Chapter 1

“Isla, paki-photocopy ang mga documents na ito. Fifteen copies tapos ilagay mo sa CEO’s conference room,” utos ni Maddie, ang sekretarya ng Marketing Manager namin na si Mr. Desiderio Refuerzo. 

Napatango ako bilang pagkumpirma na naintindihan ko. 

“Sorry, ngayon lang kasi iniutos ni Sir. May pinapagawa rin siya sa aking presentation para sa Lunes,” ani Maddie na halata namang nagsasabi ng totoo.

“Huwag kang mag-alala, hindi ako uuwi nang hindi tapos ito,” paniniguro ko sa kanya.

“Haaay! Paano na lang ako kung wala ka?” pa-cute pang sabi ni Maddie.

Natawa naman ako sa hitsura niya pero isa iyon sa nagustuhan ko kay Maddie, magaan ka-trabaho.

“Heto naman ay pakidala na rin sa CEO’s office mamaya. Wala si Ms. Mona kaya iwan mo na lang sa table niya,” pagbibigay pa ulit ni Maddie ng instructions bago ngumiti ng tipid at nagmamadaling bumalik sa kanyang work station. 

Masuwerte ako na dito sa Marketing Department ng Claveria Nickel Mining Corporation na-assign para mag on-the-job training last year at dahil nangangailangan sila ng office clerk ay in-absorb na ako ng kompanya. Inilakad din ni Mr. Refuerzo na 6:00 am to 3:00 pm ang oras ng pasok ko dahil may ilang buwan pa akong binubuno sa pamantasan bago makapagtapos ng aking pag-aaral.

Napilitan akong mag-extend ng isang oras para masiguro na maayos kong nagawa ang ibinilin ni Maddie. Nagmamadali akong nag-out sa biometrics para makahabol sa alas-dos kong klase sa Claveria State University. 

Pagdating ko sa labas ng university ay dumaan muna ako sa katabing carinderia para kumain ng mabilis. Habang nginunguya ang kanin at adobong baboy naamoy ko ang isang pamilyar na panlalaking pabango. Padabog na tumabi sa akin sa bangko ang nobyo kong si Lemuel. “Babe, kanina pa kita hinahanap.”

Nilunok ko muna ang aking nginunguya. “Babe, sorry. Nag-overtime ako tapos nag-review sa daan kasi may quiz kami sa Advertising and Integrated Marketing Communications.”

Humaba ang nguso ng lalaki sa narinig. “Yayayain pa naman sana kita na mag-absent na lang kasi nagkayayaan ang tropa na mag-swimming sa resort.”

Sinipat ko ang suot kong orasan na regalo ni Lemuel sa akin noong nakaraang birthday ko. “Dalawang oras lang naman ang klase ko, dadaan na lang ako sa resort ninyo bago umuwi.”

Agad namang lumiwanag ang mukha nito at agad akong hinalikan sa pisngi. “You’re the best!”

Napailing na lamang ako. Alam na alam kasi niya kung paano ako mapapa-oo.

“Manang, bayaran ko na po ang pagkain ng girlfriend ko,” ani Lemuel sabay dukot ng kanyang wallet at saka may isinuksok sa aking bulsa. “Mag-special trip ka na mamaya para sa loob ka na ng resort ibaba.”

“Sige. Thank you!” sagot ko sabay subo ulit ng kanin at ulam.

Muli itong naupo at saka iniikot sa baywang ko ang isang braso habang hawak naman ang kanyang cellphone para mag-text sa mga kaibigan.

Bago ako matapos kumain ay dumating na ang mga kaibigan ni Lemuel na nagsipag-sampahan na sa kanyang pick-up truck. Humalik lamang siya ng mabilis sa pisngi ko. “Ingat, later!”

Eksaktong alas-kuwatro natapos ang klase namin at marami ng text message si Lemuel kaya halos lakad takbo ako hanggang sa marating ko ang terminal ng tricycle.

“Manong, sa Claveria Sands and Resort po. Special,” sabi ko sa driver.

Halos beinte minutos inabot ng biyahe. Nang makita ng guwardiya na ako ang sakay ng tricycle ay pinapasok naman niya agad ito. Nasa kalahating kilometro rin kasi ang layo ng gate sa rest house nila Lemuel. 

Pagpasok ko sa loob ay sinalubong naman agad ako ng isang kasambahay at sinabing nasa pool sina Lemuel. 

Nagpasalamat ako at saka tinahak ang daan patungo sa swimming pool.

