعليق.

​وفي تلك الأثناء، كانت سجى قد أمرت الخدم بتجهيز الغداء ووضعه على طاوله الطعام. وعندما خرجت، وجدت والدها جالساً بمفرده يتصفح الهاتف:

— بتعمل إيه يا بابا؟!

​أغلق زاهر الهاتف ونظر لها وهو يبتسم:

— بيسلي نفسي شوية.. وأنتِ كنتِ بتعملي ايه؟!

— كنت مع يقين بره، وأبيه ليث جاء وقال لي ادخل أطلب من الخدم يجهزوا الغداء، وكمان قال ليقين إنه عاوزها فسبتهم مع بعض شوية.

— فعلاً هو اتصل بي وقال لي أنها معايه، بس يا ترى عاوزها في إيه؟!

— مش عارفة.. بس عارف يا بابا أنا نفسي قوي يقربوا من بعض! نفسي أبيه ليث يحب يقين وهي كمان تحبه.. دي بنوتة جميلة قوي، وأتمنى تفضل مع أبيه طول الوقت، هو يستحق بنت زي دي بجمالها وطبعها تعوضه عن كل اللي حصل زمان.

​تنهد زاهر تنهيدة طويلة:

— يا رب يا سجى، وأنا كمان نفسي قوي.. بس إزاي وهو بيحاول بكل الطرق يفضل بره طول الوقت كأنه بيهرب من وجوده في المكان اللي هي فيه؟

— مش عارفة، أنا هحاول، وحضرتك خليك معي أو نكسب فيه ثواب! -وأكملت بطريقة كوميدية:- اهو من باب نوفق راسين في الحلال!

​ضحك والدها على ضحكتها:

— تمام يا ستي ماشي، وأنا مستني.. وريني شطارتك.

​وفي تلك اللحظة دخلت الخادمة تخبرهم بأنه قد تم تجهيز طاوله الطعام:

— الغداء جاهز يا فندم.

— تمام يلا. وأنتِ اطلعي نادي ليث باشا ويقين هانم من بره وعرفيهم أن الغداء جاهز.

​ولكن في تلك اللحظة تحديدا، دخل ليث ومعه يقين:

— إحنا هنا.

— ابن حلال، يلا علشان الغداء!

​وذهبوا إلى مائدة الطعام، وكانت يقين ما زالت منزعجة من رؤية رامي. اقتربت منها سجى التي شعرت بانزعاجها:

— مالك؟! إيه اللي حصل؟!

​حاولت يقين أن تبقى هادئة ولا تفصح عن الأمر:

— ما فيش، بس كان الاستاد ليث بيقول لي على معلومة تخص الحيوان اللي اسمه رامي.

​استوعبت سجى سبب انزعاجها ولم تعقب، ولكنها أردفت:

— سيبك أنتِ، يلا بقى نقعد نتغدى علشان هموت من الجوع!

— تمام ماشي يلا.

​وجلسوا يتناولون الطعام، وظل ليث يتحدث مع والده عن العمل والكثير من الأحداث في الشركة. وفي تلك الأثناء، دخل عليهم خالد:

— السلام عليكم.. إيه ده أنا شكل حماتي بتحبني!

​حزنت سجى من جملته، وضحك عليه زاهر وهو يرد:

— وعليكم السلام، طيب يلا يا بكاش اقعد اتغدى.

— والله يا عمو أنا واقع من الجوع!

— اقعد واخلص!

​جلس خالد وبدأ في تناول الطعام، وعندما جلس نظر إلى يقين وسجى وسلم عليهم:

— إزيك يا آنسة يقين؟!

​ابتسمت يقين له ابتسامة هادئة وهي ترد:

— بخير والحمد لله، حضرتك عامل إيه؟!

— والله زي ما أنتِ شايفه كده، مسحول مع صاحبنا ده!

​ضحكت يقين ضحفة خفيفة وهي ترد:

— ربنا معاك.

— يا رب يا ستي.

​ثم نظر إلى محبوبة قلبه:

— وأنتِ أخبارك إيه يا سـ...؟

​ردت سجى بخسوف وقد أحمر وجهها من الخجل:

— الحمد لله كويسة.

— يا رب دايماً.

​كان هذا الحوار بأكمله تحت أنظار ليث، الذي أحس بالانزعاج الشديد من كلام خالد مع يقين، وشعر بنار تكاد تحرق الجميع إذا خرجت عندما ضحكت له وابتسمت. فقال حتى يسكت خالد:

— ما تاكل وأنت ساكت، واخلص بقى!

​أحس خالد بانزعاج ليث فابتسم وهو يرد:

— اكلنا أهو.

​وبدأ يأكل، وأثناء تناوله الطعام كان يحاول النظر إلى سجى خلسة، ولكن يقين لاحظت ذلك فاقتربت هي من سجى وهي تقول لها بهمس:

— حبيب القلب هياكلك بعينيه!

​انكسفت سجى بشدة وهي تسألها:

— بجد يا يقين؟!

— والله ده اللي أنا واخدة بالي منه.

— طيب ما أنتِ أبيه ليث عمال يبص عليكِ وشكله كده معجب!

​شرقت يقين وهي تأكل، وضحكت عليها سجى وأعطتها المياه. فنظر لهم زاهر ليطمئن عليها:

— مالك يا يقين؟! أنتِ كويسة؟!

