اللقاء الأول

​سألها الظابط بحدة وهو بيبص لها: "وانتي بقى إيه اللي منزلك في الحظر؟!

​ردت عليه بزعيق وهي مش طايقة نفسها: "ما قولتلك تعبت ونزلت أجيب حاجات من الصيدلية!"

​سيف بتهكم: "وهو محبكش غير وقت الحظر؟!"

​ردت بتكبر: "آه.." واديتله ضهرها ومشيت خطوتين.

​نادى سيف على العسكري وقال: "هاتها لي يا ابني، حطها لي في البوكس.. أنا مش عارف إيه البلاوي اللي بتتحدف علينا دي!"

​بصت له بنرفزة وقالت: "أنت بتقول إيه؟ أنت اتجننت؟! وأنت بتعمل إيه شيل إيدك دي ومتلمسنيش!"

​سيف زعق بصوت عالي: "يالا يا ابني!" وركب في البوكس من قدام، وهي كانت محبوسة ورا. سمعها وهي بتكلم العسكري وبتقوله بضعف: "لو سمحت ممكن تليفونك أعمل مكالمة؟"

​سيف رد بصوت عالي من غير ما يبص وراه: "متطلعش تليفونك من جيبك يا ابني.. سامعني؟"

​العربية وقفت قدام القسم، وسيف وقف يتفرج عليها والعسكري بينزلها وهي لسه بتقوله: "شيل إيدك ومتلمسنيش". دخل المكتب قبلهم وبص لها؛ كانت نظراتها ليه غريبة جداً، مكنتش بتعيط وكانت ثابتة، بس باين عليها الغضب والعصبية، لكن مفيش باليد حيلة. أصعب شعور لما يكون حد جاي عليك وأنت مفيش بإيدك حاجة، بس إحساسك إن ربنا معاك هو اللي بيخليك تتحمل العذاب.

​سيف ببرود: "ارميها لي جوه في الحجز."

​سيف شاب عنده 26 سنة، ضابط، والده مستشار ووالدته متوفية، ملوش غير أخته "أميرة". بيكره جداً حد يعامله بأسلوب مش كويس مهما كان مين.

​هشام صاحبه وزميله في الشغل كان قاعد معاه وبيقوله: "وفيها إيه يعني لما تخطب بنت خالتك؟"

رد سيف: "دي جوازة مصلحة يا عم قبل ما تبقى جوازة أصلاً.. وأنا مبحبش كدا بصراحة، ولا بحب أبوها ولا بحبها هي شخصياً. ده أخوها الصايع هيبقى خال ولادي؟ استحالة طبعاً.. الواد ده من يوم ما اتولد وهو متدلع لحد ما كل شوية يجيب مصيبة وخالتي تتصل بيا تقولي حلهالنا يا حبيبي. ده أنا آخر مرة مطلعه من قضية مخدرات كان هيروح فيها في حديد، وعاوزني كمان أجاملهم وأتجوز بنتهم؟ وبعدين جواز إيه وقرف إيه.. متفكرنيش."

​هشام رد عليه: "أنت مبتحبش البنات شخصياً، ومش هكدب عليك أحياناً بحسك مبقتش تحب نفسك."

سيف سأله: "ليه بتقول كدا؟"

هشام كمل: "أنت عارف ليه.. فحاول ترجع زي الأول مش علشان خاطري، علشان خاطر نفسك يا صاحبي. الواحد في الدنيا دي ملوش غير نفسه وأنا عشان بعزك بقولك كدا، وعاوزك متنساش الكلمتين دول."

​بعد تلت ساعات من الكلام، هشام قام وقال: "أنا هقوم أروح بقى.. جاي معايا؟"

سيف: "لا أنا قدامي حاجة هخلصها وأجيلك."

هشام: "طيب ماشي وحاول متتأخرش.. سلام."

سيف: "سلام."

​أول ما هشام مشي، نادى سيف: "هات لي البت اللي جوه دي."

دخلت وكان باين عليها الانهزام أخيراً، وده اللي سيف كان عاوز يشوفه في عينيها بسبب الطريقة اللي اتعاملت بيها معاه. بس أول ما وقفت قدامه رفعت عينها وبصتله وقالت: "روحني."

سيف: "ده أنتي بتؤمرينا بقى؟!"

قالت بتنهيدة: "لو سمحت.. لو سمحت روحني."

سيف: "مش هيحصل."

قالت: "طيب أنا عاوزه أعمل مكالمة لأهلي."

