الفصل الرابع

الفصل الرابع

من رواية

وهو قلبي في عشقها

  اية بدوي

•••••••♡•••••••••

ابتسم للحياة تبتسم لك ☘️🦩

في مقر المخابرات العامة الخاصة بالقوات المسلحة… يقع هناك مكتب اللواء إسماعيل البحيري، أحد الشخصيات الهامة في مجال عمله، يحترم عمله ويبذل به كل مجهوده، متزوج وكان لديه ابن، ولكن تم قتله في إحدى عمليات الاغتيال الخاصة بالإرهاب.

كان أيهم والجميع في انتظار إسماعيل، بينما أيهم كان ينظر أمامه بشرود، يتذكر طلبها لكي يسير هو أولًا، ماذا كانت تقصد؟ هل ظنت أنه قد ينظر لها تلك النظرة المنحرفة؟ اللعنة، بأي صورة ترى تلك الفتاة؟

هكذا سأل أيهم نفسه بينما يضغط على يده محاولًا التحكم في غضبه، يحاول استرجاع كل ما حدث منذ مجيئها، ماذا بدر منه حتى تراه بهذه الصورة؟

"يمكن عشان كنت مركز معها."

كان هذا ما توصل له أيهم حتى دخل اللواء إسماعيل المكتب.

إسماعيل:

"أهلًا بيكم يا رجالة."

الجميع:

"أهلًا يا فندم."

إسماعيل:

"ارتاحوا."

جلس الجميع أمام مكتب إسماعيل، كان أيهم وفهد وجاسر ومؤمن وكامل فريقًا واحدًا بقيادة أيهم تحت إشراف إسماعيل، وضع أمام الجميع ملفًا وأشار إلى مؤمن وكامل قائلًا:

إسماعيل:

"المهمة دي خاصة بأيهم وجاسر وفهد، إنتوا الاتنين مش معاهم."

كامل:

"إزاي يا فندم؟ ما إحنا فريق واحد."

مؤمن:

"فعلًا يا فندم، من إمتى وبناخد مهمات بعيد عن بعض؟"

إسماعيل:

"كامل، مؤمن، مش عاوز كلام كتير، اخرجوا حالًا."

غادر الاثنان في صمت تحت استغراب الآخرين من هذا التغيير المفاجئ، التفت إسماعيل قائلًا بنبرة حازمة:

"اللي هقوله هنا دلوقتي ميخرجش بره المكتب ده، فاهمين؟"

أيهم:

"فاهمين يا فندم."

إسماعيل:

"قدامكم ملف سري خاص بالأمن الوطني والعام، اللي في الملف ده واحدة من أخطر قضايا المافيا اللي هتمر عليكم. من مدة طويلة وفي مافيا أمريكية اسمها مافيا الشيطان، بيترأس المافيا دي زعيم اسمه إدوارد بلاك. كل محاولاتنا فشلت إننا حتى نوصل له أو نعرف شكله.

من فترة بدأت تجيلنا معلومات من شخص مجهول عن مواعيد تسليم البضاعة اللي بتوزعها المافيا دي على كافة قارة أفريقيا، وده خلانا نبحث خلف الشخص ده."

أيهم:

"قدرتوا توصلوله؟"

إسماعيل:

"الوصول ليه مستحيل، ده شخص مستوى ذكاؤه عالي جدًا. كل اللي عرفناه عنه كانت معلومات هو قال عليها بنفسه، زي إنه قدر يخترع برنامج ذكاء اصطناعي بيخترق أي شبكة في العالم، ومش بيخترقها بس، ده بيدمر النظام الخاص بيها وبيأخذ منها كل اللي هو عاوزه."

جاسر:

"وشخص زي ده إيه اللي يخليه يبعت معلومات زي دي ممكن تورطه مع مافيا زي مافيا الشيطان؟"

إسماعيل:

"وده اللي أنا اخترتكم عشانه. إنتوا قبل ما تكونوا ضباط عندي، إنتوا زي ولادي، ووالدكم كان صديق عزيز عليّ، عشان كده أنا لما المعلومات دي وصلتلي النهارده رفضت إنها تدخل ملف القضية."