​قالت يقين بكسوف جعلها تبدو أجمل:

— كويسة يا عمو، أنا بس شرقت.

— خلي بالك يا بنتي.

— حاضر.

​فاقتربت منها سجى وهي تهمس لها:

— إيه كل ده عشان قلت لك إن أبيه شكله معجب؟!

— اتلمي هتموتيني! وبعدين يا ساتر يا رب، يا ستي الله الغني!

— ليه؟! ده حتى أبيه وسيم وجميل وكيوت ويتحب!

— يا ستي ما قلتش حاجة، بس بعيد عني!

​كان حديثهم تحت عيون ليث الذي كان يريد أن يفهم ما الحوار بينهم، ولما توترت يقين فجأة وبدأ يظهر عليها الخجل، وظن أن الحوار بينهم يدور حول خالد، كما ظن أن يقين أعجبت بخ خالد! وعند التفكير بهذا الأمر كادت الغيرة تحرق قلبه، فقال والغضب مسيطر عليه:

— وبعدين بقا في المسخرة دي؟! بطلوا كلام وضحك وكملوا أكل!

​سكتت يقين فوراً هي وسجى، وانزعجت يقين من تسلط ذلك المتعجرف، ولكنها فضلت السكوت. وبعد فترة، قامت يقين من على مائدة الطعام، وعندما وقفت نظر لها ليث وهو يسألها بجدية:

— على فين؟!

​تعجبت يقين من سؤاله وأجابت:

— رايحة الأوضة.

​تدخل زاهر وأراد إنهاء الحوار بينهم:

— يعني أنتِ لسه ما خلصتيش أكل يا بنتي، اقعدي كملي أكل.

​ابتسمت يقين ابتسامة بسيطة لزاهر:

— الحمد لله يا عمو أنا شبعت، عن إذنكم.

​اتغاظ ليث من تجاهل يقين له، ولكنه فضل السكوت. قامت سجى بالحديث إلى والدها:

— بابا، بكره إن شاء الله هاغوح أعمل شوبينج.

​في تلك اللحظة، قام ليث من على مائدة الطعام وهو يتمتم:

— الحمد لله.. خالد لما تخلص حصلني على أوضة المكتب.

​نظر له خالد وهو ينهض أيضاً:

— أنا تمام الحمد لله، يلا بينا.

— كمل أكلك يا ابني.

— أنا تمام يا باشا، هشوف البوص عاوز إيه.

​وذهب ليث من أمامهم، فتعجبت سجى وهي تسأل باستغراب:

— هو أبيه ماله؟! حاساه مش مبسوط أو في حاجة مضيقاه؟

​ابتسم لها خالد ابتسامة عذبة وهو يطمئنها:

— هروح أنا أشوف ماله.

تنهد زاهر بألم:

— روح يا ابني ربنا يهديه.

​ذهب خالد خلف ليث، فتنهد زاهر بأسى:

— ربنا يهديك يا ليث.. أنت أكتر واحد تعب قلبي يا ابني.

​اقتربت سجى من والدها وقامت باحتضانه:

— اطمن يا بابا، هو أكيد في شوية شغل وحاجة مضيقاه وأكيد هتتحل إن شاء الله.

​مسح زاهر على رأسها بحنان:

— ربنا يهديه.. المهم قوليلي، بتقول بكره هتعملي شوبينج؟!

— أه، محتاجة أشتري شوية هدوم وفي حاجات كتير عاوزه أجبها.

​ابتسم لها زاهر بود:

— تمام يا حبيبتي، بس ابقي خدي معكِ يقين وخليها تجيب كل اللي محتاجاه، لأنها مستحيل تطلب مني أو من أي حد تاني.

— طبعاً يا بابا.

​ثم احتضنته بفرحة وقبلته على خده، وصعدت إلى أعلى حيث يقين.

​أما عند ليث، فقد دخل له خالد فوجده يجلس ويبدو عليه الانزعاج الشديد:

— مالك يا ابني؟! هو في حاجة مضيقاك؟!

​أجابه ليث بضيق، محاولاً إثبات عكس ذلك:

— من إيه؟!

— أنا عارفك أكتر من نفسك، قول مالك.

— أكيد ما فيش.. المهم، أنت ناوي تعمل ايه؟ هتيجي معي؟

— أه طبعاً، هنسافر سوا، مش هي مجرد تسوية أمور عشان ندمج الشركة اللي هناك مع الشركة اللي هنا؟

— أه، إن شاء الله.. قل لي، جهزت الأوراق المطلوبة؟

— اطمن كله تمام.

— طيب حيث كده بقا، اقصر أنا أجهز نفسي علشان السفر كمان يومين.

​تنهد ليث وهو يعود بظهره إلى الخلف:

— تمام.

​خرج خالد، وظل ليث وحيداً داخل مكتبه تلاحقه ابتسامة يقين لخالد وكلامها مع أخته، كما تذكر تجاهلها لكلامه وسؤاله، فحدث نفسه بغضب شديد:

— وانا مالي تضحك لخالد ولا لغيره؟! أنا ما لي دعوة ولا يخصني! يخصني إيه تعجب بمين أو مين يعجب بيها؟! أنا كل اللي يهمني إنها دلوقتي اسمها مربوط باسمي، وهي لازم تحترم ده طول ما هي على ذمتي ومرتبطة بيا!

