الفصل الرابع عشر

عاليا (بصرامة وجدية مهنية جافة صدمته): حضرتك بقالك يومين كاملين ممجتش الشغل، ومعطل أوراق ومشاريع صفقات مهمة جداً مستنية إمضتك، ومسبتش أي خبر أو إذن غياب رسمي للسكرتارية.. وبسبب التأخير والإهمال ده، العميل الكبير كان عاوز يسحب التعامل والملفات من الشركة، وحضرتك ولا أنت هنا وعايش في مية البطيخ! اعمل حسابك إنك هتتحول للتحقيق الإداري فوراً بسبب الخسارة دي، وتاني مرة قبل ما تغيب تبلغ وتخلص الشغل المهم اللي وراك، وبعد كدا غيب زي ما أنت عاوز!

وقف حازم مصدوماً، واتسعت عيناه من طريقة كلامها الرسمية الجافة ونديتها القوية:

— حازم (بغير تصديق): تحقيق؟! أنا أتحول للتحقيق في شركتي يا عاليا؟!

— عاليا (وهي تفتح ملفاً أمامها دون أن تنظر إليه): اه.. تحقيق، واتفضل بره بقا عشان عندي شغل مش فاضية للكلام ده.

خرج حازم من المكتب والشرر والغل يتطايران من عينيه وصدره يضيق، بينما كانت ليلى تقف خلف الجدار تستمع لكل كلمة دارت بينهما بدقة؛ كانت تريد التأكد هل تحاول عاليا التأثير على حازم وسرقته منها مرة أخرى، أم أن خطبتها وارتباطها بحسام حقيقي وقوي.

اندفع حازم بخطوات غاضبة، ودخل مكتب والده (عبد الله) وهو في قمة الغضب والثوران...داخل مكتب الحاج عبد الله، كان حازم يذرع الأرض جيئة وذهاباً، وعيناه تشتعلان بالحنق والاعتراض، ثم التفت إلى عمه وصاح بنبرة حادة:

— حازم: تحقيق؟! تحقيق إيه ده اللي الست عاليا عاوزه تحولني عليه وتعملي فيها رئيسة مجلس إدارة؟ مبقاش إلا عاليا كمان اللي تتحكم فيا في شركتي! وبعدين يا بابا.. إزاي توافقوا على العريس ده وتقروا فاتحتها عليه من غير ما تاخدوا رأيي ولا ترجعوا لي وأنا ابن عمها وخطيب أختها؟!

وضع عبد الله نظارته على المكتب ببطء، ونظر إلى حازم بنظرة حاسمة وقوية جعلت حازم يتراجع خطوة للخلف، وقال بصوت جهوري صارم:

— عبد الله: أولاً.. توطي صوتك وأنت بتكلمني، وتحترم نفسك وتحترم اللي واقف قدامك شوية يا حازم!

— حازم (وهو يخفض رأسه بقلة حيلة): أنا آسف يا بابا.. معلش غصب عني من النرفزة.

— عبد الله: بالنسبة للتحقيق، فعاليا معاها حق بنسبة مية في المية، وده أقل تأديب وحساب ليك على إهمالك وتعطيلك لمصالح الشغل والعملاء بقالك يومين. أما موضوع الخطوبة وقراية الفاتحة. فإحنا ناخد رأيك أنت ليه وبصفتك إيه أصلاً؟ هما الاتنين عاوزين بعض وشاريين بعض، والولد مهندس محترم وأخلاقه عالية والكل بيشهد له.. اطلع أنت من الموضوع ده خالص، ويلا اتفضل على مكتبك، وياريت تجهز وتشوف عندك عذر مقنع ولا لأ تقوله قدام اللجنة القانونية اللي هتحقق معاك!

وفي نفس الوقت، داخل مكتب عاليا:

كان هاتفها يهتز على المكتب، رفعت السماعة بابتسامة رقيقة وفتحت الخط:

— عاليا: ألو..

— حسام (بصوت يملؤه الفرح والاشتياق): أهلاً.. أهلاً ومرحب بك يا خطيبتي القمر، يا أجمل حاجة حصلت في دنيتي.

— عاليا (بخجل وهي تعتدل في جلستها): لسه متخطبناش رسمي يا هندسة.. إحنا يدوب قرينا الفاتحة بس.

— حسام (بنبرة قاطعة ومشاكسة): لا بقولك إيه.. فضي نفسك تماماً الأسبوع ده عشان ننزل ننقي ونشتري الشبكة.. وأنا بصراحة بفكر جدياً نلغي فترة الخطوبة دي ونخليها كتب كتاب على طول وندخل عش الزوجية، مش مستعد أضيع ثانية واحدة بعيد عنك.

— عاليا (بضحكة رقيقة نابعة من قلبها): هههههه مستعجل على إيه بس يا حسام؟ فكر كويس وخذ وقتك.. جايز تفكر وتندم بعد كدا!

— حسام (بنبرة صادقة هزت كيانها): أنا هندم فعلاً لو متجوزناش بسرعة وضيعت وقت تاني من عمري وأنتي مش معايا..

— عاليا (بتردد ودلال): طيب نخليها خطوبة الأول بس...

— حسام: هخلص شغل حالا وأعدي عليكي تحت الشركة.. وحشتييييييني جداً وفوق ما تتخيلي، أوعي تمشي أو تروحي في حتة، تمام؟

— عاليا (بابتسامة دافئة اتسعت على وجهها): تمام يا بشمهندس.. مستنياك.