أيهم:

"إيه هي المعلومات دي؟"

إسماعيل:

"جوان أحمد مصطفى المنشاوي."

أيهم:

"مالها جوان؟"

إسماعيل:

"في معلومات مؤكدة إن رجالة إدوارد نزلوا مصر من يومين وكانوا بيدوروا على الاسم ده، ومش كده وبس، دول جمعوا معلومات عن كل العيلة حتى النسب، أخدوا معلومات عنه."

فهد:

"ليه؟ إيه علاقة جوان بمافيا زي دي؟"

إسماعيل:

"اللي هيجاوب على السؤال ده هو صاحب الشأن. أنا رفضت أدخل المعلومات دي الملف لأنها هتأذيها هي قبل ما تضركم إنتوا، كون إنكم ولاد عم، وإحنا لحد دلوقتي منعرفش إيه الصلة بين الاتنين."

جاسر:

"إنت قصدك إنها متورطة مع المافيا دي؟"

إسماعيل:

"لحد دلوقتي منعرفش السبب، بس إحنا لازم نحط كل الاحتمالات يا جاسر."

أيهم:

"المعلومات دي لازم تفضل سرية لحد ما نلاقي حل."

إسماعيل:

"وده اللي هيحصل يا أيهم، بس إنتوا لازم تتحركوا بسرعة."

أيهم:

"تمام يا فندم."

••••••••

دخل إلياس القصر لتتوقف أمامه الخادمة قائلة باهتمام:

"أهلًا بك سيدي."

لم يرد، لم يكلف نفسه عناء الالتفات لها حتى، كان يعلم وجهته جيدًا. توقف أمام مكتب يوسف ودخل مرحبًا بصوت عالٍ:

إلياس:

"جو حبيبي، آي مس يو."

يوسف:

"هو مش في باب؟"

إلياس:

"طبعًا في باب، أمال أنا دخلت إزاي؟"

يوسف بيأس:

"مفيش فايدة فيك."

إلياس:

"سيبك مني، بعت جوان مصر ليه دلوقتي؟"

يوسف:

"إدوارد ده اكتشفت إنه كان بيراقب القصر، حتى جوه القصر في خادمة كانت بتنقل كل الأخبار."

إلياس:

"ده مش سبب يخليك تبعتها، وإنت عارف إنه متابع كل أخبارها. هناك محدش عارف بالخطر اللي بيحصل حواليها."

يوسف:

"عمي جمال عارف وأنا شرحت له كل حاجة، بس دلوقتي كل الخوف إنه يوصل لها وهي هناك لوحدها."

إلياس:

"أنا هنزل النهارده، حجزت. بس انت حاول توصل لرماس وخليها برضه."

يوسف:

"كويس، وإنت هناك حاول ترتب مكان الشركة وشوف كذا مكان نبدأ نشتريه عشان لما ننزل تكون كل حاجة جاهزة، وأنا هصفي الشغل هنا."

إلياس:

"أكيد. ماما يسرى فين؟"

يوسف:

"فوق."

إلياس:

"أنا هسلم عليها وأتحرك."

صعد فوق إلى الطابق الثاني، وبالتحديد الغرفة التي تسكن بها يسرى والدة يوسف، والتي لم تغادرها منذ موت ابنتها ديما.

التفتت يسرى على صوت إلياس لتبتسم له بحنان قائلة:

"تعالى يا حبيبي."

أسرع في الاقتراب منها مقبلًا يدها:

"وحشتيني يا ست الكل."

يسرى:

"وإنت كمان يا إلياس، طولت أوي الغيبة المرة دي."

إلياس:

"كان عندي شغل كتير."

يسرى:

"ربنا يقويك يا ابني. شفت يا إلياس؟ جوان نزلت مصر وسبتني."

إلياس:

"عارف يا ست الكل، عارف، بس دي أفضل ليها. بعدين دي كلها شهر ولا اتنين وننزل نقعد معاها إحنا كمان."

