Kabanata 9

Paano nangyaring nandito ang pangalan ni Feelin? At nakasulat na talagang sa kanya ko nga iniiwan ang lahat ng mga pag-aari ko pati na ang condo na ito sakali mang may masamang mangyari sa akin. At kapag may masamang mangyari naman kay Feelin ay saka pa lamang mapupunta kay Ted ang mga pag-aari ko. Lihim akong napangiwi sa huling nabasa ko. Bakit ko ba isinulat pa ito? Para ko na ring sinabi kay Ted na patayin niya si Feelin para mapunta dito ang lahat ng mga pag-aari ko. Pero hindi bali na. Sa ibang araw ko na lamang iisipin ito. Ang mahalaga ngayon ay ako ang mananalo sa aming dalawa ni Ted. Hindi ako mapapalayas sa condo ko dahil may katibayan na akong hawak na pirmado pa ng isang abogado na siyempre'y kilala ko dahil siya ang aking abogado.

"O bakit hindi ka na nakagalaw diyan? Ano iyang mga papeles na binabasa mo?" tanong ni Ted sa akin. Tila nainip na siya sa paghihintay sa akin kaya nilapitan na niya ako at pahablot na kinuha sa akin ang mga