​ظل هكذا يخاطب نفسه ويبرر انفعالاته.

​أما يقين، فكانت قاعدت في الغرفة المخصصة لها وهي تمسك صورة بيدها تنظر لها وتبكي:

— وحشتيني قوي يا بابا أنت وماما.. اطمن يا بابا، عمو زاهر طلع حد كويس قوي وحماني من الحيوان اللي اسمه رامي، وأنا دلوقتي في أمان، بس ناقصني وجودك أنت وماما.

​وفي تلك اللحظة دخلت سجى الغرفة بعدما قامت بالدق على بابها قبل الدخول، فقامت يقين بإخفاء صورة والديها محاولة أن تبدو طبيعية وبدأت بمسح دموعها.

​اقتربت منها سجى وهي تسأل بقلق:

— يقين، أنتِ بتعيطي ليه؟! حد ضايقك؟!

— لا يا حبيبتي، أنا بس افتكرت ماما وبابا.

​احتضنت سجى يقين وهي تمسح على ظهرها بحنان:

— ربنا يرحمهم يا حبيبتي، أكيد هم دلوقتي في مكان أحسن وهما شايفينا.. وأكيد مش هيبقوا مبسوطين أبداً وأنتِ حزينة بتعيطي كده.

​تنهدت يقين وهي تبتسم لها بتكلف:

— أكيد.

— المهم بقا، اعملي حسابك إن احنا بكره هنخرج نجيب كل اللي نفسنا فيه!

​أرادت يقين أن تكمل، ولكن قطعتها سجى:

— ما فيش بس، وحياتي عندك وافقي، هنقضي يوم حلو مع بعض.

​لم ترد يقين أن تحزن سجى، فابتسمت لها ابتسامة خفيفة وهي تهز رأسها بالموافقة:

— ماشي.

— طيب إيه رأيك تجي تقعدي معايا في أوضتي نتسلى شوية؟

— معلش يا سجى، أنا محتاجة أفضل لوحدي شوية.

— وحياتي عندك تعالي هنبسط قوي!

— والله أنا مصدعة وحاسة إني محتاجة أنام وأرتاح شوية.

​لم ترد سجى إزعاج يقين، وردت وهي تبتسم لها ابتسامة مشرقة:

— ماشي يا حبيبتي على راحتك، هسيبك أنا بس لو حسيتِ إنك زهقانة تعالي أنا هبقى صاحية.

— حاضر.

​خرجت سجى، ودخلت يقين أخذت شاور وغيرت هدومها وتوضأت وطلعت فرضها، وقعدت تقرأ قرآن وتستغفر وتدعو لأمها وأبيها بالرحمة والمغفرة، وظلت هكذا حتى غفت مكانها.

​أما عند الحرباية "صفاء"، التي كانت منزعجة بسبب اختفاء رامي وتحاول الوصول له بلا جدوى؛ فبينما كانت قاعدة في شقة حسن ويقين، سمعت صوت خبط على الباب. فذهبت إحدى الفتيات التي توجد معها بالمنزل لكي تفتح وهي تصرخ:

— يوه! مين اللي بيخبط كده ملك مسروع يا اللي بتخبط!

​وعندما فتحت، وجدت رامي وهو يقف مترنحاً وعليه آثار تعذيب وكدمات ودماء! فصرخة وهي تنادي على صفاء:

— يا لهوي! الحقي يا أبلتي!

​خرجت صفاء وهي تسأل باستغراب:

— مالك يا بنت في إيه؟!

​وحينما وجدت ابنها بتلك الهيئة، جرت عليه وأمسكت به هي وتلك الفتاة وهي تسأله بوجع:

— مالك يا واد يا رامي؟! مين اللي عمل فيك كده؟! وكنت فين كل ده؟!

— دخليه الأول يا أبلتي، خليه يرتاح.

​وبالفعل أدخلوه إلى الغرفة، وطلبت صفاء من الفتاة الاتصال بالطبيب الخاص بهم لكي يأتي ويداوي ابنها:

— روحي يا بنت اتصلي بسرعة بالدكتور مجدي خليه يجي بسرعة.

— حاضر يا أبلتي.

​وذهبت، ونظرت هي إلى ابنها وهي تسأله بحيرة:

— كنت فين يا رامي كل ده؟! ومين اللي عمل فيك كده؟!

​لم يستطع رامي الرد عليها، فهو بالكاد حاول الوصول إلى المنزل وكان يحاول أن يبقى صامداً، ولكن كفى، فهو غير قادر على أي شيء الآن. فأجاب أمه بصوت ضعيف:

— ياما.. أنا عاوز أستحمى وآكل، أنا جعان قوي يا أما.

— يا حبيبي يا ابني حاضر.. بس هتستحمى إزاي كده ده أنت مش عارف تصلب طولك!

​فأجابها بصوت ضعيف مترجي:

— ساعديني بس أوصل لباب الحمام وحضري لي غيار وبس، أنا هحاول على قد ما أقدر بس أنا لازم أخد دش أنا مش طايق نفسي.

— حاضر يا ابني.

​وبالفعل ساعدته حتى دخل الحمام، وذهبت تجهز له الملابس وهي تخبره:

— أول ما تخرج هطلب من البنات يحضروا أكل لحد ما تخلص يا رامي.

