الفصل الرابع عشر

في اليوم التالي، كان هو الموعد المنتظر لفك الجبيرة الطبية. اصطحبها إسلام إلى العيادة، لكنها هلت عليه بوجه شاحب كأوراق الخريف، وعيون منتفخة وحمراء بشكل ملحوظ من أثر البكاء الطويل والسهر طوال الليل؛ زادها حزنها هماً فوق همه، وشعر بألم في قلبه يعادل ألمها

بعد أن انتهى الطبيب من فك الجبس، تنفست ياسمين بعمق، ونظرت إلى إسلام بنظرة ممتنة وقالت بنبرة خجولة: "أنا متشكرة ليك أوي يا دكتور إسلام.. بجد مش عارفة أقولك إيه، كنت معايا طول الفترة اللي فاتت وبتوصلني وتعطل نفسك عن مستشفاك وتعبتك معايا جداً.. بس خلاص، الحمد لله الجبس اتفك، ودلوقتي تقدر ترجع لحياتك الطبيعية ومواعيدك وشغلك من غير تعطيل".

ابتسم إسلام بمرح يحاول به تخفيف الأجواء المشحونة وقال: "أولاً مفيش تعب ولا حاجة يا ستي، دا كان أسعد وقت في يومي.. ثانياً، لسه في جلسات علاج طبيعي وتمارين تأهيلية وقصة تانية، يعني الموضوع لسه مخلصش ووراكي وراكي.. إلا إذا كنتِ أنتِ زهقتِ مني بقى وعاوزة تتخلصي مني؟!".

ابتسمت بخفة وخجل وقالت: "لا طبعاً مقصدش خالص.. بس قصدي يعني...".

قاطعها إسلام بمرونة وإصرار: "لا قصدي ولا مقصديش! أنا عازمك على الغداء النهاردة في مطعم هادي بمناسبة فك الجبس، ومفيش أي مجال للاعراض أو الرفض، أنا واخد نص يوم إجازة مخصوص عشان المناسبة دي".

ترددت قليلاً ثم قالت: "خلاص.. هستأذن من ماما الأول".

قال إسلام براحة: "ماشي، كلميها".

هاتفت ياسمين والدتها، وشرحت لها الأمر، فوافقت الأم على الفور؛ لعل هذه الخروجة تروح عن نفس ابنتها وتخفف عنها ذلك العبء النفسي الثقيل الذي عانته طيلة الليلة الماضية في بكائها الصامت.

وصلا إلى مطعم هادئ يطل على النيل، جلسا في ركن منعزل، وطلبا الطعام. ساد الصمت لبرهة، فنظر إليها إسلام باهتمام وقال سابراً غور مشاعرها: "كويسة دلوقتي يا ياسمين؟".

فهمت ياسمين المغزى من سؤاله وعلمت أنه يقصد جرحها النفسي وما حدث بالأمس، لكنها فضلت تغيير مجرى الحديث هرباً من المواجهة، فقالت بجمود مصطنع: "آه الحمد لله.. الدكتور بيقول اسبوعين كمان مع العلاج الطبيعي والرجل هتبقى أحسن بكتير والمشي هيرجع طبيعي".

وضع إسلام يديه على الطاولة واقترب بجسده قليلاً قائلاً بنبرة صادقة وعميقة: "ياسمين.. أنتِ فاهمة قصدي كويس ومش قصد التطور العضوي.. اعتبريني صديق مخلص ليكي، أو أخ، أو أي مسمى يريحك ويخليكي مطمنة.. اتكلمي براحتك يا ياسمين، قولي أي حاجة وجواكي، المهم تخرجي المكتوم دا كله ومتكتميش في قلبك أكتر من كدا.. وكوني واثقة ومطمنة إن مفيش كلمة واحدة هتخرج بره القعدة دي".

نظرت له ياسمين بتمعن طويل، وكأنها تقرأ الصدق في عيونه، ثم تنهدت تنهيدة حارقة خرجت من أعماق روحها المنهكة وقالت بنبرة شجية:

"كنا تلاتة.. من صغرنا مع بعض مش بنفارق بعض أبداً. كان عادي جداً أنام عندهم في البيت باليومين، أو تلاقيهم عندي في بيتنا نص الليل بنضحك ونذاكر.. كنا جيران، وفي نفس السن، أحلامنا واحدة، ذكرياتنا وتفاصيلنا كل حاجة كنا بنشاركها مع بعض كأننا روح واحدة في تلات أجساد.. وفجأة، في لحظة واحدة، حصلت الحادثة المشؤومة! نهلة ماتت وراحت، ونهاد مستحملتش تعيش ثانية واحدة من غير توأمها.. حاولت تنتحر أكتر من مرة، وقالت لي وهي بتبكي 'أنا مش قادرة.. كل الشوارع والوشوش في مصر بتفكرني بيها'.. أهلها خافوا عليها، فقرروا يعزلوا ويسافروا بره البلد خالص، ومن ساعتها مشوفتهاش.. الدكاترة النفسيين قالوا لأهلها لازم تبعد عن أي حاجة أو أي شخص يفكرها بأختها.. ومن ضمن الحاجات والأشخاص دي.. أنا! لإن شكلي ورجلي بيفكروها بالحادثة ويوم الموت. لقيت نفسي فجأة لوحدي.. لوحدي خالص يا إسلام، مش عارفة ولا قادرة أصاحب حد تاني، كل حاجة حواليا اتغيرت، حتى أحلامي البسيطة انكسرت".