أغلقت الخط وسندت ظهرها على الكرسي، وفجأة هاجمتها الذكريات اللعينة كشريط سينمائي أسود (Flashback):

كانت واقفة في غرفتها ممسكة بالهاتف قبل سنوات أثناء احدي اجازتها بمصر، تتحدث بلهفة:

— عاليا القديمة: ألو.. إيوا يا زومي، وحشتني.

— حازم الجاف (بضيق وصوت حاد): خير يا عاليا في حاجة مستعجلة؟ ورايا شغل.

— عاليا: أبداً.. قولت وحشتني وأطمن عليك، إيه رأيك أعدي عليك أول ما تخلص شغل وتخرجني نروح السينما سوا؟ بقالنا كتير مخرجناش.

— حازم: معنديش دماغ للكلام الفاضي والسينما ده خالص، أنا مخلص ورايح أقعد مع أصحابي في السهرة.

— عاليا (برجاء): خلاص بلاش سينما.. نروح أي كافيه نقعد نص ساعة بس وروحني، وبعدها روح لأصحابك براحتك.

— حازم (بتأفف): عاليا.. فكك مني ومن الخنق ده بقا! شوفيلك أي حاجة مفيدة في دنيتك اعمليها بدل الفراغ والزهق اللي أنتي عايشة فيه ده!

— عاليا: طيب طالما بتقول فراغ.. حلو، سيبني أنزل الشغل مع عمي في الشركة.

— حازم (بحدة): ده على جثتي! قال شغل قال.. قعدتك في البيت أحسن.

— عاليا (بدموع مكتومة): حرام عليك يا حازم.. لا عاوز تخرجني ولا سايبني أشتغل وأعمل كيان لنفسي، وكل شوية تقولي بطلي تفاهة وفراغ واعملي حاجة مفيدة!

— حازم: اخرجي لوحدك واتصرفي.. ولا أنتي صغيرة ومحتاجة دادة تمشي معاكي؟ سلام.

وفي مشهد آخر من الماضي، دخلت الفيلا ليلاً فوجدته يقف أمامها وعيناه تشتعلان غضباً:

— حازم: كنتي فين لحد دلوقتي؟

— عاليا (ببرود ناتج عن كثرة التجاهل): خرجت شوية أشم هواء.

— حازم: لوحدك؟!

— عاليا: اه.. لوحدي.

— حازم (بسخرية): الله الله.. بقينا بنمشي من دماغنا كمان وبتردي عليا ببرود كدا وعادي جداً؟

— عاليا: أنت هتجنني ليه؟ مش أنت اللي قولتلي بنفسك اخرجي لوحدك وأنتي مش صغيرة؟

— حازم: كانت كلمة وقولتها في وقت ضيق.. أنتي ما صدقتي بقا تخرجي وتتسحبي!

— عاليا (بضيق شديد): يووووه.. دي عيشة تطهق وتزهق بجد!

(Back):

عادت عاليا من ذكرياتها المريرة، وارتسمت على شفتيها ابتسامة ألم وسخرية من نفسها؛ كيف كانت تتحمل قسوة هذا الشخص وأنانيته وتبرر له؟ تمتمت في سرها: "لابد أن أمحي هذه الذكريات القذرة من عقلي، وأبدأ من جديد مع الشخص الذي يقدرني ويدللني".

وفي حديقة الفيلا الخلفية، كانت ليلى تقف بضيق، وعندما دخل حازم بخطوات غاضبة، وقفت أمامه مباشرة وواجهته بشرار يملأ عينيها:

— ليلى: لما أنت بتحبها أوي كدا وميت في دباديبها.. خطبتني أنا ليه من الأول؟! كنت بتغيظها وبتحرق قلبها؟ ولا أنت زي ما هي قالتلك بالظبط مابتحبش في الدنيا دي غير نفسك وعاوز كل حاجة ليك لوحدك؟ واخد كل واحدة فينا شوية.. بتغير فينا زي قمصانك!

نظر إليها حازم بنظرة كره واحتقار، وقال بصوت منخفض غاضب:

— حازم: أنتي عارفة كويس أوي أنا خطبتك ليه وعارفة أنتي عملتي إيه ووقتها استغليتي إيه! أنتي السبب في كل الخراب ده.. عاليا عمرها ما هتسامحني، وأنا مش هسامح نفسي أبداً إني في لحظة غضب وضيق وغباء استسلمت ليكي ولـ...

— ليلى (مقاطعة بحدة وسخرية): أنت اللي عملت كدا باختيارك! أنت ناسي إنك الراجل والمفروض تتحكم في تصرفاتك وعقلك؟ وأنت مش عيل صغير عشان يتضحك عليه بلعبة.. كله حصل بمزاجك.. ها؟ بمزاجك وبإرادتك!

— حازم (وهو يقترب منها ويهمس بفحيح الأفاعي): وأنتي هتفضلي ماسكة عليا الذلة دي طول العمر؟ وتخليني أعمل كل اللي أنتي عاوزاه وتمشيني طوع أمرك؟!

تراجع عقله فجأة إلى الوراء ليتذكر تلك الليلة المشؤومة التي قلبت حياته رأساً على عقب (Flashback):