Chapter 7

MATAPOS matiyak na hindi pa makakauwi ang mag-iina ay mabilis na idinayal ni Sabrina ang numero ni Criselda. Alam niyang hindi siya nito bibiguin. At hindi nga siya nagkamali, napapayag niya ito kahit pa alam niyang hindi ito sang-ayon sa nais niya. Ang palihim na bayaran ang pagkakautang ng pamilya ni Vladimir sa pinsan nito gamit ang pera niya. May access pa rin naman si Criselda sa account niya kaya hindi ito naging problema.

Masayang-masaya siya sa kaniyang ginawa, maliban 'dun ay nagpabili din siya ng mga branded na damit at sapatos para kay Vladimir. Anonymous person ang sender kaya alam niyang hindi malalaman ng binata na sa kaniya nanggaling. Hindi naman mahahalata dahil marami naman itong tagahanga. Ora mismo ay idineliver ng parcel rider ang mga pinamili ni Criselda para sa binata, ayon sa kagustuhan ni Sabrina.

Tulad ng inaasahan ni Sabrina ay masaya ang binata nang madatnan ang santambak na regalo na nagmula sa isang hindi kilalang tagahanga. Isa-isa nitong isinukat, pumapalakpak naman sa tuwa ang mga kapatid nito kasabay ng pag-irap kay Sabrina na tahimik na nakamasid.

"Siguradong napakayaman ng tagahanga mo Kuya, imagine napakamahal ng mga iyan," palatak ni Ness.

"At kung siya ang iniuwi mo dito, marahil ay mas maginhawa ang buhay natin." Sabad naman ni Nene na umismid pa nang mapasulyap sa nakayukong si Sabrina.

Binalingan ni Vladimir si Sabrina. "Sab, dalhin mo ang lahat ng ito sa silid ko." utos nito sa dalaga na mabilis namang tumalima.

"Napakaswerte talaga natin ngayong araw, imagine may isang estranghero din na nagbayad ng utang natin sa pinsan kong mahadera!" Ang luwang ng ngiti na saad ng ina ni Vladimir.

"Wow! Ma, baka siya rin ang bumili ng mga mamahaling regalo para kay kuya." namilog ang mga mata ni Ness. Nagkatinginan ang mag-iina saka maluwang na napangiti.

Tahimik namang inayos ni Sabrina ang mga pinamili ni Criselda sa silid nila ni Vladimir. Masaya siyang napasaya niya ang binata. Palihim siyang nagpapasalamat dahil nangako si Criselda na mananatiling lihim sa mga magulang niya ang mga nangyayari sa kaniyang buhay. Inilingid niya kay Criselda ang kalupitan sa kaniya ng pamilya ni Vladimir. At alam niyang susuportahan siya para sa ikaliligaya niya ngunit tiyak na hahadlang ito kapag nalaman nito ang dinaranas niyang kalupitan sa mga ito.

Lumabas na ng silid ang dalaga, nagkani-kaniya ng pahinga sa mga silid ang mag-iina kaya kahit papaano ay nakahinga siya ng maluwag, magagawa niya ng mas maayos ang trabaho niya. Lalo niyang naappreciate ang kahalagahan ng mga katulong nila sa mansyon. Pinalaki man siya sa marangyang pamumuhay ngunit namulat siya na may mabuting pakikitungo sa mga empleyado at maging sa mga katulong nila.

Nagluto siya ng pagkain para sa dinner ng mag-iina. Pasimpleng kumain sa laundry area ng bahay, kailangan niyang pasikretong kumain dahil kailangan niya ng lakas. Tiyak kasi na mas marami siyang gagawin dahil nasa bahay ang mga ito. Ngunit nang bumalik siya sa kusina ay nakita niyang bihis ang mga ito, may mahalaga daw itong pupuntahan, ni hindi pinansin ang kaniyang mga niluto. Palihim siyang napangiti nang pumasok siya sa silid, hindi umalis si Vladimir kundi nagtitipa lang ito sa selpon nitong hawak.

"N-nakapagluto na ako, gusto mo bang ipaghain na kita?" Atubili niyang tanong sa binata. Malamig ang mga tingin na sinulyapan lang siya nito.

Napakagat-labi si Sabrina. Ano bang ginawa niya? Hanggang kailan siya tatratuhin ng ganito ng binata?

