Chapter 7

NAPAKA tahimik ng paligid at nakakailang sobra hanggang sa tuluyan nang nagsalita ang pinaka bunsong kapatid ni Keizer. “Kuya grabe ang bilis ng pangyayari ah at may bride ka na kaagad.” sabi nito sa kaniya at pagkatapos ay nilingon siya nito. “Hindi ko akalain na pumayag kang magpakasal sa Kuya ko ng agad agad, uso pa pala ngayon ang ganun. Tyaka balita ko ay nag-aaral ka pa diba? Ano na ulit ang course mo? Nursing?” tanong nito sa kaniya ngunit puno ng panunuya ang mga mata nito.

Hindi siya sumagot at nanatili lang na tahimik. Ilang sandali pa ay marahan itong natawa habang nakatingin sa kaniya. “Ilang taon ka na? 21? Super bata pa ah.” sabi pa nitong muli.

Isang nahihiyang ngiti ang ipinaskil lang ni Bella sa kanyang labi. Ang lahat ng sinabi nito ng mga oras na iyon ay totoo at ni isa sa mga iyon ay hindi niya pa nasabi man lang kay Keizer kaya paano nalaman ng kapatid nito ang tungkol sa kaniya? Mukhang pina-imbestigahan siya ng mga ito. Hindi niya tuloy maiwasang hindi mainis dahil doon.

Nilingon niya si Keizer at hindi niya itinago sa kanyang  mga mata ang inis niya. Ilang sandali pa ay muli niyang narinig ang ipinakilala ni Keizer sa kaniya na Tita nito, malamang na hindi ito ang ina niya at baka second wife lang ito. Ang dalawang babae ay tiyak na half sister niya lang siguro. “Alam mo ba na hindi lang basta-basta ang pamilya namin at hindi lang din basta basta ang mga nakakapasok. Pwede ko bang malaman kung ano ang pinagkakaabalahan ng iyong mga magulang hija?” maingat na tanong nito sa kaniya ngunit ang mga mata nito ay hindi pa rin nagbabago habang nakatingin sa kaniya.

Ang matanda ng mga oras na iyon ay nakatingin dito ng masama ngunit wala lang itong pakialam at tuloy pa rin sa pagsasalita. “Ah, ano po. Ang nanay ko ay nagpapatakbo ng maliit na klinika at wala ang tatay ko naman po ay ilang taong wala na…” mahina niyang sagot rito.

Nakaupo si Bella doon at pagkatapos ay agad na namutla ang kanyang mukha nang makita niya ang pagbabago ng mukha nito. Alam niya ang dahilan kung bakit dahil paano niya nagawang nakapasok sa napakayamang pamilya sa ganuong klaseng background hindi ba? Ang nababagay sa isang taong mayaman katulad ni Keizer ay mayaman din at kapantay nito hindi katulad niya. Napakagat labi na lang siya. Wala siyang dahilan para magsinungaling kaya mas mainam na lang na sabihin niya ang totoo sa mga ito.

“Keizer, ni minsan ay wala kang narinig sa akin pero paano mo naman nagawang magpapasok sa pamilya natin ng ganitong klaseng babae na ang ganun ang background niya? Hindi ka ba natatakot na husgahan ng mga tao kapag nalaman nila?” tanong nito kay Keizer.

Nagyuko na lang siya ng ulo dahil sa harap harapang pangungutya sa kaniya, parang gusto na lang niyang lamunin ng mga oras na iyon. Mas lalo pang namutla ang kanyang mukha. Wala na siyang ibang gustong gawin ng mga oras na iyon kundi ang tumayo at umalis doon.

Napakuyom ang kanyang mga kamay at halos mangilid ang kanyang mga luha hanggang sa tuluyan niyang narinig ang malamig na boses ni Keizer. “Tita hindi ka ba nahihiya sa sinasabi mo? Nakalimutan mo na rin ba kung paano ka nakapasok sa pamilya namin? Isa pa, ano naman ngayon kung galing siya sa ganuong pamilya? Wala naman sa akin iyon. Idagdag pa na si lolo mismo ang pumili sa kaniya na mapangasawa ko kaya kung ano man ang sabihin ng ibang tao ay labas ka na doon. Problema ko na iyon.” tuloy tuloy na sabi nito sa malamig na tinig.