Hindi ko napigilang magsalubong ang mga kilay ko nang makitang nasa pool si Lemuel at may nakasakay na babae sa kanyang balikat. Nakasuot na nga ng two-piece bikini swimsuit ang babae, nakahawak pa sa kanyang noo habang nasa pagitan ng suso ng babae ang kanyang ulo.

“Lemuel!” sigaw ng isa niyang kaibigang lalaki na nakaupo sa isang bench at saka ako inginuso.

Namutla ang lalaki nang makita ako at ibinalibag sa tubig ang babaeng kanina’y nag-e-enjoy sa balikat niya.

Mabilis akong tumalikod sa inis at naglakad pabalik sa pinto.

“Babe! Hintay!” pagtawag ni Lemuel na hindi ko nilingon.

Nahawakan niya ang pala-pulsuan ko at hinila palapit sa kanya. “Babe, naglalaro lang kami.”

Salubong ang kilay ko na hinarap siya. “Mukhang naka-istorbo nga ako eh. Kaya uuwi na lang ako.”

“Huwag please. Kanina pa kita hinihintay,” pagmamakaawa nito. “Hindi na mauulit. Sorry na.”

Hindi ako kumibo. Napahalukipkip ako sa inis.  

“Please, Babe. Bati na tayo. Samahan mo na lang ako sa kuwarto ko. Maliligo lang ako tapos sabay tayong bababa,” malambing nitong sabi. 

Tahimik naman akong sumunod sa kanya paakyat. Ika-limang beses ko na nakapunta sa resort na ito pero ngayon lang ako pumayag na sumama sa kuwarto niya. Mahirap na baka sumalisi pa ang dikyang iyon. Mukhang enjoy na enjoy pa naman siya kanina habang pasan ng boyfriend ko.

Pumasok kami sa ikatlong pinto. Malaki ang kama sa kuwarto ni Lemuel, tingin ko nga kahit mahiga kaming tatlo nina Ayah at Inay ay maluwag pa rin. 

“Upo ka muna diyan sa kama,” ani Lemuel bago pumasok sa banyo.

Maya-maya pa ay bumukas na ang pinto ng banyo at lumabas si Lemuel na nakatapis lamang. Masarap ang ngiti nito na humakbang nang malalaki palapit sa akin sabay halik sa aking pisngi. 

“Magbibihis lang ako,” sabi niya at saka kumuha ng damit sa built-in cabinet.

Tumayo ako at sumilip sa balkonahe. Mula sa kinatatayuan ko ay kita sa bandang gilid ang mga kaibigan niya na nag-iinuman sa tabi ng swimming pool habang ang babaeng nakasakay kanina sa kanyang balikat ay prenteng nakasandal sa sun lounger.

Naramdaman ko ang pagpulupot ng mga braso ni Lemuel sa aking baywang at saka ito humalik sa aking pisngi habang nakayakap mula sa aking likuran. 

“Huwag ka nang magalit, babe,” malambing niyang sabi at saka idinikit ang kanyang labi sa aking pisngi. “Mahal na mahal kita!”

Pakiramdam ko ay may kung anong humaplos sa mabigat kong dibdib at unti-unting gumaan iyon.

“Hindi ko gusto ang nakita ko, Lem,” mahina kong sabi.

“Laro lang iyon at may boyfriend si Leslie. Magkaibigan lang kami,” paliwanag nito at saka ako inikot paharap sa kanya. “Huwag mo na ikunot iyang noo mo, hindi kita ipagpapalit doon.”

Inihiwalay niya ang katawan niya sa akin at saka ako iginiya sa kama para maupo. Hinalikan niya ang aking pisngi at nagsimulang bumaba ang kanyang labi sa aking leeg habang lumikot naman ang kanyang kamay at pumasok sa loob ng suot kong baby tee. Napasinghap ako sa gulat ngunit hindi niya ako pinansin at ipinagpatuloy ang paghalik sa aking leeg. Nagsimula na akong kabahan.

Krrrriiiiiinnnng.

Naitulak ko si Lemuel sa gulat at agad na dinampot ang aking cellphone. Si Inay tumatawag.

“Anak, umuwi ka na at nangingitim na ang kapatid mo sa kakaiyak. Kanina ka pa hinahanap,” nag-aalalang sabi ni Inay.

Nilingon ko si Lemuel na nakayuko at nakakuyom ang kamao habang lamukos ang kobre-kama. “Uuwi na ako.”

Mabilis kong dinampot ang aking bag at nagmamadaling umalis doon.