سيف: "برضو مش هيحصل."

قالت بوهن: "أنا بنت ناس على فكرة، وميصحش إنك عشان ضابط تشوف نفسك على الناس وتاخد بنت وترميها الرمية دي.. أنت إيه؟!"

​إحساسها بالضعف زاد من تعبها، سيف قام ولف حواليها وهو بيقول: "أولاً أنتي مش هتعلميني اللي يصح واللي ميصحش، هو أنتي فاكرة نفسك مين يا ماما؟ ثانياً بقى وده الأهم، أنتي نزلتي وقت الحظر، واتعديتي على العسكري وشتمتيه وقلتي أدبك عليا، ده أنا كل ده من غير ما أزود من عندي حاجة ولا أتبلى عليكي ولا استخدم نفوذي."

​ردت بتعب شديد: "من فضلك أنا تعبانة.. روحني.. روحني من فضلك."

قرب من راسها وقال بجمود: "مش هيحصل.. مش هيحصل."

​رجع قعد على الكرسي وحط رجل على رجل، وجاتله مكالمة ورد: "أهلاً يا حبيبتي إيه أخبارك؟"

أخته أميرة ردت: "فينك يا باشا اتأخرت كدا ليه؟ أنا مستنياك ولسه متعشتش وبابا هنا مع عمو محمود.. بقولك إيه ما تيجي تاخدني على البحر؟ ولا أقولك لاء تعالى نتعشى عشان هنام عشان عندي كلية بكره.. هتيجي إمتى يا سيف؟"

سيف وهو بيحاول مبيضحكش: "نص ساعة بالكثير وهكون عندك."

أميرة: "متتأخرش بقى يا حبيبي وخلي بالك على نفسك."

سيف: "تمام."

​كان بيحاول يرد على أخته وميبينش شخصيته الحقيقية مع أهله قدام البنت دي.

أميرة استغربت: "هو إيه اللي تمام؟ هو فيه إيه؟ طيب عاوز بيض باللانشون ولا بالبسطرمة؟"

سيف: "أي حاجة يا حبيبتي."

أميرة: "لا قول عاوز إيه عشان أخلي الشغالة تجهزه قبل ما تروح."

سيف بصوت واطي: "بسطرمة."

أميرة: "هات لي معاك حاجة حلوة لو سمحت."

سيف: "حاضر.. سلام بقى."

​قفل معاها وبص للبنت وسألها: "ها.. قولتيلي اسمك إيه؟"

كانت موطية راسها ومبتردش، فزعق فيها: "اسمك إيه يا بت!"

رفعت راسها وبصتله بقوة: "بت؟! إيه بت دي؟!"

سيف بنرفزة: "اسمك إيه يا شاطرة؟ اسمك إيه؟!"

قالت بألم وهي بتبلع ريقها: "اسمي.. نبض."

سيف اتريق: "نبض؟ ده شكل الليلة دي مطولة معانا.. قال نبض قال."

​قالت بصوت واطي وتعب ووهن: "ممكن أقعد؟"

سيف: "لأ."

نبض بتعب: "لو سمحت مش قادرة.. خليني أقعد ثواني بس." ووطت راسها وشعرها نزل على وشها وهي حاطة إيدها على بطنها.

​سيف مكنش منكر إن شكلها تعبان، بس غروره وكبرياءه أقنعوه إنها بتمثل عشان يروحها. مهنة الشرطة بتخلي الواحد يشوف مواقف كتير تأثر على تعامله مع البشر، وساعات العقد دي بتطلع على الناس، وبينسى إن عنده بنات في بيتهم في نفس سنهم.

​زعق سيف: "ما قولت لأ!" وقام من على الكرسي وعطاها ضهره عشان يفتح الباب، لكن فجأة سمع صوت حاجة هبدت على الأرض.

​لف بسرعة لقاها واقعة، بص لها للحظات وهي مغمضة وفي دموع على خدها الأحمر، وشعرها مغطي وشها. مكنش قادر ينكر إنها جميلة وملامحها رقيقة جداً.

قال سيف: "بطلي تمثيل يا بنتي، برضو مش هروحك."

​قرب منها ومسك إيديها يشوف النبض، بس محسش بحاجة، شكلها فعلاً مش بتمثل. وقف قدام الباب ونده العسكري: "تعالى يا ابني كوب لي على وشها مية."

العسكري جرى عليه وقال بخوف: "الحق يا فندم، فيه دم على هدومها!"