"Mamaya, lumabas ka ng kwarto!" Asik nito. "At huwag kang papasok hangga't hindi ko sinasabi." Tila alipin kung ituring ni Vladimir si Sabrina. Pinuproblema na nga nito kung paano ididispatsa ang dalagang ulila na sa pagkakaalam niya. Pero dahil napapakinabangan pa naman ito ng kanilang pamilya ay pagtityagaan niya muna itong makita araw-araw.

Mabilis na nanubig ang mga mata ni Sabrina at tumalikod na para iwan ito. Mabilis na pinahid ang namalisbis na mga luha. Dumiretso siya ng banyo at sa doon niya na hinayaan ang mga matang walang patid ang pagdaloy ng luha. Wala siyang hindi kayang tiisin para sa pagmamahal niya rito. Matapos umiyak ng ilang minuto ay pinahid niya na ang luha upang magsimula na namang maglinis ng sala.

MASUSI namang pinag-aaralan ni Criselda ang buhay ng pamilya Hidalgo. Naiiling na tinitigan sa monitor ng laptop ang mukha ng mag-iina. Walang permanenteng trabaho si Marsha, kolektor ng jueteng sa Novaliches. Naging kabit ng ilang politiko 'nung kabataan pa nito. Si Vladimir ay anak ng isang negosyante na may mga illegal na pasugalan, si Ness at Nene ay mga anak naman nito sa mga pulis na protektor ng pasugalan. Mataas ang ambisyon, namumuhay sa paraket-raket. Ibinubugaw ang mga anak sa mga mayayamang mahilig tumambay sa mga bar. Hindi na nakapagtatakang maging si Vladimir ay ginagamit ang karisma upang magpaibig ng mga mayayamang kolehiyala upang huthutan ng pera.

Naiiling na tinitigan naman ni Cris ang larawan ni Sabrina, inosente, mabuti ang puso. Maswerteng bata, mala disney princess ngunit minalas na nagmahal ng maling-tao. At sasagipin niya ito sa ano mang paraan, ipinangangako niya sa sarili.

"Siya ba ang alaga mo?" Bungad na saad nang kararating lang na si Zachary.

Malungkot na tumango si Criselda.

"Magandang bata," opinyon nito na umupo na sa tabi ni Cris.

"Yap, at napaka-inosente."

Tumango-tango naman si Zachary, tantiya niya ay wala pang disi-otso anyos ang dalaga.

"Sayang, kung hahayaan ko lang na masira ang buhay dahil lang sa bulag na pag-ibig."

"Hayaan mo siyang magdesisyon para sa sarili niya," pabalewalang sagot ni Zachary. "At wala ka na naman sa buhay niya para panghimasukan pa."

Inis na binalingan ni Criselda ang pamangkin. Tinitigan ang gwapong mukha nito saka sarkastikong nginitian.

"Biktima si Sab ng maling pagmamahal, iniwan niya ang marangyang buhay para sa maling lalake."

Natigilan si Zachary, saka napaisip. Minsan ng naikwento ng kaniyang Tita Criselda ang ilang detalye sa pagkatao ng dalaga.

"At hindi mo maiintindihan dahil hindi ka pa naman nagmahal." Inirapan ni Cris ang pamangkin.

Ano nga ba ang alam ng isang Zachary Montefalcon sa reyalidad ng pag-ibig? Abala ito sa pagpapayaman, abala sa mga negosyo nito, sa edad na beinte-otso anyos ay isa na itong successful online businessman. Ilang Novel Platform na ang pag-aari nito na nagkalat online. Ito rin ang nasa likod ng ilang sikat na online games. Batang CEO na sa edad na disi-nuebe anyos at siyam na taon na itong pinayayaman ng pinasok nitong karera.

"Introvert kasi ang alaga mo," naiiling na saad ni Zachary. "Ipinanganak na may gintong-kutsara sa bibig, anong aasahan sa isang brat na gaya niya?"

"Brat?" Umiling si Cris. "Hindi spoiled-brat si Sab." Pagtatanggol ni Cris sa alaga. "Hindi siya katulad ng inaakala mo."

Natahimik si Zachary, naging curious sa buhay ng dalaga. Hinayaang magkwento ang tiyahin saka lang nito nakuha ang simpatiya niya. Nakakapanghinayang nga ang isang gaya ni Sabrina na napunta lang ito sa kamay ni Vladimir. Tila may kung anong nag-udyok sa damdamin niya para mas kilalanin pa ito. Patuloy siyang nakinig sa tiyahin at sumimpleng tumipa sa cellphone upang alamin pa ang family background nito.