4 / اول غياب

نده عليها:

«نور… ممكن أوصلك؟»

مترددتش، وردّت بسرعة وهي مبتسمة:

«ياريت.»

الطريق كان هادي زيادة عن اللزوم، والزحمة قليل فيها. الهواء بارد شوية، لكن وجوده جنبها خلى قلبها دافئ.

نور ماشية جنبه، خطواتهم على الرصيف واحدة… بس أفكارهم كانت مشتتة في كل حاجة غير المشي.

كان عايز يقول حاجة، حاسسها واقفة على طرف لسانه، بس خايف لو نطقها تبوّظ اللحظة.

بصلها من غير ما تلف وشها، كأنها حاسة بنظرته. كل ثانية كانت بتزيد توترها، وكل حركة من جسمه كانت بتخلي قلبها يدق أسرع.

وبعد سكوت طويل قالت فجأة:

«من سنتين!»

وقف مكانه، متحركش.

فضل يبص عليها وهو مخضوض ومصدوم.

«سنتين؟ سنتين يا نور؟» همس لنفسه، كأنه مش مصدق.

كانت مكملة مشي، وكأنه كل كلمة قالتها كانت نار بتيجي على قلبه. مدّ إيده بسرعة ومسكها من دراعها بحنية، وصوته مخضوض:

«إزاي؟ إزاي مخدتش بالي؟ إزاي كل ده وأنا مش جنبك؟ إزاي كل الوقت ده وإنتِ بتزعلي وتفرحي وأنا مش معاكي؟»

رفعت إيدها ولمست شفايفه، عشان توقفه عن الكلام المتسارع.

«إنت ليه شايل نفسك ذنب كل إحساس أنا اللي كنت بحسه؟ مش معنى إن ده حصل من غير ما تاخد بالك تبقى غلطان في حقي. الموضوع كله مش بإيد حد.»

عمر كان واقف ساكت، بيبص لها وهو منبهر… بيتأملها كأنه أول مرة يشوفها.

ابتسمت وقالت له بخفة:

«بتبصلي كده ليه؟»

قرب منها خطوة، وعنيه مبتسمة:

«إنتِ حلوة قوي.»

رجعت خطوة ولفّت وشها، مكسوفة وبتضحك:

«طيب مش هنمشي بقى كده؟ هنتأخر.»

ضحك وقال:

«يلا بينا.»

وصلها عند بيتها، وعند الباب قال لها:

«خلي بالك من نفسك…»

وعنيه كانت بتقول: خليكي معايا شوية كمان.

ابتسمت واتنهدت:

«حاضر.»

مشيت خطوة، فسمع صوتها الحنين بينادي عليه:

«عمر!»

بصلها بلهفة:

«نعم؟»

«هستناك… متتأخرش عليا.»

نظرته ليها كانت بتحضنها، وكل جزء في جسمه بيتمنى يبقى جنبها أطول. قرب خطوتين، بس هي كف إيدها لمست صدره وهي بتضحك:

«امشي بقى، أنا اتأخرت.»

ضحك، وهي زقّته بخفة، وطلعت تجري على بيتها، لكن كل خطوة كانت كأنها بتخطف جزء من قلبه.

فات ثلاثة أيام من سفر عمر، وكأن الحياة مفيهاش أي روح لنور. طول الوقت كانت ساكتة وسرحانة، حابة تكون لوحدها، يمكن لو نامت تحلم بية وتشوفه، حتى لو في أحلامها كانت بتحلم حوليها طول الوقت. حتى في الجامعة، لما حد كان بينادي باسم عمر، كانت تدور بلهفة، برغم إنها متأكدة إنه مش موجود.

قبل ما تنام، وهي حضنة مخدتها وبتفكر، سمعت صوت رنة تليفونها اللي مكنش بيسيب إيديها. بصت عليه بسرعة:

«عمر…!!»

أول ما شافت اسمه على شاشة التليفون، قلبها بدأ يدق بسرعة ماكنتش عارفة تاخد نفسها. ردت بسرعة:

«عمر!»

صوتها الملهوف وصل لعمر بكل إحساسه:

«نور… أنا بحاول من ساعة ما جيت أطمن عليكي، بس الشبكة ضعيفة جدًا… طمنيني إنكِ كويسة؟»

نور من كتر فرحتها، ضحكت ضحكتها اللي منورة وشها، ومن كتر ما هي متحمسة لسماع صوته، بدأت تتلخبط في الكلام:

«أنا… أنا… أنا تمام، أنا تمام… سيبك مني… طمّني عليك… إنت؟»

«عمر؟ الوو… لا… ونبي يا عمر، ما تعملش فيا كده!»

بعد كل الحماس اللي كان عندها، الخط قفل للأسف. الشبكة مش مساعدة للتواصل.

نور حست باحباط شديد، وبرغم أنهم كانو بيبعدوا في الإجازات، المرة دي كانت تقيلة عليها أوي، يمكن عشان هو بدأ يحس بوجودها ومشاعرها ليها…

من الناحية التانية، عمر ماسك التليفون:

«نور… نور… لا لا… أرجوكِ ردي…»

من كتر العصبية، حدف تليفونه على السرير. كان حاسس إنه واجعها، بس مش عارف يداويها. حاول بكل الطرق، بس للأسف الظروف مش مساعدة.

عدة الأيام اللي كانوا بيعدوها بالساعة والدقيقة والثانية رجع عمر، وأول حاجة عملها إنه اتصل بيها، بس نور مكنتش بترد…! اتصل أكتر من مرة وبرضو مفيش رد. مكنش فاهم إيه اللي حصل، حاول يوصلها بأكتر من طريقة، بس برضو مفيش أي رد.

تاني يوم راح الجامعة بدري، قعد يدور عليها، بس برضو نور مظهرتش. كان عاوز يسأل أصحابها عنها، بس كان خايف حد يتكلم عنها أو يضايقها.

وفي آخر اليوم، وهو سرحان وبيفكر فيها، سمع أصحابهم بيقولوا:

«مين هيجى معانا لنور؟»

حرك راسه بسرعة وبصلهم بلهفة:

«مالها نور؟»

«مامتها اتوفت أول امبارح، وكنا روحنلها… بس قولنا النهاردة هنتجمع وهنروحها تاني، عشان هي تعبانة أوي وزعلانة جدًا على مامتها.»

عمر قعد باضطراب، وهو مضايق، وبيقول لنفسه: «أكيد عشان كده مكنتش بترد عليا.» وقالولهم: «دي ساكتة، ومن الصدمة حتى مبتعيطش ومبتتكلمش خالص… إحنا زعلانين عليها أوي.»

«تمام… أنا ينفع أجي معاكم؟»

«أكيد… هي محتاجة لينا كلنا جنبها دلوقتي.»

وصلوا عند بيت نور، ريم بنت خالتها فتحت لهم. دخلوا وسلموا على نور، وهي قاعدة مبتتكلمش ولا حتى بتسلم على حد، وعنيها ثابتة ومفيهاش أي روح. حتى لما عمر دخل، كان آخر واحد… كل شيء حواليها ساكت، وكأن العالم كله توقف.