الفصل الحادي عشر.... فين الجثة يا حاجة؟

سهير من قبل اقتراب أم محمد لها تصرخ بعلو الصوت حتى يسمع الجيران صراخها لتستشهد بهم عند رفع قضية الطلاق للضرر ودي كانت خطة سهير مع أهلها حتى تعود لشقتها كحاضنة لابنتها آيات ويعود معها أهلها وكانت أختها هي من رسمت الخطة لها حتى تنتقم من حماتها أم محمد وتدخل بيت أختها في اى وقت تريد لتدوس في كرشها كما تدعي

وكانت سهير تنفذ الخطة بإتقان تام لذلك كانت تتجسس على حماتها وكذلك سرقت مفتاح شقة الحماة من محمد وقام أبوها بعمل نسخة لها لتتمكن من الدخول في أي وقت فجأة دون أن يفتح لها أحد الباب فتستطيع التجسس عليهم براحتها

قامت أم محمد بضرب سهير شد شعرها وطردها خارج الشقة وصعدت سهير شقتها وخرجت في البلكونة بشعرها المنكوش تصرخ وتخبر أهل الشارع بأن حماتها تضربها وتعتدي عليها هي وابنتها وتشهد الناس عليها

وذهب أحد الجيران لمحمد على القهوة يخبره أن يسرع لبيته حتى لا تنتشر الفضايح أكثر من كده ويخبره بما حدث ويهرع محمد لبيتهم ليجد سهير تقف منكوشة الشعر في البلكونة تصرخ وتعيط

ويسرع بصعود السلم في نفس واحد ويدخل شقته يسحبها من البلكونة لتدخل الشقة وترفض حسب الخطة المرسومة لها من أختها فيضربها أيضا ويزداد الصراخ وتطلب من الناس حد يقول لأبوها

وهنا تصعد أم محمد لها وتجرها من ملابسها حتى تتمزق الملابس وتقول لها فضحتينا يا أقذر خلق الله تعالي هنا وتجرها للشقة وتطلب من محمد غلق باب الشقة وباب البلكونة ولا يفتح باب البيت لأي مخلوق فقد فطنت الأم لحيلة سهير وقررت أن تخرب عليها حيلتها هي وأهلها وأمرت فاطمة بنتها أن تحضر لها حبلا وبكرة البلاستر من الدرج وقامت بتكميم سهير بالبلاستر وربطها بالحبل بمساعدة محمد وابنتها وحملها إلى الغرفة بالسطح ووضعها بها حتي يتم التفكير في الأمر

(محمد) أمي أنا خايف يجرى لسهير حاجة وادخل السجن بسببها

(أم محمد) والله يجرى لها حاجة ولا قلبك حن على المغدورة دي خطة ومرسومة صح من أهلها عشان الشارع كله يشهد عليك وتطلقها وتأخد الشقة وترجع أهلها للبيت تقعد هي وهم على قلبي وأقطع دراعي إذا ما كانت دي خطة أختها عشان كده أبوها رجعها من غير كلام ولا شروط بس على مين ولاد الكل.......

(فاطمة) يا ماما جرح دماغك بينزف

(أم محمد) ينزف ولا إن شاء الله أموت المهم بنت الكل..... دي متعلمش عليا هي وأهلها ولاد ستين في سبعين والله العظيم لا أنا لا هم يستنوا عليا بيرسموا خطط ميعرفوش أني بنت المعلم الكبير اللي كان بيرسم خطط كل أهل الشارع كله وكلمة منه كانت زي السيف

( محمد) طيب والعمل دلوقتي

(أم محمد ) ولا حاجة الوقت أختها ولا أبوها الشملول يجي وتشوف

(فاطمة) ماما آيات بتعيط

(أم محمد) خديها أبت وأنزلي شقتنا أقعدي بيها في الأوضة الجوانية وحاولي تسكتيها مش عاوزة أهل سهير يسمعوا صوتها

(فاطمة) اسكتها ازاي هو أنا أعرف

(أم محمد) خدي علبة اللبن من دولابي تحت كان أخوك اشتراها للبت قبل أبو المحروسة مايجبها ثاني وهاتي نص كوب ميه من الفلتر أغليه كويس وحطي فيه معلقتين لبن وسبيه يبرد لحد ما يبقى زي دمع العين دافي لا هو بارد ولا هو سخن وشربيه للبت با المعلقة لحد أخوك مايشتري لها ببرونة

(فاطمة) أنا مالي ومال الهم ده كله محمد يتجوز وأنا اربي

(أم محمد) نفذي كلامي والا والله العظيم أدفنك مع سهير في قبر واحد

(فاطمة) أول مرة أشوفك رهيبة كده يا ماما

(أم محمد) أومال عاوزة بنت الكلا..... تعلم على أمك يلا خلصي مش عاوزة أسمع للبت دي صوت وخدي بالك منها كويس دي دمنا ولحمنا بردو