توقفت لتلتقط أنفاسها المخنوقة بالدموع، ثم تابعت بمرارة تفوق الوصف:

"العيلة اللي كانت بتفتخر بيا وبشطارتي زمان، بقوا شايفيني بعد الحادثة مجرد حمل تقيل وعالة محدش ممكن يتقبله أو يرضى بيه.. حتى عمي، اللي كان مصدعنا زمان وجاي رايح يقول 'ياسمين دي عروسة ابني ومفيش غيرها'.. بعد الحادثة بكام شهر، مراته جت بيتنا وبكل قسوة قالت لماما في وشها 'بنتك مش هتنفع للجواز وهي بالحالة دي.. دي عايزة اللي يخدمها مش اللي تتجوز وتشيل بيت!'.. وبقوا ييجوا يقولوا لبابا 'ربنا يكون في عونك على شيلتها'، ويقولوا لماما 'دا ابتلاء واصبري عليه'.. والولد اللي كان معجب بيا في المنطقة وبيبعت لي مع طوب الأرض عشان أكلمه، مفكرش حتى يسأل عليا من بعيد بعد ما رجعت من المستشفى.. كنت زمان بطلع الأولى دايماً ودا مخلي الكام بنت في المدرسة عاوزين يصاحبوني لمصلحتهم، فجأة بقوا يتجاهلوني.. واللي يجي يزورني، يجي بس عشان يسمعني كلمتين شفقة وصعبانيات كأني مت.. بقوا شايفيني إنسانة ناقصة، مع إني والله هي هي نفس البني آدمة بنفس عقلي وطموحي، بس هما حكموا على شكلي!".

امتدت يدها ترتجف وهي تمسح دمعة سقطت عنوة، وأكملت بصوت يرتجف قهرًا:

"والراجل الغني اللي ابنه طيشه ورعونته تسببوا في الحادثة دي كلها.. طلع ابنه زي الشعرة من العجين بالواسطة والفلوس والنفوذ، وجه بيتنا بكل جبروت يرمي لنا قرشين في وشنا وقال لبابا 'هاتوا لها كرسي بعجل متطور وهعمل لها مرتب شهري ثابت كتعويض.. بس ابن الكبار ميجيش سيرته في محضر ولا قسم!'.. تعويض؟! تعويض عن إيه بالظبط؟! عن رجلي اللي اتقطعت وبقت عاجزة؟ ولا عن صاحبة عمري اللي ماتت واندفنت تحت التراب؟! تخيل يا إسلام.. وفوق كل ده، هدد بابا بكل عين قوية وهو خارج وقال له 'خلي بالك على رجل بنتك التانية بقا عشان تعيش!'..".

سكتت ياسمين، واعتصرت منديلها بقوة والإحباط يملأ ملامحها، وعقبت بضحكة ساخرة باكية: "كنت فاكرة لما أدخل كلية كويسة ومحترمة زي سياسة واقتصاد، مش هقابل الشخصيات المريضة دي تاني وهعيش في مجتمع راقي.. طلعت الكلية نفسها منبع الأذى والقسوة! مع إننا بندرس فيها الدبلوماسية، والسياسة، وفن التعامل الإنساني.. والطلبة اللي فيها مش عارفين يعاملوا بعض بأبسط قواعد الاحترام وتقبل الاختلافات البشرية!".

تابعت ياسمين حديثها بصوت متهدج، تتقاطع فيه نبرات القهر والعناد، ونظرت إلى الفراغ قائلة: "أنا بني آدم.. عندي أحاسيس ومشاعر مفقدهمش مع رجلي اللي راحت! مش كل الهزار في الدنيا لطيف ومقبول، ومينفعش أبداً ندوس على جرح اللي قدامنا بكل قسوة ونرجع نقول ببرود 'أصل أنا بهزر.. أصل أنا نيتي صافية وقلبي أبيض'! الهزار اللي بيكسر القلوب ويجرح الكرامة ميبقاش هزار، ده بيبقى قلة أدب ونقص".

ضحكت فجأة ضحكة مريرة انكسر لها قلب إسلام، وأكملت وعيناها تفيضان بالشجن: "أنا حتى فقدت ثقتي في نفسي تماماً يا إسلام.. وبقيت على يقين إني عمري ما في حد هيحبني بجد، ولا في حد ممكن يشوفني في يوم من الأيام بني آدمة كاملة أو كافية ليه.. أنا نفسي لما ببص في المراية بقيت بشوف نفسي ناقصة ومشوهة، فإزاي هطلب من حد غريب إنه يشوفني كاملة؟! من وقت الحادثة المشؤومة دي وأنا بحاول بكل ما أوتيت من قوة إني أرمّم ثقتي بنفسي وبكوامني، بس للأسف، في كل مرة ببدأ أقف فيها على رجلي، بيجي حد يهد كل اللي بنيته ويضيع مجهودي في لحظة!".