​وعندما خرجت، وجدت ابنتها مها تنظر لها وتسألها باستغراب:

— في إيه يا صفصف؟! دي البنت هدى بتقول إن رامي رجع بس راجع متخرشم على الآخر!

​جلست صفاء وهي تخبط على قدميها بحيرة:

— اه ومش عارفة مين اللي عمل فيه كده ولا حتى عارفة كان فين.. الدكتور بس يجي يطمني عليه وتاكل ويرتاح، وبعدين أنا لازم أعرف هو كان فين ومين اللي عمل فيه كده.

​ردت مها وهي تقلم أظافرها بلا مبالاة:

— زي ما قلت لك، أكيد كان بيرتع في حتة وتلاقي المره دي وقع في سكة حد ما بيرحمش!

— هنشوف.. المهم خلي البنات يجهزوا أكلة كويسة ترم عظم أخوك، بيقول يا ضنايا هيموت من الجوع.

— ماشي في الإنجاز لأني مش فاضية علشان وجع الدماغ بتاعكم ده.

​ذهبت صفاء لغرفة رامي ووجدته يحاول التحامل على الحوائط لكي يسند نفسه حتى يصل إلى السرير بعدما أخذ دشاً سريعاً وبدل ملابسه، فذهبت إليه مسرعة وهي تسنده وتأخذ بيده إلى السرير. وفي هذا الوقت وصل الطبيب الذي أكد لها أنه يعاني من كدمات وآثار ضرب، ولكنه لا يعاني من أي كسور أو أشياء أخرى؛ فليث ورجاله كانوا حريصين على تعذيبه دون حدوث أي خسائر أو عاهات تمنعه من العقاب لاحقاً.

​وبعدما ذهب الطبيب، أحضرت له صفاء الطعام:

— خد بقا يا رامي الأكل علشان تاخد علاجك وتفوق كده لاني عايزة أعرف أنت كنت فين ومين اللي عمل فيك كده.

​ثم نادت بصوت عالٍ:

— بنت يا سمية! أنت يا بنت!

​فجاءت عليها فتاة بملابس فاضحة وهي ترد عليها بمياعة:

— نعم يا أبلتي؟

— تعالي يا بنت أكلي رامي واهتم بيه علشان يقدر يرجع لصعته بسرعة.

​اقتربت سمية وهي تهز رأسها بدلال:

— حاضر يا أبلتي.

(روحي يا شيخة الهي تولعي أنتِ وأبلتك!)

​وفي مديرية الأمن، أبلغ الضابط فهد اللواء مدحت عن رجوع رامي وأبلغه بحالته، ولكنه أمر بمتابعة الأمر بدقة حتى الانتهاء من تلك القضية الكبرى.

​أما ليث، فقد كان قد صعد فوجد يقين تخرج من غرفتها وتتجه إلى غرفة سجى؛ فهي بعدما غفت استيقظت وشعرت بالملل فأرادت أن تذهب إلى سجى وتمكث معها قليلاً. ولكنه أو قفها بصوته الحاد:

— ممكن أعرف رايحة فين؟!

​تعجبت يقين من سؤاله وأجابت بتوتر:

— رايحة لسجى.

— طيب ممكن أسأل سؤال؟!

— خير؟!

— ممكن أعرف أنتو كنتوا بتتكلموا عن إيه أنتِ وسجى واحنا على الأكل؟!

​فردت يقين بصدمة واستغراب:

— نعم؟!

— هو إيه اللي نعم؟! أنا عاوز أعرف أنتم كنتم بتتكلموا وتضحكوا على إيه وقتها!

— وحضرتك ما سالتش سجى ليه؟!

— بس أنا بسالك أنتِ!

— أظن ما فيش بينا اللي يسمح لحضرتك انك تسألني عن حاجة خاصة!

— وايه اللي خاص في ضحككم وكلامكم؟!

​نظرت له يقين بصدمة وتعجب من تسلطه ولم ترد. فأكمل وقد بدأ يظهر على صوته الغضب:

— هو أظن إني بكلمك ولا أنتِ ودانك وجعاكِ؟!

— والله أنا ما عنديش رد، وأظن إني قلت لحضرتك دي حاجة خاصة ومش من حق حضرتك تسأل أو تحاول تستفسر عن حاجة تخصني!

​فغضب ليث وبدأ يقترب منها بعيون مظلمة:

— نعم؟! سمعيني كده قلتِ إيه؟!

​خافت يقين من نظرته وبدأت ترجع إلى الخلف، وعندما وجدته يتقدم نحوها ويقترب منها حتى خبطت في الحائط ولم تجد مفر، وحاصرها هو بوضع يده حولها على الحائط، شعرت يقين بخوف ورعب وبدأت تتجمع الدموع في عيونها، وقالت بصوت مرتعش ومهزوز:

— لو سمحت.. بلاش!

​قالتها وهي تغمض عيونها بفزع ورعب. وعندما وجد ليث الرعب والخوف في وجهها، وكيف أن الدموع تنهمر من عيونها، أغمض عينيه بغضب وابتعد عنها:

— امشي بسرعة!