(محمد) بتفكري فيه أيه ياحاجة

(أم محمد) بلم بلاويك يأبو آيات

(محمد) وبعدين يا أما كل شوية نقرظة

(أم محمد) أخرس ونفذ كلامي فورا بدون مناقشة

(محمد) حاضر

(أم محمد) هات فونك بسرعة عشان تليفوني تحت وعما أنزل أجيبه هيفوت وقت وأحنا محتاجين كل دقيقة

(محمد) اتفضلي تليفوني أهو

(أم محمد) ألو إسلام تعالى ليا فورا على البيت دقيقة واحدة والاقيك قدامي وأنا هنغنغك ياوله بس تعالي بسرعة وهات رجلين جامدين كده وجته معك

(إسلام) ألو مين معايا

(أم محمد) واد يا إسلام خالتك أم محمد تعالى يلا ثواني تكون عندي

(إسلام) حمامة يا خالتي أم محمد

(محمد) طيب فهميني هتعملي أيه

(أم محمد) نفذ كلامي من سكات مش عاوزة اسمع صوتك أحسن لك

انزل الحوش تحت استنى إسلام وأول مايوصل هاته وأطلع على هنا فورا وسك باب الشارع كويس وراك

(محمد) حاضر

صوت صعود سلم وصوت إسلام السلام عليكم ورحمه الله وبركاته

(أم محمد) وعليكم السلام ورحمة الله وبركاته

يلا يا إسلام نفذ كلامي بالحرف الواحد ولك مني مبلغ كويس

(إسلام) ومن غير فلوس تؤمري يا خالتي الحاجة

(أم محمد) موجهة كلامها لإسلام مش عاوزة كلام كثير عاوزة تنفيذ كلامي بالحرف

(إسلام) تمام ياحاجة

(أم محمد) توجه كلامها لمحمد عندك جوة شوال الرز

(محمد) أيوة يا أمه

(أم محمد) فرغه في طبق الغسيل وهاته

(محمد) مش فاهم

(أم محمد) إن شاء الله عنك ما فهمت نفذ وأنت ساكت

(محمد) حاضر حاضر

(أم محمد) إسلام هتأخد الشوال وتطلع مع محمد السطح البت سهير مراته فوق متكتفة وعلى بُقها بلاستر هتحطها في الشوال وتأخدها عندك لحد ما أطلبك وأقولك هتعمل فيها أيه

(إسلام) ياخالتي الحاجة أنا بلطجي آه لكن لحد القتل لا

(أم محمد) أخرس قتل أيه دي هتكون أمانة عندك كام ساعة بس لحد ما أأدب أبوها وبعد كده خلاص

وهديك ألف جنيه في الكام ساعة دول

(إسلام) إذا كان كده خلاص تمام بس هنزل بيها قدام الناس ازاي مهي هترفص وتعمل حركات وتفضحنا

(أم محمد) صدق نسيت دي طيب والعمل

(إسلام) هو فيه حل

(أم محمد) قول بسرعة

(إسلام) بس الحساب هنا هيتغير

(أم محمد) قول ياوله وخلص

(إسلام) هحط في بقها حتة أفيون تسطلها وتنام

(أم محمد) وافرض ماتت

(إسلام) عيب ياحاجة دي شغلتي وبعملها في اليوم الواحد عشر مرات

(أم محمد) ومعاك الحشيش ده ولا لسه هتعطلنا وتروح تجيب

(إسلام) هو أنا أقدر امشي من غيره ده رأس مالي يا حاجة

(أم محمد) طيب يلا خلصني

(إسلام) تمام

(ام محمد) فين الرجلين اللي قلت لك هاتهم معاك

(إسلام) الشغلة مش مستاهلة لكل ده وبعدين الوقت ضيق أجيب منين وكمان خلي سرك مع إسلام كفاية ليه نخرج مصارين البطن برة

(أم محمد) عندك حق يلا خلص

(إسلام) وهو فين الشوال ياحاجة

(أم محمد) محمد بيجيبه يخرب بيته هو طول كده ليه وتنادي يامحمد

(محمد) فيه أيه يا أمه

(أم محمد) فين الشوال يا مايل

(محمد) مش لاقي الطبق اللي افرغه فيه

(أم محمد) يا ميلة بختي فيك مش لاقي الطبق بس لاقي سهير وأهلها الزبالة

(محمد) كفاية يا أمه بقى

(إسلام) هو ده وقته خلصونا

(أم محمد) ادخل أنا افضي الشوال واجيبه لك

(إسلام) بسرعة ياحاجة

(محمد) هي أمي عوزاك ليه يا إسلام

(إسلام) ما تسأل أمك بتسألني أنا ليه

(أم محمد) خد يا إسلام الشوال أهو نفذ الاتفاق

(محمد) اتفاق ايه يا أمه

(أم محمد) أخرس وانزل تحت أقعد مع بنتك وأياك اسمع لك صوت وتصرخ فيه يلا ياخيبتي الثقيلة

(محمد) حاضر وينزل مسرعا على السلم

صوت أم محمد اياك تفتح باب البيت لحد

(إسلام) فين الجثة ياحاجة