يسرى:

"يا رب يا إلياس، أنا نفسي أنزل مصر أوي."

يوسف:

"هتنزلي يا حبيبتي متقلقيش، إنتِ بس خدي بالك من نفسك وخدي الأدوية اللي بتعذبي بيها الممرضة دي."

يسرى:

"يا ابني إنت عارف إني مش بقدر آخد كل الأدوية دي."

يوسف:

"بس ده لازم عشان صحتك."

إلياس:

"يوسف معاه حق. على فكرة أنا هسافر النهارده لجوان عشان أكون معاها، وإنتِ ويوسف أول ما يخلص شغله هنا هتنزلوا ورانا."

يسرى:

"خد بالك منها كويس يا إلياس."

إلياس:

"في عنيا الاتنين يا حبيبتي، متقلقيش."

•••••••••••

في تلك الأثناء كان أيهم يجوب المكتب كالأسد الجريح، بينما جاسر وفهد يجلسان يفكران في حل لتلك الورطة التي سيقع بها الجميع.

فهد:

"أيهم، اللي إنت بتعمله مش هيفيد بحاجة، لازم نلاقي حل."

أيهم:

"هنلاقي إيه بالضبط؟ مش سامع اللواء قال إيه؟ دول نازلين لها بالاسم، يعني عارفينها، يعني المجرم ده عرفها وعارف شكلها كمان. إزاي وصلت لشخص زي ده؟ وإيه اللي يخليه يبعت رجالة مخصوص وراها عشان يدوروا على علاقتها بيه مع إنه عارف إن الأمن المصري بيدور وراه؟"

جاسر:

"ممكن يكون الموضوع تشابه أسماء يا أيهم."

أيهم:

"إنت من كل عقلك فاكر إنه تشابه أسماء؟ ده بيدور على الاسم رباعي يا جاسر! هتجنن، إيه اللي وصل جوان لشخص ده؟"

فهد:

"ممكن يكون ده سبب نزولها."

أيهم:

"ده أكيد، مش معقول هتبدأ تدور على علاقتها كده فجأة."

جاسر:

"يبقى مفيش غير حل، إحنا هنواجهها."

أيهم:

"هتواجهها بإيه؟ هتقولها في مجرم وزعيم مافيا بيسأل عنك؟"

أخذ المفاتيح وألقاها على فهد قائلًا:

"يلا سوق إنت، أنا مش قادر."

أنهى جملته وغادر بينما لحق به جاسر وفهد متعجبين من تلك الحالة التي هو عليها.

في أثناء الطريق كان ينظر إلى النافذة ويتنفس بعمق في محاولة منه ليبث بعض الهدوء داخله حتى لا يذهب لها ويطحن رأسها حتى يعلم ما العلاقة التي تجمعها بذلك المجرم.

في القصر كانت جوان جالسة بجوار رغد على الأرضية العشبية في الحديقة، تضحك على صراخ ملك وتالا التي تحاول الوصول إلى شعر مالك القصر، بينما ريم تمسكها بين يديها وتضعها على مالك حتى تفعل هذا.

التفت الجميع على صوت صفع أيهم لباب السيارة الذي أصدر صوتًا عاليًا جعل الجميع ينظر له، راقبت الفتيات دخوله السريع إلى القصر بينما جاسر وفهد لحقا به.

ملك:

"هو أبيه أيهم ماله؟"

رغد:

"مش عارفة."

على طاولة الغداء كان الجميع موجودًا، وأثناء تناولهم الطعام لاحظت جوان نظرات أيهم لها، لترفع عينها إليه، ابتلعت ما في فمها سريعًا عندما وقعت عينها على يده التي يمسك بها الشوكة ويضغط عليها بقوة.

انتفضت عندما نهض فجأة مغادرًا الغرفة وكأن وحشًا يطارده.

جمال:

"في إيه؟ ماله أيهم؟"

جاسر:

"مفيش يا عمي، شوية مشاكل في الشغل مش أكتر."