​وعندما سمعته، جرت يقين سريعاً ودخلت غرفتها وأغلقت الباب على نفسها وبدأت تبكي بشدة. أما هو فدخل غرفته وهو منزعج من نفسه، من فعلك وتقربه منها بتلك الطريقة التي أرعبتها، كما انزعج من مشاعره التي راودته عندما رأى دموعها تنزل على خديها. ولكنه وجد أن الحل الوحيد للتخلص من كل تلك المشاعر هو الخروج والذهاب إلى أحد النوادي الليلية، فخرج من غرفته سريعا متجهاً إلى الخارج وركب سيارته وذهب بعيداً.

​أما هي فبكت قليلاً، ثم دخلت وتوضأت وصلت وظلت تقرأ قرآن حتى تهدئ من نفسها وتطمئن روحها. أما هو فظل بالخارج، وبعد فترة ليست قصيرة جاء إلى منزله ودخل غرفته وأخذ حماماً دافئا حتى يستطيع النوم.

​انتهى اليوم على أبطالنا، وبدأت خيوط أشعة الشمس تظهر، وبدأ يوم جديد بأحداث جديدة.

​استيقظت سجى من النوم على صوت تليفونها الذي كان يدق، وعندما فتحت الخط بدون النظر على من يتصل بها، ردت بصوت ناعس كله نوم:

— ألو.. مين معايا؟!

​صمت الطرف الثاني.. وكان خالد الذي قرر الاتصال بها ومعرفة شعورها نحوه لأنه أصبح يشعر بالرغبة الشديدة في التقرب منها، ولكن عندما سمع صوتها النائم سرح به. فعادت هي الرد مرة أخرى وعندما لم تجد رد، امسكت بالهاتف تنظر إلى شاشة التليفون لتجد اسم "خالد" على الشاشة!

​دق قلبها بسرعة وقامت مسرعة وهي تعدل جلستها وتعيذ الرد بصوت أكثر نعومة:

— أبيه خالد.. أنت سامعني؟!

​أدرك خالد نفسه فرد سريعاً:

— هو أنا صحيتك من النوم؟!

— الصراحة أه.

— طب أنا آسف، كملي نوم وابقي رني عليا لما تصحي.

— لا.. لا خلاص، أنا مش هنام تاني.

— طيب، أنا كنت عاوز أتكلم معك في موضوع كده.. بس أنا عاوزك دلوقتي تقومي تفطري وتفوقي كده وبعدين كلميني.

— حاضر.

— سلام.

​أغلق الهاتف معها وهو يبتسم، أما هي فحضنت هاتفها وظلت تقفز على السرير من فرحتها لسماع صوته عند استيقاظها. فقامت ودخلت إلى الحمام الخاص بها وأخذت شاور سريع وبدلت ملابسها ووضعت بعض لمسات المكياج لكي تبدو أكثر جمالاً، وخرجت من غرفتها وذهبت إلى غرفة يقين التي استيقظت بدورها منذ فترة وأبدلت ملابسها، وهي الآن تجلس تقرأ رواية جميلة فهي تحب قراءة الروايات جداً، ولكنها لا تؤمن بها وتعتبرها مجرد شيء خيالي لا شان له بالواقع.

​دقت سجى باب غرفة يقين:

— اتفضل.

​دخلت سجى وهي تبتسم بسعادة:

— صباح الورد يا يقين.

— صباح الرضا يا سجى.. بس قوليلي، شكلك مبسوطة، في إيه؟!

​ردت سجى وهي تجلس على السرير بسعادة جمة:

— جداً!

— طيب ما تفرحيني معاكي.

— خالد كلمني النهارده الصبح، وهو اللي صحاني من النوم!

​اعتدلت يقين في جلستها وهي تسأل:

— هاه.. وقال لك إيه؟!

— ولا حاجة، سألني لسه صاحية قلت أه، قال لي طيب فوقي وافطري وكلميني.. يا ترى يا يقين عاوزني في إيه؟!

— مش عارفة، بس كلميه وأنتِ تعرفي.

— أنا هاكلمه دلوقتي مش هستنى لما أفطر.

— تمام.

​أخرجت سجى هاتفها وضغطت على زر الاتصال لمكالمة خالد، وبدأت تتوتر عند سماع صوت رنين الهاتف. لحظات وأجاب خالد عليها بصوته العذب:

— ألو.

فردت بخجل وكسوف واضح:

— ألو.. إزيك يا خالد؟!

— كويسة الحمد لله.

​تابع خالد بتوتر:

— سجى، أنا كنت عاوز أكلمك في موضوع مهم، بس مش عاوز في التليفون.. أنا لازم أكلمك وأنتِ قدامي.

— موضوع إيه؟!

— لما أشوفك هتعرفي.

— طيب تمام، أنا في البيت تقدر تجي.

— لا، بلاش البيت.. أنا عاوز أقابلك بره.

​في تلك الأثناء قامت يقين ودخلت الحمام وتركت سجى بمفردها، فردت سجى على خالد:

— خلاص، أنا خارجه كمان شوية مع يقين رايحين المول، ممكن نتقابل هناك.

​فأجابها خالد بفرحة واضحة:

— تمام، هكون هناك وأكلمك.. بس ممكن بلاش ليث يعرف عن مقابلتي ليكِ دلوقتي، لاني عاوز أنا اللي أعرفه بنفسي.

— ردت سجى باستغراب: تمام ماشي.