Kapansin-pansin ang kagaspangan ng pakikipag-usap ni Keizer rito. Ilang sandali pa ay hinawakan nito ang kamay niya at tumayo pagkatapos ay hinila na siya paalis doon. 

Tumayo din naman kaagad ang tiyahin ni KEizer at malakas na sumigaw. “Tumigil ka! Ganyan ka na ba kabastos ngayon?!” sigaw nito ngunit hindi ito pinansin ni Keizer at tuloy-tuloy lang sa paglalakad. 

Nilingon ni Margaret ang matanda na nasa gitna ng mesa. “Papa, tingnan niyo kung gaano siya kabastos sa akin!” reklamo niya rito kaya lang ay malakas na hinampas ng matanda ang kamay sa mesa kung saan ay isang nakakabinging tunog ang umalingawngaw.

“Pare-parehas lang kayong sakit sa ulo!” galit na bulalas nito. “Keizer tumigil ka! Dalhin mo si Bella sa taas at doon tayo mag-usap!” sabi nito dahilan para mapatigil si KEizer sa paglalakad.

Nang lumingon siya ay nakita niyang dinampot ng matanda ang tungkod nito at pagkatapos dinuro ito sa lalaking nasa tabi nito, marahil ay anak nito iyon at ang ama ni Keizer. “Kasalanan mo ang lahat kung bakit ganito ang bahay ngayon! Nagdala ka ng gulo sa pamamahay ko at ang nag-iisang apo ako ay umalis at iniwan ako ritong mag-isa kasama ninyo!” sigaw nito sa anak.

~~~

Sa study room sila pinapunta ng matanda at pareho silang nakaupo ng mga oras na iyon ni Keizer. Ang mukha ng matanda ay mas naging maaliwalas na kaysa noong nasa baba ito at mukhang mas maganda na rin ang mood. Nakangiti itong tumingin sa kaniya at pagkatapos ay inabot pa ang kamay niya upang marahang hawakan. “Hija, gusto ko ng magka apo sa inyo.” kaagad na sabi nito at halos mapaubo siya sa labis na gulat.

Hindi niya akalain na sasabihin na naman nito iyon sa kaniya. Tiningnan niya si Keizer at pinandidilatan siya nito ng mata at para bang sinasabi nito na huwag na huwag siyang magsasalita ng mga bagay na hindi dapat.

Sa halip ay si KEizer na lang ang sumagot sa sinabi ng lolo nito. “Lolo naman, dalawang araw pa lang kaming magkasama.” sabi nito.

Agad naman na nilingon ng matanda si Keizer. “Ako nga noon, nakabuo kami kaagad ng lola mo.” sabi nito.

Namula na lang ang mukha ni Bella. Hindi niya magawang ibuka ang kanyang bibig dahil baka mamaya ay kung ano lang ang maisagot niya rito. Tumikhim si KEizer at tumingin sa lolo nito. “Lolo, hindi ba kayo natatakot? Baka mamaya ay multuhin kayo ni lola dahil sa mga sinasabi ninyo.” sabi nito.

Agad naman na naging seryoso ang matanda dahil sa narinig. Ilang sandali pa ay muli itong nagtanong. “Siya nga pala hijo, binisita mo na ba ang magiging biyenan mo? Naipasa na natin ang mga requirements at dapat nang pag-usapan ang kasal.”

Natigilan si Bella nang marinig niya ang sinabi  ng matanda. Biyenan? Hindi ba ang tinutukoy nito ay ang Mama niya? Nang mabanggit nito ang tungkol sa bagay na iyon ay bigla siyang namutla. Paano ba naman ay ang akala ng kanyang pamilya ay nag-aaral siyag mabuti. Ano na lang ang magiging reaksyon ng mga ito kapag nalaman nila ang tungkol sa pagpapakasal niya? Baka pilayin siya ng mga ito! Nang maisip niya ang masungit niyang kapatid ay bigla siyang natakot at gusto nang umiyak. Naalala niya kasi na noong naging boyfriend niya ng ang ex na niya ngayon ay nagalit ito sa kaniya at halos ilang buwan din na hindi siya nito kinausap.

…