محمد:

"مشاكل إيه يا ابني؟ دي أول مرة أشوفه بالحالة دي."

رغد:

"أنا هقوم أشوفه."

جاسر:

"رغد سيبيه لوحده دلوقتي."

جمال:

"في إيه إنتوا الاتنين؟ حد فيكم يرد عليّ."

التفت جمال على صوت أيهم الذي قال:

أيهم:

"مفيش حاجة يا بابا، أنا بس متنرفز بسبب مشكلة في الشغل. فهد، جاسر، أنا في الجيم، محدش ييجي ورايا."

جوان:

"هو في جيم هنا؟"

رغد:

"آه، بس أيهم وجاسر وفهد بس اللي بيستخدموها."

جوان:

"مممم."

•••••••

خرجت جوان متجهة إلى الحديقة حتى لا يسمعها أحد أثناء حديثها، ولم تكن تعلم أنها تقترب من الجيم الذي كان أيهم يحبس نفسه به منذ الغداء.

أخرجت سماعات الـ AirPods ووضعتها في أذنها.

جوان:

"إلياس وصل عندك؟"

يوسف:

"آه، وهينزل بكرة وهيكون عندك."

جوان:

"مممم، إنت اتواصلت تاني مع اللواء؟"

يوسف:

"لا، بس مش ساكت، عمال يدور ورانا، بس متقلقيش، قريب أنا هنزل وهحل كل حاجة."

جوان:

"يوسف أنا خايفة أوي، مش عاوزة أشوفه تاني أرجوك."

يوسف:

"جوان يا حبيبتي، أنا مستحيل أخليه يقرب منك مهما حصل، وإلياس هينزل ويكون معاكي يعني اطمني."

جوان بصوت مشبع بالخوف:

"بس هو هيقدر يوصلي لو نزل مصر مش كده؟ ممكن أشوفه تاني يا يوسف، إنت مش هنا."

يوسف:

"جوان اهدي بقى، قلتلك مش هينزل مصر ويخاطر كده، ثم إنتِ عارفة إني حاطط عليكي حراسة مشددة، يعني مش هيقدر أصلًا يقرب منك، وأنا كلها أسبوعين وهكون موجود في مصر."

جوان:

"أنا خايفة إن أيهم عرف حاجة، النهارده على الغداء كان متعصب أوي وطول الوقت كان بيبص عليّا، خوفي حسيت إنه عرف حاجة."

يوسف:

"مستحيل يعرف، أنا مبعتش معلومات للواء إسماعيل من زمان، وبعدين هو أصلًا ميعرفش لنا مين، يبقى إيه اللي مخوفك كده؟ يلا روحي نامي وأنا هكلمك بكرة."

جوان:

"ماشي."

أغلقت الهاتف وتنهدت بعمق، نظرت إلى الحديقة التي كانت تمتد أمامها، لم تدرك جوان أن أيهم كان يقف خلفها وقد استمع إلى كل ما قالته.

كادت أن تتقدم ولكن قفز أمامها قط صغير جعلها ترتجف بذعر إلى الخلف لتجد نفسها تصطدم بأحد من الخلف.

التفتت سريعًا ظنًا منها أنه أحد رجال إدوارد، كادت أن تسقط ولكن تلك الذراع التي التفّت حول خصرها منعتها، وضعت يديها على وجهها بذعر ولكنها أبعدتهما ببطء عندما وصلها صوت أيهم الهادئ:

"ده أنا يا جوان."

اتسعت عينا جوان وأسرعت في دفعه بعيدًا عنها متراجعة إلى الخلف.

جوان:

"إ... إنت بتعمل إيه؟"

أيهم بغموض:

"كنت في الجيم، إنتِ اللي بتعملي إيه هنا وبتكلمي مين؟"

جوان سريعًا:

"مش بكلم حد أنا... كنت... كنت بتمشى شوية."

أيهم:

"طيب ارجعي عشان الجو برد."

جوان:

"تصبح على خير."