​وأنهوا المكالمة وأغلق شاشة الهاتف وهو يضمه إلى حضنه وبتسم. وعندما خرجت يقين ووجدت على هذا الحال، جلست بجوارها وهي تقول بطريقة كوميدية ومسرحية:

— أوعدنا يا رب! هاه.. قال لك إيه؟!

— طلب يقابلني علشان يكلمني في الموضوع اللي هو عاوزني فيه، فقلت له خلاص نتقابل في المول.

— وليه ما يتكلمش معاكي هنا في البيت؟!

— لما قلت له قال لي لا، عاوز أبقى بره علشان يعرف يكلمني.

​تعجبت يقين وهي تضم حاجبيها باستغراب:

— أجمعنا؟!

— مش عارفة، بس باين إنه مش عايز أبيه ليث يعرف، لأنه قال لي بلاش تقوليله، وأنه هو اللي هعرفه بس بعد ما يقابلني.

— الصراحة مش عارفة.

— تفتكري عاوزني في إيه؟!

— باين قوي إنه عاوز يكلمك في شيء خاص.. أكيد هيعترف بحبه ليكِ يا جميل.

​انكسفت سجى وأحمر وجهها خجلاً:

— تفتكري يا يقين؟!

— قالت يقين وهي تضع يديها وتضغط عليهم وتعود إلى الخلف: أعتقد كده.

​فقامت سجى مسرعة:

— طيب يلا قومي بسرعة علشان نفطر ونخرج، علشان نروح المول نشتري اللبس اللي عاوزينه وكمان أقابل خالد عشان مش عاوزه أتاخر عليه.

— بلاش أنا، أنا مش عايزة أروح، روحي أنتِ.

​جلست سجى بجوارها وهي تمسك يدها وتדعي الزعل:

— كده أخص عليكِ يا يقين! بقا عاوزه تسيبيني لوحدي؟! علشان خاطري قومي علشان ننزل ونخرج سوا وتبقي معايا، مش هقدر أقابل خالد لوحدي أبدا.

— يا ستي أنا مش عاوزه أبقى عازول، هتبقى بايخة قوي إن أعد معاكم!

— يا ستي ابقي قعدي بعيد، أنا بس ما أعرف هو عاوزني ليه وارجع لك، بس يا رب ينطق بقا علشان أنا خلاص تعبت!

— اطمني إن شاء الله.. طيب علشان خاطرك بس، يلا بينا.

​قامت سجى وهي مبسوطة وقبلت يقين في خدها بمرح.ابتسمت يقين لها:

— طيب انزلي أنتِ وأنا هحصلك، هغير هدومي بس.

— اوكي.

​ونزلت سجى، وكان ليث في هذا التوقيت قد نزل وذهب إلى عمله حتى لا يلتقي مع يقين، فهو لا يريد أن يلتقي بها بعد ما حدث معها ليلة أمس. وعندما نزلت يقين لتناول وجبة الفطار لم يكن موجوداً، فحمدت ربها لعدم رؤيتها له.

​وعندما نزلت وجدت زاهر وسجى يجلسان معاً:

— السلام عليكم.

​نظر عليها زاهر بابتسامة مشرقة:

— وعليكم السلام ورحمة الله وبركاته، إزيك يا بنتي عاملة إيه؟!

​ابتسمت يقين ابتسامة هادئة:

— بخير والحمد لله.

— يا رب الحمد لله.. طيب يلا قعدي افطري علشان تروحي مع سجى، وعايزك كمان تجيب كل شيء ناقصك.

​ابتسمت يقين بوجع على حالها:

— بس أنا مش محاجة حاجة، والحمد لله مش ناقصني أي حاجة.. ربنا يخليك يا عمو، أنا متشكرة، ولما أحتاج حاجة هبقى أقول لحضرتك.

​— يقين، أنا مش عايزك تحسي نفسك غريبة، وأنا مش هضغط عليكِ ولا هجبرك على حاجة، عاوزك تبقي على راحتك خالص وتبقي مرتاحة ومبسوطة.

​ابتسمت بوجع وهزت رأسها دون كلام، وبدأت في تناول الفطار هي وسجى. قامت سجى بعد لحظات بحماس:

— أنا خلصت الحمد لله وجاهزة!

​ابتسمت لها يقين وهي تمسح يدها وفمها:

— وأنا كمان خلصت، يلا بينا.

هتفت سجى وهي تأخذ شنطتها وأشياءها الخاصة:

— يلا علشان يومنا طويل قوي ومليان حاجات كتير.

— تمام.

​ابتسم زاهر على فرحة ابنته وعلى اقترابها من يقين وتعاملهم معاً بهذه التقارب:

— روحي يلا وخلوا بالكم من نفسكم ومن بعض.

ردت سجى:

— تمام، السواق هيودينا لحد ما يرجع معاكم.

​كانت يقين حينها ترتدي فستاناً أسود من الدانتيل القوي وبه العديد من الورود السوداء، وكان واسعاً ومحتشماً، وارتدت عليه حجاباً أسود اللون وكوتشي أبيض وشنطة سوداء.

​خرجوا معاً وركبوا السيارة. أرادت سجى الاتصال بخالد لكي تخبره بخروجها وتوجهها إلى المول حتى يستعد لرؤيتها.

​فكان خالد ما زال في منزله، وكان ليث في الشركة. دخل السكرتير الخاص ومعه عدة أوراق يراجعها ليث، وعندما انتهى من المراجعة سأله مستفسراً:

— مستر خالد لسه ما جاش؟!

رد السكرتير بعملية واضحة:

— لسه يا فندم، مستر خالد مش بيجي دلوقتي.

— طيب تمام، إيه المواعيد النهارده؟!

— في ميعاد مع شركة المنياوي بعد ثلاث ساعات بس يا فندم، وما فيش أي مواعيد تاني.

— طيب تمام، تقدر تروح تجهز ميزانية المشروع وتجهب أوراق الشركة المطلوبة.

— تحت أمرك يا فندم.

​قالتها بعملية وذهبت. وعندما خرجت، أخرج ليث هاتفه وطلب خالد الذي أجاب على الفور:

— صباح الخير يا بوص.

— صباح الخير، أنت فين؟!

— أنا لسه في البيت، في حاجة ولا إيه؟!

— هتتاخر؟!

​تعجب خالد:

— يعني ساعة كده، ورايا مشوار مهم.

— مشوار إيه ده؟!

— لما أجي هعرفك هو إيه.

— طيب تمام، عندنا اجتماع كمان ثلاث ساعات.

— عارف، هاجي قبل الميعاد إن شاء الله.

— طيب تمام.

​وأغلق الخط. تعجب خالد طريقته ولكنه لم يفكر وذهب. أما ليث فسرح فيما حدث بينه وبين يقين وقربه منها وشعوره بها، فشعر بشيء غريب، ولكنه نفض أفكاره بسرعة وهو يعتدل ويتمتم:

— سيبك منها، أنت عاوز منها إيه؟!

​أما خالد بعد ما أغلق مع ليث، وجد سجى تتصل به فابتسم وهو يعلق:

— هي متفقة مع أخوها دي ولا إلة؟! ربنا يستر، العيلة دي شكلها ناويه تجيب أجري.. هي بحبها وأخوها بشغله وعقليته!

​وأجاب عليها فوراً:

— أيوه يا سجى.

— ألو، إحنا خرجنا وشوية وهنبقى في المول.

​وقف خالد وهو يأخذ مفاتيح سيارته ويخرج:

— تمام، ربع ساعة وهقابلك في الكافيه اللي هناك.

— طيب تمام.

​كانت يقين تنظر إلى الطريق من السيارة، فهي تحب الطريق وتفضل السكوت ومشاهدته دون أي انشغال. وعندما وصلوا إلى المول دخلوا، وفي هذا التوقيت وصل خالد أيضا واتصل على سجى التي دخلت بدورها إلى الكافيه ووجدت خالد بانتظارها. وعندما راها قام وذهب لها وهو يبتسم لها ابتسامة واسعة:

— حمد لله على السلامة.

ابتسمت له بكسوف:

— الله يسلمك.

​ثم نظر إلى يقين التي تقف متوترة:

— منورة يا آنسة يقين.

ابتسمت له بتكلف:

— شكرا لحضرتك، أنا هنتظرك هناك -وكانت تشاور على مكان به منظر أكثر من رائع- بس يا ريت بسرعة.

​فأجابها خالد وهو يطمئنها:

— اطمني، مش هأخد سجى منك كتير علشان ما تزهقيش.

ابتسمت له بود:

— براحتكم.

​وذهبت لكي تجلس بمفردها، وأخرجت من شنطتها روايتها المفضلة. وجلست سجى مع خالد.

​أما ليث، فكان في مكتبه يعمل على بعض الأوراق، واتصل به والده فأجاب على الفور:

— ألو، أيوه يا بابا.

— أيوه يا ليث، بقول لك كان في عميل واخد مني معاد كمان نص ساعة، بس أنا بصراحة مش قادر اطلع أقايله، يا ريت لو فاضي تقابله أنت.

​نظر ليث في ساعته وهو يرد:

— فين المكان وإيه تفاصيل المقابلة؟!

​شرح له والده كل التفاصيل بدقة:

— تمام يا بابا، أنا هروح أقابله.

— ماشي يا ليث، وطمني لو سمحت.

— حاضر.

​وأغلق الخط مع والده، وقام وأخذ جاكيته ومفاتيح سيارته وخرج وهو يخبر السكرتير بأنه ذاهب لعمل لمدة ساعة وسوف يصل قبل موعد الاجتماع.

​أما عند خالد، فكان يجلس أمام سجى ينظر لها برقة وهي تجلس أمامه وتخجل وتتكسر وتتوتر. أراد هو أن يكسر هذا التوتر فسألها:

— تشربي ايه؟! وكمان آنسة يقين تحب تشرب إيه تعرفي؟!

— آيس كوفي، أنا وهي كمان.

​ابتسم له خالد وهو ينادي النادل ويطلب منه تحضير الطلبات، كما طلب منه وضع طلب يقين في مكانها الذي تجلس فيه. ثم تابع وهو ينظر لسجى برجاء وتوتر خفيف:

— سجى.. أنتِ في حد في حياتك يعني معجبة بحد؟!

​ردت هي بكسوف:

— يعني...

رد خالد وقد تملكه القلق:

— يعني في؟!

— أه.

​انزعج خالد ظناً منه أن هناك أحد غيره:

— حد أعرفه؟!

— شوية.

تعجب خالد:

— مين هو؟!

— حد قريب قوي من أبيه ليث!

​ثم تابعت بابتسامة مشرقة:

— بس ممكن أعرف بتسأل ليه؟!

​سكت خالد لثوانٍ يفكر من هو ذلك القريب من ليث وهو يعرفه وهي تحبه! فسأله بتعجب:

— اسمه إيه؟!

​فسألت هي وهي تنظر له بترقب:

— ممكن أسأل سؤال؟ أنت بتحب حد؟!

فأجاب بهيام:

— أه، بس للأسف شكلها كده بتحب حد تاني.. شكل حظي وحش!

— طب اسمها ايه؟!

— مش ضروري بقى.

— طيب أعرفها؟!

— عز المعرفة!

​ربطت سجى سؤاله وكلامه ببعض، وأحسنت أنه يقصدها بكلامه واستشعرت حزنه فابتسمت بخجل وهي ترد:

— اسم حبيبي خالد!

​أجابه خالد وهو يتعجب وقد عجز عن المعرفة:

— أنا أعرف حد اسمه خالد؟! مين ده؟!

​ضحكت سجى عليه وهي تنظر له بحب وعشق واضح. أدرك خالد أخيراً كلامها وبدأ يظهر على وجهه الفرح والإشراق وهو يسألها:

— بجد حبيبك اسمه خالد؟! طيب يا ستي وأنا حبيبتي اسمها سجى!

​أحمر وجه سجى خجلاً من كلامه. وعندما راها وراء خجلها، نظر إلى أعلى وهو يقول:

— يا سيدنا محمد.. طيب خلاص بصي، أنا هروح أكلم أخوكِ علشان عمال بقلب نفسي إني قابلتك من وراه وهطلبك رسمي من عمي.. أنا حبيت بس أعرف رأيك عشان ما أعملش حاجة من غير رضاكِ.. قولي رأيك إيه، تقبلي تكوني مراتي وأم لولادي؟!

​اتكسفت سجى جداً وحمرت خجلاً ولم ترد.

— لا، بقول لك إيه، بلاش لاحسن أخدك دلوقتي حالا وأتزوجك من وراهم وبعدين بقى بقول لأخوك وأبوكِ!

​ضحكت سجى بمرح، فنظر في عينيها وأمسك يدها:

— قولي بجد إيه رأيك؟!

ردت سجى بكسوف:

— موافقة!

​وقف خالد بفرحة شديدة:

— طيب بصي بقى، خلاص خلصي الكوفي بتاعك ده علشان تروحي ليقين علشان ما تزهقش، كفاية زهق أخوكِ عليها!

​هزت شجى رأسها وهي غير قادرة على الكلام، فرحتها جعلتها تنسى كل الكلام.

​وفي تلك اللحظة، وصل لنفس الكافيه الموجود فيه يقين، وجلس مع العميل. وكانت هي سرحانة، وجاء أحد الشباب الذي ذهب إليها عندما وجدها تجلس وحيدة وبدأ يرخم عليها، وهي اتضايقت جداً.

​وكان خالد وسجى قاعدين بعيد عنها، لكن ليث كان قريباً منها، وعندما علا صوتها نظر باتجاه الصوت، وجدها وهي تحاول الابتعاد من وجه ذلك الشاب اللعين الذي يحاول مضايقتها.

​اقترب ليث من الحديث مع العميل سريعاً وذهب إليها ووقف أمام ذلك الشاب، وهو ينظر له بشر وشراسة:

— في حاجة يا باشا؟!

​نظر له الشاب باستخفاف:

— وأنت مالك؟!

— يعني شايفك بتضايقها!

​انتبهت يقين من وجود ليث، وأحست بالخوف من أن يرى سجى وخالد ويفهم خطأ ويبدأ يضايق سجى. فرد الشاب على ليث بوقاحة:

— وأنت مالك بيها؟! تكونش حامي الحما بتاعها؟!

​ضربه ليث لكمة قوية على وجهه وهو يرد:

— أيوة يا روح أمك، أنا حامي الحما!

​فسقط الشاب، وسحب هو يدها وجرها خلفه ويخرج بها. وكل هذه الضوضاء لفتت انتباه خالد وسجى اللذين رأيا ليث وهو يمسك بيدي يقين ويجرها خلفه ويخرج بها.

​وقفت سجى بصدمة وهي تضع يدها على فمها:

— يا نهار أبيض! ده أبيه ليث!

— تعالي نشوف في إيه.

​وأخذها وذهبوا. وقف ليث عندما حاولت يقين سحب يدها من يده وهي تقول برجاء:

— لو سمحت سيب إيدي!

​نظر لها ولم يرد، ولكنها أصرت:

— بقول لك سيب إيدي!

​فوقف وكان في قمة غضبه وسألها:

— ممكن أعرف أنتِ هنا بتعملي إيه؟! وليه ما عنديش خبر بخروجك؟!

​غضبت يقين من أسلوبه المتسلط وردت:

— أنا هنا ده شيء ما يخص حضرتك، معلش! تعرف ليه بخروجي؟! كنت أبويا ولا أخويا ولا يمكن تكون جوزي وأنا ما أعرفش؟!

​كاد ليث أن يفقد أعصابه لولا تدخل خالد وسجى في تلك اللحظة.

​يتبع